Come esser contenti anca quando ghen’è dificoltà econòmiche?

Tanti servi de Dio i ze de star in posti ndove ghen’è poche oportunità de laoro o ndove le persone le ze tanto poarete. Alora, par gaver de pi soldi, arquanti i ga fato dessision sensa pensar ben cossa che podaria suceder dopo. Arquanti i ze ndati de star in altri paesi, distante de so omo o so dona e dei so fioi pìcoli, par proar gaver una vita meio. Altri i ga metesto soldi in negossi che i promete far le persone restar siore in poco tempo e con poco sforso. Ma questi negossi i ga fato la so situassion restar pedo ancora. Come che te pol far bone dessision quando ghen’è dificoltà econòmiche?

IMPARA A ESSER CONTENTO CON QUEL CHE TE GHÈ

El apòstolo Paolo el ga dito che el ga imparà “el segreto” de esser contento in tute le situassion. Lu el ga scrito: “Mi son bon de viver con poche robe e con tante robe. In tute le robe e in tute le situassion mi go imparà el segreto de esser cola pansa piena e de gaver fame, de gaver tanto e de passar par nessessità.” — Fil. 4:11, 12.

El testo el mostra che Paolo el ga bio de imparar a esser contento. Ndemo veder quatro prinsipi dela Bìblia che i ndarà giutarne a far compagno.

Prinsìpio dela Bìblia n.º 1: “La vostra maniera de viver la ga de mostrar che no amé mia i soldi. Sté contenti cole robe che valtri gavé. Parché lu el ga dito: ‘Mi mai vao assarte e mai vao abandonarte.’” — Ebr. 13:5.

Come che questo prinsìpio el te giuta? El amor ai soldi pol farte scominsiar a comparar la to situassion econòmica con quela dei altri. Quando le persone le ama i soldi, no le ga pi pace e no le ze mai contente con quel che le ga. Ma se se sforsemo par no sentir questo amor e demo valor a quel che ghemo, ndaremo sentirse contenti e in pace.

Cossa che te pol far? Invesse de consentrarte nela maniera de viver che le altre persone le ga, consentrate in quel che ti te ghè e in quel che te pol pròpio pagar. Ricordate che Geovà el promete dar le robe che ocore a quei che i mete la so adorassion in primo posto nela so vita. (Mat. 6:24, 33) Lu no’l promete mia dar queste robe a persone che le mete i soldi in primo posto nela so vita. Sìpia grato che Geovà el te dà le robe che te ocore. Paolo el ga dito: “Se ghemo de magnar e robe de vestir, semo contenti con queste robe.” — 1 Tim. 6:8.

Prinsìpio dela Bìblia n.º 2: “No gavé mai de restar ansiosi e dir: ‘Cossa che ndaremo magnar?’, ‘Cossa che ndaremo bever?’, o ‘Cossa che ndaremo vestir?’ Le persone che no le cognosse a Dio le se preocupa con queste robe. Ma el vostro Pare che l’è in cielo el sa de tuto quel che gavé de bisogno” — Mat. 6:31, 32.

Come che questo prinsìpio el te giuta? Quando se fidemo che Geovà el ne tende e el ne giuta, se preocupemo manco coi “e se”. Come par esémpio: ‘E se le robe le va pedo?’ ‘E se no sarò bon de mantegner la me fameia?’ Eric, del Gana, el se preocupea con queste robe. Ma adesso, lu no’l pensa pi cossita. Lu el dise che esser contenti con quel che se ga no vol mia dir far finta che no ghemo problemi. Invesse, vol dir che semo boni de consentrarse in quel che podemo far e che semo grati par quel che ghemo, anca se semo drio infrontar bruti problemi.

Cossa che te pol far? Prega a Geovà sora quel che te ghè de bisogno e par domandarghe sabedoria. (Tia. 1:5) Parla con bravi fradei sora quel che te sì drio passar e proa capir cossa i ga fato quando i ga bio problemi compagni. (Pro. 20:18) Stà atento a come Geovà l’è drio giutarte tuti i giorni. Questo ndarà giutarte a gaver manco ansietà sora el futuro e a consentrarte in quel che te ghè de bisogno adesso. (Mat. 6:25-30, 34) No stà mai desmentegarte dele parole del salmista Davi, che el ga dito: “Le dificoltà del giusto le ze tante, ma Geovà lo salva de tute lore.” — Sal. 34:19.

Prinsìpio dela Bìblia n.º 3: “La persona che la ga sabedoria la vede el perìcolo e la va in serca de protession, ma el bauco el va avanti e dopo el sofre.” — Pro. 27:12.

Come che questo prinsìpio el te giuta? Fursi, quando ti te ghè problemi econòmichi, te vedi anunsi e messagi nele rede sossiai sora negossi par guadagnar soldi svelto, e queste robe te par idee belìssime. Ma tante volte la situassion de quei che i ga metesto soldi in questi tipi de negossi la ze restada ancora pedo. (Pro. 18:11; 1 Tim. 6:9) La sabedoria te giutarà a restar distante de queste tràpole.

Cossa che te pol far? La Bìblia la dise: “El bauco el crede in tuto quel che i ghe dise, ma el sàbio el pensa ben vanti de far qualcossa.” (Pro. 14:15) Alora, se qualchedun el te promete che te guadagnarè tanti soldi svelto, te ghè de restar tanto atento. Peschisa ben vanti de far una dessision. Tante volte, quei che i te promete che te restarè sior fàcile i te fà far robe disoneste. Alora, stà ben atento e fà tuto quel che te pol par mai cascar in questa tentassion. — Pro. 28:6, 20; Ger. 17:9.

Prinsìpio dela Bìblia n.º 4: “Quando qualchedun el vol far su una tore, vanti el se senta e el pensa quanto el va guastar par veder se el ga i soldi par finir el laoro, mia vera?” — Luc. 14:28.

Come che questo prinsìpio el te giuta? Vanti de acetar un laoro, te ghè de pensar ben vanti, parché te pol risolver arquanti problemi ma anca gaverghene altri. Pensa ben che robe bone e che robe brute che le pol vegner fora se te aceti quel laoro. Cossita, te farè una dessision sàbia e no te gavarè de darghene fora coi problemi che i vien de far una dessision svelta.

Cossa che te pol far? Vanti de acetar un laoro che te promete tanti soldi svelto, pensaghe tanto ben. Par esémpio, se te te cambi par nantro paese, pol esser che te vè guadagnar de pi soldi, ma anca fursi te gavarè bisogno de pi soldi par mantegnerte. Anca, pensa come to sposo o to sposa e i to fioi i se sentirà se te li assi nel to paese, e come che la so amicìssia con Geovà la podarà sfredarse. Nantra roba che te ghè te pensar la ze come che restarà le robe che ti te fè par Geovà. Te pol domandarte: Sarò bon de seitar a servir a Geovà ‘de tuta la me ànima’? — Luc. 10:27.

LE BENEDISSION QUANDO SEMO CONTENTI CON QUEL CHE GHEMO

Se imparemo a esser contenti con quel che ghemo, se fidaremo ancora de pi che Geovà el ne ama e che el ne tende. (Sal. 34:8) Saremo ancora pi grati par quel che el ne dà tuti i giorni e ghe daremo ancora de pi valor ala so maniera amorosa de tenderne.

Samuel, che ghemo parlà nel scomìnsio de questo artìcolo, el ga visto che l’è pròpio cossita. Lu el ga dito: “Dopo de pregar a Geovà par domandarghe sabedoria, mi e me sposa ghemo dessidio tornar casa, tornar ai laori che gaveino prima e tender dei nostri fioi. Adesso, sempre studiemo la Bìblia con cada un de lori e li menemo ale riunion e ala predicassion. E adesso che semo consentradi nel laoro a Geovà, mi go manco ansietà. Semo pròpio contenti cola nostra dessision de tornar casa.”

No stà mai desmentegarte che servimo al “Dio felice”, e che el so spìrito santo el pol farne gaver alegria in tute le situassion. (1 Tim. 1:11; Gàl. 5:22, 23) Suito, el portarà el novo mondo, ndove ghen sarà una mùcia de robe bone par tuti. — Sal. 72:16; 145:16.