Come che podemo gaver una forte amicìssia con Geovà e Gesù?

1. Parché che podemo esser sicuri che Geovà el vol esser nostro Amigo?

GEOVÀ el cognosse e el ama tuti quei che i vol esser so amighi. Lu el vol che tute le persone le gàpia una amicìssia con lu. Parché che podemo esser sicuri de questo? Parché lu el ne ga creà de una maniera che podemo deventar so amighi.a Lu anca el scolta le nostre orassion e el ga caro de giutarne quando ne ocore. (Sal. 139:1-4) Noantri restemo tanto contenti de saver che podemo gaver una amicìssia con Geovà e che lu el vol tanto esser nostro Amigo!

2. Parché che podemo esser sicuri che podemo gaver una amicìssia con Geovà anca se semo imperfeti?

² Quando Adon e Eva i ga desobedio a Geovà, lori i ga assà de esser so amighi. Par quela, quando le persone le nasse, no le ze amighe de Dio. (Rom. 5:10) Alora, saria fàcile pensar che mai podarissino gaver una amicìssia con Geovà. Ma ghemo de ricordarse che Gesù el ga dito che Geovà el pol far tuto quel che el vol. (Mar. 10:27) Alora, cossa che lu el ga fato par giutarne a tornar a esser so amighi? Lu el ga dato el so caro Fiol come sacrifìssio, una roba tanto fadiga par lu. (1 Gio. 4:9, 10) Gràssie a quel che Geovà e Gesù i ga fato, podemo gaver una amicìssia con lori. — Gio. 15:9, 10.

3. Parché che no ghen’è amigo compagno a Geovà?

³ No ghen’è amigo compagno a Geovà. Parché? Parché lu l’è el nostro Creador e el Tuto Poderoso. Alora, esser amigo de Geovà l’è un presente tanto grando che lu el ne ga dato. (Sal. 15:1) Par quela, in questo stùdio, ndaremo veder parché che podemo esser sicuri che Geovà el vol esser nostro Amigo, parché che lu l’è el meio Amigo che podarissino gaver e, dopo, ndaremo veder come podemo gaver una forte amicìssia con Geovà e con Gesù.

GEOVÀ EL VOL ESSER NOSTRO AMIGO

4. Cossa che fursi se domandemo?

⁴ Noantri savemo che Geovà el vol che ghemo vita eterna. (Rom. 6:23) Ma, pol esser che, par causa dei nostri sbali, se domandemo se lu el vol pròpio esser nostro Amigo. Adesso, ndemo veder cossa che pol giutarne a esser sicuri che Geovà el vol gaver una amicìssia con noantri.

5. Parché che podemo esser sicuri che Geovà el vol esser nostro Amigo? (Varda anca la stampa.)

⁵ Podemo esser sicuri che Geovà el vol esser nostro Amigo parché lu el ne ga dato so caro Fiol par salvarne. (Gio. 3:16) Pena dopo che Adon e Eva i ga desobedio a Geovà, lu el ga catà fora una maniera par salvar le persone del pecato. (Gén. 3:15) Alora, Geovà no’l ga mai assà de amar a noantri, fioi de Adon e Eva, anca se ghemo el pecato. (Ger. 31:3) Cossita, tuto quel che Geovà el ga fato mostra che lu el vol tanto esser nostro Amigo.

6. Come che Geovà el ne giuta a esser so amighi? (Tiago 4:8)

⁶ Geovà el fà de pi che sol dir che el vol esser nostro Amigo. Lu anca el ne incoraia a gaver una amicìssia con lu. (Ledi Tiago 4:8.b) Anca se semo imperfeti, lu el ne ama e el ne giuta a cognosserlo. (Gio. 6:44) Par esémpio, par meso dela Bìblia, lu el ne incoraia a parlar sempre con lu. Geovà el vol che parlemo de tuti i nostri sentimenti e pensamenti, anca quei che no volarissino contarli a nissuni. (Lam. 2:19; Fil. 4:6, 7) Dopo, lu anca el risponde ale nostre orassion. (Mat. 7:7, 8) Cossita, podemo esser sicuri che Geovà el vol esser nostro Amigo. Adesso, ndemo veder parché che lu l’è el meio Amigo che podemo gaver.

PARCHÉ CHE GEOVÀ L’È EL MEIO AMIGO CHE PODARISSINO GAVER?

7. Che qualità Geovà el mostra ai so amighi, e parché che l’è bon saver de questo? (Ésodo 34:6)

⁷ Geovà el mostra amor leal. Geovà el ama tute le persone, ma el mostra amor leal a quei che i ze so amighi. (Sal. 4:3) Parché che l’è bon saver de questo? Parché una persona che la ga amor leal la ga un sentimento tanto forte e mai la abandona quei che ela la ama. La Bìblia la parla de pi de 20 volte che Geovà el ga tanto amor leal. (Ledi Ésodo 34:6.c) Alora, dopo che Geovà el deventa nostro Amigo, lu mai el ne abandona par causa dele nostre imperfession o sbali. Invesse, lu el ne perdona e el ne giuta. — Sal. 103:11, 12.

8. Come che Geovà el ga mostrà che no’l se ga mai desmentegà de Abraon e Davi? (Varda anca la stampa.)

⁸ Geovà no’l se desmentega mai dei so amighi. Varda due esempi. Sentene de ani dopo che Abraon l’è morto, Geovà ancora lo ciamea de ‘so amigo’. (Isa. 41:8) Nantro esémpio l’è del rè Davi. Geovà el ghe gavea prometesto che el so regno el ndaria durar par sempre. (1 Cró. 17:11-17) E Geovà mai el se ga desmentegà de questa promessa. Sentene de ani dopo, Geovà el ga dito che el daria el regno de Davi a Gesù. (Luc. 1:32, 33) Alora, in 1914, Geovà el ga fato quel che el ga prometesto parché el ga scoliesto Gesù par governar come Rè del so Regno.

9. Cossa gheto imparà con quel che ga sucedesto con Ana? (Varda anca la stampa.)

⁹ Fursi te sì drio pensar: ‘Abraon e Davi i era pròpio bravi. Ma mi no go mia fato bele robe come lori.’ Se fursi te te senti cossita, varda come che Geovà el ga tratà Ana, la dona de Elcana. Ana no la era mia bona de gaver fioi, e quel’altra dona de so omo, Penina, la ghe tratea tanto mal par causa de questo. (1 Sam. 1:4-7) Fursi Ana la se domandea se Geovà l’era drio veder le dificoltà che la infrontea. Anca cossita, la ga pregà a Geovà e la ghe ga contà tuto quel che la era drio sentir. (1 Sam. 1:11, 15) E Geovà el ga mostrà a Ana che l’era el so Amigo. Lu el ga scoltà le so orassion e anca la ga benedida con un fiol che el ga bio el nome Samuel.d (1 Sam. 1:20) Dopo, Geovà anca la ga benedida con altri tre fioi e due fiole. (1 Sam. 2:21) Cossita, podemo esser sicuri che Geovà el mostra amor leal ai so amighi, anca a quei che i pensa che no i ga mia valor. — Ger. 31:3.

10. Parché che i consili de Geovà i ze i meio che ghen’è? (Salmo 119:98-100)

¹⁰ Geovà sempre el ne dà i meio consili. I consili che Geovà el ne dà ne giuta a esser pi sabi e a far bone dessision. Lu l’è la meio persona par domandar consili parché el sa de tute le robe e el vol che semo felici. (Ledi Salmo 119:98-100;e Isa. 48:17, 18) Arquanti ancoi i guasta tanti soldi par scoltar consili de persone imperfete. Ma quel che noantri ghemo l’è tanto meio parché podemo domandar aiuto a Geovà, el Dio Tuto Poderoso. I consili de Geovà i ze i meio che ghen’è, podemo domandarghe quando che ne ocore e no ne toca pagar gnente. Geovà mai el dorme, no l’è mai straco e sempre el ne scolta quando preghemo. (Sal. 121:1-4) E i so consili i ze sempre par el nostro ben. — Sal. 1:2, 3.

11. Cossa che mostra che Geovà l’è un Amigo generoso?

¹¹ Geovà l’è generoso. Lu el mostra questa qualità in tuto quel che el fà. Par esémpio, lu el ga mostrà generosità quando el ne ga dato la vita e tuto quel che ne ocore par esser felici. (Sal. 145:16; Ati 14:17) Lu anca el ne dà sabedoria par infrontar dificoltà e el ne perdona quando sbaliemo. (Tia. 1:5) E anca se semo imperfeti, Geovà el mostra che el ne ama e che noantri ghemo tanto valor par lu. El presente pi bel che Geovà el ne ga dato l’è stà la vita del so Fiol. Gràssie a questo presente, noantri podemo gaver la speransa de viver par sempre. Geovà l’è el Amigo pi poderoso che podemo gaver. Cossa che ne ocore far par esser amighi de Geovà par sempre?

COME CHE PODEMO SEITAR A GAVER UNA FORTE AMICÌSSIA CON GEOVÀ?

12. De acordo con Ebrei 11:6, cossa ne ocore far par esser amighi de Geovà?

¹² Geovà el vol che anca noantri se sforsemo par esser so amighi. (Ledi Ebrei 11:6.f) Par esser so amighi, ne ocore gaver fede in lu e creder che lu el ndarà benedirne se seitemo leai. E ghen’è anca tre robe che ne ocore far se volemo gaver una forte amicìssia con lu.

13. Cossa che vol dir gaver un grando rispeto par Geovà?

¹³ Ne ocore gaver un grando rispeto par Geovà. El Salmo 25:14 mostra che, se volemo gaver una forte amicìssia con Geovà, ne ocore gaver un grando rispeto par lu. Ma cossa che questo vol dir? Par causa del nostro grando amor par Geovà, no volaremo mai far gnente che ndarà disgustarlo. Par quela che, quando femo dessision, se sforsemo sempre de saver quel che la Bìblia la dise. (Pro. 3:5, 6) E, quando ndemo drio ai consili del nostro Amigo Geovà, femo bone dessision e seitemo a esser so amighi. Par quela, Proverbi 9:10 dise che “la prima roba par gaver sabedoria la ze gaver grando rispeto par Geovà”.

14. Come che podemo mostrar che semo leai a Geovà?

¹⁴ Ghemo de esser leai a Geovà. Cossita come Geovà l’è leal coi so amighi, lu el vol che anca noantri semo leai a lu. (2 Sam. 22:26; Pro. 3:32) Noantri mostremo che semo leai a Geovà de arquante maniere. Par esémpio, mostremo che semo leai a lu quando servirlo l’è la roba pi importante dela nostra vita, quando parlemo sora lu e dele so bele qualità ai altri e quando ndemo drio al esémpio de Gesù. (Mat. 28:19, 20) Noantri anca mostremo che semo leai se seitemo fedeli quando i nostri nemighi i ne vien contra e quando no assemo che gnente intrighe la nostra amicìssia col nostro caro Pare, Geovà.

15. Come che podemo mostrar amor leal ai altri?

¹⁵ Ghemo de mostrar amor leal ai altri. Geovà el vol che i so amighi i mostre amor leal compagno a lu. Par quela che noantri se sforsemo par seitar a mostrar amor leal ai nostri amighi. Ma come che podemo farlo? Ghemo de darghe valor a quel che lori i ga fato par noantri e seitar a amarli e giutarli. Ghemo anca de sforsarse par esser sempre bondosi e generosi con lori. Geovà el vol che noantri ‘amemo la lealtà’. (Mic. 6:8) Par quela che, nel pròssimo stùdio, ndaremo veder arquante robe che podemo far par mostrar el nostro amor ai altri. Ma adesso, ndemo veder come che podemo gaver una forte amicìssia con Gesù.

COSSA CHE PODEMO FAR PAR ESSER AMIGHI DE GESÙ?

16-17. (a) Come che savemo che Gesù el vol esser nostro amigo? (b) Parché che la nostra amicìssia con Gesù la ze difarente dela nostra amicìssia con Geovà?

¹⁶ Gesù el ga mostrà che el vol esser nostro amigo. Come? Ancora prima che noantri fussino nassesti, Gesù el ga dato la so vita par salvarne. Lu el ga dito: “Nissun el ga amor pi grando de quel che el dà la so vita par i so amighi.” (Gio. 15:13) Sicuro che questa la ze stata una maniera tanto bela de mostrar che lu el vol esser nostro amigo!

¹⁷ Gesù el convida tuti noantri a deventar so amighi. (Mat. 11:28-30; Gio. 15:15) Ma la nostra amicìssia con Gesù la ze difarente dela nostra amicìssia con Geovà. Come cossita? Noantri no preghemo a Gesù e gnanca lo adoremo. (Mat. 4:10; 6:9) Ma come ghe demo valor a tuto quel che el ga fato par noantri, volemo gaver una amicìssia con lu.

18. Cossa che Gesù el fà par noantri?

¹⁸ Gesù l’è un bon amigo par noantri parché lu el ne giuta de tante maniere. Par esémpio, el profeta Isaia el ga dito che Gesù el saria un “Maraveioso Consiliero”, “Pare Eterno” e “Prìnsipe dela Pace”. (Isa. 9:6) Ma cossa che questo vol dir? Come nostro “Maraveioso Consiliero”, Gesù el ne dà bei consili che i pol salvar la nostra vita. Quando la Bìblia la dise che Gesù l’è el nostro “Pare Eterno”, vol dir che lu el ga el poder de dar a tuti vita eterna nela Tera. (Gio. 11:25, 26) Gesù anca el capisse tuto quel che sentimo parché “l’è stà provà de tute le maniere”. (Ebr. 4:15) E come “Prìnsipe dela Pace”, Gesù el ne giuta a gaver una amicìssia con Geovà e a esser in pace con Lu. Sicuro che Gesù l’è un amigo tanto bon par noantri!

19. Cossa ghemo de far par esser amighi de Gesù? (Gioani 15:14) (Varda anca la stampa.)

¹⁹ Cossa che noantri ghemo de far par esser amighi de Gesù? (1 Pie. 1:8) Noantri ghemo de studiar ben i Vangeli par imparar sora quel che Gesù el ga fato e quel che el ga dito. E quando ndemo far una dessision, ghemo de ndar drio ai so consili e al so esémpio. Noantri anca volemo rispetar la so autorità e obedir ale so orientassion. (Ledi Gioani 15:14.g) Par esémpio, savemo che Gesù el dopera i ansiani par tender dele congregassion. Alora, quando lori i ne dà orientassion, volemo obedirghe. (Efe. 4:8; Ebr. 13:17) E se ricevemo un laoro par far nela congregassion, volemo sforsarse de farlo ben. Gesù el vede quel che semo drio far e el dà valor al nostro sforso de esser so amighi.

20. Come che te te senti de saver che te pol esser amigo de Geovà e de Gesù?

²⁰ L’è tanto bel saver che podemo esser amighi del nostro Dio, Geovà, e del so Fiol, Gesù Cristo! Geovà l’è el nostro meio Amigo parché el ne ama, el scolta le nostre orassion e el ne risponde. Geovà e Gesù sempre i ne dà quel che ne ocore par seitar a esser so amighi. (Mat. 5:3) Sicuro che ghe demo tanto valor ala amicìssia che ghemo con lori. Volemo esser leai ai nostri amighi par sempre!