Nyengo Jachitukuta Mnope ja Pachilambo Chosope M’chaka cha 2023—Ana Baibulo Jikusasala Yamtuli Panganiji?

Pachilambo chosope chapasi, ŵandu akupilila ni chitukuta changanichitendekwejepo munyumamu. Chitukuta chakusimonjesyachi, chikutendekasya ngosi sine sya m’chilengedwe. Kwende tulole malipoti gakuyichisyaga:

•  Lipoti line lyatite “Mwesi wa Juni watesile chitukuta mnope pachilambopa kutyochela pele ŵandu paŵatandite kuŵalanjila nyengo jachitukuta kapena jakusisima, m’yaka 174 yipiteyo.”—National Oceanic and Atmospheric Administration, U.S. Department of Commerce, Julayi 13, 2023.

•  Lipoti line lyatite “Ŵandu ŵa m’yilambo ya Italy, Spain, France, Germany soni Poland akwayidwe ni yakusawusya yakwika ligongo lya kutukutila mnopeku mwamti kutukutilaku kukwembecheya kwika pamadigili 48 ku yilumba ya Sicily soni Sardinia. Komboleka kuti chitukuta chakogoyachi chikupunda nyengo syosope syasiŵele sili mkutendekwa ku Europe.”—European Space Agency, Julayi 13, 2023.

•  Bungwe jine jatite “Chilambochi pachikutukutila mnope tujembecheyeje kuti kugwe ula jejinji mwakutotoganya, yele yitendekasye kuti mesi gejinji gasewuchile.”—Stefan Uhlenbrook, jwamkulungwa jwakulola ya nyengo ku bungwe ja World Meteorological Organization, Julayi 17, 2023.

Ana yindu yakogoyayi yikwatendekasya wawojo woga? Kwende tulole yajikusasala Baibulo panganiji.

Ana nyengo pajikuchenga myiyi nikuti yakulochesya ya m’Baibulo yikukwanilichikwa?

Elo. Kutukutila kwakukutendekwa pachilambo chosope soni mitundu jine jakuchenga kwa nyengo, chili chimanyilo chakuti yajasasile Baibulo kalakala ni yayikutendekwa masiku agano. Mwachisyasyo, Yesu jwalochesye kuti “kuchiwonekasoni yindu yakutesya woga,” kapena “kwinani kuchiwoneka yindu yakusimonjesya soni yakogoya.” (Luka 21:11; Good News Translation) Kutukutila kwakukutendekwa pachilambopa, kukwatendekasya ŵandu ŵajinji kola woga mwamti akuganisya kuti pachilambopa yaumi yosope kuchiŵa kwangali.

Ana pachilambopa ngasipapagwasoni chaumi chilichose?

Iyayi. Mlungu ŵapanganyisye chilambochi kuti tutamejemo mpaka kalakala, soni ngasakunda kuti ŵandu achijonanje mpaka kuchimalisya. (Salimo 115:16; Jwakulalichila 1:4) Yehofa ŵasasile kuti chachajonanga “wosope ŵakuchijonanga chilambo chapasi.”—Chiwunukuko 11:18.

Baibulo jikusasala kuti Mlungu chachichiteteya chilambochi ku ngosi syamchlengedwe.

•  “[AMBUJE] ŵachitulesye chimbunga mpaka matumbela ga pa nyasa gatesile bata.” (Salimo 107:29) Mlungu akwete machili gakulamulila yindu ya m’chilengedwe. Jwalakwe mpaka akombole kulinganya yakusawusya yayikutendekwa apanopano ya m’chilengedwechi yayikutendesya kuti ŵandu alajeje ni kuchenga kwa nyengo.

•  “Ŵalakwe akusalosya chisamalilo chawo pa chilambo chapasi, akusamelesya mbeju pa yilambo.” (Salimo 65:9) Mlungu chachijaliwa chilambochi mwamti chichiŵa paladaiso.

Kuti alijiganye yejinji pa yajasasile Baibulo yakwamba kulinganya yindu ya chilengedwe yayijonasiche m’chilambomu, aŵalanje ngani ja Chichewa jakuti, “Kodi Ndi Ndani Amene Adzapulumutse Dzikoli?”