Pachilambo Chosope Pana Sala Ligongo Lyangondo Soni Kuchenga Kwanyengo—Ana Baibulo Jikusasala Yamtuli Panganiji?

Ngondo jajikutendekwa ku Ukraine soni yakuyichisya yakuchenga kwa nyengo, yitendekasisye kuti yakulya yisoŵeje pachilambo chosope. Kusoŵa kwa yakulyaku kukutendekwa mnopemnope m’yilambo yayikusaŵa yakusawusya kwa ŵandu kuti apateje yakulya yakwanila.

Pa Julayi 17, 2023, António Guterres jwali mlembela jwamkulungwa jwa bungwe ja UN, jwatite “Kupanganya yakulya soni kusimanikwa kwa yakulyayo kukusawusya mnope ligongo lya yindu mpela yachiwawa, kuchenga kwa nyengo, kukwela mtengo wa magesi ni yindu yine yejinji.”
Pa Julayi 23, 2023 ngani jine ja pa intaneti jatite, “Chilambo cha Russia nganichiŵasoni mumkamulano wakutumisya yakulya yakutyochela m’chilambo cha Ukraine. Ligongo lya yeleyi ŵandu ŵamlijiganye akuganisya kuti yakulya chiyiŵe yakudula mnope m’yilambo yayili yakulaga, mnopemnope yilambo yayili kumpoto kwa Africa soni yayili ku Middle East.”

Alole yajikusasala Baibulo pangani ja kusoŵa kwa yakulya soni mwayichiŵela yindu msogolo.

Yajasasile Baibulo pangani jakusoŵa kwa yakulya

Yesu jwalochesye kuti: “Mtundu uchijimuchilana ni mtundu ujakwe soni uchimwene ni uchimwene ujakwe. Kuchiŵa sala.”—Mateyu 24:7.
Buku ja m’Baibulo ja Chiwunukuko jikusasala ya achalume mcheche ŵakwesile pamahachi gakuwanichisya. Jumo mwa achalume ŵakwesile pamahachi akwimila ngondo. Jwakumkuya jwakwe akwimila sala, jajili ndaŵi jakuti yakulya yichisoŵa soni ŵandu chachiyisumisyaga pamtengo wakudula. Baibulo jikusati “Pinalolite najiweni hachi jepiliwu. Juŵakwesilepo jwakwete sikelo m’myala mwakwe. Myoyo napikene liloŵe . . . Liloŵelyo lyatiji kuti, ‘Lupeta lumo lwatiligu mtengo wakwe uli malipililo galisiku limo. Mbeta sitatu sya mbeju jakolanjidwa balele, mtengo wakwe uli uwowosoni.’”—Chiwunukuko 6:5, 6, Buku Jeswela.

Yakulochesya yakwamba kusoŵa kwa yakulyayi yikukwanilichikwa masiku agano gagali “masiku gakumalisya” mwakamulana ni yajikusasala Baibulo. (2 Timoteyo 3:1)Kuti amanyilile yejinji yakwamba “masiku gakumalisya” soni ya achalume mcheche ŵakwesile pamahachi ŵa m’buku ja Chiwunukuko, alolele fidiyo jakuti Chilambochi Chichenjile kutandila mu 1914 soni aŵalanje ngani jakuti “Ana Achalume Mcheche Ŵakwesile Mahachi Ali Ŵani Soni Akwimila Chichi?”

Ana Baibulo mpaka jakamuchisye mwamtuli?

M’Baibulo mukusasimanikwa malangiso gampaka gatukamuchisye kupilila yakusawusya yayikupwatikapo kwela mitengo kwa yakulya soni kusoŵa kwa yakulyayo. Alole yisyasyo yine mungani ja mtwe wakuti “Yampaka Yakamuchisye Naga Akusapata Mbiya Syangakwanila.”
Baibulo jikusatupa chembecheyo chakuti msogolomu yindu yichiŵasoni chenene. Jikusatusalila kuti jichiyika ndaŵi jakuti “mchilambo muchiŵa yakulya yejinji” soni jwalijose chachikola yakulya yakwanila. (Salimo 72:16) Kuti amanyilile yejinji yakwamba chembecheyochi soni mwampaka achikulupilile, aŵalanje ngani jakuti “Chembecheyo Chisyesyene Chikusatukamuchisya Kola Sogolo Jambone.”