Boni amighi i te giuta a seitar a esser leal a Geovà

1. Cossa che tanti i pensa sora gaver amighi?

COME Testimònie de Geovà, noantri savemo che ne ocore seitar leai. Ma, dele volte, pol esser tanto fadiga parché vivemo nte un mondo ndove le persone le fà tante robe che disgusta a Geovà. Alora, ne ocore sforsarse tanto par no ndarghe drio. Par esémpio, tanti i pensa che la roba pi importante la ze gaver tanti amighi, anca se no i ze de fidarse. Altri i pensa che sol i pol domandar aiuto e consili a quei che i ga la medèsima età che lori. E arquanti anca i pensa che no i ga bisogno de amighi. Ma cossa che Geovà e Gesù i pensa sora gaver amighi?

2. (a) Che tipo de amighi Gesù el gavea? (b) De acordo con Eclesiasti 4:9-12, cossa che un bon amigo el fà?

² Geovà el vol che te gàpia amighi che i te giuta a seitar leal a lu. Gesù el ga sempre scoliesto amighi cossita. Par esémpio, lu el vedea i so apòstoli come veri amighi, nò sol come dissìpoli. Lu el ga dito: “Sì stati valtri che sì restadi dela me banda nele me provassion.” (Luc. 22:28; Gio. 15:15) Alora, cossa che un bon amigo el fà? Lu el resta dela to banda, nò sol quando va tuto ben, ma anca quando te infronti “situassion difìcile”. (Pro. 17:17) Un bon amigo el te giuta a far quel che l’è giusto e el te consola quando te sì desanimà.a (Ledi Eclesiasti 4:9-12.b) Un bon amigo anca el te giuta a seitar leal a Geovà quando l’è fadiga. E, quando laoré insieme par Geovà, podé far bele robe che mai gavé pensà de far prima e de gaver una bela amicìssia par tuta la to vita.

3. Cossa che ndaremo veder in questo stùdio?

³ Se te sì un gióveno, come boni amighi i pol giutarte a seitar a esser leal a Geovà? Come che i to genitori e altri bravi fradei i pol esser un bon esémpio par ti? Par risponder a queste domande, ndaremo studiar un pochetin sora el esémpio de Daniel e veder come che lu l’è stà bon de darghene fora cole dificoltà. Noantri anca ndaremo veder come che Geovà, che l’era el meio Amigo de Daniel, lo ga giutà anca quando l’era lu lu sol.

BONI AMIGHI I TE GIUTA A SCÒLIER SERVIR A GEOVÀ

4. Che dificoltà Daniel el ga infrontà quando l’era gióveno?

⁴ Daniel el ga vivesto nte una època tanto fadiga par i servi de Geovà. Parché? Tanti israeliti che i vivea in Giudà i se gavea fermà de obedir a Geovà. Par quela, nel ano 620 vanti de Cristo, Geovà el ga assà che Nabucodonosor, che l’era el rè de Babilònia, el governesse quela tera. (Dan. 1:2) Alora Daniel, che l’era ancora gióveno, l’è stà menà par Babilònia par laorar par el rè. (Dan. 1:3-6) Cossita, Daniel l’è restà distante dela so casa e dela so fameia.

5-6. Chi fursi ga giutà Daniel a scòlier servir a Geovà?

⁵ Daniel el ga infrontà tante dificoltà in Babilònia, ma la Bìblia la dise che lu “el ga dessidio nel so cuor” obedir a Geovà. (Dan. 1:8) Cossa che lo ga giutà? Sicuro che qualchedun ghe gavea insegnà sora le lege de Geovà e lo gavea giutà a dessider servirlo. Pol esser che sìpia stà i so genitori che lo gavea giutà. Parché che podemo dirlo? El nome de Daniel vol dir “Dio l’è el me Giuis”. Questo el mostra che i so genitori i volea che Daniel el servisse a Geovà. — Deu. 6:6, 7.

⁶ Pol esser che Daniel anca el ga imparà tanto col esémpio de Geremia. Parché che podemo dirlo? Nel ano 647 vanti de Cristo, Geovà el scoliesto Geremia par esser profeta. (Ger. 1:2) Tante volte, lu el ndea fin el rè de Giudà e a altre fameie importante par parlar sora el so messàgio. E pol esser che intrà queste fameie ghen’era la fameia de Daniel. (Ger. 1:17, 18; Dan. 1:3, 6) L’è vera che no savemo se Daniel e Geremia i era pròpio amighi. Ma savemo che, de gióveno, Daniel el cognossea le so professie. Anca quando l’era vècio, lu ancora el ledea sora le parole de Geremia. (Ger. 25:11; 29:10; Dan. 9:1, 2) Sicuro che el bel esémpio de coraio e lealtà de Geremia el ga giutà Daniel a far quel che l’è giusto, anca se le persone intorno no lo fea.

7-8. Come che i genitori e altri bravi fradei i pol giutar i gióveni a seitar leai a Geovà?

⁷ Podemo esser sicuri che i genitori de Daniel, el profeta Geremia e altri bravi servi de Geovà i ze stati un bel esémpio par lu e lo ga giutà a seitar leal. Lori lo ga giutà a gaver una forte amicìssia con Geovà.

⁸ Anca i genitori ancoi i pol giutar i so fioi a gaver una forte amicìssia con Geovà. Come? Se te sì pare o mare, domandate: ‘Sarà che i me fioi i sa cossa far se i ghe domanda de cantar la mùsica del paese davanti la bandiera? Lori i sa cossa far se i coleghi dela scola i vol che i fae qualcossa de sbalià? Cossa che i ndarà far se ghe vien fora qualcossa de sbalià nela internet? Lori i ze pareciadi par seitar leai nela granda tribolassion?’ Giuta i to fioi a amar cada volta de pi a Geovà e a fidarse del tuto in lu. Ma come che te pol far questo? Discori con lori sora Geovà, giùtali a far comentari nele riunion e predica insieme de lori. Cossita come Geremia l’è stà un bel esémpio par Daniel, fradei che i ga una forte amicìssia con Geovà e che i seita leai i pol esser un bel esémpio par i gióveni. Alora, passa tempo insieme dei gióveni e deventa so amigo.

BONI AMIGHI I TE GIUTA A FAR QUEL CHE L’È GIUSTO

9. Parché che Daniel e altri gióveni ebrei i gavea de star atenti in Babilònia?

⁹ Quando Daniel e altri gióveni ebrei i ze stati menadi par Babilònia, lori i ga infrontà dificoltà che no i gavea mai infrontà casa. Par esémpio, quei de Babilònia i volea che i scominsiesse a pensar compagno a lori e i ndesse drio ai so costumi. Lori anca i ndaria pareciar questi gióveni par laorar par el rè. Alora, Daniel e i altri gióveni ebrei i gavea de star atenti par restar leai a Geovà intanto che i era là.

10. Quala che la ze stata la prima dificoltà che i gióveni ebrei i ga infrontà?

¹⁰ Una dele prime dificoltà che quei gióveni ebrei i ga infrontà fursi parea una roba che no la era tanto importante. El rè el ga mandà che Daniel e altri gióveni i magnesse quel che lu el magnea. Ma, lì ghen’era magnar che la Lege mosaica la disea che l’era impuro. (Dan. 1:5, 8) Quei gióveni i podaria gaver pensà: ‘No ne ocore preocuparse tanto con questo parché semo stati menadi qua e ne toca far quel che el rè el dise. Se no ghe obedimo, lu el va restar inrabià e el va farne tribolar.’ Cossa che questi gióveni i ga fato?

11. Come che Daniel e so amighi i ga giutà un al altro? (Varda anca la stampa.)

¹¹ Tanti gióveni de Giudà i ze stati pareciadi par laorar par el rè in Babilònia. Ma la Bìblia la parla sol de quatro gióveni che i ze restadi leai, che i era Daniel, Anania, Misael e Azaria. Questi quatro amighi i ga giutà un al altro a darghene fora cole dificoltà e a seitar a far quel che l’è giusto. Lori no i ga acetà el magnar che el rè el volea darghe e i ga mostrà che i era leai. Par quela, Geovà l’è restà tanto contento e li ga sempre benedidi. — Dan. 1:6-12, 17.

12. Cossa pol giutarte a seitar a far quel che l’è giusto?

¹² Dele volte, i altri i vol che te fae qualcossa che te sè che la ze sbaliada? Alora, cossita come Daniel, gàpia amighi che i te giuta a far quel che l’è giusto e a no ndarghe drio a quel che le persone del mondo le fà. (1 Gio. 2:15-17) Boni amighi i pol giutarte a seitar leal anca nele “pìcole robe”, a far Geovà contento e a ricever le so benedission. (Luc. 16:10) Se te sì bon de obedir a Geovà in queste “pìcole robe”, te pol esser sicuro che te sarè bon de restar leal anca quando te infronti situassion pi fadiga nela vita.

VERI AMIGHI I TE GIUTA A DARGHENE FORA CON DIFICOLTÀ PRÒPIO BRUTE

13. Che bruta dificoltà Daniel e so amighi i ga infrontà?

¹³ Boni amighi i pol giutar un al altro a darghene fora con dificoltà pròpio brute. Varda quel che ga sucedesto con Daniel e so amighi quando el rè Nabucodonosor l’è restà tanto spaurà con una roba che el se gavea insognà. El rè el volea saver cossa che volea dir quel insogno. Alora, lu el ga mandà ciamar i sabi e i strioni che ghen’era in Babilònia. Ma, invesse de contarghe quel che el se gavea insognà, lu el ga domandà che quei sabi lo contesse e dopo ghe spieghesse cossa volea dir. Una roba che un umano no’l saria bon de farlo lu sol! (Dan. 2:3, 9-11) El rè el ga dito che, se i sabi no i fusse boni de contarghelo, i saria tuti copadi. Intrà questi sabi, ghen’era anca Daniel e so amighi. Alora, cossa che lori i ga fato?

14. Come che Daniel e so amighi i ga giutà un al altro? (Varda anca la stampa.)

¹⁴ Daniel el ga domandà che el rè el ghe desse tempo par capir quel insogno. Dopo, Daniel l’è ndato fin so amighi par domandar che ‘i preghesse che Dio el ghe mostresse misericòrdia’, che lo giutesse a capir el insogno del rè e che ‘no i fusse finidi fora’. (Dan. 2:18) Geovà el ga scoltà la orassion de quei gióveni e el ga giutà Daniel a saver cossa che Nabucodonosor el se gavea insognà e cossa che volea dir. Cossita, Daniel e so amighi no i ze stati copadi, e el rè el ghe ga dato laori tanto importanti in Babilònia. — Dan. 2:19, 47-49.

15. Che bele robe podemo imparar dela stòria de Daniel e so amighi? (Gàlati 6:2)

¹⁵ La stòria de Daniel e so amighi pol insegnarne tante bele robe. Prima, ricòrdate che no te ocore infrontar dificoltà ti ti sol. No stà mai assar che el orgòlio o la vergogna te intrighe de domandar aiuto ai altri. Seconda, domanda che i altri i preghe par ti sora la dificoltà che te sì drio infrontar. (2 Cor. 1:11) E pensa nele bele maniere che Geovà el pol risponder ale orassion che ti e i altri i fà. Lu el pol giutarte a infrontar dificoltà che te pensei che no te sarissi mai bon de darghene fora. (Sal. 65:2; Efe. 3:20) Quando te ghè amighi che i serve a Geovà, te pol esser sicuro che lori te giutarà e i te darà forsa par infrontar tute le provassion. — Ledi Gàlati 6:2.c

EL TO AMIGO GEOVÀ L’È SEMPRE DELA TO BANDA

16. Che bruta dificoltà Daniel el ga infrontà quando l’era belche vècio?

¹⁶ Geovà l’è un Amigo che el ndarà sempre giutarte, anca se te par che te sì ti sol. Varda nantra dificoltà che Daniel el ga infrontà. Quando lu el gavea de pi de 90 ani, el rè Dario el ga scominsià a governar Babilònia. Arquante persone che le laorea par el novo rè le gavea invìdia de Daniel parché el gavea un laoro importante e le volea coparlo. Par quela, lore le ga dito al rè de far una lege che la disea che le persone no le podea pregar a nissuni, sol al rè. Ma Daniel no’l se ga fermà de pregar a Geovà. Cossita, lu l’è stà trato rento el buso dei leoni. Parea che Daniel no’l gavea gnanca un amigo che podea giutarlo a darghene fora con quel bruto colpo. Ma sarà che Daniel l’era pròpio lu lu sol? — Dan. 6:4-16.

17. De acordo con Daniel 6:19-23, cossa che ga giutà Daniel quando la so vita la era in perìcolo?

¹⁷ Geovà, el Amigo pi poderoso che una persona la pol gaver, el ga salvà Daniel dei leoni. (Ledi Daniel 6:19-23.d) Quando Daniel l’è vegnesto fora del buso, lu el ga dito al rè: “Dio el me ga mandà el so àngelo e el ga serà su la boca dei leoni, . . . parché Dio el sa che no go fato gnente de sbalià.” (Dan. 6:22) Anca quando Daniel l’era in perìcolo, lu el ga bio coraio parché el se ga fidà del tuto in Geovà, el so meio Amigo.

18. (a) Parché che l’è importante esser amigo de Dio? (b) Come che te pol far pi forte la to amicìssia con Geovà? (Varda anca la stampa e el quadro “Geovà l’è el nostro Pare, nostro Dio e el nostro Amigo”.)

¹⁸ Te te ghè belche sentio ti ti sol parché te eri distante dei to amighi e dela to fameia? Fursi te sì ndato de star in nantro posto, te sì straco par causa de una malatia o te sì in preson par causa dela to fede. In situassion cossita, fursi te pensi che no ghen’è nissuni che te pol discorer o domandar aiuto. Ma no stà mai desmentegarte che i amighi de Geovà mai i ze lori soli. Geovà el sa quel che te sì drio infrontar e el va proteger e tenderte, no importa ndove te sì. (Sal. 139:7-10) Alora, fìdate del tuto in Geovà.

TE GAVARÈ AMIGHI PAR SEMPRE

19. Parché ne ocore gaver boni amighi ancoi? (1 Tessalonissensi 5:2, 11)

¹⁹ L’è tanto importante gaver amighi ancoi. Parché? La Bìblia la mostra che semo drio viver nei ùltimi giorni de questo mondo e che presto el “giorno de Geovà” el rivarà. Alora, questi amighi pol incoraiarne e giutarne a far bone dessision. (Ledi 1 Tessalonissensi 5:2,e 11.f) El apòstolo Piero el ga parlà sora el tempo che semo drio viver e el ga scrito: “Gàpie grando amor un par el altro.” — 1 Pie. 4:7, 8.

20. Che tipi de amighi te vol gaver, e cossa sucederà se te scoli boni amighi?

²⁰ Boni amighi i ze presenti de Geovà che ne ocore tanto. Alora, fà compagno a Daniel e gàpia amighi che i pol giutarte e insegnarte bele robe. Passa tempo insieme de amighi che, cossita come Geremia, i te giuta a seitar leal a Geovà. Domanda ai to amighi che i preghe par ti quando te sì drio infrontar una bruta dificoltà. E no stà mai desmentegarte che el to meio Amigo Geovà mai el ndarà abandonarte. (Ebr. 13:5) Se noantri ghemo el aiuto de Geovà, saremo boni de seitar leai a lu e de gaver bele amicìssie par sempre.