Engtikah Nge Indona A Tâwp Ang?—⁠Bible-in Eng Nge A Sawi?

Kum 2024, April 3, Inrinnîa Iranin Israel a beih chungchângah United Nations Secretary-General António Guterres-a chuan “Tûn hi dinhmun tihsosân hun ni lovin, tihdaih hun a ni. Tûn hi insûmtheihna lantîr hun a ni,” tiin a sawi.

Middle East-a indona awm mêk hi khawvêl puma thilthlengte zînga pakhat mai a ni.

“Khawvêl Indopui Pahnihna aṭanga thleng tawh zawng aia nasain tûn lai khawvêlah hian tharum thawhna avânga buaina a thleng mêk a, chu chuan mihring tluklehdingawn 2—pali zêla pakhat vêl—te chungah nghawng a nei a ni.”—United Nations Security Council, January 26, 2023.

Tharum thawhna avânga buaina thlengte zîngah chuan Israel, Gaza, Syria, Azerbaijan, Ukraine, Sudan, Ethiopia, Niger, Myanmar leh, Haitia te an tel a ni.

Engtikah nge indona a tâwp ang? Khawvêl hruaitute hian remna an thlen thei ang em? Bible-in eng nge a sawi?

Indonaa khat khawvêl

Tûn lai khawvêl buainate hian indona zawng zawng tâwpna a hnaih tawhzia a târ lang a. Hêng indonate hian kan tûn lai hun chungchânga Bible sawi lâwk chu a tithleng famkim a ni. Bible-in chu chu ‘khawvêl tâwpna,’ tiin a sawi.—Matthaia 24:3.

• “Indo thâwmte leh indo thuthangte in hre bawk ang. . . . Hnam hrang leh hnam hrang an indo vang a, ram hrang leh ram hrang an indo vang.”—Matthaia 24:6, 7.

Tûn laia indonate’n Bible hrilh lâwkna a tihthlen famkimtîr dân hriat nân, he thuziak ““‘Ni Hnuhnûng’ A Nih Loh Leh ‘Tâwpna Hun’ Chhinchhiahna Chu Eng Nge Ni?” tih hi chhiar ang che.

Indona zawng zawng titâwptu tûr indona

Bible chuan mihringte buaina tâwp hun chungchâng a sawi lâwk a. Engtin nge chu chu a rawn thlen ang? Mihringte hma lâkna hmangin a ni lo va, ‘Pathian Engkimtitheia ni ropuia indona’ Armageddon hmangin a ni ang. (Thu Puan 16:14, 16) Chu indona chuan remna tluantling chên tûra mihringte tâna Pathian thutiam thleng famkim tûrin kawng a hawng ang.—Sâm 37:10, 11, 29.

Indona zawng zawng titâwptu tûr Pathian indona chungchâng hriat belh nân, he thuziak “Armageddon Indona Chu Eng Nge?” tih hi chhiar ang che.