Mite’n Politician-te Chu An Ring Tawh Lo—Bible-in Eng Nge A Sawi?

Kum 2024 hi khawvêl puma neih tawh azawnga inthlanna (election) neih tam ber kum a ni. Mahse, mi tam takin politician-te chu an ring zo tawh lo a ni.

• America rama ngaih dân lâkna a tam zâwk chuan “politician a tam zâwkte hi” mipui vângtlâng tâna rawng an bâwl duh vâng ni lovin, “mahni hmasialna an neih vâng a ni,” tih a târ lang.a—Pew Research Center, September 19, 2023.

Ṭhalai tam tak pawhin politician-te chu an ring zo tawh lo bawk.

• “Tûn laia ṭhalaite chuan buaina khirh tak takte chinfel dân chu an ngaihven hle a; mahse, politician-te chuan a chinfel dân an hre lo tih ngaih dân lâknaah an sawi chhuak.”—The New York Times, January 29, 2024.

• “Ngaih dân lâkna pakhat chuan ṭhalaite hian politician-te aiin YouTuber-te hi an ring tawh zâwk tih a sawi.”—The Korea Times, January 22, 2024.

Nakin hun ṭha zâwk siam tûrin politician-te hi kan ring ngam ang em? Tu nge kan rinchhan theih?

I mi rin tûrah fîmkhur rawh

Mite hian tu chungah nge rinna an nghah dâwn tih chungchângah an fîmkhur a ṭha a. Bible chuan “mi mâwl chuan thu tin a ring a, mi remhria erawh chuan a kalna a en ṭha ṭhîn,” tiin a sawi.—Thufingte 14:15.

• I thu dawnte a dik leh dik loh i enfiah theih dân chungchânga thurâwn ṭangkai takte i hmuh theih nân, he thuziak “Chanchin Dik Lo Lakah Invêng Rawh,” tih hi chhiar ang che.

Chu bâkah, thinlung ṭha tak leh theih tâwp chhuah duhtu politician-te pawh an thiltihtheihnain chin tâwk a nei a. Chuvângin, Bible chuan heti hian min vaukhân a ni:

• “Mi liante chu ring suh ula, mihring fapa, ṭanpuina rêng rêng awm lohna chu, ring hek suh u.”—Sâm 146:3.

I rinchhan theih hruaitu

Bible chuan Pathianin thiltithei ber leh rinchhan tlâk ber hruaitu a ruat tawh tih min hrilh a, chu chu Isua Krista a ni. (Luka 1:32, 33) Isua chu vân aṭanga rorêl tûr sawrkâr, Pathian Lalrama Lalber a ni.—Matthaia 6:10.

• Isua i rinchhan theih chhan leh kan hmachhawn harsatnate a chinfel dân tûr chu hriat belh tum rawh. Hêng thuziak “Pathian Rama Lal Chu Tu Nge Ni?” tih leh “Pathian Ramin Eng Nge A Hlen Chhuah Ang?” tihte hi chhiar ang che.