“Te faaroo i roto i te Parau a te Atua”—Tairururaa mataeinaa 1997
1 “E maitai rahi to te mahana hoê i roto i te mau [“aua,” MN] no oe ra, i te mahana atoa e tausani noa ˈtu i te tahi vahi ê.” (Sal. 84:10) I to te papai salamo taviniraa i te hiero o Iehova, ua nehenehe oia e ite i te vairaa mai o te Atua Mana hope. Ia putuputu anaˈe te nunaa no te mau oroa matahiti e ia haere rahi mai te feia haamori mau i Ierusalema, ua nehenehe te mau ati Iseraela e fanaˈo i te mau amuimuiraa au maitai ia putuputu anaˈe ratou i roto i te aua o te hiero. Ua faahaamanaˈo te reira ia ratou i te tahoêraa o to ratou nunaa, e te mea e o ratou anaˈe te nunaa i nia i te fenua nei, o ta Iehova e haamaitai ra e e farii ra. I te mau matahiti atoa, e nehenehe atoa tatou e fanaˈo i te hoê â mau manaˈo tahoê e te oaoa e te mau tausani taeae e tuahine. I to tatou nei tau, te faaohipa nei o Iehova i te mau tairururaa mataeinaa matahiti no te haapii i ta ˈna mau tavini i haaputuputuhia e no te faafanaˈo ia ratou i te autaeaeraa kerisetiano.
2 Ia nahonaho ïa no te haapao i te rahiraa tavini a Iehova e noho na ati aˈe ia Ierusalema e i roto i te oire i te tau oroa. Ia vai noa te nahonaho e te hau, papu maitai, e tia ia horoa i te mau faaueraa no nia i te vahi faaearaa, te mau hora o te mau tairururaa e te tahi atu â mau faanahoraa. I te mea e ua taaihia taua mau tumu parau ra i te haamoriraa mau, ua pee noa te mau ati Iseraela ma te oaoa i te mau faaueraa i horoahia mai.—Sal. 42:4; 122:1.
3 E mau hanere taeae o tei horoa aˈena e rave rahi hora no te faanaho vetahi mau tuhaa no te mau tairururaa. Te ohipa amui nei teie mau taeae e te piha tairururaa a te Taiete, no te faaau i te mau tuhaa iti atoa no nia i te faanahonahoraa o te hoê tairururaa. Peneiaˈe aita tatou e taa ra i te rahiraa taime, tutavaraa, e haamâuˈaraa e horoahia ra no ta tatou mau tairururaa mataeinaa i te mau matahiti atoa, tera râ, te mauruuru mau nei tatou no te feruriraa faatusia o teie mau taeae haapao maitai, e ere anei?
4 A rave-noa-hia ˈi te mau faaineineraa no ta tatou tairururaa mataeinaa 1997 “Te faaroo i roto i te Parau a te Atua,” teie vetahi mau manaˈo te tia ia outou ia haapao. E haapapu to outou ohipa-amui-raa mai i to outou mauruuru no te mau faanahoraa i ravehia no outou. Parau mau, ua tauaparau aˈena tatou no nia i te tahi o teie mau tumu parau, tera râ, e mea faufaa no tatou tataitahi ia taa maitai e eaha ta tatou hopoia i mua ia Iehova, no te turu i te mea e ravehia ra no ta tatou tairururaa.
5 Mau tupuraa taa ê: Te haamatara ra te api parau ra “Demande de chambre pour cas particuliers” horoahia e te Taiete, i te mau titauraa te tia i te feia ani ia faaî: ‘Mai te peu e e roo maitai to outou i roto i te amuiraa, e mau hinaaro taa ê to outou e eita ta outou amuiraa e nehenehe e tauturu, e nehenehe ta outou, mai te peu e e hinaaro outou, e fanaˈo i te hoê piha na roto i te tuhaa haapao i te vahi faaearaa.’ Teie faanahoraa, no te feia poro anaˈe ïa e roo maitai to ratou, e tae noa ˈtu te feia poro e haerea maitai to ta ratou mau tamarii, e ua fariihia te aniraa na te tomite no te taviniraa a te amuiraa. Te feia e hinaaro taa ê to ratou, o to tatou ïa mau taeae e mau tuahine, e te hinaaro nei tatou e tauturu ia ratou.
6 Te hinaaro atoa ra paha te mau ruhiruhia aore ra te mau hapepa, te mau tavini ma te taime taatoa aore ra vetahi atu, i te tauturu no te haere i te tairururaa. E nehenehe ïa te fetii, te mau matahiapo aore ra te tahi atu mau melo o te amuiraa, i ite i to ratou huru tupuraa taa ê, e rave ma te here i te tahi mau ohipa e titauhia, e eiaha râ e vaiiho i ta ratou hopoia e na te mau taeae e faanahonaho ra i te tairururaa e rave. (A hiˈo Timoteo 1, 5:4.) Hou a faaî ai i te hoê api parau “Demande de chambre pour cas particuliers,” a taio maitai i te mau haamaramaramaraa i raro i te api parau. E tia ia hapono oioi i teie mau aniraa i te tuhaa haapao i te vahi faaearaa.
7 Faaotiraa: Te haapapu rahi ra te mau rata e faataehia ra i te Taiete i te mau matahiti atoa i muri aˈe i te tairururaa mataeinaa, i te mauruuru o to tatou mau taeae e mau tuahine no te mau faanahoraa i ravehia no ratou.
8 Eita e ore, te turu maira o Iehova i te mea e ravehia ra no te mau tairururaa matahiti. E faaite anaˈe e ‘te haapao maitai nei tatou i te mea iti’; e nehenehe ïa tatou e fanaˈo e rave rahi haamaitairaa i mua nei no te feia e here ra ia Iehova.—Luka 16:10.
9 Te na ô ra te Isaia 33:20 e: “E ite râ oe ia Ziona, i te oire no ta tatou mau oroa moˈa ra.” E nehenehe tatou e faahohoˈa i te nahoa taata oaoa tei putuputu rahi mai i Ierusalema e o tei pahono ma te aau tae i te faaueraa a Iehova ia ‘oaoa noa.’ (Deut. 16:15) Ua riro ta tatou mau tairururaa mataeinaa matahiti ei taime otahi no tatou no te fanaˈo i te haapiiraa no ǒ mai i te Atua ra e te auhoaraa faufaa roa o to tatou mau taeae e mau tuahine. Ia haamaitai mai Iehova i ta outou mau tutavaraa no te faaineine ia outou no te haere i te tairururaa mataeinaa 1997 “Te faaroo i roto i te Parau a te Atua”!
[Box on page 6]
Hora
Mahana pae e Mahana maa
9:30 - 4:50
Sabati
9:30 - 3:50