Yajikusasala Baibulo Pangani ja Kukwela Mitengo kwa Yindu Ligongo Lyakunandipa Machili kwa Mbiya

Mu lipoti lya Juni 2022, pulesidenti jwa banki jekulungwa pachilambo chosope (World Bank) jwasasile kuti, “Kajende ka chipanje pachilambo chosope kali pangosi. Soni mitengo ja yindu jikukwela mnope pandaŵi jimo, soni kuti ŵandu ngakupata mbiya syakwanila.”

Bungwe jajikusakamuchisya yilambo pangani ja chipanje, (International Monetary Fund) jisasile kuti, “Mitengo ja yakulya soni mawuta jikwesile mnope, yayikutendekasya kuti ŵandu ŵa m’yilambo yakulaga, alajeje mnope.”

Nambope Baibulo jikusatukamuchisya kumanyilila ligongo lyakwe tukusimana ni yakusawusya mpela yeleyi soni kumanyilila yampaka tutende. Jikusatukamuchisyasoni kumanyilila mwayichimalila yakusawusyayi.

Kukwela mitengo kwa yindu “masiku gakumalisya”

•  Baibulo jikusasala kuti ndaŵi jatukutamaji, jili “masiku gakumalisya.”—2 Timoteyo 3:1.

•  Yesu jwasasilesoni kuti kuchiwoneka yindu “yakutesya woga.” Yindu yeleyi ni yayikutendekwa masiku gakumalisyaga. (Luka 21:11) Mwamti kukwela mnope mitengo kwa yindu kukwatendekasya ŵandu kuti akole woga. Ŵandu akudandawula ni mwajiŵele sogolo jawo soni ngakumanyilila naga chakomboleje kugasamalila maŵasa gawo.

•  Buku ja Chiwunukuko jasasile kuti masiku gakumalisya, yakulya yichiŵa yakudula. Lilemba lya Chiwunukuko 6:6 likusati, “Napikene mpela liloŵe. . . . Liloŵelyo lyatiji kuti, ‘Lupeta lumo lwa tiligu, mtengo wakwe uli malipilo ga lisiku limo.’”—Buku Jeswela.

Kuti amanyilile yejinji ya “masiku gakumalisya” soni yakulochesya ya m’buku ja Chiwunukuko, alolele fidiyo jakuti Chilambochi Chichenjile Kutandila mu 1914. Aŵalanjesoni ngani ja mtwe wakuti “Ana Acalume Mcece Ŵakwesile Mahaci Ali Ŵani Soni Akwimila Cici?”

Ana kusawusya kwa chipanje kuchimala mwamtuli?

•  “Ŵandu ŵangu tachitaŵa nyumba nipo tachitamamo, tachipanda migunda ja mipeleya, tachilya yisogosi yakwe. Ngasataŵa nyumba kuti ŵandu ŵane atamejemo, nipo ngasapanda mipeleya kuti ŵandu ŵane alyeje yisogosi yakwe.”—Yesaya 65:21, 22.

•  “Mchilambomo muŵe yakulya yejinji; atamose pa chanya pa matumbi paŵe yakulya yejinji.”—Salimo 72:16.

•  “Ligongo lyakuti ŵakulaga ŵasumwile yindu yawo, ni ŵakulagawo akudandawula. AMBUJE akuti, ‘Tindendepo kandu sambano, tinakulupusye mpela mwakusachila jemanjajo.’”—Salimo 12:5.a

Pachangakaŵapa, Mlungu chamasye ungali chilungamo pangani ja chipanje pachilambo chosope. Kuti amanyilile mwachatendele Mlungu yeleyi, aŵalanje ngani ja Chichewa jakuti, “Kodi Mayiko Angathe Kuyendetsa Chuma Mokomera Aliyense?”

Atamose kuti chipanje chikusawusya, nambope Baibulo mpaka jitukamuchisye kumanyilila yampaka tutende ni kukwela mitengo kwa yindu. Mwamtuli? Baibulo jikusatusalila yampaka tutende kuti tukamulichisyeje masengo mbiya mwalunda. (Misyungu 23:4, 5; Jwakulalichila 7:12) Kuti amanyilile yejinji, aŵalanje ngani ja mtwe wakuti “Asamalileje Mbiya Soni Katundu Jwawo” soni jakuti “Yampaka Yakamuchisye Naga Akusapata Mbiya Syangakwanila.”