25-31 DE GENARO DE 2027
CÀNTICO 107 Geovà el ne insegna a amar
Come far amighi e come esser un bon amigo?
“Un vero amigo el ama tuto el tempo.” — PRO. 17:17.
COSSA CHE NDAREMO IMPARAR?
In questo stùdio, ndaremo imparar parché ghemo bisogno de amighi, e come far e mantegner una amicìssia.
1-2. Che dificoltà tanti i infronta?
TUTI noantri ghemo bisogno de amighi che i resta dela nostra banda nei boni e nei bruti momenti. E anca noantri se sentimo ben quando semo un bon amigo par i altri. (Ati 20:35) Ma se volemo seitar fedeli e esser felici, ghemo bisogno de amighi che anca lori i ama a Geovà e a Gesù. (Sal. 119:63) Savemo che ancoi le persone nel mondo le cata fadiga far e mantegner bone amicìssie, e fursi anca noantri pensemo cossita.
2 Cossa che ne ocore far par deventar amighi dei nostri fradei e sorele? Arquante robe che ghemo imparà nel ùltimo stùdio sora gaver una amicìssia con Geovà e con Gesù pol giutarne a deventar amighi dei nostri fradei. In questo stùdio, ndaremo parlar sora sinque robe importante che ne giutarà a far e mantegner bone amicìssie. Ma prima, ndemo veder cossa che podaria intrigarne de gaver boni amighi e cossa che podemo far par esser un bon amigo.
COSSA CHE POL INTRIGARNE DE GAVER AMIGHI?
3. Cossa ghemo de far se volemo gaver veri amighi, e cossa no ghemo mia de far?
3 Pensar sol in noantri stessi. Ancoi, tante persone le pensa sol in lore stesse e no le ghe bada ai altri. (2 Tim. 3:1, 2) Ma se pensemo sol in noantri stessi, i altri no i volarà esser nostri amighi. Alora, ghemo de imparar a gaver interesse par i nostri fradei e sorele. El apòstolo Paolo el ne ga incoraià a preocuparse nò sol con quel che noantri volemo, ma anca con quel che i altri i vol. — Fil. 2:3, 4.
4. Parché che no l’è mia bon passar massa tempo noantri soli? (2 Gioani 12) (Varda anca la stampa.)
4 Passar massa tempo noantri soli. Se restemo massa tempo noantri soli, pol esser che scominsiemo a restar ansiosi e desanimadi. Col tempo, questo pol fin rovinar la nostra amicìssia con Geovà. (Pro. 18:1) L’è vera che, dele volte, ghemo bisogno de un tempo noantri soli, ma ghemo de star atenti par no restar sempre distanti dele persone. Par esémpio, tanti i proa catar amighi nele rede sossiai. Ma anca se queste persone le ghe piase le medèsime robe che noantri, no le cognossemo tanto ben. Alora, se volemo gaver amighi de verità, ghemo de passar tempo insieme dele persone. (Ledi 2 Gioani 12.a) Quando passemo tempo insieme dele persone, podemo incoraiarse un al altro. — Ebr. 10:24, 25.
Ghemo de torse el tempo par star insieme dei nostri amighi (Varda el paràgrafo 4.)
5. Parché che l’è importante parlar ai altri come che se sentimo?
5 Arquante persone le ga paura de parlar ai altri quel che le pensa e quel che le sente. Savemo che la Bìblia no la dise che ghemo sempre de dir ai altri quel che sentimo. (Pro. 13:3; Ecl. 3:7) Ma Geovà el ne ga creà de una maniera che ne ocore parlar ai altri sora i nostri sentimenti. Alora, se mai contemo ai altri quel che sentimo e quel che pensemo, pol esser che sarà fadiga par noantri far boni amighi. Invesse, se scoliemo contar a un amigo come che se sentimo, el sarà tanto contento che se ghemo fidà in lu, e questa amicìssia pol deventar tanto forte. Gesù el ga dato un bel esémpio sora questo. Lu no’l gavea mia vergogna de dir ai so dissìpoli come che el se sentia. (Luc. 19:41; Gio. 11:35) Far cossita lo ga giutà a gaver tanti boni amighi. — Gio. 15:15.
6. Cossa che podemo far se ghemo vergogna de parlar cole persone? (Varda anca el quadro “Cossa che posso far se go vergogna de parlar coi altri?”.)
6 Tirarse indrio de parlar coi altri. Tanti i ga vergogna o i resta massa preocupadi con quel che le persone le pensa sora lori. Se anca ti te te senti cossita, prega a Geovà che el te giute a darghene fora con questa dificoltà e sfòrsate de far de acordo cola to orassion. (Fil. 2:13) Pensa anca come che te pol mostrar ai to fradei e sorele che te li ami. (Gio. 15:12) Par esémpio, prima o dopo dele riunion, te pol sforsarte par parlar con qualchedun che no te cognossi tanto ben. Te pol scominsiar cola domanda: ‘Come steto?’. E dopo, scolta con atension quel che la persona la dise.
7. Come che dele volte se sentimo, e cossa che podemo far?
7 Sentirse massa stufi par parlar cole persone. Pol esser che semo sempre drio i nostri afari e restemo pròpio strachi. Fursi pensemo che no ghemo tempo gnanca forsa par star insieme con un amigo o par giutarlo. Savemo che, dele volte, ne ocore restar noantri soli e riposar. (Ecl. 4:6) Ma anca ne ocore gaver boni amighi, e ghemo de torse tempo par far pi forte una amicìssia. Alora, anca se semo stufi e sensa voia de star insieme dei altri, ghemo de sforsarse par passar tempo coi fradei e cole sorele. Far questo ndarà giutarne a gaver bele amicìssie e ne darà forsa par seitar a servir a Geovà con alegria. — Pro. 11:25.
8. (a) Parché che ghemo de sforsarse par esser amighi de persone difarente de noantri? (b) De acordo con Filipensi 2:19-22, cossa che imparemo dela amicìssia intrà Timòteo e el apòstolo Paolo?
8 Pensar che sol poche persone podaria esser nostre amighe. Fursi no ghen’è nissuni nela nostra congregassion che gàpia la medèsima età o che ghe piase le medèsime robe che noantri. Ma pensaghe sora: Una pianta che la ze nte un vaso grando e con tanta tera la ze bona de vegner su meio. Alora, se noantri se sforsemo de deventar amighi dei altri e anca de quei che ga età e culture difarente de noantri, deventaremo persone meio. Pensa nel esémpio dela amicìssia intrà Timòteo e el apòstolo Paolo. Lori i era persone difarente, ma ancora cossita, i era boni amighi. Se anca noantri se sforsemo de far amicìssie con fradei difarenti, gavaremo tanta alegria. (Ledi Filipensi 2:19-22.b) Col aiuto de Geovà, podemo darghene fora con quel che ne intriga de gaver boni amighi.
COSSA CHE GHEMO DE FAR PAR ESSER UN BON AMIGO?
9. Cossa che ne giutarà a gaver amighi?
9 Par gaver un bon amigo, ghemo de esser un bon amigo. Par quela, ghemo de sforsarse. Adesso, ndaremo veder sinque robe che ghemo de far se volemo che i altri i sìpia nostri amighi: (1) esser leai, (2) esser grati, (3) mostrar amor, (4) perdonar e (5) esser generosi.
10. Parché che ghemo de mostrar lealtà ai nostri amighi, e come che podemo far cossita?
10 Esser leai. Geovà l’è “pien de amor leal”. (Éso. 34:6) Geovà no’l abandona i so amighi, anca quando lori i fà sbali. Alora, se volemo assar Geovà contento, anca noantri ghemo de esser leai ai nostri amighi. (Mic. 6:8) Questo vol dir che saremo dela so banda quando va tuto ben ma anca quando i ze drio infrontar dificoltà. (Pro. 18:24; Rom. 12:15) Noantri anca ndaremo parlar ai altri dele bone qualità dei nostri amighi invesse de parlar mal de lori. (Sal. 15:3) Quando semo leai ai nostri amighi, anca lori i volarà esser leai a noantri. Pol esser che i ndarà fin risciar la so vita par salvarne. — Rom. 16:3, 4.
11. (a) Parché che sempre ghemo de ringrassiar ai nostri amighi par quel che i fà? (b) De acordo con Luca 17:11-18, cossa che Gesù el ga dito quando un omo el ghe ga ringrassià, e cossa che podemo imparar de questo? (Varda anca la stampa.)
11 Mostrar che semo grati. Se volemo gaver boni amighi, l’è importante mostrar che semo grati par quel che i fà par noantri. Se no femo cossita, le persone no le volerà esser nostre amighe. Alora, quando un amigo el fà qualcossa de bon par noantri, ghemo sempre de dimostrar che ghe demo valor e ringrassiarghe. (Ledi Luca 17:11-18;c Col. 3:15) Se sempre mostremo ai nostri amighi che semo grati, la nostra amicìssia e amor par lori i deventarà sempre pi forti.
Ghemo de ringrassiar quando i altri i fà qualcossa par noantri compagno el leproso che l’è tornà par ringrassiar a Gesù (Varda el paràgrafo 11.)h
12. Cossa che podemo imparar de Geovà e de Gesù? (Gioani 11:3, 5, 33-36; 13:1)
12 Mostrar amor. Se volemo gaver boni amighi, ghemo de mostrarghe che li amemo. (2 Cor. 6:12, 13 e la nota nel versìcolo 13 nela Bìblia de Stùdio in portoghese; 1 Pie. 4:8) Noantri podemo imparar tanto dela maniera che Geovà e Gesù i ga mostrà amor par i so amighi. Pensa in quando Geovà el ga dito al so Fiol che lu lo amea. (Luc. 3:22) Anca se Gesù belche el savea de questo, lu l’è restà tanto contento quando el ga scoltà queste parole. Geovà anca el mostra amor par noantri, e questo fà che noantri lo amemo ancora de pi. (Ger. 31:3) Anca Gesù el ga mostrà amor par i so amighi. La Bìblia la dise che “lu el ga seità amarli fin el fin”. (Ledi Gioani 11:3,d 5,e 33-36;f 13:1.g) Anca i dissìpoli i ga fato compagno a Gesù. Par esémpio, el apòstolo Piero el ga dito davanti ai altri che ‘ghe volea tanto ben’ a Gesù. — Gio. 21:15-17.
13. Come che podemo mostrar ai nostri amighi che li amemo?
13 Podemo far compagno a Geovà e Gesù quando mostremo ai nostri amighi che li amemo. (Rom. 12:10; 1 Pie. 1:22) Come che podemo far cossita? No ghemo paura de dirghe che ghe volemo ben. Noantri anca podemo lodarli par le so bone qualità e giutarli de volentiera. Se ghen’è de bisogno, ndaremo anca darghe consili. (Pro. 27:9) Quando mostremo ai nostri amighi che li amemo, la nostra amicìssia con lori la resta cada volta pi forte.
14. Parché che l’è importante perdonar i nostri amighi?
14 Perdonar i nostri amighi. Se volemo che le persone le seite a esser nostre amighe, ghemo de perdonarle. L’è importante ricordarse che, cossita come Geovà no’l speta che semo perfeti, gnanca noantri ghemo de spetar che i altri i fae tuto perfeto. Fin boni amighi i pol far qualcossa che ne disgusta. (Ecl. 7:21, 22) Se questo sucede, sarà che ndaremo far compagno a Geovà e perdonar el nostro amigo? Ghemo de ricordarse che, par deventar amigo de una persona, ghe vol tanto tempo e sforso. Alora, saria tanto triste se noantri perdessino una amicìssia sol parché no se ghemo sforsà par mantegner la pace. (Rom. 14:19) Se no perdonemo i nostri amighi, podarissino deventar una persona trista che nissuni ghe piase de star darente. Invesse, se perdonemo i altri, gavaremo boni amighi che i ne ama. — Pro. 17:9.
15. Parché che ghemo de esser generosi coi nostri amighi?
15 Esser generosi. Par gaver bele amicìssie, ghemo de passar tempo coi nostri amighi, darghe atension e spartir con lori quel che ghemo. (Pro. 11:25; Luc. 6:38) Par esémpio, noantri podemo convidarli par magnar qualcossa nela nostra casa, menarli de auto in qualche posto che i ga de bisogno o scoltarli quando i ne conta come i se sente. Se femo queste robe, sempre gavaremo boni amighi.
GHEMO DE SEITAR A AMAR I NOSTRI AMIGHI
16. Parché che l’è importante gaver boni amighi?
16 Tuti noantri ghemo bisogno de boni amighi. Lori i ne giuta a esser felici e a seitar a servir a Geovà. Lori anca i ne dà consolo “tuto el tempo” anca “quando ghen’è situassion difìcile”. — Pro. 17:17; 2 Cor. 7:5-7.
17. Parché che podemo esser sicuri che gavaremo amighi par sempre? (Varda el quadro “Lori i gavea bele amicìssie”.)
17 Alora, ghemo de sforsarse par darghene fora con quel che ne intriga de gaver boni amighi e ricordarse cossa che ghemo de far par mantegner queste amicìssie. Ghemo anca de seitar a darghe valor ai amighi che belche ghemo. Semo tanto grati che Geovà el ne ga creà de una maniera che podemo far amicìssie e mantegnerle. Par quela, podemo esser sicuri che le amicìssie che ghemo con quei che i ama a Geovà le sarà par sempre!
CÀNTICO 154 El amor mai el finirà
a (2 Gioani 12) Mi go tante robe de scriverve, ma mi no vui farlo con papel e tinta. Mi son premoso de visitarve e parlar con valtri fàcia a fàcia parché la vostra alegria la sìpia completa.
b (Filipensi 2:19-22) Se el Signor Gesù el vol, vao suito mandarve Timòteo. Cossita vao esser incoraià de saver notìssie de valtri. 20 Parché no go nissun altro cola disposission compagna ala soa. Lu el ve tenderà pròpio ben. 21 Parché tuti i altri i ze drio ndar in serca dei so interessi, nò dei interessi de Gesù Cristo. 22 Ma valtri savé che lu el ga dimostrà el so valor. Come un fiol insieme so pare, lu el ga laorà come un schiavo insieme de mi nela predicassion dele bone notìssie.
c (Luca 17:11-18) Intanto che Gesù l’era drio ndar a Gerusalen, lu el ga passà intrà Samaria e Galilea. 12 Quando l’è ndà rento una pìcola cità, diése òmini con lepra i ze ndati catarlo, ma i ze restadi distante. 13 Lori i ga parlà forte: “Gesù, Istrutor, gàpia misericòrdia de noantri!” 14 Quando Gesù li ga visto, el ghe ga dito: “Ndé e mostreve ai sasserdoti.” Intanto che i era drio ndar, i ze stati curadi. 15 Quando un de lori el se ga nicorto che l’era stà curà, l’è tornà indrio e el ga lodà a Dio in alta voce. 16 Lu el se ga indenocià cola fàcia par tera davanti a Gesù e el ghe ga ringrassià. Lu l’era samaritano. 17 Gesù el ghe ga dito: “Tuti i diese i ze stati curadi, mia vera? Alora, ndove zeli i atri nove? 18 De tuti quei che i ze stati curadi sol questo omo che l’è de nantra nassion l’è tornà par lodar a Dio?”
d (Gioani 11:3) Alora, so sorele le ga mandà dir a Gesù: “Signor, quel che te ami l’è malà.”
e (Gioani 11:5) Gesù el amea Marta, la sorela de Marta e Làzaro.
f (Gioani 11:33-36) Quando Gesù el ga visto che ela e i giudei i era drio piander, lu l’è restà tanto triste e disgustà. 34 Alora, el ghe ga domandà: “Ndove lo gavé metesto?” Ela la ghe ga dito: “Signor, vien veder.” 35 E Gesù el ga scominsià a piander. 36 Par causa de questo, i giudei i ga dito: “Vardé come lu el ghe volea ben!”
g (Gioani 13:1) Vanti dela Festività dela Pàscoa, Gesù belche el savea che la era rivada la ora de assar questo mondo par tornar col Pare. Cossita come lu el ga sempre amà i so dissìpoli che i era nel mondo, lu el ga seità amarli fin el fin.
h STAMPA: El leproso el ga ringrassià Gesù parché lo gavea curà. Una sorela pi vècia la fà compagno. Ela la ringràssia un casal che la ga giutada.