Come seitar a esser amighi dei nostri fradei e sorele?

1. Ndove podemo catar veri amighi?

IN QUESTI ùltimi giorni, la vita la pol esser tanto difìcile. Ma saria pedo ancora se no gavessino veri amighi. Geovà lo sa, par quela, lu el ne dà veri amighi intrà i so servi! (Sal. 119:63) Femo parte de una fameia de fradei che adora a Geovà e che ama un al altro.

2. Come che volemo che sìpia la nostra amicìssia coi fradei e le sorele?

² No volemo mia cognosser sol un pochetin i nostri fradei e sorele. Invesse, volemo gaver bone amicìssie con lori e esser amighi leai. Femo parte de una fameia che ama a Geovà e a Gesù, e questo amor ne fà restar unidi. (Gio. 13:35) Ma queste amicìssie coi fradei no le vien lore sole. Invesse, ghemo de sforsarse par gaverle. Come semo imperfeti, dele volte, no l’è mia fàcile seitar a esser amighi.

3. Parché pol esser fadiga seitar a esser amighi dei nostri fradei e sorele?

³ L’è vera che semo pi amighi de un per de fradei de che de altri. Parché? Parché fursi catemo che la nostra personalità e la nostra maniera de far le robe le se someia. Ma con altri pol esser fadiga seitar a esser so amighi. Dele volte, no semo mia intesi, e cossita resta fadiga mostrar amor un al altro. Fursi come la nostra maniera de far le robe e la nostra personalità le ze difarente un del altro, gnanca ne piase de passar tempo insieme. Pol esser anca fadiga seitar a esser amighi dei fradei e sorele quando i ga qualche malatia nel corpo o dela mente. Alora, in questo stùdio, ndemo veder come el esémpio de Gesù pol giutarne a seitar esser amighi dei nostri fradei e sorele quando l’è fadiga. Ma vanti, ndemo veder come mostrar le qualità de Geovà pol giutarne a seitar a esser boni amighi dei nostri fradei e sorele.

MOSTRAR LE QUALITÀ DE GEOVÀ NE GIUTA A SEITAR COLE AMICÌSSIE

4. Come che podemo far pi forte le nostre amicìssie?

⁴ Par far pi forte la nostra amicìssia coi fradei e le sorele, ghemo de ndar in serca dele so bele qualità. Una bona maniera de far cossita la ze passar tempo con lori. El apòstolo Paolo l’era premoso de passar tempo coi fradei e sorele. Lu el ga scrito ai tessalonissensi: “Ghemo fato de tuto par vederve.” (1 Tes. 2:17) Tanti i cata che discorer coi fradei e sorele la ze la meio maniera par far pi forte la amicìssia. Ghemo tante oportunità de far cossita quando ndemo ala predicassion, ale riunion, ale assemblee e ai congressi. Ma quando ghemo un problema con nantra persona, ghe volarà de pi che sol passar tempo con ela se volemo rangiar la situassion.

5. Cossa che pol giutarne a seitar cole nostre amicìssie anca quando l’è fadiga? Parla de un esémpio. (Colossensi 3:12)

⁵ Le qualità de Geovà le pol giutarne a mantegner una amicìssia quando vien fora problemi. (Ledi Colossensi 3:12.a) Quando se sforsemo par gaver umiltà, passiensa, bontà e compassion, saremo boni de darghene fora coi problemi che podarìssino gaver con un amigo. Par esémpio, el motor de un auto el ga bisogno de òio par laorar ben. Dela stessa maniera, par catarse ben coi nostri fradei e sorele, ghemo bisogno de queste qualità. Ndemo veder adesso tre dificoltà che podemo gaver coi nostri amighi. Par cada dificoltà, ndemo veder come che podemo mostrar bele qualità compagno a Gesù. Cossita, sarà pi fàcile seitar a gaver bone amicìssie.

QUANDO NO SEMO MIA INTESI

6. Parché che pol esser fadiga seitar a esser amighi quando no semo mia intesi un colaltro?

⁶ Parché che pol esser fadiga? Quando due persone no le ze mia intese, fursi cada una la ze sicura che la so maniera de pensar la ze la giusta. Proa imaginar due fradei che no i ze mia intesi sora la maniera de organisar el laoro del so grupo de predicassion. Cada un l’è sicuro che la so maniera la ze la meio. Come questo podaria deventar un problema che intrigaria la so amicìssia? Lori i podaria scominsiar a restar orgoliosi e pensar che l’è pi importante catar chi che ga la rason che seitar a esser amighi. Se lori no i se parla sora el problema par proar esser intesi, i pol fin scominsiar a restar cativi un colaltro. Col tempo, i pol assar de esser amighi. E, tuto questo pol suceder sol par causa de una pìcola robeta .

7. Cossa che Gesù el ga fato par insegnar ai so dissìpoli che la umiltà ndaria giutarli quando i gavesse idee difarente?

⁷ Impara dela umiltà de Gesù. Lu el ga insegnà ai so dissìpoli che, par lori seitar unidi quando no i fusse mia intesi, i gavea de esser ùmili. Fea tempo che i dissìpoli de Gesù i volea esser un pi importante che quelaltro. Par giutarli a cambiar la so maniera de pensar, Gesù el ghe ga dito che i gavea de veder i altri come pi importanti che lori. (Mat. 20:25-28) Alora, lu l’era drio insegnarghe come esser ùmili. Fin nela note vanti dela so morte, Gesù el ghe ga “dato el esémpio”. Con umiltà, lu el ga lavà i pié dei so dissìpoli, che l’era un laoro che i schiavi i fea. (Gio. 13:3-5, 12-16) Cossita, lu el ga mostrà come che i podaria seitar a esser amighi un del altro. Se i vedesse i altri come pi importanti che lori, saria pi fàcile acetar le so idee, anca quando le fusse difarente. Questo ndaria giutarli a esser amighi.

8. Come che la umiltà la pol giutarte a seitar a esser amigo dei fradei quando no sì mia intesi? (Colossensi 3:13) (Varda anca la stampa.)

⁸ Cossa far par seitar cole amicìssie? La umiltà la pol giutarte a no badar pìcole difarense e a perdonar i altri del tuto. (Ledi Colossensi 3:13.b) Se te sì ùmile, sarà fadiga par ti restar cativo quando te pensi difarente de nantra persona. Cossita, podé seitar a esser amighi. (Sal. 4:4) Anca se ve gavé dito brute robe un al altro, ricordeve che tuti disemo robe che dopo se ciamemo grami. (Ecl. 7:21, 22) Domandate: ‘Cossa che l’è pi importante par mi? Mostrar che go rason o seitar cola amicìssia?’ Te pol scòlier acetar la idea de quel’altra persona. Dopo, proa no pensar pi in quel che ga sucedesto e no parlar pi sora quel lì.

9. Come che la umiltà la pol giutarte se ancora no te ghè risolvesto un problema con un amigo? (Proverbi 17:9)

⁹ La umiltà la te giutarà a risolver un problema con un amigo e a no voler provar che ti te ghè la rason. (Ledi Proverbi 17:9;c 1 Cor. 6:7) Ricòrdate che el to ogetivo l’è che valtri seité a esser amighi. Tanti i ze stati boni de risolver el problema quando i ga parlà con bontà col so amigo. (Sal. 34:14) Te podarissi dir: ‘Varda, fà tanto tempo che semo amighi. Alora, podemo discorer sora quel che ga sucedesto?’ Ti te ghè de esser parecià par dirghe che anca ti te ghè la colpa, che te sè che lu l’è disgustà e par domandarghe scusa. E se el to fradel o sorela el te domanda scusa, te ghè de acetar con umiltà. (Luc. 17:3, 4) Ricòrdate sempre che quel che te vol no l’è provar chi che l’è sbalià, ma si, risolver el assunto e seitar a esser amighi. — Pro. 18:24.

QUANDO PENSEMO E FEMO LE ROBE DE MANIERE DIFARENTE

10. Parché che dele volte l’è fadiga seitar cola amicìssia?

¹⁰ Parché che pol esser fadiga? Pol esser fadiga seitar a esser boni amighi parché semo difarente un del altro. Arquanti i fà robe che ne fà fastìdio o che catemo stragne. Fursi, lori i fà robe cossita par causa dela so cultura, parché i ze stati maltratadi o slevadi nte una fameia sensa amor. Ancora altri i ze tanto animadi e ghe piase de ciacolar, e altri nò. Nantra roba che pol esser tanto difarente la ze che un el ghe piase de star in meso ala gente e quelaltro el ghe piase de restar lu lu sol.

11. Come che Gesù l’è stà bon de seitar a esser amigo de quei che i era difarenti de lu?

¹¹ Impara dela passiensa de Gesù. Gesù el ga bio amicìssie con persone che le era tanto difarente de lu. Par esémpio, i apòstoli Tiago e Gioani. Una volta, lori i ga domandà a Gesù un posto par sentarse ala so drita e ala so sanca nel so Regno. Questo ga mostrà che lori i volea esser meio dei altri. (Mar. 10:35-37) Ma Gesù l’è stà tanto ùmile quando el ga assà so posto e i so laori nel cielo par vegner ala Tera. (Fil. 2:5-8) Alora, anca se Gesù l’era tanto difarente de Tiago e Gioani, lu el ga bio passiensa con lori e anca con altri.

12. Cossa che ga giutà Gesù a esser passiente coi so amighi?

¹² Gesù no’l spetea che i so amighi sempre i fesse la roba giusta. Lu el savea che no l’era mia sol Tiago e Gioani che i se preocupea massa cola so posission. Tanti dei so dissìpoli i pensea cossita. (Mar. 9:34) Gesù l’è stà slevà nela medèsima cultura che lori. In quel tempo, i lìderi religiosi sol i dea valor a persone che le era importante in quel tempo. Alora, lu l’era bon de capir parché che i so dissìpoli i pensea de quela maniera. Fea tanti ani che lori i pensea cossita, par quela, Gesù l’è stà passiente con lori e el ghe ga dato tempo par cambiar la so maniera de pensar orgoliosa. — Mar. 10:42-45.

13. Come che la passiensa la pol giutarne a seitar cole amicìssie? (Efesi 4:2)

¹³ Cossa far par seitar cole amicìssie? Seita a esser passiente e fà el meio che te pol par acetar la maniera che i fradei e le sorele i fà le robe, anca se dele volte te fà fastìdio. (Pro. 14:29) Tuti noantri ghemo le nostre qualità e costumi e che gnanca sempre i ze difeti. Sicuro che restemo contenti se i altri i rispeta come che semo. (Ledi Efesi 4:2.d) Anca, no ghemo mia de spetar che i altri i sìpia come noantri volemo. Pensa sora el sforso che ghe vol par una persona che la ga vergogna discorer in meso dei altri. Ma anca, no stà perder la passiensa con qualchedun che ghe piase parlar tanto e star cola gente. L’è vera che no podemo mia esser amighi de tuti. Ma, ghemo de ricordarse che fin fradei e sorele con personalità tanto difarente i pol esser boni de catarse ben insieme.

14. Se semo passienti, cossa che ndaremo veder nei nostri amighi?

¹⁴ La passiensa la ndarà giutarne a veder sol le qualità dei nostri fradei e sorele. Quando femo cossita, no vedaremo le personalità difarente come una roba che ne intriga de gaver amicìssie. Par esémpio, Tiago e Gioani i volea esser cognossesti come persone importante. Ma, par Gesù, questo l’è stà una prova de che i credea che el Regno de Dio el vegnaria. Gesù el ga capio che lori i gavea fede e el ga dato valor a quel lì. Alora, quando vedemo le bele qualità dei nostri amighi, semo drio far compagno a Gesù e a Geovà.

15. Chi che pol giutarte a seitar a portar passiensa?

¹⁵ El pi importante l’è che podemo domandar a Geovà che el ne giute a seitar a esser amighi de quei che i ga una personalità diferente dela nostra. Pensa in quel che pol farte fastìdio nte una persona e prega a Geovà par lu darte la calma. Ricòrdate che Geovà el ga creà a tuti e el sa che semo difarenti un del altro. Fìdate che lu el te cognosse ben e che el te darà el aiuto che te ocore par darghene fora cola situassion. E quando te senti che no te sì bon de portar passiensa, domanda che Geovà el te giute a controlar quel che te ndarè parlar o far. — Luc. 11:13; Gàl. 5:22, 23.

QUANDO NOSTRI FRADEI E SORELE I ZE DRIO PATIR

16. Che dificoltà fursi infrontemo quando nostri fradei i ze drio patir?

¹⁶ Parché che pol esser fadiga? Quando i nostri fradei e sorele i ze drio patir de una malatia nel corpo o dela mente, lori i pol far robe che ne fà fastìdio. Par esémpio, i pol voler restar lori soli, no discorer con nissuni o far robe che gnanca no spetemo mia. Fursi lori i parle o fae robe che fin ne asse disgustadi. (Giò 6:2, 3) Come noantri, tante volte, gnanca no savemo che problemi i fradei ze drio infrontar, fursi spetemo massa de lori.

17. Cossa che te ghè imparà dela maniera che Gesù el ga tratà Bartimeo?

¹⁷ Impara dela bontà e compassion de Gesù. Lu el mostrea queste qualità anca ale persone che no’l cognossea mia. Par esémpio, podemo veder come che lu el ga tratà un omo che l’era orbo de nome Bartimeo. Quando el ga savesto che Gesù l’era lì darente, el ga scominsià a osar par Gesù vederlo. Anca se le persone le ga dito par Bartimeo taser, lu el ga seità a osar parché el volea tanto esser curà. Sarà che ghe ga fato fastìdio ale persone? Fursi si. Ma a Gesù “ghe ga fato pecà” quel omo. Questo mostra che el gavea tanta compassion par lu. (Mat. 20:34; Mar. 10:46-52) Gesù el ga parlà con bontà col omo parché el ga visto che el gavea fede, e lo ga curà.

18. Cossa te pol far par giutar i to amighi che i ze drio sofrir? (1 Tessalonissensi 5:14)

¹⁸ Cossa far par seitar cole amicìssie? Mostra bontà e compassion. Queste qualità le ndarà giutarte a parlar de una maniera che consola i to fradei e sorele che i ze drio sofrir par causa de una malatia nel corpo o dela mente. (Ledi 1 Tessalonissensi 5:14.e) Ricòrdate che el vero amigo l’è sempre pronto par giutar, ancora de pi “quando ghen’è situassion difìcile”. (Pro. 17:17) El vero amigo el resta disgustà de veder quelaltro sofrir. Ma anca, el fà tuto quel che el pol par tirarlo su, par giutarlo a restar calmo e par far altre robe che ghe ocore.

19. Come che podemo mostrar bontà e compassion? (Varda anca la stampa.)

¹⁹ Che robe podemo far par mostrar bontà e compassion? L’è vera che no podemo curar i nostri fradei e sorele, ma noantri podemo capir quel che i ze drio sentir e quel che i ze drio infrontar. (Mat. 7:12; 1 Pie. 3:8) Noantri anca podemo scoltarli con atension quando i ze drio parlar e nela ora giusta darghe consolo. (Pro. 12:25) Ghemo de star atenti par no pensar che capimo el tanto che i ze drio sofrir. (Pro. 18:13) Ghemo anca de sforsarse de portar passiensa con lori e no spetar che i sìpia perfeti. — Efe. 4:32.

20. Che amigo te vol esser?

²⁰ Noantri ghe demo tanto valor ai veri amighi che ghemo nela organisassion de Geovà. Ma tuti noantri semo imperfeti e ghemo belche passà par robe brute nela nostra vita. Par quela, dele volte parlemo o femo robe che disgusta ai altri. Ma semo tanto contenti de gaver fradei e sorele che i ze ùmili, che i ga passiensa, che i ne trata con bontà e che i desside seitar a esser nostri amighi. Alora, volemo far el meio che podemo par esser amighi dei altri.