ქიმვეხვარათ ბიბლიაშ მაგურაფალეფს, გინირთან იესოშ ნათილ მოწაფეეფო

1. მუ უწუეს იესოშ მოწაფეეფქ აკოშაყარელ ხალხის?

შხვადოშხვა ნინაშა მორაგადე ბრელ ადამიანქ გეკიშაყარ იერუსალიმს. თე დღას სარკო მუდგარენქ მოხვად. იუდეველეფიშ ჯგუფიქ თინეფიშ ნინაშა ქიდიჭყჷ ჩიება! თენა მართალო გასაკვირ რდჷ, მარა ხოლო უმოს გასაკვირ თინა რდჷ, მუ უწუეს თე იუდეველეფქ უცხოელეფს დო მუ უწუ მოციქულ პეტრექ არძას. თე ხალხიქ ქიგეგ, ნამდა იესო ქრისტეშ მიმართ რწმენას გავითარენდეს-და, შეიალებედეს რსხება. თინეფშა თეშ იმოქმედ თე ცნობაქ, ნამდა იკითხეს: „მუჭო მიფქცუათ?“. თეშ პასუხო პეტრექ უწუ: „დინათით“ (საქ. 2:37, 38).

2. მუს გუვარჩიენთ თე სტატიას? (ქოძირით სურათ გალენ გვერდის)

² თეშ უკულ სარკო მუდგარენქ მოხვად. თიმ დღას სოდგარენ 3 000 პიროვნებაქ დინათ დო გინირთჷ ქრისტეშ მოწაფეთ. თეშნერო დიჭყჷ მოწაფეეფიშ მომზადებაშ დიდებულ საქმექ, ნამუთ იესოქ დავალ მუშ მიმაჸუნალეფს. თე საქმე 21-ა საუკუნეს ხოლო იგრძელებ. ამდღა ჩქი მუსხირენ საათ ვა მობაღნა, ქიმვეხვარათ პიროვნებას, მზათ რდას დინათას. თეშო შილებე დემესაჭირან თუთეფქ, წანაქ ვარდა ხოლო უმოს მეტ დროქ. მითინს ბიბლიას ქუვოგურუანთ-და, ჯგირო მარჩქილედან იჸი, ნამდა მოწაფეეფიშ მომზადებაშო ბრელ ხანდა რე საჭირო. თე სტატიას გუვარჩიენთ, მუ შემლებნა ვაკეთათ, ნამდა ქიმვეხვარათ ბიბლიაშ მაგურაფალს, გინირთას იესოშ მოწაფეთ.

ქიმვეხვარათ ბიბლიაშ მაგურაფალს, გეგმირინუას ნაგურეფ

3. მუჭოთ მათეშ 28:19 დო 20-ის ჭარჷ, მუ ოკო აკეთას ბიბლიაშ მაგურაფალქ, ნამდა დინათას?

³ ნათუაშახ ბიბლიაშ მაგურაფალქ ცხოვრებას ოკო გეგმირინუას თინა, მუდგას ბიბლია ოგურუანს (წეკითხით მათეშ 28:19, 20). მუჟამსით თინა მეჸუნს ნაგურეფუს, აგურუ „გონიერ კოჩის“, ნამდგაქ, მუჭოთ იესოშ მაგალითის რე მოშინაფილ, კირდეს აშენ ჸუდე (მათ. 7:24, 25; ლუკ. 6:47, 48). მუჭო შემლებნა მივეხვარათ ბიბლიაშ მაგურაფალს, მიაჸუნას ნაგურეფუს? გუვარჩუათ თეშ სუმ საშვალება.

4. მუჭო შემლებნა მივეხვარათ ბიბლიაშ მაგურაფალს, გაგრძელას წიმი ულა? (ქოძირით ჩარჩო „ქიმვეხვარათ ბიბლიაშ მაგურაფალს, უღდას მიზნეფ დო ქიმიოჭირინუას თინეფს“)

⁴ ქიმვეხვარათ ბიბლიაშ მაგურაფალს, უღდას მიზნეფ. მუშენ რე თენა საჭირო? წერმიბდგინათ, ნამდა გინძე შარა გემძუნა დო მარა სქვამ ადგილეფს ქობძირუნთინ, ფჩენდუთ. თეშნერ მგზავრობაშ დროს დანიშნულებაშ ადგილ იზმათ შორს ვა მაძირუაფდან იჸი. თაშ რე ბიბლიაშ მაგურაფალწკუმა ხოლო. მუჟამსით თის აღვენუ ჭიჭე მიზნეფ დო ქიმიოჭირინუანს თინეფს, ქიმეხვადუ, ნამდა შეულებ ნათუაშ მიზანს ხოლო ქიმიოჭირინუას. ჯგირ იჸუაფ, გეგმიბრინუათ წიგნის „მარადიულო გეხარით ცხოვრებათ!“ მოჩამილ ჩარჩო „მიზან“, ნამდა ქიმვეხვარათ ბიბლიაშ მაგურაფალს წიმი ულას. თითოულ დუდიშ ბოლოს გუვარჩუათ, მუჭო მეხვარებ ბიბლიაშ მაგურაფალს თე მიზან, ნამდა გეგმირინუას ნაგურეფ. თიქ შხვა მიზანს ქიმიოჭირინუასინ ქუმოკონან-და, ქინვოჭარაფუათ თინა წიგნიშ თი ადგილს, სოდეთ გეჭარ „შხვა“. ირიათო გეგმიბრინუათ წიგნიშ თე ნაწილ, ნამდა ქიფჩუათ ბიბლიაშ მაგურაფალწკუმა ართო თიშ ჭიჭე დო დიდ მიზნეფშენ.

5. მუჭოთ მარკოზიშ 10:17—22-ს რე მოჩამილ, მუშ კეთება ელუჩ იესოქ ართ მდიდარ კოჩის დო მუშენ?

⁵ ქიმვეხვარათ ბიბლიაშ მაგურაფალს, დოთირუას ცხოვრებაშ წეს (წეკითხით მარკოზიშ 10:17—22). იესოს უჩქუდ, ნამდა მდიდარ კოჩშო ადვილ ვეჸუაფუდ, გეგმოჩკო ირფელ (მარ. 10:23). მარა იესოქ უწუ თეცალ კოჩის თე დიდ ცვლილება გაკეთკო. მუშენდა უჸორდჷ თინა. მინშა შილებე დუდ შებკავათ დო ბიბლიაშ მაგურაფალს ველუჩათ, მიაჸუნას ნაგურეფუს, მუშენდა ფიფქრენდათ, ნამდა ვა რე მზათ, დითირას. შილებე დროქ დესაჭირას, ნამდა პიროვნებაქ ჩეთხინუას ჯვეშ ჩვევეფ დო დითირას ახალ პიროვნებათ (კოლ. 3:9, 10). მარა მუთ უმოს მალას დიბჭყანთ ალალას თიშე ჩიებას, მუთ ოთირალ აფჷ, მაგურაფალ თით უმოს მალას დიჭყანს თირუას. თეცალ ჩიებათ ვოძირანთ, ნამდა ბზრუნენთ თიშე (ფსალმ. 141:5; იგავ. 27:17).

6. მუშენ ოკო დუსვათ ბიბლიაშ მაგურაფალს თიცალ კითხვეფ, სოვრეშეთ თიშ აზრის გებგენთ?

⁶ მნიშვნელოვან რე ბიბლიაშ მაგურაფალს თიცალ კითხვეფ ქუდვუსვათ, სოვრეშეთ გებგენთ თიშ აზრის კონკრეტულ საკითხშე. თენა მიმეხვარებნა, ქიგებგათ, მუს ფიქრენს თინა დო მუ წანს. თაშ რეგულარულო ქიმიფქციებუთ-და, უმოსო გემეადვილებნა, ქივმსჯელათ თიწკუმა თიცალ საკითხეფშე, ნამდგაშე გვალო შხვანერ შეხედულება უღჷ. წიგნის „მარადიულო გეხარით ცხოვრებათ!“ ბრელ თეცალ კითხვა რე მოჩამილ. მაგალთო, მა-4 დუდ ოკითხჷ მაგურაფალს: „მუჭო ფიქრენთ, მუს გინაფლენს იეჰოვა, მუჟამსით თიშ სახელს გიმირინუანთ?“ დო მა-9 დუდ ოკითხჷ: „მუ რე თი ნამთინე საკითხ, მუდგაშ გურშენ გოკონა ილოცათ?“. დუდშე ბიბლიაშ მაგურაფალს შილებე დროქ დესაჭირას, თეცალ კითხვეფშა პასუხიშ მიოჩამალო. ჩქი შემლებნა თის ყურადღება გუმახვილათ თექ მოჩამილ ბიბლიურ მუხლეფ დო სურათეფშა.

7. მუჭო შემლებნა რეალურ შემთხვევეფიშ ეფექტურო გიმორნაფა?

⁷ მუჟამსით ბიბლიაშ მაგურაფალ ქენანჭუ, მუ აფჷ ოკეთებელ, ჯგირ იჸუაფ, გეგმიბრინუათ რეალურ შემთხვევეფ, ნამდა აღბძრათ თინა მოქმედებაშა. მაგალთო, ბიბლიაშ მაგურაფალს შეხვალამეფშა დასწრება ქუჭირს-და, შემლებნა ქუვოძირათ ვიდეო „იეჰოვა ზრუნენს ჩქიმდე“, ნამუთ მოჩამილ რე მა-14 დუდიშ განყოფილებას „დამატებით მასალა“. თე წიგნის ბრელ რეალურ შემთხვევას შეფხვადუთ განყოფილებეფს „ქიგეგით უმოს“ დო „დამატებით მასალა“.b ქივეცადათ, თეშ ვაგშამირთან, ნამდა ბიბლიაშ მაგურაფალ შხვას შევადარათ დო თეცალ მუდგარენ ვუწუათ: „თის ქეშიალებუ-და, თენა სი ხოლო გაკეთებე“. საშვალება ქიმეფჩათ თის, მუშით ქიმერთას დასკვნაშა. უკულ შემლებნა გუვარჩუათ, განსაკუთრებულო მუქ მეხვარ ვიდეოს მოჩამილ პიროვნებას, ქიმიაჸუნკო ბიბლიურ გურაფეფს. თე ვიდეოშე შემლებნა მიფშინუათ ძირითად ბიბლიურ მუხლეფ ვარდა პრაქტიკულ მხარეეფ. მაქსიმალურო ვეცადათ, ყურადღება გუვამახვილათ თიშა, მუჭო მეხვარ იეჰოვაქ ვიდეოს მოჩამილ პიროვნებას.

8. მუჭო შემლებნა მივეხვარათ ბიბლიაშ მაგურაფალს, ქიჸოროფუას იეჰოვა?

⁸ ქიმვეხვარათ ბიბლიაშ მაგურაფალს, ქიჸოროფუას იეჰოვა. მუჭო შემლებნა თეშ კეთება? დობგორათ ირნერ შესაძლებლობა, ნამდა იეჰოვაშ თვისებეფშა გუვამახვილათ ყურადღება. ქიმვეხვარათ თის, ქოძირას, მუნერ ბედნერ ღორონთ რე იეჰოვა დო მუჭო ოხვარ მუშ მოჸოროფეეფს (1 ტიმ. 1:11; ებრ. 11:6). ქუვოძირათ, ნამდა ნაგურეფუშ გიმორნაფა ჯგირობუას მოუღანს დო გევუნწყათ, მუჭო იძირე თავრეშე თიშ მიმართ იეჰოვაშ ჸოროფა (ეს. 48:17, 18). მუთ უმოსო ეჸოროფებ ბიბლიაშ მაგურაფალს იეჰოვა, თით უმოსო აჸი გურ თირუაშა (1 იოან. 5:3).

გუვოჩინებაფუათ ბიბლიაშ მაგურაფალს თანამორწმუნეეფ

9. მუჭოთ მარკოზიშ 10:29, 30-შე იძირე, მუქ შილებე მეხვარას პიროვნებას, დინათასინ თიშენ, მუდგარენეფ დათმას?

⁹ ბიბლიაშ მაგურაფალქ წიმი მიდართას დო დინათასინ, მუდგარენეფ ოკო დათმას. ჟიშე მოშინაფილ მდიდარ ქომოლკოჩცალო, ნამთინეს შილებე მატერიალურ მსხვერპლშა აჸუას ოულარქ. შილებე თინეფიშ სამუშა ოწინააღმდეგდას ბიბლიურ პრინციპეფს დო ათეშენ ოთირალქ აჸუან. ვარდა თიცალ მეგობრეფიშ დოტება უწიენდას, მიდგას ვა უჸორს იეჰოვა. რენა თიცალეფ ხოლო, მიდგას ოჯახიშ წევრეფ ოწინააღმდეგნა, მუშენდა ვა უჸორა იეჰოვაშ მოწმეეფ. იესოქ თქუ, ნამდა ნამთინეშო შილებე ძნელქ იჸუკო თეცალ მსხვერპლშა ულაქ. მარა პირობა ხოლო მუჩეს, ნამდა მუშ მიმაჸუნალეფ გურგოტახილ ვა დოსქიდუნა დო აკურთხენს თინეფს მოჸოროფე სულიერ ოჯახით (წეკითხით მარკოზიშ 10:29, 30). მუჭო შემლებნა მივეხვარათ ბიბლიაშ მაგურაფალს, ნამდა სარგებელ მიღას თე ძვირფას ძღვინშე?

10. მუს ბგურაფლენთ მანუელიშ შემთხვევაშე?

¹⁰ გუვავითარათ ბიბლიაშ მაგურაფალწკუმა მეგობრობა. მნიშვნელოვან რე, ბიბლიაშ მაგურაფალს ქუვოძირათ, ნამდა ბზრუნენთ თიშე. მუშენ იფჩიებუთ თეს? ქიდვეკვირათ მანუელიშ სიტყვეფს, ნამუთ მექსიკას ცხოვრენს. თინა იშინანს დროს, მუჟამსით ბიბლიაშ მაგურაფალ რდჷ დო იჩიებ: „გურაფაშ ჩატარებაშახ ჩქიმ მასწავლებერ ირო მომკითხანდჷ. დუდის თავისფალო მოგინებაფუანდჷ დო საშვალებას მარზენდჷ, შხვა საკითხეფშე ხოლო ქიფჩიკო. ბგინაფლენდჷ, ნამდა თინა მართალო ზრუნენდჷ ჩქიმდე“.

11. მუჭო შილებე მეხვარას ბიბლიაშ მაგურაფალეფს ჩქინდე დროშ გიმორთუალაქ?

¹¹ დრო გეგმვურთათ ბიბლიაშ მაგურაფალეფს, მუჭოთ იესო გიმურთუნდჷ დროს მუშ მიმაჸუნალეფს (იოან. 3:22). შეიოლებერ ქორენ-და, ქუდვაპატიჟათ ჸუდეშა მაგურაფალ, ნამუთ სულიერო წიმი მეურს, ნამდა ართო გეფშვათ ჩაი ვარდა ობჭკუმათ ოჭკუმალ დო ქოვუჯინათ მაუწყებლობაშ პროგრამას. ბიბლიაშ მაგურაფალ ალბათ განსაკუთრებულო თი პერიოდის დაფასენს ჩქინ მოწვევას, მუჟამსით თიშ მეგობრეფ დო ოჯახიშ წევრეფ დღესასწაულს აღნიშნენა. უგანდას მახორუ ჯიმა, ნამდგას კაზებვე ჯოხო, იჩიებ: „ბიბლიაშ გურაფაშ პერიოდის მასწავლებერწკუმა ართო რინაშ შედეგო ბრელ მუდგარენ დიბგურე იეჰოვაშ გურშენ. ქობძირ, მუჭო ზრუნენს იეჰოვა მუშ ხალხშე დო მუნერ ბედნერეფ რენა თინეფ. მა ხოლო ზუსტას თეცალ ცხოვრება მოკოდ“.

12. მუშენ ოკო იპჸუნათ შხვადოშხვა მაუწყებელეფ ბიბლია გურაფაშა?

¹² მიდეპჸუნათ შხვადოშხვა მაუწყებელ ბიბლიაშ გურაფაშა. მინშა შილებე უმოს ადვილ მაფდან, ხვალე ვარდა ირო ართ დო იგივე მაუწყებელწკუმა ართო ჩუვატარათ ბიბლიაშ გურაფა. მარა გურაფაშა შხვადოშხვა მაუწყებელს მიდეპჸუნანთ-და, თექ შილებე ბიბლიაშ მაგურაფალშო უჯგუშიქ იჸუას. მოლდოვას მახორუ დიმიტრი იშინანს: „თითოულ მაუწყებელ, ნამუთ ჩქიმ ბიბლიაშ გურაფაშა მიშჷ, ენწყუმაშ შხვადოშხვა მეთოდის ირინუანდჷ. თექ მიმეხვარ შხვა კუნთხუშე ხოლო ქობძირკო თინა, მუდგას ბგურაფლენდჷ. თეწკუმა ართო, ნაკლებო მიღუდ მორდება, მუჟამსით პირველო დევესწრჷ შეხვალამას, მუშენდა ბრელ და დო ჯიმას უკვე შენახვამლეფ ვორდჷ“.

13. მუშენ ოკო მივეხვარათ ბიბლიაშ მაგურაფალს, ქიდესწრას კრებაშ შეხვალამეფს?

¹³ ქიმვეხვარათ ბიბლიაშ მაგურაფალეფს, ქიდესწრან კრებაშ შეხვალამეფს. თენა მნიშვნელოვან რე, მუშენდა იეჰოვა ითხინს მუშ თაყვანიშმცემელეფშე, ართო დიშაყარან; თენა ჩქინ თაყვანიშცემაშ ნაწილ რე (ებრ. 10:24, 25). თეს გეძინელ, და დო ჯიმალეფ ჩქინ სულიერ ოჯახ რენა. შეხვალამეფს თინეფწკუმა ართო რინა, ქოგჷ ჸუდეს ოჯახიშ წევრეფწკუმა ართო ოჭკუმალიშ ჭკუმუას. მუჟამსით ბიბლიაშ მაგურაფალს ვოხვარუთ, ქიდესწრას კრებაშ შეხვალამეფს, თეშნერო ვოხვარუთ ნათუაშო ართ-ართ არძაშ უმოს მნიშვნელოვან ნაბიჯიშ გინოდგუმას. მარა თექ შილებე თიშო ადვილქ ვეჸუას. მუჭო შეულებ პუბლიკაციას „მარადიულო გეხარით ცხოვრებათ!“ მეხვარას თის თეცალ სირთულეეფიშ გერჯგინას?

14. მუჭო შემლებნა აღბძრათ ბიბლიაშ მაგურაფალ, ქიდესწრას შეხვალამეფს?

¹⁴ გეგმიბრინუათ წიგნიშ „მარადიულო გეხარით ცხოვრებათ!“ მა-10 დუდ, ნამდა აღბძრათ მაგურაფალ, ქიდესწრას შეხვალამეფს. წიგნიშ გიშაშქუმალაშახ, ნამთინე მაუწყებელს თხუეს, გეგმირინესკო თე დუდ ბიბლიაშ მაგურაფალეფწკუმა. თინეფ იჩიებნა, ნამდა თექ მანგარ ჯგირო იმუშუ დო მეხვარ მაგურაფალეფს, ქიდესწრესკო კრებაშ შეხვალამეფს. მუშო ოკო რაგად, საჭირო ვა რე იშენდოიშენ მა-10 დუდიშ მიკულას ვუჯინათ, ნამდა მაგურაფალ კრებაშა ქუდვაპატიჟათ. საჭირო რე, თენა მუთ შილებენ მალას გუვაკეთათ დო უკულ ხოლო ვემვოტუათ თეშ კეთება. თითოულ მაგურაფალს შხვადოშხვა პრობლემა უღჷ. თაშ ნამდა, ქიდვეკვირათ ბიბლიაშ მაგურაფალიშ საჭიროებეფს დო შეიოლებერ ქორენ-და, პრაქტიკულო ქიმვეხვარათ თის. თინა ხეთეშე ვა დიჭყანს კრებაშა დასწრებას-და, გურქ ვა გომტირხან, გეგმიფრჩქინათ მოთვინება დო ვემვოტუათ თიშ დაპატიჟება.

ქიმვეხვარათ ბიბლიაშ მაგურაფალს, გიორჯგინას შიშის

15. მუშ შიშ შილებე უღდას ბიბლიაშ მაგურაფალს?

¹⁵ ალბათ ფშუნა, ნამდა დუდშე ჩქი ხოლო მოშქურდეს, გინიფრთითკო იეჰოვაშ მოწმეთ. შილებე ფიფქრენდით, ნამდა დღას ვეშმალებედეს სახალხოთ ქადაგება. ვარდა შილებე ოჯახიშ წევრეფიშ დო მეგობრეფიშ წინააღმდეგობაშა მოშქურდესკო. თაშ ქორდ-და, ადვილ მაჸინა გემშაფრთათ ბიბლიაშ მაგურაფალიშ მდგომარეობაშა. იესოქ თქუ, ნამდა ნამთინეს შილებე თეცალ გრძნობეფ უღუდკო. მარა თიქ ელუჩ მუშ მიმაჸუნალეფს, შიშშა ვემუჩამდესკო უფლება, მიოტებაფუკო თინეფს იეჰოვაშ მსახურება (მათ. 10:16, 17, 27, 28). მუჭო მეხვარ იესოქ თინეფს, გიორჯგინესკო შიშის? დო ჩქი მუჭო შემლებნა მივაჸუნათ თიშ მაგალითის?

16. მუჭო შემლებნა მუვამზადათ ბიბლიაშ მაგურაფალ ქადაგებაშო?

¹⁶ დროშ მიკულაწკუმა ართო, უმოსო მუვამზადათ ბიბლიაშ მაგურაფალ ქადაგებაშო. იესოშ მოწაფეეფ შილებე ნერვიანენდესკო, მუჟამსით თიქ ოქადაგებშა გოუტუ. მარა იესოქ მეხვარ თინეფს თით, ნამდა უწუ, სო დო მუშ გურშენ იქადაგესკო (მათ. 10:5—7). მუჭო შემლებნა მივაჸუნათ იესოშ მაგალითის? ქიმვეხვარათ ბიბლიაშ მაგურაფალს, ქოძირას, მის შეულებ უქადაგას. მაგალთო, ქობკითხათ, ხომ ვეჩინენს თიცალ მითინს, მიდგას ნამდგაინ ბიბლიურ გურაფაშ მორჩქილაფა განსაკუთრებულო ოსაჭირ. თეშ უკულ ქიმვეხვარათ თის, მამზადას მუშ ორაგადე დო ქუვოძირათ, მუჭო შეულებ მარტივო ქადაგება. მუჟამსით ბიბლიაშ მაგურაფალს ვოძირანთ, ბიბლიაშ გიმორნაფათ მუჭო მეჩას შხვას მარტივ დო ტაქტიან პასუხეფ, საკითხის ქიმურენ-და, შემლებნა პრაქტიკულო გიმიბრინუათ წიგნის „მარადიულო გეხარით ცხოვრებათ!“ მოჩამილ ჩარჩოეფ „ნამთინექ შილებე თქუას“ დო „ნამთინექ შილებე იკითხას“.

17. მუჭო შემლებნა გიმიბრინუათ მათეშ 10:19, 20, 29—31, მუჟამსით ვოხვარუთ ბიბლიაშ მაგურაფალს, მიენდას იეჰოვას?

¹⁷ ქიმვეხვარათ ბიბლიაშ მაგურაფალს, მიენდას იეჰოვას. იესოქ დარწმუნ მუშ მოწაფეეფ, ნამდა იეჰოვა ქიმეხვარებუდ, მუშენდა უჸორდჷ თინეფ (წეკითხით მათეშ 10:19, 20, 29—31). ქუგვოშინათ ბიბლიაშ მაგურაფალს, ნამდა იეჰოვა თის ხოლო მეხვარებ. შემლებნა მივეხვარათ თის, მიენდას იეჰოვას თით, ნამდა ლოცვათ ქეჩუას მუშ მიზნეფიშ გურშენ. ართ ჯიმა, ფრანციშეკი, ნამუთ პოლონეთის ცხოვრენს, იჩიებ: „ჩქიმ მასწავლებერ ხშირას მიშინუანდჷ ლოცვეფს ჩქიმ მიზნეფს. მუჟამსით ქობძირ, მუჭო პასუხენდჷ იეჰოვა თიშ ლოცვეფს, მა ხოლო ხეთეშე ქიდიბჭყჷ ლოცვა. იეჰოვაშ მოხვარა თიმწკუმა იბგინ, მუჟამსით სამუშაშე, ნამუთ ახალ დოჭყაფილ მაფუდ, დღალეფქ მაჸუ ოთხუალქ, ნამდა ქიდვესწრიკო კრებეფს დო კონგრესის“.

18. მუნერ დამოკიდებულება უღჷ იეჰოვას თი საქმეშენ, ნამდგას ქრისტიან მასწავლებერეფ ორთნა?

¹⁸ იეჰოვა მანგარო ზრუნენს ჩქინ ბიბლიაშ მაგურაფალეფშე. თინა აფასენს ქრისტიან მასწავლებერეფიშ ხანდას, ნამდგას თიშო გიმირჩქინანა, ნამდა ხალხის იეჰოვაწკუმა დაახლოებას ქიმეხვარან, მუდგაშ გურშენ უჸორს თე დუდგინოდვალირ მსახურეფ (ეს. 52:7). ასე ბიბლიაშ გურაფა ვამღუნან-და, შემლებნა შხვა მაუწყებელეფს ქელვუდირთათ ბიბლიაშ გურაფაშ დროს დო თეშნერო მივეხვარათ ბიბლიაშ მაგურაფალეფს, დინათან.