Politician-te’n Armageddon A Thleng Thuai Dâwn Tih An Sawi—Bible-in Eng Nge A Sawi?

Kum 2022, October 10, Thawhṭan zîngah, Crimea leh Russia inkal pawhna ber lei tihchhiat a nih hnu ni hnih vêlah Russia-in missile hmangin Ukraine khawpuite chu a bom leh a. Chu chu Politician ṭhenkhatin Armageddon a rawn thleng thuai dâwn tih an sawi hnu lawka thleng a ni.

“Armageddon thleng mai tûr anga a lanna hi [U.S. President John F.] Kennedy-a leh Cuban Missile Buaina hnuah tûn hi a vawikhatna a ni a. . . . Nuclear râlthuam hman ni chiah se chuan, Armageddon hi a thleng ngei ang.”—U.S. President Joe Biden, October 6, 2022.
Kei pawhin Armageddon hi a thlen thuai ka ring, khawvêl pum tân thil hlauhawm tak a ni ang.”—Nuclear râlthuam hmanin a nghawng theihte chungchâng an zawhna Ukraine President Volodymyr Zelensky-a chhânna, BBC News, October 8, 2022.

Nuclear râlthuamte hmannain Armageddon a thlen ang em? Bible-in eng nge a sawi?

Nuclear râlthuamte hian Armageddon a thlen ang em?

Thlen lo vang. Bible-ah “Armageddon” tih thumal hi Thu Puan 16:16-ah chauh hmuh tûr a awm a. Chu chuan hnamte inkâra indona ni lovin, Pathian leh “khawvêl zawng zawnga lalte” inkâra indona a kâwk a ni. (Thu Puan 16:14) Pathianin Armageddon indona chu mihring rorêlna zawng zawng tihtâwp nân a hmang ang.—Daniela 2:44.

Armageddon-in he leia a thlen tûr chungchâng hriat belh nân Armageddon Indona Chu Eng Nge? tih thuziak chu chhiar ang che.

Lei leh a chhûnga chêngte hi nuclear indona avânga tihchimih a ni ang em?

Ni lo vang. Kan hma lawkah, mihring roreltute hiannuclear râlthuamte an hmang pawh a ni thei; mahse, Pathianin chûngte hmanga lei an tihchhiat chu a phal lo vang. Bible chuan heti hian a sawi:

“Lei hi erawh chu a awm reng mai. ”—Thuhriltu 1:4.
“Mi felte chuan ram hi an luah ang a, a chhûngah hian kumkhuain an awm ang.”—Sâm 37:29.

Amaherawhchu, Bible hrilh lâwkna leh tûn hnaia thilthlengte hian, he leiah hian inthlâk danglamna lian tak a thleng thuai dâwn tih a târ lang. (Matthaia 24:3-7; 2 Timothea 3:1-5) A thlâwna phûrawm taka Bible sawihona kan neihte hmangin hmalam hun chungchânga Bible sawite chu hria ang che.