Ngondo ja ku Ukraine Jitendekasisye Kusoŵa kwa Yakulya Pachilambo Chosope

Pa Meyi 19, 2022, chiwanja cha United Nations Chakulola ya Chiteteyo, chapochele malipoti kutyochela kwa achakulungwakulungwa ŵane, kuti “yakulya yikusoŵa pachilambo chosope ligongo lya mlili wa COVID-19, nambosoni kuchenga kwa nyengo. Konjechesya pelepa, ngondo jajikutendekwa ku Ukraine jikutendekasyasoni kuti pachilambopa papagwe sala.” Nyusipepala jine (The Economist) jisasile kuti “ngondoji jikutendekasya kuti chilambochi chachikwete kala yakusawusya yejinji chikolesoni ŵandu ŵajinji ŵachalaje ni sala.” Nambope Baibulo jaliji jili jisasile kala kuti masiku getu gano yakulya yichiŵa yakusoŵa. Atamose yili myoyo, Baibuloji jikusatukamuchisyasoni kumanyilila yampaka tutende kuti tupilile yakusawusya yeleyi.

Baibulo jasasile kala kuti yakulya yichiŵa yakusoŵa

•  Yesu jwasasile kuti: “Mtundu uchijimuchilana ni mtundu ujakwe soni uchimwene ni uchimwene ujakwe. Kuchiŵa sala.”—Mateyu 24:7.

•  Buku ja Chiwunukuko jikusalondesya ya ŵandu mcheche ŵakwesile ma hachi. Jumo mwa ŵandu ŵakwesile ma hachiŵa akwimila ngondo. Jwakuyichisya jwakwe akwimila sala. Yayikugopolela kuti yichiŵaga yakusawusya kupata yakulya soni kuti yichiŵa yakudula mnope. Panganiji Baibulo jikusati, “Najiweni hachi jepiliwu jili jikopochele. Juŵakwesile hachijo ŵajigele sikelo jakupimila mmyala mwakwe. Pelepo napikene maloŵe . . . gakuti, ‘Kilogalamu jimo ja tiligu mtengo wakwe uli wakulandana ni malipilo ga lisiku limo, soni makilogalamu gatatu ga balele mtengo wakwe uli wakulandanasoni ni malipilo ga lisiku limo.’”—Chiwunukuko 6:5, 6, Contemporary English Version.

Yakulochesya ya m’Baibulo yakwayana ni kusoŵa kwa yakulyayi, yikwanilichikwa “masiku gakumalisya” gano. (2 Timoteyo 3:1) Kuti amanyilile yejinji yakwamba “masiku gakumalisya” soni ya achalume mcheche ŵakwesile mahachi ŵakwakolanga m’buku ja Chiwunukuko, alolele fidiyo jakuti Chilambochi Chichenjile Kutandila mu 1914. Aŵalanjesoni ngani ja mtwe wakuti “Ana Acalume Mcece Ŵakwesile Mahaci Ali Ŵani Soni Akwimila Cici?”

Ana Baibulo mpaka jitukamuchisye mwamtuli?

•  Baibulo jana mfundo syampaka situkamuchisye kupilila yakusawusya yakulekanganalekangana yayikupwatikapo kusoŵa soni kudula kwa yakulya. Alole mfundo sine syampaka syakamuchisye mu ngani jakuti “Yampaka Yakamuchisye Naga Akusapata Mbiya Syangakwanila.”

•  Baibulo jikusatupa chembecheyo chakuti kusogoloku yindu chiyiŵe chenene.Jikusatusalila kuti jikwika ndaŵi jele m’chilambo ‘muchiŵa yakulya yejinji’ soni kuti jwalijose chachikola yakulya yakwanila. (Salimo 72:16) Kuti amanyilile yejinji yajikusasala Baibulo pakwamba ya msogolo soni ligongo lyakwe akusosekwa kuyikulupilila, aŵalanje ngani jakuti, “Chembecheyo Chisyesyene Chikusatukamuchisya Kola Sogolo Jambone.”