ქიმეხვარით შხვეფს იეჰოვაშ გაჩინებაფას

1. მუს გინაფლენთ, მუჟამსით ბიბლიაშ მაგურაფალიშ სულიერო წიმი ულას ორწყეთ?

ᲛᲣᲡ გინაფლენთ, მუჟამსით თქვან ბიბლიაშ მაგურაფალ პირველო მოურს კრებაშ შეხვალამაშა, იჭყანს კომენტარეფიშ კეთებას, შხვეფს ეჩიებ მუშ რწმენაშ გურშენ დო გინმოჭყვიდუნს, დუდ მეუძღვინას იეჰოვა ღორონთის? მუშო ოკო რაგად, მანგარ გახარებულ იჸუაფუთ! თე ირფელ იეჰოვაშ დამსახურება რე, ათეშენ, თის განვადიდენთ, მუჟამსით ვორწყეთ, მუჭო მეურს ბიბლიაშ მაგურაფალ სულიერო წიმი (1 კორ. 3:5–9; 3 იოან. 3, 4).

2. მუ რე იეჰოვაშ ნება ბიბლიაშ მაგურაფალწკუმა დაკავშირებით? (1 ტიმ. 2:3, 4).

² ღორონთის ოკო, „არძანერ ადამიანქ გინოსქიდას დო სიმართლეშ ზუსტ რჩქინა მიღას“ (წეკითხით 1 ტიმოთეშ 2:3, 4). იეჰოვას ოკო, ხალხიქ მუთ შილებენ უჯგუშო გეჩინებაფუას მუ დო ქიგეგას მუშ განზრახვეფიშ გურშენ (იერ. 9:24). თეშო თინეფს ზუსტ რჩქინა ოსაჭირუნა. 1 ტიმოთეშ 2:4-ის ორიგინალს გიმორნაფილ ბერძნულ სიტყვა, ნამუთ თარგმნილ რე, მუჭოთ „ზუსტ რჩქინა“, უბრალოთ ფაქტეფიშ გაგებას ვა ნიშნენს. მუჭოთ ართ ბიბლიაშ მარკვიებელ იჩიებ, „თენა რე თიცალ რჩქინა, ნამუთ პიროვნებას გინაჭყვიდირაფუანს, მთლიანო დოთირუას მუშ ცხოვრება“. თაშ ნამდა, ბიბლიაშ მაგურაფალ იეჰოვას იჩინებაფუანსინ, ღებულენს ზუსტ რჩქინას, ნამუთ ცხოვრებაშ თირუაშ სურვილს ურჩქინანს. თენა არზენს თის საშვალებას, მიღას „ულიებ სიცოცხლე“ (იოან. 17:3).

3. მუს გუვარჩიენთ თე სტატიას?

³ იეჰოვა არძას მარზენა პატის, ქიმვეხვარათ შხვეფს მუშ გაჩინებაფას. ათეშენ, თე სტატიას გუვარჩიენთ კითხვეფს: მუშენ ოკო იჩინენდან ბიბლიაშ მაგურაფალეფ იეჰოვას ჯგირო? მუჭო ვოძირუათ თინეფს, მუნერ რე იეჰოვა? მუჭო მივეხვარათ თინეფს იეჰოვაშ გურშენ ნაგურეფ მუნეფიშ ცხოვრებას გეგმირინუან?

ᲥᲘᲛᲔᲮᲕᲐᲠᲘᲗ ᲑᲘᲑᲚᲘᲐᲨ ᲛᲐᲒᲣᲠᲐᲤᲐᲚᲡ, ᲯᲒᲘᲠᲝ ᲒᲔᲩᲘᲜᲔᲑᲐᲤᲣᲐს ᲘᲔᲰᲝᲕᲐ

4. მუ რე ჩქინ მთავარ მიზან ბიბლიაშ გურაფაშ ჩატარებაშ დროს? (მარ. 12:30).

⁴ იესოქ თქუ, ნამდა არძაშ უდიდაშ მცნება რე, მიჸორდან იეჰოვა მთელ გურით, მთელ შურით, მთელ გონებათ დო მთელ ძალათ (წეკითხით მარკოზიშ 12:30). ბიბლიაშ მაგურაფალქ თეშ ოკო გეჩინებაფუას იეჰოვა, ნამდა ქეჸოროფას თიქ. ჩქი მოკონა, ბიბლიაშ მაგურაფალქ დუდ ჩქი, ბიბლიურ გურაფეფს ვარდა ორგანიზაციას ვარინ, იეჰოვას მეუძღვინას. ათეშენ ბიბლიაშ გურაფაშ ჩატარებაშ დროს ჩქინ მთავარ მიზან რე, გუვოჩინებაფუათ იეჰოვა დო ქუჸოროფუათ თინა.

5. მუშ კეთებას გინაჭყვიდირაფუანს იეჰოვაშ ჸოროფა ბიბლიაშ მაგურაფალს?

⁵ ჸოროფა დო მორჩილება ართიანწკუმა რე დაკავშირებულ. მუჟამსით ბიბლიაშ მაგურაფალ გეჩინებაფუანს დო ქიჸოროფუანს იეჰოვას, გურჩქინდუ სურვილ, დემორჩილას თის. იესოქ თქუ: „მა თის ვორთუქ, მუთ მუმაქ მიზოჯ, მუშენდა თე ქიანას უჩქუდას, ნამდა მუმა მიჸორს“ (იოან. 14:31). იესოცალო, ბიბლიაშ მაგურაფალს იეჰოვაშ ძალიერ ჸოროფა გინაჭყვიდირაფუანს, დემორჩილას დო ვეჩეთხუას ღორონთის (1 იოან. 5:3).

6. ხოლო მუ მიშურს იეჰოვაშ გაჩინებაფაშა დო მუჭო მეხვარებ თენა ბიბლიაშ მაგურაფალს? ქიმიჸუნით მაგალით.

⁶ ბიბლიაშ მაგურაფალს უმოსო შეიალებე ჭკვერულ გადაწყვეტილებეფიშ მეღება, მუჟამსით ჯგირო გეჩინებაფუანს იეჰოვას; თეშა ხვალე თეორიულ რჩქინა ვემშურს. ქიმიპჸუნათ თეცალ მაგალით: მითინს მანქანაშ ჸუნაფაშ დოგურაფა ქაკონ-და, თენა ვაკეთინე ხვალე თიშ ჯინათ, შხვას მუჭო გილაჸუნს მანქანა ვარდა ხვალე თეორიაშ გურაფათ. თიქ ბრელშა ოკო იმეცადინას პრაქტიკულო. თეცალ დროს ქოძირუნს, შხვადოშხვა სიტუაციას მუჭო უჯგჷ მოქმედება მანქანას გეხენ თიმწკუმა. თეშნერ გამოცდილება ჸუნაფას ქუდაგურუანს. თეშნერო, ბიბლიაშ მაგურაფალს ხოლო ხვალე ბიბლიაშ გურაფა ვა უბაღ იეჰოვაშ გაჩინებაფალო; თიქ ოკო ქოძირას, მუ ჯგირ შედეგ მოჸუნს ბიბლიურ პრინციპეფით მეღებულ გადაწყვეტილებეფს. იეჰოვაშ გურშენ უმოს რჩქინაშ მეღებაწკუმა ართო, თიშ ძირაფა, მუჭო ოხვარ მუშ ზეციერ მუმა, მამზადენს თის, ნებისმიერ სიტუაციას მიღას ჭკვერულ გადაწყვეტილებეფ.

7. მუჭო მეხვარ იეჰოვას იჩინენდუნ თიქ იოსების სწორ გადაწყვეტილებაშ მეღებას?

⁷ იეჰოვაშ გურშენ რჩქინაქ მეხვარ იოსების, ვეიაჸუნუკო ფოტიფარიშ ოსურს, ნამდგაქ თიშ მეჩილითაფას ეცად. მუშო ოკო რაგად, ბაღანობას თის გაგებულ აჸიდ ადამ დო ევაშ დო აბრაამ დო სარაშ ისტორიეფ (დაბ. 2:24; 20:3, 6). თე ისტორიეფშე იოსებ ქოძირუნდჷ, მუჭო უჯინე იეჰოვა ქორწინებას დო სექსუალურ ურთიერთობას. იოსებ თიზმათ ჯგირო იჩინენდჷ იეჰოვას, ნამდა ვეიაჸუნ ფოტიფარიშ ოსურს დო უწუ: „მუჭო ვაკეთა თე დიდ უბადობა დო მუჭო შეფცოდა ღორონთის?!“ (დაბ. 39:7–9). თის უჩქუდ, იეჰოვაშ თოლს მუ რდჷ სწორ დო მუ რდჷ არასწორ დო თინა ხოლო არჩქილედ, მუ უწყუნუანდუკონ იჸიდ ღორონთის გურს. შედეგო იოსებიქ სწორ გადაწყვეტილება მიღჷ. თეშნერო, მუჟამსით ქიმვეხვარებუთ ბიბლიაშ მაგურაფალს თიშ გაგებას, მუნერ რე იეჰოვა, მუ მოწონს დო მუ ვა მოწონს თის, თინა ხოლო თიცალ გადაწყვეტილებას მიღენს, მუდგათ გურს გუხარენს იეჰოვას.

ᲥᲣᲓᲐᲒᲣᲠᲔᲗ ᲑᲘᲑᲚᲘᲐᲨ ᲛᲐᲒᲣᲠᲐᲤᲐᲚᲡ, ᲛᲣᲜᲔᲠ ᲠᲔ ᲘᲔᲰᲝᲕᲐ

8. მუჭო შეილებუნა წიგნიშ „მარადიულო გეხარით ცხოვრებათ!“ გიმორნაფათ, ქიმეხვარათ ბიბლიაშ მაგურაფალს, გეჩინებაფუას იეჰოვა?

⁸ მუჭო გუვოჩინებაფუათ ბიბლიაშ მაგურაფალს, მუნერ რე იეჰოვა? იეჰოვაქ კითხვეფიშ გიმორნაფათ გაჩინებაფუ იობის მუშ დუდ უჯგუშო. თიქ 50-შე უმოს კითხვა დუსვჷ იობის (იობ. 38:1–41:34). ჩქი ხოლო შემლებუნა კითხვეფიშ გიმორნაფა. წიგნის „მარადიულო გეხარით ცხოვრებათ!“ თიცალ კითხვეფ რე მოჩამილ, ნამუთ ოხვარ ბიბლიაშ მაგურაფალს იეჰოვაშ პიროვნებაშ გაჩინებაფას (ქოძირით ჩარჩო „კითხვეფ, ნამუთ შხვეფშა გურაფას მიმეხვარებუნა“). ათეშენ გეგმირინეთ თე კითხვეფ, ნამდა ქიმეხვარათ ბიბლიაშ მაგურაფალს, გეჩინებაფუას იეჰოვა.

9, 10. ა) მუ მეხვარებ ბიბლიაშ მაგურაფალს, ბიბლიაშ კითხირიშ დროს უმოს ქიგეგას იეჰოვაშენ? (იაკ. 5:11). ბ) დანიელიშ ისტორიაშ მაგალითით გენწყით, მუჭო შილებე ბიბლიურ შემთხვევაშე იძირედას, მუ მოწონს დო მუ ვა მოწონს იეჰოვას.

⁹ ბიბლიაშ გურაფაშ დოჭყაფაშ უკულ ხეთეშე ელუჩანთ მაგურაფალს, ირდღას წეკითხას ბიბლია.a ჩქი მუჭო შემლებუნა მივეხვარათ თის, ბიბლიაშ კითხირიშ დროს უმოს ქიგეგას იეჰოვაშენ? შილებე ელუჩათ, ნამდა კითხირიშ უკულ დეფიქრას, მუშენ ენაჭარაფუ იეჰოვაქ მუშ სიტყვას თე მონაკვეთ დო თიშ ნამ თვისება იძირე თავრეშე. მაგალთო, ქიდეკვირით, მუჟამსით მოციქულ იაკობიქ იობიშ ისტორია გიშინ, ხვალე თიშ თვისება, მაგალთო, მოთვინება ვა მუშინუაფუნ, იეჰოვაშ თვისებეფ ხოლო მიშინუ, მუნერით რე, შხვეფიშ გაჭირებაშ გურშა მეღალა დო ჭყოლოფა (წეკითხით იაკობიშ 5:11).

¹⁰ ჩქი მოკონა, ბიბლიაშ მაგურაფალქ თითოეულ ბიბლიურ შემთხვევაშ კითხირიშ დროს ქოძირას, მუ მოწონს დო მუ ვა მოწონს იეჰოვას. მაგალთო, შილებე თინა მირაგადუნა, ნამდა ოკითხეთ გიშაგორ წიგნიშ „მარადიულო გეხარით ცხოვრებათ!“ ჩარჩოს „ქიდიჭყ ბიბლიაშ კითხირ“ მოჩამილ თემა „დანიელ ლომეფიშ ხაროს“. შემლებუნა თის ელუჩათ, დეფიქრას თეცალ კითხვეფშე: „მუშენ ირსხჷ იეჰოვაქ დანიელ? მუჭო იძირე თავრეშე, მუ მოწონს იეჰოვას?“ (დან. 6:10, 22). შილებე მუშ დუდის თეცალ მუდგარენეფ ხოლო ქოკითხას: „მუქ აღოლეს თინეფს, მიდგაქ ბრალ გედვეს დანიელს? მუჭო იძირე თავრეშე, მუ ვა მოწონს იეჰოვას?“ (დან. 6:4, 5, 24). ბოლოს შემლებუნა თინა ხოლო ქელუჩათ, ქიდეკვირას, ხოლო მუს გურაფლენს თე ისტორიაშე იეჰოვაშ გურშენ (დან. 6:26, 27).

11. მუჭო შემლებუნა მივეხვარათ ბიბლიაშ მაგურაფალს თიშ ძირაფას, ნამდა სინამდვილეს იეჰოვა ოგურუანს?

¹¹ ჩქი მანგარო მოხიოლუნა თიშ ძირაფა, მუჟამსით ბიბლიაშ მაგურაფალ ორწყე, მუ ჯგირ შედეგეფ მოუღ თიშა ბიბლიაშ გურაფას. მარა ჩქი ოკო მივეხვარათ თიშ ძირაფას, ნამდა თე ჯგირობუა, იეჰოვაშე, დიდებულ მასწავლებერშე მოურს (ეს. 30:20, 21). შილებე თინა ჩქინ მარდულ რდასჷ დო მოცქვანდან, მუჭოთ ჯგირ მასწავლებერს. ალალას მარდულობაშ გიმოხანტუა არასწორ ვა რე, მარა ჩქი ოკო ვეცადათ, ნამდა თის მთელ დიდება დო მარდულობა იეჰოვაშა გეგნვოღალაფუათ.

ᲥᲘᲛᲔᲮᲕᲐᲠᲘᲗ ᲑᲘᲑᲚᲘᲐᲨ ᲛᲐᲒᲣᲠᲐᲤᲐᲚᲡ, ᲘᲔᲰᲝᲕᲐᲨ ᲒᲣᲠᲨᲔᲜ ᲜᲐᲒᲣᲠᲔᲤ ᲪᲮᲝᲕᲠᲔᲑᲐᲡ ᲒᲔᲒᲛᲘᲠᲘᲜᲣᲐს

12, 13. მუჭო მეხვარებ იეჰოვაშ გურშენ მეღებულ რჩქინა ბიბლიაშ მაგურაფალს, მუჟამსით ბიბლიას რთულო ინანჭაფალ მონაკვეთის კითხულენს? (ქოძირით სურათ).

¹² ბიბლიაშ მაგურაფალქ ზუსტ რჩქინაშე სარგებელ მიღასინ, ცხოვრებას ოკო გიმირინუას თინა. მუჭო შემლებუნა მივეხვარათ თის თეშ კეთებას? პირველ, მუჟამსით ბიბლიაშე თიცალ მონაკვეთის კითხულენს, ნამდგაშ ინონჭაფა უჭირს, ქუდაგურეთ, ქიგიშინას, მუთ იეჰოვაშ გურშენ დიგურუ. მაგალთო, ღორონთიშ განაჩენიშ გურშენ ქოკითხულენს-და, შილებე უკვედას, მუშენ დასაჯ იეჰოვაქ ნამთინე დო მუშენ იჭყოლოფუ შხვეფ. მუჭო შეილებუნა თე დროს მეხვარათ, სწორ დასკვნაშა ქიმერთას?

¹³ შილებე თე დროს ბიბლიაშ მაგურაფალს ელუჩათ, დეფიქრას თიშე, მუთ უკვე უჩქჷ იეჰოვაშენ. მაგალთო, მუზმათ ძვირფას რე თიშო ადამიანიშ სიცოცხლე? (2 პეტ. 3:9). მუშმადიდა მუდგარენ აკეთ ჩქინ ორსხებელო, თიშ უმკუჯინუო, ნამდა ცოდამეფ ვორეთ? (ეფეს. 2:4, 5). ქასაჯენსო იეჰოვა ხალხის ვემსახურენან თეშ? ვარდა დასაჯებას იმსახურენსინ თის, ანტინენო თიშე? (გიშ. 34:6, 7). ნამთინე შემთხვევაშ გურშენ ბიბლია ვეჩიებ დეტალეფს, ნამუთ უჯგუშო ქუმოძირანდეს, მუშენ მიღჷ იეჰოვაქ მუდგარენ გადაწყვეტილება, მარა თე დეტალეფ იშენ ვა მოსაჭირუნა, მუშენდა იფჩინენთ ჩქინ ღორონთის დო დარწმუნებულ ვორეთ, ნამდა თინა ირო სწორას მოქმედენს.

14. მუჭო შეილებუნა მეხვარათ ბიბლიაშ მაგურაფალს, მუჟამსით კრებას მიდგარენშე ნაწყენ რე?

¹⁴ ქობძირათ, ხოლო მუჭო შემლებუნა ბიბლიაშ მაგურაფალს მივეხვარათ, იეჰოვაშ გურშენ ნაგურეფ ცხოვრებას გიმირინუას. შილებე თინა კრებეფს ოსწრუდას, მარა კრებას მიდგარენშე ნაწყენ რდასჷ. შილებე დაქ ვარდა ჯიმაქ თიცალ მუდგარენ თქუ ვარდა აკეთ, მუდგაქ თის გურს ქუმოხვად. ქელუჩით, დეფიქრას, მუჭო უჯინე იეჰოვა ჩქინ და დო ჯიმალეფს. მაგალთო, მუ მსხვერპლშა იდჷ იეჰოვაქ, მუდგათ ოძირუ, ნამდა უჸორს თინეფ? (იოან. 3:16). მუსხით მნიშვნელოვან რე თიშო ქრისტიანეფ შქას ართობა? (ფსალმ. 133:1). მუს გინაფლენს თინა, მუჟამსით ორწყე, მუჭო ვოცადუთ, თე ართობაქ ვეკოცუას? (2 კორ. 13:11). ქიმეხვარით მაგურაფალს თიშ ძირაფას, მუჭო ოხიოლ იეჰოვას, მუჟამსით მთელ ყურადღება და დო ჯიმალეფიშ ჯგირ თვისებეფშა გინომღუნა დო ვართ ხოლო თინეფიშ შეცდომეფშა.

15, 16. ა) სერიოზულ გადაწყვეტილებაშ მეღებაშ დროს, მუჭო შეულებ ბიბლიაშ მაგურაფალს იესოშ მაგალითიშ მეჸუნა? (იოან. 8:29). ბ) მუჭო მეხვარ მარიანექ ბიბლიაშ მაგურაფალს სწორ გადაწყვეტილებაშ მეღებას? (ქოძირით სურათ).

¹⁵ ხოლო ართ სიტუაცია, მუდგაშ დროს შეილებუნა ბიბლიაშ მაგურაფალს იეჰოვაშ გურშენ რჩქინაშ გიმორნაფას მეხვარათ, გადაწყვეტილებეფიშ მეღება რე. შილებე დუდშე ყურადღება ქიმიოქციებაფუათ წიგნიშ „მარადიულო გეხარით ცხოვრებათ!“ 35-ა დუდშა „მუჭო მიბღათ სწორ გადაწყვეტილებეფ?“. მარა მუშ კეთება შეილებუნა, მუჟამსით ბიბლიაშ მაგურაფალქ ქოთ ქილოც, ქოთ გეგმირკვუ, მარა იშენით უჭირს გადაწყვეტილებაშ მეღება? შილებე თინა ვა ხვადუდას, ნამ ბიბლიურ პრინციპ მეურე მუშ სიტუაციას. თეცალ დროს ქელუჩით, დეფიქრას იესოშ მაგალითშე. მუჭო ღებულენდჷ თინა გადაწყვეტილებეფს? იესოქ თქუ: „ირო თის ვორთუქ, მუთ [მუმაშ] გურს ოჰამ“ (წეკითხით იოანეშ 8:29). ქელუჩით, ქოკითხას მუშ დუდის: „მუთ გიმიბრკვი დო იეჰოვაშ გურშენ მუთ იბგურენ თიშ თანახმას, ნამ გადაწყვეტილება მუᲰამუანს თიშ გურს?“. ჯგირ გადაწყვეტილება თინა რე, ნამუთ იეჰოვას ახიოლე.

¹⁶ ჩილეს მახორუ ართ ბიბლიაშ მაგურაფალქ სერიოზულ გადაწყვეტილებაშ წოხოლე ქიგედირთჷ. ოჯახიშ წევრეფ უჩემენდეს, დეთანხმუკო თიცალ სამუშას, სოდეთ ჯგირ ხელფას აღვენუდ, მარა კრებეფ აჸიდ გაჩილითაფარ. თიშ ბიბლიაშ მასწავლებერ, მარიანე, იშინანს: „ელუჩ, დეფიქრუკო, მუჭო ოგინებაფუანდ იეჰოვას დუდის თიშ გადაწყვეტილება – ახიოლედუო დოვარ ეწყინებუდ? თინა ხოლო უწი, კონკრეტულო თე საკითხშენ ხოლო ქილოცუკო დო ქიდეკვირუკო, მუჭო უპასუხენდჷ იეჰოვა. თიქ ვარია ქოთქუ თე სამუშაშენ დო გვალო მალას შხვა სამუშა ქოძირ, ნამუთ კრებეფიშ დასწრებას ვეცილებუდ“. ქიდეკვირით, მუ აკეთ მარიანექ – თიშ მანგიორო, ნამდა ბიბლიაშ მაგურაფალს პირდაპირ გინუჭყვიდუკო, მუ აკეთუკონ, ქიმეხვარ, დეფიქრუკო თიშე, მუთ იეჰოვაშ გურშენ უჩქუდ. შედეგო, თე შემთხვევაქ თინა უმოსო დაახლოვ იეჰოვაწკუმა. მარიანე თიშ გურშენ იჩიებ: „თიქ ქიდიგურუ, ნამდა იეჰოვაშ თაყვანიშცემას პირველ ადგილს ქიგვორინუანთ-და, თინა იზრუნენს ჩქინდე“.

ᲘᲔᲰᲝᲕᲐᲨ ᲒᲐᲩᲘᲜᲔᲑᲐᲤᲐᲡ ᲙᲣᲠᲗᲮᲔᲕᲔᲤ ᲛᲝᲸᲣᲜᲡ

17. მუ რე ჩქინ მიზან, მუჟამსით პიროვნებას ბიბლიას ვოგურუანთ?

¹⁷ პიროვნება ბიბლიაშ გურაფაშ დროს ბრელ მნიშვნელოვან მუდგარენს გურაფლენს. მაგალთო, თიცალ ძირითად ბიბლიურ გურაფეფს, მუნერით რე, ღურელეფიშ მდგომარეობა, გიშაჸიდირალ დო ღორონთიშ სამეფო. თეს გეძინელ, თინა ორგანიზაციულ საკითხეფს ხოლო გურაფლენს, მაგალთო, მუჭო რე ორგანიზებულ იეჰოვაშ მოწმეეფიშ ორგანიზაცია, მუჭო იტარებ ჩქინ შეხვალამეფ, მი რენა უხუცესეფ დო მუ როლს ასრულენს ხელმძღვანელ საბჭო. მარა ჩქინ მიზან ბიბლიაშ მაგურაფალშა ხვალე ინფორმაციაშ გინოჩამა ვარინ, იეჰოვაშ გაჩინებაფა რე.

18. მუ კურთხევეფს ღებულენა თინეფ, მით იჩინებაფუანა იეჰოვას?

¹⁸ ჩქინო დიდ პატი რე, იეჰოვა გუვოჩინებაფუათ შხვეფს. თინეფს, მით იჩინებაფუანა დო თაყვანს ცენა იეჰოვას, ამდღა ხოლო ხარენა კურთხევეფით დო ბედნერ ცხოვრებათ (ფსალმ. 25:12–15). მომავალს არძა, მით ღებულენს რჩქინას იეჰოვაშ, „ნამდვილ ღორონთიშ გურშენ“, ულიებ სიცოცხლეს მიღენს (1 იოან. 5:20). კურთხევეფ თაქ ვეთებ. ბიბლია იჩიებ, ნამდა თის, მით ღორონთის იჩინებაფუანს დო იჸოროფუანს, „ღორონთ იჩინენს“ (1 კორ. 8:3). თაშ რე, ირფელიშშემალებე ღორონთ ყურადღებას მაქციენა დო მუშ მეგობრეფო მემრჩქინანა. მართალო მუშმადიდა ბედნერობა რე, იჩინენდე ნამდვილ ღორონთის!