Photo by Zhai Yujia/China News Service/VCG via Getty Images
AŴEJE MESOPE
Mesi Gakusewuchila—Ana Baibulo Jikusasala Yamtuli Panganiji?
Pachilambo chosope chapasi, ŵandu ŵajinji akwayidwe ni mesi gakusewuchila. Kwende tulole malipoti gakuyichisyaga:
Nyusipepala ja AP ja pa 2 Ogasiti, 2023 jatite, “Masiku gapitega, ku likulu lya chilambo cha China kwagwile wula jamachili mnope kupunda wula jajiŵele jili mkugwa m’yaka chiŵandika 140 yipiteyo. Wulaji jagwile kutandila Lyakuŵeluka mpaka Lyatatu mwamti jaliji jejinji mamilimita . . . 744.8.”
Nyusipepala ja Deutsche Welle ja pa 3 Ogasiti, 2023 jatite, “Lyamcheche, mbungo jamachili jakolanjikwa kuti Typhoon Khanun jatendekasisye kuti kum’mwela kwa chilambo cha Japan kugwe wula nambosoni mbungo jamachili jijawuleje ŵandu chiŵandika ŵaŵili. . . . Yikuwoneka kuti mbungoji chijitendekasye kuti wula jejinji mamita 0.6 jigwe m’chigawo chapasikati cha m’madela gakwela mchilambo cha Taiwan.”
Nyusipepala ja BBC ja pa 24 Julayi, 2023 jatite, “Kumbesi kwa wiki jimasileji, wula jamachili jijagwile mungulugulu mwa nyasa ja Atlantic ku Canada jayiche ligongo lya kusewuchila kwa mesi [ga m’chigawo cha Nova Scotia] soni jaliji jamachili mnope kupunda jajiŵele jili mkugwa m’yaka 50 yipiteyo.”
Ana Baibulo jikusasala yamtuli pa yakutendekwa mpela yeleyi?
Chimanyilo cha “masiku gakumalisya”
Baibulo jikusasala kuti tukutama mundaŵi jajikusakolanjikwa kuti “masiku gakumalisya.” (2 Timoteyo 3:1) Yesu ŵaŵechete mkanipaŵe kuti mundaŵi jetu jino tuyiwoneje, “yindu yakutesya woga.” (Luka 21:11) Kuchenga kwa nyengo ni kwakukutendekasya kuti kusa kuchenjeje ndaŵi ni ndaŵi, mwangajembecheya soni mwakusimonjesya.
Ligongo lyakwe tukusosekwa kola chembecheyo
Baibulo jikusatusalila kuti yindu yejinji yakutesya woga yayikutendekwa masiku agano yikusatukamuchisya kola chembecheyo. Ligongo chichi? Yesu jwatite, “Pachimchiyiwona yinduyi yili mkutendekwa, chimmanyilile kuti Uchimwene wa Mlungu uŵandichile.”—Luka 21:31; Mateyu 24:3.
Yakutendekwa yatukuyiwonayi yikulosya kuti Uchimwene wa Mlungu usigele panandi kumasya yakusawusya yosope ya m’chilengedwe mpela kusewuchila kwa mesi soni mbungo syamachili.—Yobu 36:27, 28; Salimo 107:29.
Kuti amanyilile yejinji yakwamba yawuchitenda Uchimwene wa Mlungu pakulinganyasoni chilambochi kuti chiŵe chambone, aŵalanje ngani ja Chichewa jakuti, “Kodi Ndi Ndani Amene Adzapulumutse Dzikoli?”