Solomona thuziak chuan Pathian Jehova betute chunga thilthleng theite a târ lang a. Ani chuan sual lian tak tihnaa a inhnamhnawih hnuah chutiang thil chu “a thleng nghâl” mai niin a hre thei a. A nih loh leh, “chutiang thil chu ka beisei loh takin a thleng,” tiin a sawi thei a ni. Mahse, thil thlen dân dik tak ngun taka a ngaihtuah chuan, thil sual lian tak a tih hmain thu tlûkna âtthlâk tak a lo siam tawh tih a hre ngei ang. Chûng zîngah chuan ṭhian sual kawm te, intihhlimna ṭha lo en te, a nih loh leh intihhlimna hmun ṭha lo chu a takin emaw, online aṭangin emaw ente a tel thei a ni. Ṭawngṭai te, Bible chhiar te a bansanin, inkhâwmnaah leh thu hrilh rawngbâwlnaah a tel tawh lo pawh a ni thei. Thufingte bu-a târ lan tlangvâl ang bawkin, thil sual a tih chu tihpalh thil thua “thleng nghâl” mai a nih a rinawm loh a ni. Eng nge kan zir theih? Thil sual chauh ni lovin, chu thil sual tihnaa min hruai lûttu pawh kan pumpelh tûr a ni. Solomona chuan chu tlangvâl leh hmeichhe khawlo chungchâng a sawi hnuah, kan pumpelh tûr chungchâng chu a târ lang a ni.—Mt. 5:29, 30. w24.07 16 ¶10-11

Chu ro chu eng nge ni? Chu chu nun chhanhimtu Lalram thuchah puan chhuahna hna a ni. (2 Kor. 4:1) A nih leh, hlum bêl chu eng nge ni? Mi dangte hnêna chanchin ṭha thlentu Pathian chhiahhlawhte an ni. Paula hun lai chuan, sumdâwngte chuan ei tûr te, uain te leh, pawisate ang chi thil hlu takte ken nân hlum bêl an hmang ṭhîn a. Chutiang bawkin, Jehova chuan chanchin ṭha thuchah hlu tak chu min kawltîr a. A ṭanpuinain chu thuchah chu rinawm taka puang chhuak tûrin kan mamawh chakna kan nei thei a ni. A châng chuan mihring hlauhna emaw, hnâwl nih hlauhna emaw kan nei thei a. Engtin nge chutiang hlauhna chu kan hneh theih? Thu hril lo tûra thu pêk an nih laia tirhkohte ṭawngṭaina kha han ngaihtuah teh. Anni chuan hlauh ahnêkin, Jehova hnênah huai taka thu hril tûrin ṭanpuina an dîl a. Jehova chuan an ṭawngṭaina chu a chhânsak nghâl a ni. (Tirh. 4:18, 29, 31) Mihring hlauhna i neih chuan Jehova hnênah mite i hmangaihnain mihring i hlauhna hneh tûra ṭanpui tûr chein dîl ang che. w24.04 16 ¶8-9

Jehova kan hmangaihna chuan a hming tithianghlim tûrin min chêttîr a. Setana’n Jehova a sawi chhiatna zawng zawngte chu dâwt a nihzia mi dangte hnêna hrilh kan duh a ni. (Gen. 3:1-5; Job. 2:4; Joh. 8:44) Kan rawngbâwlnaa kan thu ngaithlatu zawng zawngte chu Pathian chungchâng thu dik hrilhin a lamah kan ṭang tlat a. Mi zawng zawng hnênah Jehova mize ropui ber chu hmangaihna a ni tih te, a rorêlna chu a felin a dik tih te leh, rei lo têah a Lalramin mihringte hrehawm tawrhna zawng zawng a titâwp ang a, remna leh hlimna a thlentîr ang tihte chu hriattîr kan duh a ni. (Sâm 37:10, 11, 29; 1 Joh. 4:8) Kan rawngbâwlnaah Jehova hming ṭhatna kan humhim hian a hming kan tithianghlim a. Kan hming phûin kan nung tih hriatna chuan lungawina min neihtîr bawk. w24.05 18 ¶12