მუჭო შეილებნა ჩატარათ თიცალ ბიბლიაშ გურაფა, ნამუთ პიროვნებას ნათუაშა მიჸონანს — პირველ ნაწილ

1. მუჭო მოხვარნა 2 კორინთელეფიშ 3:1—3, დუვაფასათ შხვეფშა ბიბლიაშ გურაფაშ პატი, ნამუთ ნათუაშა მიჸონანს თინეფს? (ქოძირით სურათ გალენ გვერდის.)

მუს გინაფლენქ, მუჟამსით ორწყექ, ნამდა ბიბლიაშ მაგურაფალ, ნამუთ სქან კრებას რე, ინათუ? მუშო ოკო რაგად, თენა გურს ხიოლით ეიფშანს! (მათ. 28:19). მარა განსაკუთრებულ ხიოლს თიმწკუმა გინაფლენქ, მუჟამსით სქან ბიბლიაშ მაგურაფალ ინათუ! (1 თეს. 2:19, 20). ახალნანათა მოწაფეეფ ჯგირ „შუამდგომლობაშ წერილეფ“ რენა ქოთ თინეფშო, მით ბიბლიას ოგურუანდჷ დო ქოთ მთელ კრებაშო (წეკითხით 2 კორინთელეფიშ 3:1—3).

2. ა) ნამ მნიშვნელოვან კითხვაშე ოკო დეფიფქრათ დო მუშენ? ბ) მუ რე ბიბლიაშ გურაფა? (ქოძირით სქოლიო.)

² სახიოლო რე, ნამდა ბოლო ოთხ წანა რე, მუთ მთელ მსოფლიოს ირ თუთას საშვალოთ 10 000 000 ბიბლიაშ გურაფაb იტარებ. თე წანეფიშ განმავლობას საშვალოთ 280 000-შე მეტ პიროვნება ინათუ ირ წანას დო გინირთუ იეჰოვაშ მოწმეთ დო ქრისტეშ მოწაფეთ. მუჭო შემლებნა მივეხვარათ მილიონობით ბიბლიაშ მაგურაფალს, დინათან? იეჰოვა მოთვინებას გიმირჩქინანს დო ხალხის არზენს დროს დო საშვალებას, ნამდა გინირთან ქრისტეშ მოწაფეთ. ათეშენ მოკონა, მუთ შემლებნან, ირფელ გუვაკეთათ, ნამდა მივეხვარათ თინეფს, მუთ შილებე მალას დინათან, მუშენდა თე ქვეყნიერებაშო დოსქილადირ დრო მანგარ ჩქარას ილიებ! (1 კორ. 7:29ა; 1 პეტ. 4:7).

3. მუს გუვარჩიენთ თე სტატიას?

³ ამდღა მოწაფეეფიშ მომზადებაშ საქმე მანგარ მნიშვნელოვან რე, ათეშენ ხემძღვანელ საბჭოქ ფილიალეფს თხუ, ქიგეგესკო, მუჭო შემლებნა, უმოსო მივეხვარათ ბიბლიაშ მაგურაფალეფს, დინათან. თე დო უკულიან სტატიას ქობძირუნთ, მუშ გურაფა შემლებნა გამოცდილ პიონერეფშე, მისიონერეფშე დო რაიონულ ზედამხედველეფშე (იგავ. 11:14; 15:22).c თინეფ ენწყუნა, მუშ კეთება შეულებნა ბიბლიაშ მაგურაფალეფს დო მასწავლებერეფს, ნამდა ბიბლიაშ გურაფა უმოს ეფექტურ რდას. თე სტატიას გუვარჩიენთ ხუთ ნაბიჯის, ნამუთ მეხვარებ ბიბლიაშ მაგურაფალს, სულიერო წიმი მიდართას დო დინათას.

ირ მარას ჩატარ ბიბლიაშ გურაფა

4. მუ ოკო მარჩქილედან კარწკუმა ბიბლიაშ გურაფაშ ჩატარებაშ გურშენ?

⁴ ბრელ ჩქინ და დო ჯიმა ბიბლიაშ გურაფას პირდაპირ კარწკუმა ატარენს. მართალ რე, თენა ჯგირ დაჭყაფ რე ბიბლიაშ მიმართ ინტერესიშ გავითარებელო, მარა თე დროს საკითხეფიშ გარჩიებას ჭიჭე დრო ეთმებ დო შილებე ირ მარას ხოლო ვეტარებდას გურაფა. ინტერესიშ უმოსო გავითარებელო ნამთინე მაუწყებელ დაინტერესებულს საკონტაქტო ინფორმაციას თხინს დო მაჟია მეულაშახ ურეკუნს ვარდა წერილს ჭარუნს, ნამდა ნამთინე ბიბლიურ აზრ გეგნოჩას თის. საკითხეფიშ თე მეთოდით გარჩიებაქ შილებე თუთეფს გეგრძელას, მარა თის ნაყოფიერ ბიბლიაშ გურაფაქ ვა მაჸუნას. ბიბლიაშ მაგურაფალ ღორონთიშ სიტყვაშ გურაფას თეშე უმოს მეტ დროს ვეგმურთუნს-და, მეუძღვინენსო თინა დუდის იეჰოვას დო დინათუნო? ალბათ ვარ.

5. მუჭოთ ლუკაშ 14:27—33-ს ჭარჷ, მუ თქუ იესოქ, მუთ მოწაფეეფიშ მომზადებაშ საქმეს მიმეხვარებნა?

⁵ ართშა იესოქ მაგალითით ენწყჷ, მუს ნიშნენს თიშ მოწაფეთ გინორთა. თიქ მაგალით მიჸონ კოჩშე, ნამდგას კოშკიშ შენება ოკო დო მეფეშე, ნამდგას ჩხუპშა ულა ოკო. იესოქ თქუ, ნამდა მაშენებელქ დიო ოკო ქუდოზოჯას დო გაგმოკოროცხას ხარჯეფ, მუშენდა ბოლოშა აშენას კოშკი დო მეფექ ხოლო დიო ოკო ქუდოზოჯას დო შხვეფწკუმა ართო ქიმირაგადუას, ნამდა ქიგეგას, შეიალებენ დოვარ მუშ ჯარს საქმეშ ბოლოშა მეჸუნაფა (წეკითხით ლუკაშ 14:27—33). იესოს თიშ რაგად ოკოდ, ნამდა პიროვნებაქ, ნამდგას თიშ მოწაფეთ გინორთა ოკო, ჯგირო ოკო დეფიქრას მუს ნიშნენს თენა. ათეშენ, ბიბლიაშ მაგურაფალეფ ოკო წუვახალისათ, ნამდა ბიბლიაშ გურაფა ირ მარას ჩუვატარათ. მუჭო შემლებნა თეშ კეთება?

6. მუშ კეთება შემლებნა, ნამდა ბიბლიაშ გურაფაქ უმოს შედეგ მიღას?

⁶ ბიბლიაშ გურაფას, ნამდგას კარეფწკუმა ატარენქ, უმოს მეტ დრო დუთმჷ. მაგალთო, შეილებ ირ მეულაშ დროს დამატებით ბიბლიურ მუხლ გარჩუე. მუჟამსით ორწყექ, ნამდა პიროვნებას ბიბლიაშ გურაფაშა მეტ დროშ დათმება უხუჯანს, ქოკითხ თის, ქორენ დო ვარ შეიოლებერ, ართო ქუდოზოჯათ დო გაგრძელათ ბიბლიურ აზრეფიშ გარჩიება. თიშ პასუხშე გეგენქ, მუსხით სერიოზულო უჯინე თინა ბიბლიაშ გურაფას. თეშ უკულ, შეილებ თინა ხოლო ქოკითხე, ქაკონ დოვარ მარაშე ჟირშა ჩატარათ ბიბლიაშ გურაფა. მარა თიშე უმოს რე საჭირო, ვინემ მარაშე ართშა ვარდა ჟირშა ჩატარება.

მემზად ირ გურაფაშ წოხლე

7. მუჭო შეულებ ბიბლიაშ მასწავლებერს, ჯგირო მემზადას თითოულ გურაფაშო?

⁷ სი მასწავლებერ რექ, ათეშენ ჯგირო ოკო მემზადე თითოულ ბიბლიაშ გურაფაშო. დუდშე შეილებ წეკითხე მასალა დო დოგორე ბიბლიურ მუხლეფ. ქიდემახსოვრ მთავარ აზრეფ. ქიფიქრ გაკვეთილიშ სათაურშე, ქვესათაურეფშე, კითხვეფშე, ოკითხე მუხლეფშე, ილუსტრაციეფშე დო თი ვიდეოეფშე, ნამდგაქ შილებე საკითხიშ ენწყუმას მიგეხვარას. თეშ უკულ, წინასწარ დეფიქრ, მუჭო შეილებ ადვილო დო გასაგებო გეგნოჩე მასალა ბიბლიაშ მაგურაფალს, ნამდა ვა გუჭირდას მეღებულ ინფორმაციაშ ინონჭაფაქ დო გიმორნაფაქ (ნეემ. 8:8; იგავ. 15:28ა).

8. მუს ბგურაფლენთ კოლოსელეფიშ 1:9, 10-ის ინოჭარილ პავლეშ სიტყვეფშე, ბიბლიაშ მაგურაფალეფშო ლოცვაშ გურშენ?

⁸ ქილოც ბიბლიაშ მაგურაფალიშ გურშენ, მუშენდა თენა მომზადებაშ ნაწილ რე. ქოთხი იეჰოვას, ქიმგეხვარას, თეშ ჩატარე ბიბლიაშ გურაფა, ნამდა პიროვნებაშ გურშა გენიღე მასალა (წეკითხით კოლოსელეფიშ 1:9, 10). მომზადებაშ დროს ქეცად, ქოძირე, მუშ გაგება ვარდა გიმორნაფა გუჭირდუ ბიბლიაშ მაგურაფალს. რშუდას, ნამდა სქან მიზან რე, ქიმეხვარე თის დინათას.

9. მუჭო შეულებ მასწავლებერს, ქუდაგურუას ბიბლიაშ მაგურაფალს მომზადება? გენწყით.

⁹ იმენდ მიღნა, ნამდა რეგულარულ ბიბლიაშ გურაფა მეხვარებ პიროვნებას, დაფასას თინა, მუთ იეჰოვაქ დო იესოქ აკეთეს დო შედეგო, მეტიშ გაგებაშ სურვილ უღდას (მათ. 5:3, 6). ბიბლიაშ მაგურაფალქ მთელ ყურადღება თიშა ოკო გეგნიღას, მუდგას გურაფლენს, ნამდა სრულ სარგებელ მიღას თიშე. თე მიზანიშ მიოჭირნაფალო, გეუნწყ, მუსხით მნიშვნელოვან რე თითოულ გურაფაშო მომზადება, მუდგაშათ მიშურს მასალაშ წინასწარ კითხირ დო თიშე ფიქრ, მუჭო ოხუ თინა პირადო მუს. მუჭო შეილებ, თის მომზადება დაგურუე? თიწკუმა ართო მემზად გურაფაშო.d გეუნწყ, მუჭო გორას კითხვეფიშ პასუხეფ დო ქაძირე, მუჭო მონიშნას მთავარ სიტყვეფ ვარდა ფრაზეფ, ნამუთ პასუხიშ გოშინას მეხვარებ. უკულ ქოთხი, მუშ სიტყვეფით ქუპასუხას. თეშნერო ქიგეგენქ, მუჭო ინანჭჷ მასალას. თეს გეძინელ, შეილებ ხოლო მუდგარენიშ კეთება ელუჩე ბიბლიაშ მაგურაფალს.

ქუდაგურე, მუჭო უღდას ირდღაშიან ურთიერთობა იეჰოვაწკუმა

10. მუშენ რე ბიბლიაშ ირდღაშიან კითხირ მნიშვნელოვან დო მუ ოკო აკეთას მაგურაფალქ, ბიბლიაშ კითხირშე მეტ სარგებელ მიღასინ?

¹⁰ მართალ რე, ბიბლიაშ მაგურაფალ ირმარას მასწავლებერწკუმა ართო გურაფლენს ბიბლიას, მარა თის შეულებ მუშით ხოლო გაკეთას მუდგარენეფ, მუთ სულიერო წიმი ულას მეხვარებ. თის პირად ურთიერთობა ოკო უღდას იეჰოვაწკუმა. მუჭო შეულებ თეშ კეთება? იეჰოვაშ რჩქილათ დო თიწკუმა ჩიებათ. თის იეჰოვაშ რჩქილა ირდღაშიან ბიბლიაშ კითხირით შეულებ (იეს. 1:8; ფსალმ. 1:1—3). ქაძირე, მუჭო გიმირინუას ბიბლიაშ კითხირიშ გეგმა, ნამუთ მოჩამილ რე ვებგვერდის jw.org.e ბიბლიაშ კითხირშე მეტ სარგებელ მიღასინ, ქელუჩ, ქიფიქრას, მუს ოგურუანს ბიბლია იეჰოვაშ გურშენ დო მუჭო შეულებ, ნაგურეფ გიმირინუას პირად ცხოვრებას (საქ. 17:11; იაკ. 1:25).

11. მუჭო რე შეიოლებერ, ბიბლიაშ მაგურაფალქ დიგურუას სწორას ლოცვა დო მუშენ რე მნიშვნელოვან, ხშირას ილოცას?

¹¹ ქელუჩ ბიბლიაშ მაგურაფალს, ირდღას ქილოცას დო თეშნერო ქუდურაგადუას იეჰოვას. თითოულ გურაფაშ დოჭყაფაშ დო თებაშ დროს ბიბლიაშ მაგურაფალწკუმა ართო მთელ გურით ქილოც დო ლოცვას ქიმიშინე თინა. სქან ლოცვაშე თინა ქიდიგურუანს, მუჭო ოკო ილოცას მთელ გურით დო მუჭო ოკო მიმართას იეჰოვას ლოცვათ იესო ქრისტეშ სახელით (მათ. 6:9; იოან. 15:16). წერმიდგინ, მუჭო მეხვარებ ბიბლიაშ მაგურაფალს ბიბლიაშ ირდღაშიან კითხირ — იეჰოვაშ რჩქილა, დო ლოცვა — იეჰოვაწკუმა ჩიება, უმოსო დეახლოვას ღორონთის! (იაკ. 4:8). თე ჩვევეფიშ გავითარება მეხვარებ ბიბლიაშ მაგურაფალს, საბოლათ დუდ მეუძღვინას იეჰოვას დო დინათას.

ქიმეხვარ თის, პირად ურთიერთობა გევითარას იეჰოვაწკუმა

12. მუჭო შეულებ მასწავლებერს, ქიმეხვარას ბიბლიაშ მაგურაფალს იეჰოვაწკუმა ურთიერთობაშ გავითარებას?

¹² თიქ, მუდგას ბიბლიაშ მაგურაფალ გურაფლენს, ხვალე თიშ გონებაშა ვარინ, გურშა ხოლო ოკო იმოქმედას. მუშენ იფჩიებუთ თეს? ჩქინ გურ, მუდგაშა მიშურს ჩქინ სურვილეფ, ემოციეფ დო გრძნობეფ, მოქმედებაშა აღბძრენა. იესო ლოგიკურო მსჯელენდჷ დო თიშ ნაგურეფ ადამიანეფიშ გონებაშა მოქმედენდჷ. მარა ხალხ თის თიშენ ეკოჸუნდჷ, ნამდა იესო თინეფიშ გურს ოხუდ (ლუკ. 24:15, 27, 32). ბიბლიაშ მაგურაფალქ ოკო ქოძირას, ნამდა იეჰოვა რეალურ პიროვნება რე, მიდგაწკუმა ურთიერთობაშ გავითარება შეულებ. თეს გეძინელ, ბიბლიაშ მაგურაფალქ ოკო ქოძირას, ნამდა იეჰოვა რე თიშ მუმა, ღორონთ დო მეგობარ (ფსალმ. 25:4, 5). ბიბლიაშ გურაფაშ დროს, ხაზ გუსვ ღორონთიშ პიროვნულ თვისებეფს (გამ. 34:5, 6; 1 პეტ. 5:6, 7). ვა უღჷ მნიშვნელობა მუ თემას არჩიენთ, ყურადღება გამახვილ იეჰოვაშ პიროვნებაშა. ქიმეხვარ ბიბლიაშ მაგურაფალს, დაფასას იეჰოვაშ ძვირფას თვისებეფ — ჸოროფა, სიჯგირა დო შხვეფიშ გაჭირებაშ გურშა მეღალა. იესოქ თქუ, ნამდა „პირველ დო არძაშ უდიდაშ მცნება“ რე, „გიჸორდას იეჰოვა, სქან ღორონთ“ (მათ. 22:37, 38). ქეცად, ნამდა ბიბლიაშ მაგურაფალიშ გურს გავითარე ძალიერ ჸოროფა იეჰოვაშ მიმართ.

13. გენწყით, მუჭო შილებე მივეხვარათ ბიბლიაშ მაგურაფალს იეჰოვაშ პიროვნებაშ გაჩინებაფას.

¹³ ბიბლიაშ მაგურაფალწკუმა რაგადიშ დროს, გეგმოხანტ მუჭო გიჸორს იეჰოვა. შილებე თექ ბიბლიაშ მაგურაფალს თიშ გაგებას მეხვარას, ნამდა თიქ პირად, მეგობრულ ურთიერთობა ოკო გავითარას იეჰოვაწკუმა (ფსალმ. 73:28). მაგალთო, ოგურაფალ პუბლიკაციას ვარდა ბიბლიურ მუხლის ხომ ვა რე თიცალ ფრაზა, სოვრეშეთ იძირე იეჰოვაშ ჸოროფა, სიბრძნე, სამართლიანობა ვარდა ძალა, ნამუთ ოხუ სქან გურს? ქიმიშინე თინა ბიბლიაშ მაგურაფალწკუმა დო ქაძირე, ნამდა თენა რე ართ-ართ მიზეზ, მუდგაშეთ გიჸორს სქან ზეციერ მუმა. მარა ხვალე თენა ვა რე დასაბაღ, ნამდა ბიბლიაშ მაგურაფალქ წიმი მიდართას დო დინათას.

ქელუჩ ბიბლიაშ მაგურაფალს, ქიდესწრას კრებაშ შეხვალამეფს

14. მუ იძირე ებრაელეფიშ 10:24, 25-შე კრებაშ შეხვალამეფიშ გურშენ დო მუჭო მეხვარებ შეხვალამეფშა დასწრება ბიბლიაშ მაგურაფალს სულიერო წიმი ულას?

¹⁴ არძას მოკონა, ბიბლიაშ მაგურაფალეფქ წიმი მიდართან დო დინათან. ათეშენ ქელვუჩათ თინეფს, ქიდესწრან კრებაშ შეხვალამეფს, თენა რე ართ-ართ მნიშვნელოვან შარა, მუდგათ შემლებნა მივეხვარათ ბიბლიაშ მაგურაფალეფს. გამოცდილ მასწავლებერეფ იჩიებნა, ნამდა თი ბიბლიაშ მაგურაფალეფ, მით შეხვალამეფშა დასწრებას ხეთეშე იჭყანა, სულიერო წიმი უმოს მალას მეულა (ფსალმ. 111:1). ნამთინე მასწავლებერ ბიბლიაშ მაგურაფალს ეუნწყუნს, ნამდა ბიბლიურ რჩქინაშ გვერდ ბიბლიაშ ირმარიან გურაფაშე მიღეს დო გვერდ — შეხვალამეფიშ დასწრებაშე. ართო წეკითხით ებრაელეფიშ 10:24, 25 დო გეუნწყ, მუ ჯგირობუას მოუღანს კრებაშ შეხვალამეფშა დასწრება. ქაჯინე ვიდეოშა „მუს ომსახურუ იეჰოვაშ მოწმეეფიშ სამეფო დარბაზი?“.f ქიმეხვარ ბიბლიაშ მაგურაფალს, ირმარიან შეხვალამეფშა დასწრებაქ თიშ ცხოვრებაშ მნიშვნელოვან ნაწილო გინირთას.

15. მუშ კეთება შემლებნა, ნამდა ბიბლიაშ მაგურაფალ აღბძრათ, რეგურალურო ქიდესწრას კრებაშ შეხვალამეფს?

¹⁵ მუშ კეთება შეილებ, მუჟამსით ბიბლიაშ მაგურაფალ დიო ვა ჸოფე კრებაშ შეხვალამას ვარდა რეგულარულო ვასწრჷ თის? მთელ გურით გეგნოჩ თინა, მუთ ბოლო შეხვალამაშე დიგურე. შეხვალამაშა დაპატიჟებაშე უმოსო, თენა აღძრენს, ქიდესწრას კრებას. ქიმეჩ თის „გინაჯინალ კოშკიშ“ ოგურაფალ გიშაშქუმალა ვარდა „ცხოვრება დო მსახურებაშ ომეცადინებელ ფურცელ“, ნამდგას ასე არჩიენთ კრებას. ქაძირე, მუ იჸუაფ გარჩიებულ ანწიან მარას, უკულ ქოკითხ, მუ რე თიშო არძაშ უმოს საინტერესო გარჩიებელ მასალაშე. თის, მუდგას კრებაშ შეხვალამაშ პირველ დასწრებაშ დროს ძირუნს დო მირჩქილუანს ბრელით უმოს დიდ გავლენა აღვენუ, ვინემ შხვა ნებისმიერ რელიგიურ შეხვალამას (1 კორ. 14:24, 25). ბიბლიაშ მაგურაფალ კრებას თიცალ პიროვნებეფს შეხვადუ, მიდგაშ ჯგირ მაგალითის შეულებ მიაჸუნას დო მით მეხვარებ თის, სულიერო წიმი მიდართას დო დინათას.

16. მუჭო ჩუვატარათ თიცალ ბიბლიაშ გურაფა, ნამუთ პიროვნებას ნათუაშა მიჸონანს დო მუს გუვარჩიენთ ანწიან სტატიას?

¹⁶ მუჭო ჩუვატარათ თიცალ ბიბლიაშ გურაფა, ნამუთ პიროვნებას ნათუაშა მიჸონანს? შემლებნა, თითოულ ბიბლიაშ მაგურაფალს ელვუჩათ ბიბლიაშ გურაფაშ ირმარას ჩატარება დო თითოულ გურაფაშო წინასწარ მომზადება. თეშნერო მივეხვარებუთ, ნამდა სერიოზულო უჯინას ბიბლიაშ გურაფას. თეს გეძინელ, მოკონა, აღბძრათ თინა, ირდღას ილოცას, წეკითხას ბიბლია დო პირად ურთიერთობა გავითარას იეჰოვაწკუმა. თეწკუმა ართო, მოკონა, ბიბლიაშ მაგურაფალ აღბძრათ, ქიდესწრას კრებაშ შეხვალამეფს (ქოძირით ჩარჩო „მუ ოკო აკეთან ბიბლიაშ მაგურაფალეფქ, ნამდა სულიერო წიმი მიდართან დო დინათან“). ანწიან სტატიას გუვარჩიენთ ხოლო ხუთ მხარეს, მუთ ბიბლიაშ მასწავლებერეფქ ოკო აკეთან, ნამდა ბიბლიაშ მაგურაფალ ნათუაშა ქიმიჸონან.