“Orometua haapii i te Parau a te Atua”—Tairururaa Mataeinaa 2001 a te mau Ite no Iehova
1 Ua faataa te peropheta ra Isaia ia Iehova mai te Orometua Rahi, o te parau ma te reo o te hoê metua tane e: “Teie te eˈa: e na reira i te haere.” (Isa. 30:20, 21) Mea nafea râ tatou e faaroo ai i te mau parau ta Iehova e faahiti ra e faufaahia ˈi tatou? Te paraparau ra Iehova i ta ˈna mau tavini na roto i te mau api o te Bibilia, na roto atoa râ i te ravea o te mau papai Bibilia, te mau putuputuraa, te mau tairururaa haaati e mataeinaa ta “te tavini haapao maitai e te paari” e faanaho. (Mat. 24:45) Aita anei ta tatou e mau tumu e mauruuru ai ia Iehova no te aratai-tamau-raa ia tatou na nia i te eˈa e tia ˈi ia tatou ia haere?
2 I te mau matahiti atoa, ua riro te tairururaa mataeinaa ei taime no te farerei faahou i to tatou mau hoa faaroo e no te faaroo maite i te mau haapiiraa a Iehova. I te matahiti i mairi aˈenei, e 3 119 taata tei haere mai i te mau Tairururaa Mataeinaa “Feia rave i te Parau a te Atua” tei riro ei faaitoitoraa i te pae varua. I te matahiti 2001, e tupu te mau Tairururaa Mataeinaa “Orometua haapii i te Parau a te Atua” e toru mahana i te maoro i roto i te tuhaa fenua taatoa. Ua ite matou e te ru ra outou i te faanaho ia haere mai iho â outou; no reira matou e horoa ˈtu ai i te tahi mau faaueraa i muri nei no te tauturu ia outou.
3 Te haapaoraa i te mau tupuraa taa ê: E hinaaro paha te vetahi i te tauturu no te haere mai i te tairururaa: te ruhiruhia, te feia ea paruparu, te tavini taime taatoa e vetahi ê atu e mau hinaaro taa ê to ratou. E nehenehe ïa te mau fetii, te mau matahiapo e te tahi atu mau melo o te amuiraa, o tei ite i to ratou tupuraa e horoa i ta ratou tauturu ma te here. Eiaha te utuafare e te amuiraa e tuu atu i ta ratou mau hopoia i nia i te feia e faanaho i te tairururaa. (Tim. 1, 5:4) Te haapapu nei te api parau ra “Demande de chambre pour cas particuliers” i te mau titauraa e tia ia faaîhia. E hiˈopoa te tomite tiaauraa a te amuiraa i te tupuraa o te taata ani taitahi hou a hapono atu ai i taua api parau ra i te tuhaa haapao i te vahi faaearaa. E papai te papai parau i ta ˈna numera niuniu ia taniuniu atu te tuhaa haapao i te vahi faaearaa ia ˈna mai te peu e e uiraa ta ratou. E haponohia ˈtu teie mau parau aniraa i fariihia i te vahi nohoraa o te tairururaa i faaitehia i muri i te api parau.
4 Te faanahoraa ia tae mai i na mahana e toru: Ua tamata anei Satani i te haafariu ê ia outou i te mau tumu parau i te pae varua? Ma te peapea, te ere ra e rave rahi taeae e tuahine e to ratou utuafare i te hoê maa faufaa i te pae varua. Nafea? Ma te ore e haere mai i te mau rururaa o te Mahana pae. I te tahi mau tairururaa, ua itehia e ua ere e rave rahi taeae e tuahine i te haapiiraa i te pae varua e te autaeaeraa ta ratou i nehenehe e fanaˈo i taua mau rururaa ra o te Mahana pae.
5 Te vai ra anei te tahi mau taeae o te ore e ani oioi i te hoê tau faafaaearaa ohipa i ta ratou paoti ohipa no te haere mai i te tairururaa? Mai te reira atoa anei no outou? No te aha e ore ai e faahiti i te reira ia Iehova i roto i ta outou mau pure e e ani ia ˈna i te itoito no te faataa i to outou tupuraa i ta outou paoti ohipa? A haamanaˈo na i te faahopearaa oaoa no te hoê â tupuraa i farereihia e Nehemia. (Neh. 2:1-6) Ia papu ia outou e te hinaaro ra to outou Metua i te raˈi ra e turu ia outou e, mai te peu e e tuu outou i te mau faufaa o to ˈna Basileia i te parahiraa matamua, e horoa oia i te mau mea e hinaarohia no to outou oraraa na outou.—Mat. 6:32b, 33.
6 Te haereraa i te tahi atu tairururaa: Mai te peu e e hinaaro outou i te tahi mau haamaramaramaraa no nia i te tahi atu tairururaa, e nehenehe te papai parau o ta outou amuiraa e faaite atu ia outou i te vahi nohoraa o te tuhaa haapao i te tairururaa e vai ra i muri i te api parau ra “Demande de chambre pour cas particuliers.” A tuu noa mai i ta outou parau aniraa e te hoê vehî rata i titirohia tei papaihia to outou vahi nohoraa i nia iho. Mai te peu e ua faanahohia e rave rahi tairururaa i taua oire ra, a haamanaˈo i te haapapu i te mau taio mahana o te tairururaa ta outou e haere atu.
7 Parau hopea: I te mea e te piri maira te Tairururaa Mataeinaa, a pure ia Iehova ia tae mai iho â outou i te mau rururaa atoa i na mahana e toru e ia fanaˈo maite i te porotarama. Ua ani aˈena anei outou i ta outou tau faafaaearaa ohipa no na mahana e toru o te tairururaa ta outou e opua ra e haere atu? Mai te peu e aita, a ani oioi atu. Mai te peu e e anihia te tau faafaaearaa ohipa i te taime hopea, mea varavara te reira i te horoahia mai. Ua faanaho te tavini haapao maitai e te paari i te Tairururaa Mataeinaa i teie matahiti i nia i te tumu parau ra “Orometua haapii i te Parau a te Atua” no te haapii ia tatou i te pae varua e no te patu i to tatou faaroo. E rave anaˈe ïa i te mau faanahoraa i teie nei â ia tae mai iho â tatou no te mea te aˈo mai ra te papai salamo e: “E haamaitai i te Atua i roto i te amuiraa”!—Sal. 68:26.
[Tumu parau tarenihia i te api 3]
Hora o te mau rururaa
Mahana pae e Mahana maa
9:30–5:00
Sabati
9:30–4:00