ქიმეხვარით ბიბლიაშ მაგურაფალეფს, ქიდიჭყან იეჰოვაშ მსახურება

1, 2. ა) მუ ოცილ ნამთინე ბიბლიაშ მაგურაფალს, ქიდიჭყას იეჰოვაშ მსახურება? ბ) მუს გუვარჩიენთ თე სტატიას?

ᲥᲘᲒᲘᲨᲘᲜᲘᲗ, დუდშე ხომ ვაიჭირდეს ნაბიჯიშ გინოდგუმა, ნამდა იეჰოვაშ მოწმეთ გინირთითკო? შილებე თიშა გოშქურუდეს, ნამდა თქვან თანამშრომელეფ, მეგობრეფ ვარდა ოჯახიშ წევრეფ ქიგეწინააღმდეგებუდეს. ვარდა ხოლო, შილებე ფიქრენდით, ნამდა ღორონთიშ ნორმეფ დღას ვადგაცვებედეს. თაშ ქორენ-და, ალბათ ჯგირო გარჩქილედან იჸი თი ბიბლიაშ მაგურაფალეფიშ, მიდგას უჭირა იეჰოვაშ მსახურებაშ დოჭყაფა.

² იესოს ჯგირო არჩქილედ, ნამდა თიცალ მუდგარენეფქ, მუთ ჟიშე მიფშინეთ, შილებე ეცილას პიროვნებას სულიერ რდუალას (მათ. 13:20–22). მარა თინა იშენით აგრძელენდჷ თიცალეფიშ მოხვარას, მით დუდის იჭოფუნდჷ თიშ მიმაჸუნალო გინორთაშე. თიქ მუშ მაგალითით ქაძირუ მოწაფეეფს, მუჭო მეხვარესკო თეცალ ადამიანეფს, 1) ქიმეხვადესკო, მუ ოცილუდეს ღორონთიშ მსახურებაშ დოჭყაფას, 2) უმოსო ქიჸოროფუესკო იეჰოვა, 3) პირველ ადგილს გიორინუესკო თიშ მსახურება დო 4) გიორჯგინესკო სირთულეეფს. ქობძირათ, ჩქი მუშ გურაფა შემლებუნა თი ირფელშე, მუთ იესოქ მოწაფეეფს დაგურუ, ნამდა წიგნიშ „მარადიულო გეხარით ცხოვრებათ!“ საშვალებათ, ქიმვეხვარათ ბიბლიაშ მაგურაფალეფს, ქიდიჭყან იეჰოვაშ მსახურება.

ᲥᲘᲛᲔᲮᲕᲐᲠᲘᲗ, ᲥᲝᲫᲘᲠᲐᲡ, ᲛᲣ ᲝᲪᲘᲚ ᲘᲔᲰᲝᲕᲐᲨ ᲛᲡᲐᲮᲣᲠᲔᲑᲐᲨ ᲓᲝᲭᲧᲐᲤᲐᲡ

3. მუ შილებედ ოცილუდუკო ნიკოდემეს იესოშ მოწაფეთ გინორთას?

³ ნიკოდემეს, იუდეველეფიშ ართ-ართ მმართველს ხოლო ოცილუდ მუდგარენ, ნამდა იესოშ მოწაფეთ გინირთუკო. იესოშ მსახურებაშ დოჭყაფაშე გვალო ჭიჭე ხანშა, სოდგარენ ამშვ თუთაშა, ნიკოდემეს უკვე წანდჷ, ნამდა იესო ღორონთშე მოშქუმალირ მესია რდჷ (იოან. 3:1, 2). მარა თიქ, ფარისეველეფშა ოშქურუდუნ თიშენ, სერით, ტყობაშე, მერთჷ იესოშა დარაგადაფშა (იოან. 7:13; 12:42). შილებე ნიკოდემე ფიქრენდუკო, ნამდა იესოშ მიმაჸუნალო გინირთუდ-და, მუშ ქონებას დო ადგილს მიოდინუანდ.a

4. მუჭო მეხვარ იესოქ ნიკოდემეს, ქინანჭუკო, მუს ითხინდჷ იეჰოვა თიშე?

⁴ მართალ რე, ნიკოდემეს ჯგირო უჩქუდ მოსეშ კანონ, მარა ბოლოშა ვენანჭუდ, მუს ითხინდჷ იეჰოვა თიშე. მუჭო მეხვარ იესოქ თის? თიქ ვედიზარუ ნიკოდემეშა დროშ დათმება დო მზათ რდჷ, სერით ხოლო ქეჩუკო. თეწკუმა ართო, იესოქ გასაგებო გეუნწყჷ თის, მუ ოკო აკეთუკო, ნამდა მუშ მოწაფეთ გინირთუკო: ოკო ინარღუკო ცოდეფ, წყარს დინათუკო დო ირწმუნუკო ღორონთიშ სქუა (იოან. 3:5, 14–21).

5. მუჭო შემლებუნა მივეხვარათ ბიბლიაშ მაგურაფალს თიშ ძირაფას, მუ ოცილ სულიერო წიმი ულას?

⁵ შილებე თქვან ბიბლიაშ მაგურაფალ მანგარ ჯგირო ინანჭუდას ბიბლიაშე ნაგურეფუს, მარა იშენით უჭირდას იეჰოვაშ მსახურებაშ დოჭყაფა დო ვარწყედას, მუ რე თეშ მიზეზ. მაგალთო, შილებე სამუშა მიდმუღანდას დროს ვარდა ხოლო წინააღმდეგობა უღუდას ოჯახშე, მუთ ოცილ, გეგნოდგას ნაბიჯ დო იეჰოვაშ მსახურება ქიდიჭყას. თაშ ქორენ-და, იესოცალო, თქვა ხოლო დრო გეგმურთით თის, ნამდა ქიმეხვარათ. შეილებუნა ყავაშ ოშუმშა ქუდაპატიჟათ ვარდა ართო გესეირნათ. თეცალ არაოფიციალურ გარემოს შილებე თიქ გურ გეგნოიფაჩან დო ქიგეჩუან მუშ პრობლემეფშე. ქიმეხვარით თქვან ბიბლიაშ მაგურაფალს, ქინანჭას, მუ აფჷ ოთირალ, დო თინა ხოლო ქაძირეთ, ნამდა თენა თქვან ხათრით ვარინ, იეჰოვაშ ჸოროფაშ გურშენ ოკო აკეთას.

6. მუჭო შეილებუნა მეხვარათ ბიბლიაშ მაგურაფალს, ნაგურეფუშ გიმარნაფალო საჭირო გაბედულებაქ ქიმიაჩას? (1 კორ. 16:13).

⁶ ბიბლიაშ მაგურაფალს ნაბიჯეფიშ გინადგუმალო საჭირო გაბედულებაქ ქიმიაჩასინ, საჭირო რე, ჯერდას, ნამდა იეჰოვა ქიმეხვარებ ბიბლიურ ნორმეფით ცხოვრებას (წეკითხით 1 კორინთელეფიშ 16:13). მუშ კეთება შეილებუნა თე კუნთხუთ თიშ მახვარებელო? თქვა მუდგარენით სკოლაშ მასწავლებერს მოგენთ. ქიგიშინით სკოლას რდითინ თი დრო; ნამ მასწავლებერ გიჸორდეს არძაშ უმოსო? ალბათ თინა, ნამუთ მოთვინებათ გოგურუანდეს დო გირაგადუდეს, ნამდა ირფელ გიშგალედეს. თეშნერო, ჯგირ ბიბლიაშ მასწავლებერ ხოლო, მაგურაფალს ხვალე ღორონთის მუ მოწონს დო მუ ვა მოწონსინ თის ვაგურუანსინ, არწმუნენს თის, ნამდა იეჰოვაშ მოხვარათ, შეიალებე ცხოვრებაშ თირუა. მუჭო შეილებუნა თქვა, თეცალ ჯგირ მასწავლებერ რდათჷ?

ᲥᲘᲛᲔᲮᲕᲐᲠᲘᲗ, ᲣᲛᲝᲡᲝ ᲥᲘᲸᲝᲠᲝᲤᲣᲐᲡ ᲘᲔᲰᲝᲕᲐ

7. მუჭო ოხვარუდ იესო მუშ მარჩქილეეფს, უმოსო ქიჸოროფუესკო იეჰოვა?

⁷ იესოს უჩქუდ, ნამდა ღორონთიშ ჸოროფას შეულებუდ ქიმეხვარუკო თიშ მოწაფეეფს, გეგმირინუესკო თიშ გურშენ ნაგურეფ დო იცხოვრესკო თიშ ნებაშ თანახმას. ათეშენ მუშ მიმაჸუნალეფს ხშირას ურაგადუდ თიცალ მუდგარენეფს, მუთ უმოსო ქუჸოროფუანდ თინეფს ზეციერ მუმას. მაგალთო, ართშა თიქ იეჰოვა შეადარ კოჩის, ნამუთ ირფელ ჯგირს არზენს მუშ სქუალეფს (მათ. 7:9–11). ხოლო ართ იგავს იესოქ იეჰოვა მოჸოროფე მუმას შეადარ, ნამდგაქ გურშა ქიხუტოლუ ჸუდეშა დორთელ შარას ეჩილათირ სქუა. იესოშ მარჩქილეეფშე ბრელს შილებე შუროთ ვა ჸუნდუკო თიცალ მზრუნველ დო მოჸოროფე მუმა, მუნერით თე მაგალითეფს რე ეჭარილ. წერმიდგინით, მუჭო გოუტიბუანდ თინეფს გურს თიშ გაგება, ნამდა იეჰოვას თეშმანწარას უჸორს მიწიერ სქუალეფ (ლუკ. 15:20–24).

8. მუჭო შეილებუნა მეხვარათ ბიბლიაშ მაგურაფალს, უმოსო ქიჸოროფუას იეჰოვა?

⁸ თქვა ხოლო ბიბლიაშ მაგურაფალს იეჰოვაშ სქვამ თვისებეფშა ყურადღებას ხშირას ქიმიოქციებაფუანთ-და, თის უმოსო ქეჸოროფებ იეჰოვა. ირ ბიბლიაშ გურაფაშ დროს ქუდაკვირებაფეთ თის, მუჭო იძირე იეჰოვაშ ჸოროფა თი ირფელშე, მუდგას არჩიენთ. მაგალთო, მუჟამსით ჩიება გაღვენუნა გიშაჸიდირალშე, ქაძირეთ თის, ნამდა იეჰოვაქ თენა ადამიანეფშო მუჭოთ ჯგუფშო ვარინ, პირადო მუშო ხოლო აკეთ (რომ. 5:8; 1 იოან. 4:10). თაშ ნამდა, მუჟამსით ბიბლიაშ მაგურაფალ ქოძირუნს, პირადო მუ მუჭო უჸორს იეჰოვას, მუს ხოლო უმოსო ქეჸოროფებ თინა (გალ. 2:20).

9. მუქ მეხვარ მაიკლის, დითირუკო ცხოვრებაშ წეს?

⁹ გუვარჩუათ მაიკლიშ შემთხვევა, ნამუთ ინდონეზიაშე რე. თის ჭეშმარიტება ბაღანობაშე უჩქუდ, მარა ვა ნათე. 18 წანა გათუნ, შხვა ქიანაშა მიდართჷ, სოდეთ დიდ მაშნას გეხედ. უკულ თიქ დირთჷ მუშ ქიანაშა დო დეოჯახ, მარა ჭიჭე ხანშა კინ მიდართჷ ომუშებშა საზღვარგარეთ, თეშ, ნამდა ჩილ დო სქუა ვა უჸუნაფ. მიკილ დროქ დო მაიკლიშ ოსურ დო სქუაქ ბიბლიაშ გურაფა ქიდიჭყეს დო სულიერო წიმი მიდართეს. მაიკლის კინ აჸუ ჸუდეშა დართალქ, მუშენდა დიდაქ დოუღურ დო მოხუცებულ მუამუშის ოკო მუკულუკო. თე დროს მუქ ხოლო ქიდიჭყჷ ბიბლიაშ გურაფა. მუჟამსით არჩიენდეს წიგნიშ „მარადიულო გეხარით ცხოვრებათ!“ 27-ა დუდის, მაიკლშა მანგარო იმოქმედ მასალაქ, ნამუთ მოჩამილ რდჷ პუნქტის „ქიგეგით უმოს“. თიქ წერმიდგინ, მუჭო იგინანდ იეჰოვა დუდის მუშ სქუაშ წამებაშ მიმაჯინუ დო ქანგარინ. თექ მაიკლის გიშაჸიდირალიშ მიმართ მარდულობა გურჩქინ დო ქიმეხვარ ცხოვრებაშ თირუას დო ნათუას.

ᲥᲘᲛᲔᲮᲕᲐᲠᲘᲗ, ᲪᲮᲝᲕᲠᲔᲑᲐᲡ ᲞᲘᲠᲕᲔᲚ ᲐᲓᲒᲘᲚᲡ ᲘᲔᲰᲝᲕᲐ ᲒᲘᲝᲠᲘᲜᲣᲐᲡ

10. მუჭო მეხვარ იესოქ მუშ პირველ მოწაფეეფს, ცხოვრებას პირველ ადგილს იეჰოვაშ მსახურება ქიგიორინუესკო? (ლუკ. 5:5–11; ქოძირით სურათ).

¹⁰ იესოშ პირველ მოწაფეეფქ ხეთეშე მეხვადეს, იესო მესია რდუნ, მარა თინეფს მოხვარაქ დესაჭირეს თიშ მიოხვამლაფარო, ნამდა მთელ მონდომათ ოკო ქიდიჭყესკო სახიოლო ამბეშ ქადაგება. მაგალთო, პეტრე დო ანდრიაქ ხეთეშე ირწმუნეს იესო, მარა უცფას ვეკუჸუნალუნა თიშა. მუჭოთ იძირენ, თინეფ იაკობ დო იოანეწკუმა ართო ჩხომენდეს დო მანგარ ჯგირო აფუდეს გენწყილ თე საქმე. მარა, მუდგარენ პერიოდიშ უკულ, მუჟამსით იესოქ ქიმერთჷ თინეფშა დო უწუ, ქეკმაჸუნითია, პეტრექ დო ანდრიაქ „ქიდიტუეს ბადეეფ დო [იესოს] ქეკაჸუნეს“ (მათ. 4:18, 19; მარ. 1:16–20). მუქ მეხვარ თინეფს, ფარაშ შიბაშ წოხოლე ქადაგება ქიგიორინუესკო? მუჭოთ ლუკაშ სახარებაშე ბგებულენთ, იესოქ თიცალ სასწაულ აკეთ თინეფიშ წოხოლე, მუდგაქ დარწმუნ თე მოწაფეეფ, ნამდა იეჰოვა ქიზრუნენდ თინეფშე (წეკითხით ლუკაშ 5:5–11). მუჟამსით პეტრე დო ანდრიაქ გინოჭყვიდეს, იესოს ეკაჸუნესკო, ალბათ თინეფ მუდგაინს ქიმიფიქრენდეს, ნამდა მუნეფიშ ოჯახის აუცილებერქ ვა მაკორდუკო.

11. მუჭო შემლებუნა ჩქინ პირად შემთხვევეფით რწმენა გაუმანგარათ მაგურაფალს?

¹¹ ჩქი იესოცალო სასწაულეფიშ კეთება ვეშემლებუნა, მარა შემლებუნა ბიბლიაშ მაგურაფალს ქოუწუათ თიცალ შემთხვევეფ, სოვრეშეთ იძირე, მუჭო ალურე იეჰოვა თინეფს, მით ცხოვრებას პირველ ადგილს გიორინუანა თიშ მსახურებას. შეილებუნა ქიგიშინათ, თქვა მუჭო მიგეხვარეს იეჰოვაქ, მუჟამსით დიჭყით კრებაშ შეხვალამეფშა გილულა. მაგალთო, შილებე თქვან უნჩაშშა გაჸუეს ოთხუალქ, ჭიჭე ადრე გოიტუესკო სამუშაშე, ნამდა კრებაშ შეხვალამეფშა შეგალებუესკო გილულაქ დო შილებე თეშ მიზეზიქ ხოლო გაჸუეს ეიონწყუმალქ. ქეჩით თქვან მაგურაფალს, მუჭო მიგეხვარეს იეჰოვაქ, მუჟამსით თიშ მსახურება პირველ ადგილს გიორინეთ დო მუჭო გაიმანგარეს თეშ ძირაფაქ რწმენა.

12. ა) მუშენ რე ჯგირ, ბიბლიაშ გურაფაშა შხვადოშხვა და დო ჯიმა იპჸუნათ? ბ) მუჭო შეილებუნა ვიდეოეფიშ საშვალებათ მეხვარათ მაგურაფალს? ქიმიჸუნით მაგალით.

¹² მაგურაფალეფშა ჯგირო იმოქმედენს შხვა და დო ჯიმალეფიშ ისტორიეფიშ მორჩქილაფა ხოლო, მიდგაქ მუნეფიშ ცხოვრებას მუდგარენეფ თირუეს, ნამდა იეჰოვა პირველ ადგილს ქიგიორინუესკო. ათეშენ, ქეცადით, ბიბლიაშ გურაფაშა მიდეჸუნათ თიცალ და დო ჯიმალეფ, მიდგას შხვადოშხვანერ ისტორიეფ უღუნა. ქოთხით თინეფს, ქეჩუან, მუჭო გეგეს ჭეშმარიტება დო მუ აკეთეს, ნამდა იეჰოვაშ მსახურება ჸოფედუკო თინეფშო არძაშ უმოს მნიშვნელოვან. თეწკუმა ართო, დრო გეგმურთით თის, ნამდა მაგურაფალწკუმა ართო ქუჯინათ ვიდეოეფს, ნამუთ მოჩამილ რე წიგნის „მარადიულო გეხარით ცხოვრებათ!“, პუნქტის „ქიგეგით უმოს“ დო, საჭიროებაშ მიხედვით, „დამატებით მასალას“. მაგალთო, 37-ა დუდიშ გარჩიებაშ დროს შილებე თიწკუმა ართო ქიჩუათ თი პრინციპეფშე, ნამუთ ძირაფილ რე თე დუდის მოჩამილ ვიდეოს „იეჰოვა ქიზრუნენს ჩქინ საჭიროებეფშო“.

ᲥᲘᲛᲔᲮᲕᲐᲠᲘᲗ, ᲒᲘᲝᲠᲯᲒᲘᲜᲐᲡ ᲡᲘᲠᲗᲣᲚᲔᲔᲤᲡ

13. მუჭო მამზად იესოქ მოწაფეეფ სირთულეეფშო?

¹³ იესოქ მუსხირენშა გაფრთხილ მუშ მოწაფეეფ, ნამდა შხვეფშე წინააღმდეგობეფს ქეშეხვადუდეს, თინეფ შქას ოჯახიშ წევრეფშე (მათ. 5:11; 10:22, 36). ღურაშახ ჭიჭე ხანით ადრე თიშე ხოლო გაფრთხილ, ნამდა შილებედ მუნეფიშ რწმენაშ გურშენ დოჸვილესკო (მათ. 24:9; იოან. 15:20; 16:2). ათეშენ უწუ, ნამდა ფრთხილას რდესკო მსახურებაშ დროს. თიქ ელუჩ მოწაფეეფს, ვენირზესკო მოწინააღმდეგეეფს დო გურ ქუგუჩესკო, მუს თქუანდეს დო მუჭო მიქციებუდეს, ნამდა ქეშიალებუესკო მსახურებაშ გაგრძელებაქ.

14. მუჭო შემლებუნა მუვამზადათ მაგურაფალ წინააღმდეგობაშო? (2 ტიმ. 3:12).

¹⁴ იესოცალო, ჩქი ხოლო შემლებუნა მუვამზადათ მაგურაფალ წინააღმდეგობაშო დო გეუნწყათ, მუ შილებე უწუან ვარდა მუჭო შილებე მექცუან თანამშრომელეფქ, მეგობრეფქ ვარდა ოჯახიშ წევრეფქ თიშ გურშენ, ნამდა ბიბლიას გურაფლენს (წეკითხით 2 ტიმოთეშ 3:12). ნამთინე თანამშრომელქ შილებე თიშ გურშენ გიაძიცუას, ნამდა ბიბლიურ ნორმეფიშ თანახმას დოთირუ ცხოვრება. შხვეფს, თინეფ შქას ოჯახიშ წევრეფს ხოლო, შილებე ვემეწონან დო გაკრიტიკან ბიბლიურ გურაფეფ. მუთ უმოს მალას მუვამზადენთ ბიბლიაშ მაგურაფალს წინააღმდეგობეფშო, თით უმოს უჯგუშო არჩქვენუ, მუ თქუას დო მუჭო მიქცუას, მუჟამსით წინააღმდეგობას ქეშეხვადუ.

15. მუქ შილებე მეხვარას ბიბლიაშ მაგურაფალს ოჯახშე წინააღმდეგობაშ დროს?

¹⁵ მაგურაფალ წინააღმდეგობას ოჯახიშ წევრეფშე ქოხვადუნ-და, ქელუჩით დეფიქრას, მუ შილებე რდასჷ თეცალ დამოკიდებულებაშ მიზეზ. შილებე თინეფ ფიქრენდან, ნამდა თის ტვინ გამნურთინუეს დო დაღორეს ვარდა შილებე უბრალოთ გლახა წარმოდგენა უღუდან იეჰოვაშ მოწმეეფშენ. იესოშ ნათესეეფს ხოლო ვა მოწონდეს თი ირფელ, მუდგას თინა ორთუდ, დო იჩიებუდეს, ჭკუაშე გინულებუნია (მარ. 3:21; იოან. 7:5). ათეშენ ქუდაგურეთ მაგურაფალს, მოთვინება გიმირჩქინას დო ტაქტიან რდასჷ შხვეფწკუმა, თინეფ შქას ოჯახიშ წევრეფწკუმა ხოლო.

16. მუჭო შემლებუნა მივეხვარათ ბიბლიაშ მაგურაფალს, ტაქტიანო ქეჩუას შხვეფს მუშ რწმენაშენ?

¹⁶ მაგურაფალიშ ოჯახიშ წევრეფს ბიბლიურ გურაფეფშე კითხვეფ ქოუღუნან-და, ჯგირ იჸუაფ, თიქ ბრელ საკითხშე ართათ ვეჩუას თინეფს, მუშენდა, თაშ გაკეთენს-და, შილებე თინეფქ თეზმა ინფორმაციათ თეშ გეგნიხარგან, ნამდა მაჟია შქას თიწკუმა მუშ რწმენაშ გურშენ ჩიება ვემიკორინუან. ათეშენ ქელუჩით, თისხი იჩუას მუშ რწმენაშენ, ნამდა უკულიან ჩიებაშო ხოლო ქიდიტუას შარა (კოლ. 4:6). თის შეულებ ოჯახიშ წევრეფს ჩქინ ვებსაიტ jw.org ქაძირუას დო ელუჩას, თექ მიშელან, მუთ საშვალებას ქიმეჩანს თინეფს, მუნეფიშით მიღან მუზმა ოკონან თიზმა ინფორმაცია იეჰოვაშ მოწმეეფიშ გურშენ.

17. მუჭო შეილებუნა მამზადათ ბიბლიაშ მაგურაფალ თი კითხვეფშა ოპასუხებელო, ნამუთ შილებე შხვეფს იეჰოვაშ მოწმეეფიშ გურშენ ურჩქინდუდან? (ქოძირით სურათ).

¹⁷ შეილებუნა ჩქინ ვებსაიტის jw.org განყოფილებას „კითხვეფ, ნამუთ ხშირას ურჩქინდუნა“ მოჩამილ ინფორმაცია ხოლო გეგმირინუათ, ნამდა ქიმეხვარათ ბიბლიაშ მაგურაფალს, მარტივ პასუხეფ მამზადას თი კითხვეფშე, ნამდგაქ შილებე ოჯახიშ წევრეფს ვარდა თანამშრომელეფს გურჩქინდან (2 ტიმ. 2:24, 25). თეს გეძინელ, ირ დუდიშ ბოლოს წიგნშე „მარადიულო გეხარით ცხოვრებათ!“ გარჩით პუნქტ „ნამთინექ შილებე თქუას“. ქელუჩით ბიბლიაშ მაგურაფალს, მუშ სიტყვეფით ქოთქუას, მუჭო უპასუხენდ თე კითხვას. მორდებაქ ვა გაშუან, ქოუწუათ თის, მუჭო შეულებ უჯგუშო უპასუხას. თეცალ პრაქტიკულ მომზადება ქიმეხვარებ თის, უმოს თამამას გეუნწყას მუშ რწმენა შხვეფს.

18. მუჭო შეილებუნა მეხვარათ ბიბლიაშ მაგურაფალს, მოუნათლავ მაუწყებელო გინირთას? (მათ. 10:27).

¹⁸ იესო ურაგადუდ მუშ მოწაფეეფს, ნამდა ირკოჩის ქუგაგებაფუესკო სახიოლო ამბე (წეკითხით მათეშ 10:27). მუთ უმოს მალას დიჭყანს ბიბლიაშ მაგურაფალ მუშ რწმენაშენ შხვეფწკუმა ჩიებას, თით უმოს მალას ქიგინანს იეჰოვაშ მოხვარას დო თიშ მიმართ ნდობა გურჩქინდუ. მუჭო შეილებუნა მეხვარათ თეშ კეთებას? მუჟამსით კრებას სამქადაგებლო კამპანიაშ გურშენ იკეთებ განცხადება, ქელუჩით თის, დეფიქრას, მუ აფჷ ოკეთებელ თიშო, ნამდა მაუწყებელქ ქიჸუას. გეუნწყით, ნამდა თეცალ კამპანიეფიშ დროს, მუჭოთ წესინ, უმოს ადვილ რე ქადაგება. თეწკუმა ართო, თის შილებე ქიმეხვარას შქამარაშ შეხვალამას დავალებეფით გიშულაქ, მუთ შხვეფშა მუშ რწმენაშ თამამას ენწყუმაშო მამზადენს. ათეშენ ჯგირ იჸი, მიზანო უღუდას თეცალ დავალებეფით გიშულა.

ᲥᲐᲒᲘᲜᲐᲤᲔᲗ, ᲜᲐᲛᲓᲐ ᲠᲯᲔᲠᲐ ᲗᲘᲨ

19. მუჭო ოძირუ იესოქ, ნამდა ჯერდჷ მუშ მოწაფეეფიშ დო მუჭო შემლებუნა ჩქი ხოლო თეშ კეთება?

¹⁹ ონდო დოღურუდ დო ზეცაშა იშჷ, იესოქ მუშ მოწაფეეფს უწუ, ნამდა, ჭიჭე ხანით დაშორებაშ უკულ, თინეფ კინ ართო იჸუაფუდეს. მოწაფეეფქ თიმწკუმა ვემეხვადეს, ნამდა იესო თინეფიშ ზეცაშა ულაშენ იჩიებუდ. მარა იესოს ყურადღება თინეფიშ ურჩქინჯობაშა დო მუდგარენეფს ვენანჭუდესინ თეშა ვა აფუდ გინოღალირ. თინა უმოსო თის ოკვირუდ, ნამდა თინეფ ართგურ ხალხ რდესჷ დო იეჰოვაშ გურიშ გახარება ოკოდეს (იოან. 14:1–5, 8). თის უჩქუდ, ნამდა მოწაფეეფს დრო ოსაჭირუდეს ნამთინე საკითხიშ ინანჭაფალო, მაგალთო, თიშ, ნამდა ზეციურ ჯილდოს მიღენდეს (იოან. 16:12). იესოცალო, მოკონა ჩქი ხოლო ქუვოგინაფუათ ბიბლიაშ მაგურაფალს, ნამდა ბჯერა, თის მთელ გურით ოკო, იეჰოვას ემსახურას.

20. მუჭო ოძირუ ართ დაქ, ნამდა ჯერდჷ მუშ ბიბლიაშ მაგურაფალიშ?

²⁰ ოკო ბჯერდან, ნამდა ჩქინ მაგურაფალს მართალო ოკო სწორას მოქციება. გუვარჩუათ მალავის მახორუ ართ დაშ, ჩიფუნდოშ შემთხვევა. თიქ ბიბლიაშ გურაფა ქიდიჭყჷ წიგნით „მარადიულო გეხარით ცხოვრებათ!“ ართ ახალგაზრდა ძღაბწკუმა, ალინაფეწკუმა, ნამუთ კათოლიკე რდჷ. მა-14 დუდიშ გარჩიებაშ უკულ ჩიფუნდოქ კითხჷ თის, მუს ფიქრენდჷ თაყვანიშცემას გამოსახულებეფიშ გიმორნაფაშ გურშენ. ალინაფეს გურქ მურთჷ დო უწუ: „თენა პირად გინაჭყვიდირალ ამბე რე!“. ჩიფუნდოქ იფიქრჷ, ნამდა თეშ უკულ ალინაფე გურაფაშ გუმაგრძელებერ ვა რდჷ. მარა თაშ ვეჸუ დო ჩიფუნდოქ მოთვინებათ გუგრძელ თის გურაფა თი იმენდით, ნამდა ჭიე-ჭიეთ ქინანჭუდ თე საკითხის. მუსხირენ თუთაშ უკულ, 34-ა დუდიშ გარჩიებაშ დროს, ჩიფუნდოქ წიგნის მოჩამილ თე კითხვა ქუდუსვჷ თის: „მუ ჯგირობუა მოიღეს ბიბლიაშ დო ჭეშმარიტ ღორონთ იეჰოვაშ გურშენ გურაფაქ?“. ჩიფუნდო იშინანს ალინაფეშ პასუხის: „თიქ ბრელ ჯგირ მხარეწკუმა ართო, თინა ხოლო თქუ, ნამდა იეჰოვაშ მოწმეეფ მუთუნ თიცალს ვართუნა, მუდგაშეთ ბიბლია იჩიებ, ნამდა გლახა რე“. მალას ალინაფექ მიოტუ გამოსახულებეფიშ გიმორნაფა დო დინათ.

21. მუჭო შემლებუნა ქიმვეხვარათ ბიბლიაშ მაგურაფალს, ქიდიჭყას იეჰოვაშ მსახურება?

²¹ მართალ რე, ბიბლიაშ მაგურაფალეფს „იეჰოვა რდუნსჷ“, მარა ჩქი ხოლო ბრელ მუდგარენიშ კეთება შემლებუნა თინეფიშ წიმი ულაშო (1 კორ. 3:7). მუჭოთ გუვარჩით, მოკონა, თინეფს ხვალე ღორონთ მუს თხულენსინ თენა ვადვოგურუათინ, ქიმვეხვარათ, ქიჸოროფუან იეჰოვა. თეწკუმა ართო, ვოხვარუთ, იშო ხოლო გეგმოხანტან იეჰოვაშ ჸოროფა თით, ნამდა ცხოვრებას პირველ ადგილს გიორინუან თიშ მსახურება. თეს გეძინელ, ვოგურუანთ, მუჭო მიენდან იეჰოვას სირთულეეფიშ დროს. დობოლოს, ვოძირანთ, ნამდა ბჯერა თინეფიშ, მუთ არწმუნენს თინეფს, ნამდა შეიალებენა იეჰოვაშ ნორმეფიშ თანახმას ცხოვრება დო თიშ ართგურო მსახურება.