Ngani jaŵasasile Solomoni jikusagamba kulosya yindu yampaka yimtendechele jwakutumichila jwa Yehofa jwalijose. Mundu mpaka atende chakulemwa chekulungwa kaneko ni kuŵechetaga kuti “nganajembecheyaga” kuti mpaka yimtendechele yeleyo. Mwine ni kwika kwene pakuŵecheta kuti, “Yigambile kutendekwa mwangosi.” Nambo chitamilecho yili mkuti ali aganichisye yayatendekwe, mpaka apate kuti jwatesile yindu yineyakwe mwakupwambwana yayatendekasisye kuti atende ulemwa wekulungwa. Mwine yindu yakwe mpaka yine mpela kunguluka ni ŵandu ŵakusakala, kutenda yakusangalasya yakulemwecheka, kwinjila m’mawebusayiti gakulemwecheka, kapena kusimanikwa mmalo gangaŵajilwa. Kombolekasoni kuti jwalakwe jwalesile kupopela, kuŵalanga Baibulo, kusongana kapena kulalichila. Mwamti mpela muyaŵelele ni mchanda jwakusamkolanga m’buku ja Misyungu jula, nganituŵa tusasile kuti mundu jweleju atesile chakulemwachi “mwangosi.” Ana tukulijiganya chichi pelepa? Ngatukusosekwa kwamba kuŵambala kutenda chakulemwape iyayi, mmalomwakwe tuŵambalejesoni yindu yampaka yitutendekasye kutenda ulemwa. Mwamti yeleyi ni yaŵasasile Solomo panyuma pakulondesya chakutendekwachi.—Mat. 5:​29, 30. w24.07 16 ¶10-11

Ana chipanje chelechi chili chichi? Gali masengo gakulalichila ya Uchimwene wa Mlungu gagakusakulupusya umi wa ŵandu. (2 Akoli. 4:1) Nambi yiŵigayi yikwimila chichi? Yikwimila ŵakutumichila ŵa Mlungu ŵakusakamula masengo gakulalichilaga. Mu ndaŵi ja ndumetume Paulo, ŵandu ŵamalonda ŵakamulichisyaga masengo yiŵiga pakunyakulila katundu jwakusosekwa mnope mpela yakulya, finyo nambosoni mbiya. Mwakulandanamo, Yehofa atupele utenga wakusosekwa mnope wa ngani syambone kuti twalalichileje ŵandu ŵane. Mwamti ni chikamuchisyo cha Yehofa mpaka tupate machili gakutukamuchisya kuti tukombole kulalichila ngani syambone mwakulupichika. Ndaŵi sine mpaka twajogopeje ŵandu kapena kogopa kuti ngapikanila utenga wetu. Nambo ana mpaka tumalane chamti uli ni woga welewu? Aganichisye ya lipopelo liŵaŵendile ŵandumetume pandaŵi jiŵasalilidwe kuti aleche kulalichila. Mmalo mwakwajogopa ŵandu, jemanjaji ŵamŵendile Yehofa kuti ŵakamuchisye kuti “aŵecheteje mwakulimba mtima.” Mwamti Yehofa ŵajanjile lipopelo lyawo ndaŵi jijojo. (Mase. 4:​18, 29, 31) Nombe m’weji ndaŵi sine pawutukamwile woga tukusosekwa kupopela kwa Yehofa kuti atukamuchisye. Tumŵendeje Yehofa kuti atukamuchisye kupitilisya kwanonyela ŵandu yampaka yitukamuchisye kuti tukajogopaga kwalalichila. w24.04 16 ¶8-9

Kumnonyela Yehofa kukusatutendekasya kuti tulichimbichisyeje lina lyakwe. Mwamti tukusajigala nawo mbali pakulichimbichisya linali, mwakwasalila ŵandu kuti yindu yaŵasasile Satana yakwamba Yehofa yili yaunami. (Gen. 3:​1-5; Yob. 2:4; Yoh. 8:44) Patuli mu utumiki tukusasachilila kulichenjela lina lya Yehofa mwakwasalila ŵandu yindu yisyesyene yakwamba jwalakwe. Tukusasakasoni kuti jwalijose amanyilile kuti ndamo jekulungwa jakwete Yehofa jili chinonyelo soni kuti ali jwakulamulila jwachilungamo. Nambosoni tukusasaka kwamanyisya ŵane kuti pachangakaŵapa Uchimwene wakwe uchimasya yakusawusya yosope soni kuti ŵandu chachitamaga mwakusangalala soni mwamtendele. (Sal. 37:​10, 11, 29; 1 Yoh. 4:8) Patukwasalila ŵandu ya ndamo syambone syakwete Yehofasi tukusaŵa tuli mkulichimbichisya lina lyakwe. Tukusaŵagasoni ŵakusangalala ligongo lyakutenda yindu yatukusasosekwa kutenda mpela ŵakutumichila ŵakwe. w24.05 18 ¶12