Indona Atân Trillion Têl Hman Ral A Ni—Hman Ral Tak Tak Chu Eng Nge Ni?

Indona atâna hman ral zât chu nasa tak a ni.

• “Nikum khân, khawvêl puma indona atâna sênso hman ral zât chu $2.2 trillion a ni a, chu chu kum dang zawng aiin a nasa.”—The Washington Post, February 13, 2024.

Sênso hman ral zîngah chuan sum leh pai bâkah, thil dang tam tak pawh a tel a. Entîrna pakhat chauh hi han ngaihtuah teh: Ukraine rama indona.

• Sipaite. Mi ṭhenkhat chuan kum hnih kal taa a inṭan aṭangin indonaah sipai 500,000 dâwn laiin nunna an chân, a nih loh leh hliam an tuar niin an chhût a ni.

• Mipuite. United Nations sawi dân chuan, mipui 28,000 aia tamin nunna an chân, a nih loh leh hliam an tuar a. Mahse, senior UN official pakhat chuan: “He indona râpthlâk taka mipui thi zât chiah chu chiang taka sawi theih a ni lo,” tiin a sawi.a

Indona avâng leh khawvêl buaina avânga hrehawm tuarte chu sawi sên rual a ni lo.

• 114 million. Hei hi kum 2023, September thlaa chhinchhiah dâna khawvêl puma indona leh tharum thawhna avânga mahni in leh lo chhuahsan zât a ni.

• 783 million. Hei hi ṭâm rêng rênga awm ṭhînte zât a ni a. “Ṭâm awm chhan ber chu indona vâng a ni a, khawvêla ṭâm rêng rênga awm ṭhîn za zêla 70-te hi indona leh tharum thawhna hmuna awmte an ni.”—World Food Programme.

Indona hi a tâwp ngai ang em? Remna hi kan beisei thei ang em? Retheihna awm tawh hun leh mi tinte’n ei leh bâr hnianghnâr tak an neih hun chu a awm ngai ang em? Bible-in eng nge a sawi?

Indo hun

Bible chuan entîr nei sakawr chunga chuang târ langin, khawvêl pumah indona a awm tûr thu a lo sawi lâwk a ni.

• “Tichuan, sakawr dang, a sen mi, a lo chhuak leh a; tin, a chunga chuang hnênah chuan lei ata inremna lâksak theihna leh mi inthahtîr theihna an pe a; tin, a hnênah khandaih lianpui an pe bawk a.”—Thu Puan 6:4.

Entîr nei chu sakawr chung chuang chu sakawr chung chuang dang pahnihin an rawn zui a, chu chuan hri leh chhiatna dangte avânga khawvêl pum huap ṭâmna leh thihna a entîr a ni. (Thu Puan 6:5-8) Chu Bible hrilh lâwkna leh chûng thilte tûn kan huna a thlen famkim chhan hriat belh nân, he thuziak “Sakawr Chungchuang Palite—Tute Nge An Nih?” tih hi chhiar ang che.

Remna lo awm tûr

Nakin lawkah chuan, leilung hausaknate hi indona atâna hmang a ni leh tawh ngai lo vang. Mahse, chu chu mihringte thawhrimna avânga awm a ni lo vang. Bible chuan heti hian a sawi a:

• [Pathian] chuan indonate chu kâwlkil thlengin a tireh ṭhîn.”—Sâm 46:9.

• Pathian chuan indona sawhkhâwk râpthlâk tak takte chu a nuai bo vang. “An mit ata mittui zawng zawng a hrufai ang a; thihna a awm leh thei tawh lo vang a, lungngaih te, ṭah te, nat te pawh a awm leh tawh hek lo vang; thil hmasate chu a ral ta.”—Thu Puan 21:4.

• Pathian chuan mi zawng zawng tân remna tluangtling a awm tîr ang. “Ka mite chu râlmuanga awmnaah leh, in nghet takahte leh chawlhna hmun muanawm takahte chuan an awm tawh ang.”—Isaia 32:18.

Bible hrilh lâwk angin, tûn laia kan hmuh indonate leh thilthleng dangte hian chu remna lo awm tûr chu a hnai tawh hle tih a târ lang.

Engtin nge Pathianin chu remna lo awm tûr chu a rawn thlentîr ang? A vân lam sawrkâr, a nih loh leh Lalram hmangin a ni ang. (Matthaia 6:10) Chu Lalram chu eng nge a nih a, i tân eng awmzia nge a neih tih hriat nân, he video tâwi Pathian Ram Chu Eng Nge Ni? tih hi en ang che.