Khawvêl Indopui A Thleng Mai Ang Em?—Bible-in Eng Nge A Sawi?

Kum 30 kal ta chhûng khân, mi tam tak chuan khawvêla ramte inkâra inlaichînna chu a nghetin a ṭha chho zêl niin an ngai a. Mahse, tûn hnaia thilthlengte aṭang chuan chutiang chu a ni lo niin a lang.

• “Israel leh Hezbollah pâwlte chu Lebanon ramrîa an inkah avângin Gaza-a thleng indona hi a kângkai zêl ang tih a hlauhthâwnawm hle.”—Reuters, January 6, 2024.

• “A thununna hnuaia awm pâwlte’n hmun hrang hrang an beih bâkah, Iran chuan thâwklehkhatah a nuclear program chu a thar thawh leh a. Chu bâkah, Russia leh China a ṭanrualpui avângin khawthlang lam ramte tâna hlauhawm a ni thei.”—The New York Times, January 7, 2024.

• “Russia beihna chuan Ukraine ram pumpuiah chhiatna a thlen chhunzawm zêl.”—UN News, January 11, 2024.

• “China ram sum leh pai dinhmun leh sipai chakna ṭhan chhoh zêlna, Taiwan-in nasa lehzuala a ram leh hnam a chhuanpuina leh, Beijing leh Washington inkâra inlaichînna ṭhat lohnate chuan awlsam takin harsatna lian tak a thlentîr thei.”—The Japan Times, January 9, 2024.

Tûna khawvêl dinhmun derthâwng tak chungchângah hian Bible-in sawi a nei em? Hei hian khawvêl indopui a thlentîr ang em?

Bible-in tûna thilthlengte hi a hrilh lâwk

Bible chuan tûna thleng mêk indona eng emaw ber chungchâng chu hrilh lâwk lo mah se, indonate chu hmun hrang hranga thlengin ‘lei ata inremna a la bo’ vang tih erawh a sawi lâwk a ni.—Thu Puan 6:4.

Daniela bu chuan “tâwpna hunah” khawvêl thuneitute chu chak zâwk nih tumin an ‘innawr,’ a nih loh leh an inbeih tûr thu a hrilh lâwk a. Chu inbeihnaah chuan sipai chakna ropui tak leh “rangkachak leh tangkaraw dah khâwmte,” a nih loh leh sum leh paite hman a ni dâwn a ni.—Daniela 11:40, 42, 43.

Indona lo awm tûr chu

Bible chuan khawvêl dinhmunin ṭhat lam a pan hmain chhiat lam a pan zêl tûr thu a sawi a. Isua chuan ‘hrehawm nasa tak, leilung pian tirh ata tûn thlenga la awm ngai lo’ chu a awm ang tih a hrilh lâwk a ni. (Matthaia 24:21) Chu “hrehawm nasa tak” chu ‘Pathian Engkimtitheia ni ropuia indona’ tia koh, Armageddon indonaah a vâwrtâwp a thleng ang.—Thu Puan 16:14, 16.

Mahse, Armageddon chuan mihringte chu tiboral vek lovin a chhanhim zâwk dâwn a. Pathianin chu indona hmang chuan chhiatna tam tak thlentu indonate awmtîrtu mihring rorêlna chu a titâwp ang. Armageddon-in chatuana remna a awmtîr dân tûr hriat nân, hêng thuziakte hi chhiar ang che:

• “Armageddon Indona Chu Eng Nge?”

• “Armageddon Chu Chanchin Ṭha A Ni”