იეჰოვაქ უჯგუშ პიროვნებათ გინმოშქვჷ

საამკინძაოს ბრელ მუდგარენ ბძირჷ, მარა არძაშ უმოსო თექ მსახურენდესინ თი და დო ჯიმალეფქ მოფხვად თოლს. თექ ახალგაზრდა და დო ჯიმალეფ ართ მეჯინათ მოსაწყენ საქმეს ორთუდეს, მუშენდა ართ დო იგივეშ კეთება უხვადუდეს. თეწკუმა ართო, თინეფიშ ხანდა ბრელშო თოლშამალაფარ ვა რდჷ, მარა თინეფ იშენით ბედნერეფ დო კმაყოფილეფ რდესჷ. თე და დო ჯიმალეფიშ მაგალითშე ქიდიბგურე, მუს ნიშნენს თანდაბლურო ემსახურე იეჰოვას.

წანეფიშ დინახალე იეჰოვა ბრელ მუდგარენს მოგურუანდჷ, ნამდა თიშ უჯგუშ მსახურო გინიბრთიკო. მარა დიო თის ქიგეჩიებუთ, მუჭო ბგორუნდჷ ჭეშმარიტებას, მუჟამსით ბუდისტ ვორდჷ.

ᲦᲝᲠᲝᲜᲗᲘᲨ ᲒᲝᲠᲣᲐ ᲑᲐᲦᲐᲜᲝᲑᲐᲡ

დებაბდჷ დო მიბრდჷ ჩიკაგოს, ილინოისიშ შტატის. ოთხ და დო ჯიმაშე არძაშ უნჩაშ მა ვორდჷ. ჩქიმ მშობლეფქ იაპონიაშე ჩიკაგოშა უჯგუშ ცხოვრებაშ ეიონწყუშა გინორთეს, მუდგას „ამერიკულ ოცნებას“ უძახუნა. თინეფს ოკოდეს, სქუალეფქ არძაშ უჯგუშ განათლება მიღესკო დო წარმატებულეფ ჸოფედესკო.

ჩქიმ მშობლეფ დუდგინოდვალირ ბუდისტეფ რდესჷ. დიაჩქიმქ ირდუნ თი ჸუდეს ბუდაშ ტაძარ ხოლო რდჷ. თიშ მუმა დო ჟირ უკლაშ ჯიმა ბუდისტ ბერეფო მსახურენდეს. თაშ ნამდა, ბუდიზმის ჩქიმ ბაღანობას ჩქინ ოჯახის მნიშვნელოვან ადგილ უკინებუდ. სკოლაშე მოულირს, პირველ, მუდგას ვორთუდინ, რდჷ ბუდაშ ქანდაკებაშა საკმელიშ ჭუალა დო ბრინჯიშ დო წყარიშ შეწირუა. ირ ჟეშხას ბუდაშ ტაძარშა მიფშით, სოდეთ უმოს დიდ დო ოქროთ გონწყილ ბუდაშ ქანდაკებას უბირდით.

ფშჷ, შქვით წანერ იპჸიდ, მუჟამსით ჸუდეს ბუდაშ ქანდაკებას უჯინედ დო ფიფქრენდჷ: „სო იპჸიქ ღურაშ უკულ?“. ბუდიზმ მოგურუანდჷ, ნამდა ღურაშ უკულ ჩქიმ შურ სოდგარენ გაგრძელენდჷ არსებობას. ქიმეფხვად, ნამდა ართ დღასით ჩქიმ სიცოცხლე გეთებუდ. შილებე სოდგარენ ჩქიმ შურქ იარსებუკო, მარა მუჭოთ ადამიანს, მეტო ვა მაღვენუდ საშვალება, გეფხარიკო ცხოვრებათ. თეშე ფიქრიქ მანგარო დოპჭყვიდ გურ. თე ირფელიშ ოთირალო მუთუნ ვა მაკეთებედ. თეცალ უიმენდოთ პირველო იბგინ დუდ.

მოზარდობაშ წანეფს ჭიე-ჭიეთ ქიმეფხვად, ნამდა ბუდისტურ რიტუალეფ უაზრობა რდჷ. ბგინაფლენდჷ, ნამდა ცხოვრებას მუდგარენ მორკუდ (მათ. 5:3). გურს სოდგარენ ბჯერდჷ, ნამდა არსებენდჷ ირფელიშშემალებე დო ცოცხალ ღორონთ. მოკოდ, გეფჩნებაფეკო თინა. იფიფქრჷ, ნამდა ჩქიმ კითხვეფშე პასუხეფ ბიბლიას იჸუაფუდ. ათეშენ გეგნოპჭყვიდ თიშ ჸიდირ. გაიკვირდუნა დო ბიბლია ართ-ართ ბუდისტურ დღახუს იპჸიდ.

ართშა ქუჩას ჯოღორს ვასეირნენდინ თეშ, ართ ახალგაზრდაქ ქუმორთჷ ჩქიმდა დო პკითხჷ: „ქოიჩქუნო, მუნერ მომავალს მოპირუნა ღორონთ?“. თე ახალგაზრდა, ჯიმა უილსონ ბაშუ რდჷ. თე კითხვას გვარიან ჩიებაქ ქუმაჸუნ. თე დროს 17 წანერ ვორდჷ. უილსონქ გიმოცხადებაშ 17:1 გეშამკითხჷ დო პკითხჷ: «ქოიჩქუნო, მუს ნიშნენს „ბრელ წყარ“, ნამდგას „დიდ მეძავ“ მინოხე?». თე კითხვაშ პასუხიშ აზრის ვა ვორდჷ. თიქ მა-15 მუხლ წამკითხჷ, სოდეთ პირდაპირ ჭარჷ, ნამდა წყარს ხალხ იგულისხმებ. ჩქიმდა მანგარო იმოქმედ თიშ ძირაფაქ, ნამდა იეჰოვაშ მოწმეეფ ბიბლიას კინ მუშ დუდის ეიონწყუმაფუანდეს. ონდო ართიანს ჩევეთხიებუდითკონ, ჯიმა უილსონქ ქომუჩ წიგნ „მარადიულ სიცოცხლეშა მიმაჸუნაფალ ჭეშმარიტება“. თე ჭიჭე ლურჯ წიგნიქ ჩქიმ ცხოვრება დოთირუ.

ვით დღაშ უკულ პირველო დევესწრჷ იეჰოვაშ მოწმეეფიშ შეხვალამას. დღას ვაგმოჭყორდუ, მუ გემუანო მემღეს თექ. თევრეშე მოჸუნაფილ ირო ვოსწრუქ შეხვალამეფს. უილსონქ ბიბლიაშ გურაფა ქუდომიჭყჷ. გურაფა თეშ მოპწონდჷ, ნამდა რდჷ შემთხვევეფ, მუჟამსით თინა სოდგარენ 8 საათის იგრძელებუდ. ჩქიმ მშობლეფს ვა მოწონდეს ბიბლიას ბგურაფლენდინ დო მანგარო მოწინააღმდეგუდეს. მარა, მუთ უმოსის ბგურაფლენდჷ, თით უმოსო ბჯერდჷ, ნამდა თენა ჭეშმარიტება რდჷ. თაშ ნამდა, 1983 წანას დიმნათ.

ᲣᲜᲘᲕᲔᲠᲡᲘᲢᲔᲢᲘᲡ ᲒᲣᲠᲐᲤᲐᲨ ᲛᲔᲢᲔᲑᲐ ᲓᲝ ᲞᲘᲝᲜᲔᲠᲝᲑᲐᲨ ᲓᲝᲭᲧᲐᲤᲐ

იმნათინ თიმწკუმა, პრესტიჟულ უნივერსიტეტის სამედიცინო ფაკულტეტის ბგურაფლენდჷ დო კარიერაშ ენყუალას ვოცადუდ. ჩქიმ მშობლეფქ ბრელ მუდგარენ აკეთეს თიშო, ნამდა თე განათლება მიბღიკო. მართალ რე, უნივერსიტეტის გურაფაშ გაგრძელება შემლებუდ, მარა ავრე თინა ხოლო მოკოდ, ნამდა დუდ ვა დაბზოგიკო იეჰოვაშო დო სრულ დროთ ვემსახურიკო თის.

მუაჩქიმქ გუმაფრთხილ, უნივერსიტეტის გურაფას მიოტენქ-და, ჸუდეშე გაჸინია გინულა. მშობლეფ მანგარო მიჸორდჷ დო ვა მოკოდ, გურ უწყუნეკო თინეფს. გურგოტახილ ვორდჷ დო ვა მიჩქუდ, მუჭო მიფქციკო. ათეშენ სერ-სერით კოლეჯიშ ოზეშა გიმიფშჷ დო მურიცხეფით მოჭკადილ ცაშ თუდო ბლოცულენდჷ: „იეჰოვა, გოხვეწუქ, ქიმმეხვარ სწორ გადაწყვეტილებაშ მეღებას“. ბოლოს, გურაფაშ მეტება გეგნოპჭყვიდინ, მუაჩქიმქ მიწუ, ჸუდეშე გეგნორთ დო მეუა. უილსონს დოურეკ დო ირფელ ქივეჩი. თიქ შურ დო გურით მიწუ, ჩქიმდა გეგნორთია. ჩქიმ ნივთეფ ართ სუმკას ქენობდვჷ დო ავტობუსით მიდაბრთჷ უილსონშა. ჯგირო ფშჷ, მუშმადიდა სიმშვიდე იბგინ თიმწკუმა, მუშენდა მიჩქუდ, ნამდა სწორ გადაწყვეტილება მიბღჷ.

დუდის გალიაშე ახალგუნატებ ჩიტცალო ბგინაფლენდჷ. მუთ იჸუნ, თავისფალო შემლებუდ, ჩქიმ დუდ მეუძღვინიკო იეჰოვაშ მსახურებას. თაშ ნამდა, 1984 წანას პიონერობა ქიდიპჭყჷ.

პიონერულ მსახურებაშ დროს იეჰოვაქ ბრელ ჯგირ თვისებაშ გავითარებას მიმეხვარ, მაგალთო დუდგინოდვალირობაშ. ართ დღას თეშ იძირედ, ნამდა ირნერ მიზეზ მიღუდ, მსახურებაშა ვებდიკო. გურგოტახილ ვორდჷ, მუშენდა ნაონდღერს მსახურებაშა მაჸალეთ მითინქ ვა მაშუ. მარა იშენით მიდაბრთჷ ოქადაგებშა. სოდგარენ ჟირ საათის ქადაგებაშ უკულ, გეგნოპჭყვიდ, ნამდა ხოლო ართ ბინაშა ქიმიფშ დო თეთ გუათენდ მსახურებას. მანგარ შულადირ ვორდჷ დო დუდის ხვალახეთ ბგინაფლენდჷ, ავრე მაჭვემერ ხოლო რდჷ. ფიფქრენდჷ, ჸუდეშა ხომ ვებდა-მაქ. ბინაშ მასმა სართულშა ეშეფშინ, ახალგაზრდა ფილიპინელ კოჩიქ ქამხვად. იფიფქრჷ, ეს ვაინტერესდას იჸი-მაქ. მარა მანგარო მეფჩილათექ, მუშენდა თიწკუმა ბიბლიაშ გურაფა ქიდიპჭყჷ დო თიქ ბოლოს ქოთ დინათ.

ᲑᲠᲣᲙᲚᲘᲜᲘᲨ ᲑᲔᲗᲔᲚᲡ ᲛᲡᲐᲮᲣᲠᲔᲑᲐ

უილსონიშ ჸუდეშა გინულაშე 2 წანაშა, 1985 წანას, ბრუკლინიშ ბეთელშა ქუდომძახეს. მუჭოთ დაჭყაფუს მიფშინე, საამკინძაო განყოფილებას დუმანიშნეს. ართ დღას ართ დანადგარწკუმა მუშობაშ დროს, შემთხვევით ოშობით წიგნიშ ყდა გილვოლე. ჯიმალეფქ ფთხუეს, ზედამხედველს გეუნწყიკო თე ამბე. თის ირფელ კილ-კილშა გეუწყჷ, მარა ართ მუდგარენ ვამთქუალ. ზედამხედველქ გემუანას ქუგმოშინ, ბოდიშიშ რაგად ირო ჯგირ რენია. თე შემთხვევაქ ქუდმოგურუ, მუზმათ მნიშვნელოვან რე, ვაღიარე ჩქიმ შეცდომეფ დო ბოდიშ ქოფთქუე.

შხვეფიშ მომსახურებაწკუმა დაკავშირებით ართგურ უნჩაშ ბეთელელეფშე ხოლო ბრელ მუდგარენ დიბგურე. გუმაშინე, ართშა სადილს ჩქინწკუმა ართო სტოლს ჯიმა მილტონ ჰენშელ ხოლო მიკოხედ, ნამუთ ხელმძღვანელ საბჭოშ წევრ რდჷ. თიმ დღას სასადილო ხალხიშ გოფშა რდჷ დო მომსახურე ჯიმალეფ ვაჭიშუანდეს ოჭკუმალიშ დროულო განაწილებას. ჩქი, ახალგაზრდა ჯიმალეფ, სტოლს მიკვოხედით დო თიშე იპჭირებუდით, ნამდა სტოლშა გვიანო მიშჷ ოჭკუმალ. ჯიმა ჰენშელქ, ხონარ ვეკუღალუნ თეშ, გედირთჷ, თე მომსახურე ჯიმალეფშა ქიმერთჷ დო თინეფწკუმა ართო ქიდიჭყჷ გრაფინეფით წყარიშ დო სენეფით ქობალიშ დო კარაქიშ სტოლეფშა მეღალა. თე ამბე დღას ვაგმოჭყორდუ. შხვეფიშ მომსახურებაშ თეცალ თანდაბლურ მაგალითიქ ქუგმოშინ, მუჭო ომსახურუდ იესო მუშ მოციქულეფს (იოან. 13:3–5).

„ᲘᲐᲞᲝᲜᲣᲠ ᲒᲐᲤᲷ ᲓᲐᲒᲣᲠᲐᲤᲐᲚ!“

1987 წანას იაპონიაშა მიდაბრთჷ. ჩქიმდა მანგარო იმოქმედ თექიან დუდგინოდვალირ დო თანდაბალ და დო ჯიმალეფიშ ძირაფაქ. მანგარო მოკოდ, მსახურებას ქიმვეხვარიკო თინეფს, მარა ართ პრობლემა რდჷ – იაპონურ ვა მიჩქუდ. ართ ბეთელელ დაქ, მიჩიკო ოდექ, თოლს ქენმოჯინ დო მიწუ: „იაპონურ გაფჷ დაგურაფალ!“. მა ხოლო ქიდიბგურე. თიმწკუმა მუს იფიფქრენდ, ნამდა თე დაშ რჩევა ჩქიმ ცხოვრებას დოთირანდჷ.

მუსხირენ თუთაშა ნიუ-იორკის იაპონურ კრებაშა გეგნობრთჷ. იაპონურიშ გურაფაქ იეჰოვაშ მსახურებას უმოსიშ კეთებაშ საშვალება ქომუჩ. 1989 წანას პირველო დევესწრჷ იაპონურ კონგრესის ლოს-ანჯელესის, კალიფორნიას. თექ თოლშა ქუმომიოლ ართ პიონერ დაქ, მივაკო ონამიქ, მით დრამას მონაწილენდჷ.

1992 წანას მა დო მივაკოქ დეფქორწინით დო პატიქ მაშუეს, ართო ვემსახურითკო იეჰოვას ბრუკლინიშ ბეთელს. მივაკო მანგარ გურგოჩამილ დო მზრუნველ პიროვნება რე. თინა ირო მზათ რე შხვეფიშ მახვარებელო. თიშ მაგალითიქ მიმეხვარ, უმოს გემუანო მივექციკო შხვეფს. მივაკო მართალო საჩუქარ რე იეჰოვაშე. მივაკოშ გვერდით მანგარ ბედნერ დო გურექექაფილ ვორექ.

ᲘᲐᲞᲝᲜᲘᲐᲨ ᲑᲔᲗᲔᲚᲡ ᲓᲝ ᲕᲔᲚᲡ ᲛᲡᲐᲮᲣᲠᲔᲑᲐ

თე პერიოდის მივაკოშ მშობლეფქ მანგარო დელახეს. თინეფ იაპონიას ცხოვრენდეს. ათეშენ ჯიმალეფს ქოფთხით, იაპონიაშ ფილიალშა გეგნომიჸუნესკო, ნამდა უმოს ხოლოს ვორდითკო მივაკოშ მშობლეფწკუმა დო ქიმკვოჯინითკო თინეფს. თაშ ნამდა, 1999 წანას ქოთ გეგნობრთით იაპონიაშა.

იაპონიაშ ბეთელშა შურ დო გურით მემღეს, ათეშენ ახალ გარემოშა მერჩქვანა ვა გაპჭირებუნა. იაპონელ და დო ჯიმალეფიშ ჯგირ თვისებეფიშ, მაგალთო გურხვეობაშ დო სტუმარიშ ჸოროფაშ გიმორჩქინაშ ძირაფაქ უმოს უჯგუშ პიროვნებათ გინმოშქვჷ. თინეფ საქმეს სერიოზულო დო შურ დო გურით მეურენა. თეწკუმა ართო, ართიანწკუმა ჯგირო თანამშრომლენა. იაპონურ კულტურას ხალხშო ართიანწკუმა თანამშრომლობა დო საქმეშ ართო კეთება უმოს მნიშვნელოვან რე, ვინემ მუდგარენიშ ხვალე მეჭირნაფა. თინეფიშ ჯგირ მაგალითიქ მა ხოლო აღბძრჷ, თანდაბლურო ქიფთანამშრომლიკო შხვეფწკუმა დო ვაგმოჭყორდუკო, ნამდა ჩქიმ კეთებულ ჭიჭე საქმეთ ხოლო იეჰოვაშ განზრახვაშ შესრულებას ბღებულენდჷ მონაწილებას.

მარა, რახანს იაპონურ დო ამერიკულ კულტურა ართიანშე გენესხვავებუდ, მინშა მიჭირდჷ საკითხეფიშ მიმართ თინეფიშ მიდგომაშ ენონჭაფა. ათეშენ მოთვინება ოკო ქიდიბგურეკო დო სიმშვიდე ოკო ვა ვოდინეკო. დროშ მიკულაწკუმა ართო ქოთ დიფთირე დამოკიდებულება დო ქიმეფხვად, ნამდა ორგანიზაციაშე მეღებულ ხელმძღვანელობას ქიმვაჸუნუთ-და, იეჰოვა აკურთხენს ჯიმალეფიშ მეღებულ ნებისმიერ გადაწყვეტილებას. საბოლათ იეჰოვა რე თინა, მიდგაშ ჭყოლოფათ საქმე გიშურს.

მომზადებას, ნამდგას ბეთელს მიკობრთჷ, ხშირას ვადარენქ თი მომზადებას, ნამუთ წინასწარმეტყველ მოსექ მიკორთჷ. იეჰოვა 40 წანას ამზადენდჷ მოსეს დო ოხვარუდ თვინიერო გინორთას. მოსეცალო, მა ხოლო უმაღლეს განათლება მაფუდ მეღებულ, მუდგაქ სიამაყე გომრჩქინ დო ჩქიმ დუდშა ვორდჷ დაიმენდებულ. მარა ბეთელქ თანდაბლობა დო იეჰოვაშა მენდება ქუდმოგურუ. მუჭოთ მოსეს ამზადენდჷ იეჰოვა მოთვინებათ, თეშ მა ხოლო მოთვინებათ მამზადენდჷ წანეფიშ დინახალე.

24 წანას ქულუანდით მივაკოშ მშობლეფს. სანარღოთ, უკულ თინეფქ დოღურეს. თე 24 წანაშ დინახალე მის უჩქჷ, მუსხი რეკუეფ, მუსხი ნერვიანობა დო საავადმყოფოშა გილარულა რდუნ. მივაკოშ დიდას, მასაკოს, ჯანმრთელობაქ თეშ გეკუცუ, ნამდა ედგინა ხოლო უჭირდჷ. ათეშენ თიშო ვართ ფერ ეფ რდჷ შეხვალამეფშა დასწრება დო მსახურებაშა ულა. ბოლო მარეფს კალიასკას ენოხედ. თე ირფელიშ უმკუჯინუო, თიშ გურს იეჰოვაშ ჸოროფა ვა დასუსტებე. ირო დიდ ხიოლით იჩიებუდ ჭეშმარიტებაშენ დო თენა სახეს გიოხედ. მა ხოლო მოკო, მასაკოცალო მუდგა სიტუაცია ვა მიღუდასინ, კმაყოფილ დო ბედნერ ვორდე ღორონთიშ მსახურებათ.

2024 წანას ჩქინ ცხოვრებაქ მანგარო დითირ. ბეთელს 30 წანიან მსახურებაშ უკულ შხვა დანიშნულება მიბღით. ასე კუნძულ ოკინავას სპეციალურ პიონერეფო მსახურენთ დო მიღუნა პატი, სამხედრო ბაზაშ გოხოლუას მახორუ ოჯახეფს უქადაგათ. ბეთელს მიკულირ დიდ მომზადებაქ მიმეხვარეს, უმოს ადვილო ქიმვარჩქვანითკო თე ახალ დანიშნულებას. ვოცადუთ, გეგმეფ ჭკვერულო ქუდვონწყუათ, მთავარ ყურადღება მსახურებაშა მაფუდან გინოღალირ დო თეშნერო ჩქინ დრო ჭკვერულო გეგმიბრინუათ. იეჰოვაშ ჭყოლოფათ პჸუნა ბიბლიაშ მაგურაფალეფ, მით ოჯახცალ რენა ჩქინო. ასე უჯგუშო ვორწყეთ, მუზმათ მნიშვნელოვან რე, მიჸორდან ადამიანეფ. მა დო მივაკო ირდღას უმარდუთ იეჰოვას თეცალ ჯგირ დანიშნულებას ვორეთინ.

ᲒᲘᲜᲝᲭᲧᲕᲘᲓᲘᲚ ᲛᲐᲤᲷ, ᲣᲛᲝᲡ ᲥᲘᲓᲘᲑᲒᲣᲠᲣᲔ ᲘᲔᲰᲝᲕᲐᲨᲔ

მართალ რე, ჩქიმ ოჯახიშ წევრეფ მეტო ვა მოწინააღმდეგუნა, მარა თინეფ დიო ხოლო ვამსახურუნა იეჰოვას. იესოქ დემეპირეს, ნამდა მიდგას, მუშ მოწაფეთ გინორთაშ გურშენ ოჯახ აჸი დატებელ, სულიერ ოჯახიშ საშვალებათ ოშწილო მიღენს დოტებულს (მარ. 10:29, 30). თამამას მარაგადე, ნამდა იესოშ თე დუნაპირებუქ ჩქიმდე ხოლო შისრულ. ვეგმმაკოროცხე, მთელ მსოფლიოს მუსხი და დო ჯიმაქ მემიღ მუშ ოჯახიშ წევრცალო, მიჸოროფუ დო ალამდირთჷ თე წანეფიშ დინახალე.

ამდღარშახ მიღჷ თი ლურჯ წიგნ, ნამუთ უილსონქ მუჩჷ. თე წიგნის უჯინექინ, გუმაშინე, მუჭო გუმოჩინებაფუ მუშ დუდ იეჰოვაქ (1 მატ. 28:9). გინოჭყვიდილ მაფჷ, გუვაგრძელე იეჰოვაშე გურაფა დო ქიმვეხვარე შხვეფს ულიებ სიცოცხლეშ მუმაღალარ რჩქინაშ მეღებას.