გაგრძელით იეჰოვაშ გაჩინებაფა

1. მუ გრძნობეფ მირჩქინდუნა, მუჟამსით ფიფქრენთ იეჰოვაშ რჩქინაშ, სიბრძნეშ დო დიდებულ საქმეეფიშ გურშენ?

ᲓᲦᲐᲡ ქუდაფიქრებეთო, მუშმადიდა რჩქინაშ დო სიბრძნეშ მენდულ რე იეჰოვა დო მუ დიდებულ საქმეეფ აფჷ ნაკეთებ? თე ირფელშე ფიფქრენთინ, ვორწყეთ, მუზმათ დიდებულ რე ჩქინ გუმაჭყაფალ ჩქინ კარს. შილებე მოციქულ პავლეცალო ფიფქრენდათ, მიდგაქ ჭარჷ: „მუ გურხვე რე ღორონთ! მუშმატომბა რე თიშ სიბრძნე დო რჩქინა! ბოლოშა ვენინჭინე თიშ სამართალშა დო ბოლოშა ვეგიგორე თიშ შარეფშა!“ (რომ. 11:33, 34).

2. მუ მარწმუნენა თიშა, ნამდა შემლებუნა იეჰოვაშ გაჩინებაფა?

² მართალ რე, ბოლოშა დღას ვაგმაჩინებენა იეჰოვა, მარა მუდგარენ დონეშა შემლებუნა თიშ გაჩინებაფა. მუ მარწმუნენა თეშა? მეფე დავითიქ მუშ სქუას, სოლომონს, უწუ: „იჩინენდა სქან მუმაშ ღორონთის; მთელ გურით დო ხიოლით ემსახურ თის . . . გორუას ქუდუჭყანქ-და, დუდის ქუგოძირანს“ (1 მატ. 28:9). თე სიტყვეფიშ ჭარუაშე საუკუნეეფიშ უკულ, მოციქულ იოანექ ხოლო თანაქრისტიანეფს თეცალ მუდგარენ მეჭარ: „ღორონთიშ სქუაქ . . . ინონჭაფაშ უნარ ქომუჩეს, მუშენდა მიბღითკო რჩქინა ნამდვილ ღორონთიშ გურშენ“ (1 იოან. 5:20). იესოქ ხოლო თქუ, ნამდა იეჰოვაშ გურშენ რჩქინაშ მეღება შეულებ არძას „მიდგაშა სქუას ოკო გაცხადება მუმაშ გურშენ“ (მათ. 11:27).

3. მუს გუვარჩიენთ თე სტატიას?

³ არძას, მიდგას დუდ მაფუნა მეძღვინელ იეჰოვაშა, უკვე ბრელ მუდგარენ მიჩქუნა თიშ გურშენ. მარა იეჰოვას უკვე იფჩინენთინ თენა ვა ნიშნენს, ნამდა ვა გუვაგრძელათ თიშ გაჩინებაფა (იოან. 17:3). მაგალთო, ჩქი ირო შემლებუნა მეტ გებგათ თიშ გურშენ, მუ ახიოლე ჩქინ ღორონთის დო უმოსო მუჭო მივენდათ თის. თე სტატიას გუვარჩიენთ სუმ კითხვას, ნამუთ მიმეხვარებუნა, უჯგუშო გეფჩინებაფუათ იეჰოვა, თიშ უმკუჯინუო, მუსხი ხან რე, ვომსახურუთ თის. თე კითხვეფ რე: მუს ნიშნენს იეჰოვაშ გაჩინებაფა? მუშენ ოკო გუვაგრძელათ იეჰოვაშ უჯგუშო გაჩინებაფა? მუჭო შემლებუნა უჯგუშო გეფჩინებაფუათ თინა?

ᲛᲣᲡ ᲜᲘᲨᲜᲔᲜᲡ ᲘᲔᲰᲝᲕᲐᲨ ᲒᲐᲩᲘᲜᲔᲑᲐᲤᲐ?

4. მუ მიშურს იეჰოვაშ გაჩინებაფაშა?

⁴ ბაბილონშე დორთელ იუდეველეფშენ რაგადებულ იეჰოვაშ სიტყვეფშე ბგებულენთ, მუ მიშურს თიშ გაჩინებაფაშა. იეჰოვაქ თქუ: „თინეფს გურს ჩქიმ გაჩინებაფაშ სურვილს გურჩქინანქ, მუშენდა უჩქუდან, ნამდა მა ვორექ იეჰოვა“ (იერ. 24:7). მუშო ოკო რაგად, ბაბილონშე დორთელ იუდეველეფს უკვე ძირითად მუდგარენეფ უჩქუდეს იეჰოვაშ გურშენ. მარა დორთაშ უკულ იეჰოვაშ გაჩინებაფაშ საქმეს გურ ოკო ქენოდვესკო, მუდგაშათ თინეფიშ გრძნობეფ დო მოტივეფ მიშეშ. ართ ნაშრომ თე აზრის თაშ ეჭარუნს: „ართ რე, რჩქინა გიღუდას ღორონთიშ გურშენ დო მაჟია რე, იჩინენდე ღორონთის. თენა შილებე შევადარათ ჸოროფას: ართ რე, კითხულენდე ჸოროფაშ გურშენ დო მაჟია რე, სი თვითონ გიჸორდას“. თაშ ნამდა, ხვალე თი ფაქტიშ რჩქინა ვა რე დასაბაღ, ნამდა ღორონთ არსებენს დო თის იეჰოვა ჯოხო. საჭირო რე, ქიგებგათ, მუნერ პიროვნება გერე თე სახელიშ უკახალე.

5. მუჭო იძირე მეფე იოშიაშ მაგალითშე, მუს ნიშნენს იეჰოვაშ გაჩინებაფა?

⁵ იეჰოვაშ გაჩინებაფაშ დროს, თის ხოლო ბგებულენთ, მუ ოხიოლ თის დო მუს ვეწონუანს. თენა ჯგირო იძირე მეფე იოშიაშ მაგალითშე. ბიბლია თიშ გურშენ იჩიებ: „მუშ მეფობაშ მა-8 წანას, მუჟამსით დიო ხოლო ბაღანა ბოშ რდჷ, მუშ ჯვეშიშ, დავითიშ, ღორონთიშ გორუა ქიდიჭყჷ“ (2 მატ. 34:3). მარა იოშია რჩქინაშ მეღებას ვეგეჯერებე. თინა ნაგურეფუშ თანახმას იქციებუდ. წინასწარმეტყველ იერემიაშ პიჯით იეჰოვაქ თქუ, ნამდა იოშია „სამართლიანო დო სიმართლეთ იქციებუდ“ დო „გინარდჷ საცოდალს დო უღონოს“. ბოლოს იეჰოვაქ გეუძინ: „თენა თის ვა ნიშნენსო, ნამდა მიჩინენდჷ?!“ (იერ. 22:15, 16).

6. მუჭოთ ფსალმუნეფიშ 9:10-შე იძირე, მუჭო იმოქმედენს ჩქინდა იეჰოვაშ გაჩინებაფა?

⁶ წეკითხით ფსალმუნეფიშ 9:10. მუთ უმოსო იფჩინებაფუანთ იეჰოვას, თით უმოსო მირჩქინდუნა ნდობა თიშ მიმართ. თექ თაშ მოხვად მოციქულ პავლეშ შემთხვევას ხოლო. მუშ ბოლო პატიმრობაშ დროს, ღურაშე ჭიჭე ხანით ადრე თიქ ჭარჷ: „ვა მოონჯღორ, მუშენდა მიჩქჷ, მი იბრწმუნ“ (2 ტიმ. 1:12). თი ირფელქ, მუთ პავლეს იეჰოვაშ გურშენ დუგურუაფ დო მუ მოხვარათ იეჰოვაშე მეუღებ, დარწმუნ, ნამდა შეულებუდ თოლწკურილო ენდუკო იეჰოვას. პავლე დარწმუნებულ რდჷ, ნამდა იეჰოვა ვეგიჭყოლიდუანდ თის დო თიშ ართგურობას დო გათელენდ.

ᲛᲣᲨᲔᲜ ᲝᲙᲝ ᲒᲣᲕᲐᲒᲠᲫᲔᲚᲐᲗ ᲘᲔᲰᲝᲕᲐᲨ ᲒᲐᲩᲘᲜᲔᲑᲐᲤᲐ?

7. მუქ შილებე დროშ მიკულაწკუმა ართო მოხვადას?

⁷ შილებე დროშ მიკულაწკუმა ართო თეშ ქუმოხვადას, ნამდა თიცალ მონდომათ ვა გუვაგრძელათ იეჰოვაშ გაჩინებაფა, მუჭოთ თეს დუდშე ვორთუდით. მუჭო შილებე თექ მოხვადას? ჸუდეს ვარდა კრებას ბიბლიაშ კითხირიშ დროს შილებე ყურადღება უმოსო თიშა გეგნიბღათ, პირადო ჩქი მუჭო გიმმოდირთუნა ბიბლიაშე გაგებულ ინფორმაცია ვარდა მუჭო შემლებუნა თიშ შხვეფიშ მახვარებელო გიმორნაფა. მუჭოთ თაშინ, ბიბლია ელამჩანა თე მხარეეფს ქიდვეკვირათ (2 ტიმ. 3:16, 17). მარა უმოს მნიშვნელოვან რე, დეფიფქრათ თიშ ავტორშე (ფსალმ. 25:8–10). ბიბლიაშ კითხირიშ დროს პირადო ჩქი მუ გიმმოდირთუნა ვარდა შხვეფიშ მახვარებელო მუს გიმიბრინუანთინ თიშა ყურადღება თიზმათ ოკო ვეგნიბღათ, ნამდა გეგშმოსქიდან მთავარქ, მუს ბგურაფლენთ იეჰოვაშ გურშენ.a

8. მუჭო მოქმედენს იეჰოვაწკუმა ჩქინ მეგობრობაშა თიშ უჯგუშო გაჩინებაფა? (ფსალმ. 73:24–28).

⁸ მუთ უმოსო იფჩინებაფუანთ იეჰოვას, თიწკუმა ჩქინ მეგობრობა უმოსო იმანგარებ. მაგალთო, მუჭო მოქმედენს იეჰოვაწკუმა თქვან ურთიერთობაშა ირდღას ბიბლიაშ კითხირ, ირთუთიან მაუწყებლობაშ ჯინა ვარდა კონგრესეფშა დასწრება? თე ირფელ მაახლოენა იეჰოვაწკუმა, მუშენდა თეშნერო უმოსის ბგებულენთ თიშ გურშენ, მუდგაშ შედეგო სურვილ მიღუნა, დიდება დო მარდულობა უძღვინათ ღორონთის. ჩქი ხოლო ვოთანხმუთ ფსალმუნმაბირე ასაფიშ სიტყვეფს, ნამუთ ფიქრენდჷ იეჰოვაშ ჸოროფაშენ დო თქუ: „ღორონთ რე ჩქიმ გუმამანგარებელ დო ჩქიმ წილ სადღამუშოთ“ (წეკითხით ფსალმუნეფიშ 73:24–28). მუთ უმოსო ვეცადებუთ იეჰოვაშ უჯგუშო გაჩინებაფას, თით უმოს მარდულეფ იპჸუაფუთ თიშო, ნამდა მიღუნა თიწკუმა მეგობრობაშ პატი.

9. მუჭო მოქმედენს ჩქინ გადაწყვეტილებეფშა იეჰოვაშენ ფიქრ? ქიმიჸუნით მაგალით.

⁹ ბიბლია მირაგადუნა, ნამდა ფშუდან იეჰოვა (იგავ. 3:5, 6). თენა ნიშნენს, იფიფქრათ თიშე, მუთ ღორონთიშ გურშენ მაფუნა გურაფილ დო თიშე, მუჭო იმოქმედენს ღორონთშა ჩქინ საქციელ. თენა მიმეხვარებუნა, უჯგუშ გადაწყვეტილებეფ მიბღათ. მაგალთო, ბრელს მუშ მეუღლეშ სურათ სტოლშა გილუძ, კაშილოკშა ენუძ ვარდა ტელეფონს გეურე, მუთ ოხვარ, ხშირას იფიქრას მუშ მეუღლეშე დო თიშე, მუჭო უჸორა ართიან. თენა ოხვარ თიცალ გადაწყვეტილებეფ მიღას, მუდგათ გურს გუხარენს მეუღლეს დო თიცალ მუთუნ ვაკეთას, მუდგათ გურს უწყუნუანს. თაშ რე იეჰოვაწკუმა ურთიერთობაშ დროს ხოლო – მუთ უმოსო ფიფქრენთ იეჰოვაშე, თით უმოსო მიბღენთ თიშ გურს ახიოლენ ფერ გადაწყვეტილებეფს (ფსალმ. 19:13, 14).

10. მუშ კეთებას მიმეხვარებუნა იეჰოვაშენ უმოსიშ გაგება?

¹⁰ ჩქი იეჰოვაშ ამნახანტო ვორეთ გოჭყაფილ, ათეშენ შემლებუნა გეგმიბრჩქინათ თის უღუნ თი თვისებეფ (დაბ. 1:26). მუთ უმოსის გებგენთ იეჰოვაშ თვისებეფშენ, თით უჯგუშო მარჩქვენუნა, ჩქი მუჭო გიმიბრჩქინათ თე თვისებეფ. მწიგნობარეფ დო ფარისეველეფ ვეგმირჩქინანდეს ღორონთიერ თვისებეფს, ათეშენ იესოქ განჭყორ თინეფს. მართალ რე, თე რელიგიურ ლიდერეფს კანონიშ ჭიჭე დეტალეფ ხოლო ჯგირო უჩქუდეს, მარა გიჭყოლიდუეს „თინა, მუთ უმოს მნიშვნელოვან [რდჷ] კანონს: სამართალ, ჭყოლოფა დო ართგურობა“ (მათ. 23:23). ჩქი ვა მოკონა, ვაგურათ თინეფს, თეშ გინაწონს, მოკონა, ირფელ გუვაკეთათ, ნამდა იეჰოვაშ კანონეფიშ დო პრინციპეფიშ უკახალე თიშ თვისებეფ ქობძირათ. თენა მიმეხვარებუნა, ჩქი ხოლო გეგმიბრჩქინათ თე თვისებეფ (1 იოან. 4:8, 11).

ᲛᲣᲭᲝ ᲨᲔᲛᲚᲔᲑᲣᲜᲐ ᲘᲔᲰᲝᲕᲐᲨ ᲣᲯᲒᲣᲨᲝ ᲒᲐᲩᲘᲜᲔᲑᲐᲤᲐ

11. მუჭო გეგით პირველო იეჰოვაშ გურშენ?

¹¹ მიშე გეგით პირველო იეჰოვაშ გურშენ? შილებე ქრისტიან მშობლეფქ მორრდეს. თინეფ ალბათ გეჩიებუდეს ბიბლიურ ისტორიეფს დო გოგურუანდეს, მუ დო მუ გაჭყჷ იეჰოვაქ, მუდგათ გოხვარუდეს, ქოძირითკო, მუნერ რე ღორონთ დო მუ თვისებეფ უღჷ თის. შილებე იეჰოვაშ გურშენ ნამდგაინ იეჰოვაშ მოწმეწკუმა ბიბლიაშ გურაფაშ დროს გეგით. თქვან მასწავლებერ ალბათ ქიმგეხვარებუდეს, ტომბაშე დეფიქრითკო ბიბლიურ შემთხვევეფშე დო გუნაჭყეფუეფშე, ნამდა ქოძირითკო იეჰოვაშ თვისებეფ. შილებე თინა თეშო ირინუანდჷ წიგნის „მარადიულო გეხარით ცხოვრებათ!“b (ნეემ. 8:8; საქ. 14:17). ასე თიშე ქიფჩუათ, მუჭო შემლებუნა გუვაგრძელათ იეჰოვაშ გაჩინებაფა.

12, 13. მუშ გაგება შემლებუნა იეჰოვაშ გურშენ ბიბლიაშ კითხირით? ქიმიჸუნით მაგალით (იერ. 39:15–18; ქოძირით სურათ).

¹² პირველ, იეჰოვაშ გურშენ მეტიშ გაგება შემლებუნა თიშ სიტყვაშ კითხირით დო გურაფათ. ბიბლიას ნამთინე ადგილს ღორონთიშ თვისებეფ პირდაპირ რე მოშინაფილ (გიშ. 34:6, 7). მარა უმენტაშო ბიბლიას მოჩამილ რე ადამიანეფიშ ისტორიეფ დო თინეფიშ მეღებულ გადაწყვეტილებეფ. თე ისტორიეფიშ კითხირიშ დროს დეფიქრით, მუს გოგურუანა თინეფ იეჰოვაშ გურშენ.

¹³ მაგალთო, იერემიაშ 38:6–13-იშ კითხირიშ დროს გებულენთ, მუჭო ირსხჷ ეთიოპ ებედ-მელექიქ იერემია. მუშო ოკო რაგად, ხეთეშე ქიმეხვადუთ, მუჭო მიაჸუნათ ებედ-მელექიშ დუდგინოდვალირობაშ, გაბედულებაშ დო თანამორწმუნეეფიშ ჸოროფაშ მაგალითის. მარა ქარწყეთო თე შემთხვევაშე იეჰოვაშ თვისებეფს? (წეკითხით იერემიაშ 39:15–18). მაგალთო, ნამ მუხლეფშე იძირე, ნამდა იეჰოვა გიმირჩქინანს მარდულობას, რე სამართლიან დო ადამიანეფს ვეგშაგორუნს ართმაჟიაშე. იეჰოვაშ ხოლო ნამ თვისებეფს ორწყეთ თე ისტორიაშე? ღორონთიშ სიტყვაშ კითხირიშ დროს ქიდეკვირით იეჰოვაშ თვისებეფს. თეშ უკულ მარდულობა დო დიდება უძღვინით თის თეცალ ჯგირ თვისებეფიშ მენდულ რენ თიშ გურშენ.

14. მუშენ ოკო დეფიფქრათ ტომბაშე იეჰოვაშ გუნაჭყეფუეფშენ?

¹⁴ მაჟია, იეჰოვაშ გურშენ მეტიშ გაგება შემლებუნა თიშ ნახელუანშე დაფიქრებათ (ფსალმ. 145:9, 10). მარა ხვალე გუნაჭყეფუეფშა დაკვირება ვა რე დასაბაღ. ნამთინე მთელ ცხოვრებას ბუნებაშა დაკვირებას მიკალიენს, მარა თე ირფელიშ უკახალე ვარწყენა ღორონთიშ თვისებეფს, ინა ვარ, ღორონთიშ არსებობაშ ხოლო ვა ჯერა. პავლე მოციქულქ ჭარჷ, ნამდა ღორონთიშ „თვისებეფს, ნამუთ თოლით ვეძირე, თე ქიანაშ გოჭყაფაშე მოჸუნაფილ არგამათ ვორწყეთ“, მუშენდა თენა „თიშ ნახელუანშე იძირე“ (რომ. 1:20). ართ თარგმანიშ თანახმას ღორონთიშ თვისებეფ ირწყებე, მუშენდა თინეფიშ „ძირაფა შილებე გონებაშ თოლით“. თაშ ნამდა, ჩქი ოკო იფიფქრათ, გურ ქუგუჩათ თის, მუდგას ვორწყეთ, ნამდა ჩქინ გუმაჭყაფალიშ თვისებეფ ქობძირათ.

15. მუ აკეთ პატრიკიქ თიშო, ნამდა უჯგუშო გეჩინებაფუკო იეჰოვა დო თქვა მუჭო შეილებუნა თეშ კეთება? (ქოძირით სურათ).

¹⁵ ბრელ ბუნებაშე შორს დიდ ქალაქეფს ცხოვრენს. თქვა ხოლო თეცალ ადგილს ქოცხოვრენთ-და, იშენით ქეშეილებუნანო გუნაჭყეფუეფიშ საშვალებათ იეჰოვაშ გაჩინებაფა? ქიმიპჸუნათ პატრიკიშ მაგალით, მით კონგოშ რესპუბლიკაშ დიდ ქალაქ ბრაზავილს ცხოვრენს. თინა იჩიებ: „ირიათო ვოცადუქ გუნაჭყეფუეფს ჩქიმ ბალკონშე ქიდვეკვირე. თევრეშე ხშირას ვორწყექ ჭიჭე მწერეფს დო ჭიჭე ჩიტეფს, ნამუთ ოჭკუმალიშ ოშიბელო ვარდა ბუდეშ ოშენებელო იცხვაბარუნა. ართშა ვოკვირუდ, მუჭო იშენენდეს ჩიტეფ ბუდეს. თინეფ ჩქინ გოხოლუას თიცალ მასალას შაყარანდეს, ნამდგათ შენებულ ბუდე მუნეფიშ ბარტყეფშო გემუან ოცხოვრებელ იჸუაფუდ“. პატრიკ თე ირფელს უბრალოთ ვაკვირუდუნ, ფიქრენდჷ გუმაჭყაფალშენ, მით მიკურდჷ თე ირფელს. თინა იჩიებ: „ვორწყექ, ნამდა იეჰოვა მუშ გვალო აკაბცხა გუნაჭყეფუეფს ხოლო აქციენს ყურადღებას. თენა მარწმუნენს, ნამდა თინა ჩქიმდე ხოლო ზრუნენს დო აუცილებერიშ უმშო დღას ვა დომტენს“.

16. მუქ მეხვარ იესოშ დიდა მარიამს, უჯგუშო გეჩინებაფუკო იეჰოვა დო ჩქი მუჭო შემლებუნა მივაჸუნათ თიშ მაგალითის? (ქოძირით სურათ).

¹⁶ მასმა, იეჰოვაშ გურშენ მეტიშ გაგება შემლებუნა ჩქინ გამოცდილებაშე დაფიქრებათ. თაშ მიქცუ იესოშ დიდა მარიამქ. მარიამ ჯგირო იჩინენდჷ იეჰოვას დო ღორონთ ხოლო იწონუანდჷ თის (ლუკ. 1:30). თიქ ღორონთშე მიღჷ მანგარ მნიშვნელოვან დო რთულ დავალება – ოკო მორდუკო ღორონთიშ სქუა. იეჰოვაქ ანგელოზ გაბრიელიშ დო მარიამიშ ნათესე ელისაბედიშ საშვალებათ გამანგარ თინა დო დარწმუნ, ნამდა ქიმეხვარებუდ. თე ირფელშე დაფიქრებაქ მარიამს უჯგუშო გაჩინებაფუ იეჰოვა – არგამათ ქაძირუ, მუნერ ძალიერ დო მოჭყოლოფე რე, ადამიანეფს ართმაჟიაშე მდგომარეობათ ვეგშაგორუნს დო უბრალო კათაშე ხოლო ზრუნენს (ლუკ. 1:46–55). მარიამ მანგარ მარდულ აფუდ ღორონთის. ჩქი ხოლო მოკონა, მივაჸუნათ თიშ მაგალითის დო მარდულ ვაფუდათ იეჰოვას, მუშენდა თინა „მუშ დროს“ მოხვარუნა (ებრ. 4:16). ღორონთშე მოხვარას ქიგინანთინ, თქვან დუდის ქოკითხით: „მუ დიბგურე თავრეშე იეჰოვაშ გურშენ? თიშ ნამ თვისებეფ ბძირჷ თე შემთხვევაშე?“.

ᲘᲔᲰᲝᲕᲐᲨ ᲒᲐᲩᲘᲜᲔᲑᲐᲤᲐᲡ ᲓᲦᲐᲡ ᲕᲔᲛᲕᲝᲢᲔᲜᲗ

17, 18. მუშენ შემლებუნა თიშ რაგად, ნამდა დღას ვემვოტენთ ღორონთიშ გაჩინებაფას?

¹⁷ წერმიდგინით, მუსხით უმოსის ქიგებგენთ იეჰოვაშ გურშენ ახალ ქიანას, სოდეთ ახალ გრაგნილეფიშ საშვალებათ თიშე მითითებეფს მიბღენთ (გიმოცხ. 20:12). შემალებენა უმოს გებგათ გუნაჭყეფუეფშე (ეს. 11:6–9). იეჰოვას უჯგუშო გეფჩინებაფუანთ, მუჟამსით გეგმოფცადუნთ ახალ მუდგარენეფს, მაგალთო, ჩქინ საჸოროფო ადამიანეფიშ გათელებას დო ირდღას უმოსო დო უმოსო გასრულყოფილებას.

¹⁸ იეჰოვაშ გაჩინებაფას დღას ვემვოტენთ. თინა ირიათო არსებენდჷ, ათეშენ „უზომე რე თიშ გონიერება“ (ფსალმ. 90:2; 147:5). თაშ ნამდა, ჩქი „დუდშე ბოლოშა დღას [ვენვანჭუთ] ღორონთიშ საქმეეფს“ (ეკლ. 3:11). ათეშენ იეჰოვაშ გაჩინებაფა დიპჭყითინ თიშ უკულ მუდგა დრო ვა რდასჷ მიკულირინ, ნამთინ საშვალება ვა გუტუათ ხეშე, ნამდა უჯგუშო გეფჩინებაფუათ ჩქინ მოჸოროფე მუმა.