“Te huru oraraa fariihia e te Atua”—Tairururaa Mataeinaa 1998
1 I te mau matahiti atoa, te tiai ru nei te feia haamori ia Iehova ati aˈe te ao nei, i te haaputuputu ei nahoa rahi i te mau tairururaa mataeinaa. Te faaite ra ïa ratou i te hoê â feruriraa e to te mau tavini haapao maitai a Iehova no Iseraela i tahito ra, o tei himene ma te oaoa i te mau parau a te Salamo 122 a haere ai ratou i Ierusalema no te haamori ia Iehova. Te na ô ra te Sal 122 irava 1 e: “Oaoa aˈera vau e te feia atoa i parau mai ia ˈu e, [E haere] tatou i nia i te fare o Iehova.” Te faaite atoa ra teie mau haaputuputuraa e te tupu nei te mau parau faauruahia a te Isaia 2:2, 3.
2 I teie matahiti, e tumu taa ê to tatou no te oaoa, e faatupuhia hoi te hoê haaputuputuraa nunaa rau inaha, e mau tausani tia no te mau fenua ěê o te haere atu i te tahi o te mau tairururaa rarahi. E tia atoa ˈtu te mau mitionare o te hoˈi atu i rotopu i to ratou mau fetii i te mau tairururaa e rave rau. No reira, e vauvau atoa mai te porotarama i te tahi mau faatiaraa e te mau tabula no nia i te pororaa i te Basileia na te ara.
3 Oia mau, o te mau amuiraa anaˈe e vai ra i roto i te mau tuhaa fenua e faatupuhia ˈi te mau tairururaa nunaa o te titau-manihini-hia. E tia hoi ia tatou pauroa ia faatura i teie nei otia i haamauhia, ia nehenehe te mau tairururaa atoa e faaineinehia ma te nahonaho maitai. E riro te tairururaa tataitahi ei haaputuputuraa nunaa rau inaha, e vauvauhia mai i roto i te porotarama vetahi mau tuhaa taa ê e te mau tabula, e e tia atoa mai te mau mitionare i te tahi mau tairururaa.
4 Tei roto mau tatou i te tau faaineineraa i te Tairururaa Mataeinaa 1998 “Te huru oraraa fariihia e te Atua,” e te hinaaro nei matou e faahaamanaˈo atu i te tahi mau tuhaa. Na roto i to outou haapao-maite-raa i te reira, e faaite ïa outou i to outou mauruuru no te mau faanahoraa atoa e ravehia no outou.
5 Mau tupuraa taa ê: Te hinaaro ra paha te mau ruhiruhia aore ra te mau hapepa, te mau tavini ma te taime taatoa aore ra vetahi atu, i te tauturu no te haere i te tairururaa. E nehenehe ïa te fetii, te mau matahiapo aore ra te tahi atu mau melo o te amuiraa, o tei ite i to ratou huru tupuraa taa ê, e rave ma te here i te tahi mau ohipa e titauhia, eiaha râ e vaiiho i ta ratou hopoia e na te mau taeae e faanahonaho ra i te tairururaa e rave.—Hiˈo Timoteo 1, 5:4.
6 No te mau taata aita e fanaˈo ra i teie huru faanahoraa, te haapapu nei te api parau ra “Demande de chambre pour cas particuliers” i te mau titauraa te tia i te feia ani ia faaî. Teie faanahoraa, no te feia poro anaˈe ïa e roo maitai to ratou, e tae noa ˈtu te feia poro e haerea maitai to ta ratou mau tamarii, e ua fariihia te aniraa na te tomite no te taviniraa a te amuiraa. Hou e faaî ai i teie api parau, a taio maitai i te mau haamaramaramaraa i raro i te api. E tia ia hapono oioi i teie mau aniraa i te tuhaa haapao i te vahi faaearaa. A hapono atu i te vahi nohoraa a te tairururaa i papaihia i muri i te api parau “Demande de chambre pour cas particuliers.”
7 Faaotiraa: E rave rahi mau taeae e mau tuahine te faatae nei i te rata i te Taiete no te faaite i to ratou mauruuru no te mau faanahoraa i ravehia no ratou. Ua papai te hoê utuafare e faaea nei i te hau Marite no Illinois e: “Te hinaaro nei matou e faaite atu e aita matou e haafaufaa ore nei i te tairururaa mataeinaa. Ua papu ia matou e e mea faanahonaho-maitai-hia teie ohipa, e e rave rahi mau taeae o tei rohi puai. Te papai atu nei matou no te haamauruuru ia outou.” Ua papai te hoê tuahine no te hau Marite no Michigan e: “Te hinaaro nei au e haamauruuru hohonu i to ˈu mau taeae atoa no te tuhaa haapao i te vahi faaearaa. Te oaoa nei mâua ta ˈu tane i te fanaˈoraa i te mau tarifa mâmâ aˈe, no te mea te ora nei mâua i nia i te hoê anaˈe moni ohipa, ia nehenehe au e tamau noa i te taviniraa pionie. Te tauturu nei te mau faanahoraa e ravehia ra e te tuhaa haapao i te vahi faaearaa, ia mâua ia fanaˈo hau atu â i te tairururaa.”
8 Te ite papu ra tatou paatoa e te turu nei o Iehova i te mau faanahoraa e ravehia nei no te mau tairururaa mataeinaa. Mai te peu e ‘e haapao maitai tatou i te mea iti ra,’ e nehenehe ïa tatou e tiaturi e fanaˈo i te mau haamaitairaa rahi e tiai ra i te feia i herehia e Iehova.—Luka 16:10.
[Box on page 3]
Hora
Mahana pae e Mahana maa
9:30 - 5:00
Sabati
9:30 - 4:00