Mal Nia Inhria An Pun Zêlna Chungchângah Bible-in Eng Nge A Sawi?

Tûn hnaia khawvêl pum huapa neih zir chianna pakhatina a târ lan dânin mi pali zêla pakhatin mal nia inhriatna an nei a ni.

• “Khawi hmuna awm pawh ni ila, mi tute pawh hian mi dangte nêna inbiak pawhna ṭha nei lovin mal nia inhriatna kan nei thei.”—Chido Mpemba, cochair of the World Health Organization’s Commission on Social Connection.

Mi tam tak chuan kum upate leh mahnia awmte chauhvin mal nia inhriatna nei thei tûrah an ngai a; mahse, ṭhalaite, mi hrisêlte, mi hlawhtlingte leh, nupui pasal neite pawhin chu chu an nei thei. Mi dangte nêna inbe pawh lova awm leh mal nia inhriatna neihna chuan taksa leh rilru lam hrisêlna chu nasa takin a nghawng thei a ni.

• U.S. surgeon general, Dr. Vivek Murthy-a chuan, “Mal nia inhriatna chu rilru nawm lohna chi khat a ni mai lo. Mi dangte nêna inbe pawh lova awmna chuan nî tin meizial tlâwn 15 zûk ang tlukin thihna a thlen thei,” tiin a sawi.

Bible sawi dân

Min Siamtu chuan mi dangte nêna inbiak pawhna ṭha nei tûrin min duh. Mihringte’n hlimna leh lungawina thlentu inṭhian ṭhatna an neih chu Pathian thiltum a ni.

• Bible thu bul: “Pathian chuan, ‘Mihring amah chauhva awm hi a ṭha lo ve,’ a ti a.”—Genesis 2:18.

Pathian chuan amah nêna inlaichînna nei chho tûrin min duh. Amah hnaih tûra ṭan kan lâk chuan ani pawhin min hnaih ang tih min tiam a ni.—Jakoba 4:8.

• Bible thu bul: “Pathian kaihhruaina mamawh nia inhriate chu an hlim e, vân Ram an ta a ni si a.”—Matthaia 5:3, NWT.

Pathian chuan mi dangte ruala a huhova amah be tûrin min duh. Chutianga tihna chuan hlimna min pe lehzual thei a ni.

• Bible thu bul: “Hmangaih leh thil ṭha tiha inchawk tho tûrin i inngaihtuah tawn ang u; kan inkhâwmte bânsan lovin, i infuih tawn zâwk ang u.”—Hebrai 10:24, 25.

Mal nia inhriatna do lêt a pawimawh chhan hriat belh nân, “Loneliness in a World of Mass Connection tih thuziak chu en rawh.”