E aratai anaˈe i te mau taata i roto i te faanahonahoraa
1 Ua taaihia te tupu-maitai-raa i te pae varua o te mau taata o tei amuimui mai ia tatou aita i maoro aˈenei, i to ratou here i te mau parau mau Bibilia, i te faanahonahoraa a Iehova e i te mau faanahoraa ta ˈna e rave ra. (Sal. 33:12; 119:97) No reira, e faahanahana te haapiiraa ta tatou e faatere tamau nei ma te haere noa i mua, e te feia i anaanatae apî mai i te parau mau, ia Iehova e i te mau faanahoraa o ta ˈna i rave no ta ˈna haamoriraa. Mai te peu e e huti tatou ma te haapao maitai i te ara-maite-raa o te taata i nia i te tiaraa o teie faanahonahoraa i roto i to tatou oraraa, e faaite ïa tatou e e feia poro aravihi tatou e e faaitoito tatou i ta tatou taata haapii ia haere i mua.
2 Mai te peu e e hinaaro tatou e ia faatupu ta tatou haapiiraa i te mau pǐpǐ mau a te Mesia, e tia ia tatou ia tutava i te tauturu i te feia e anaanatae ra i te parau mau, ia ite papu e ia here i te faanahonahoraa a Iehova. E rave rahi feia poro o tei oaoa i te iteraa i te mau faahopearaa faaitoito tei noaa mai na roto i te huti-tamau-raa i te ara-maite-raa o te taata i nia i te faanahonahoraa. Eaha te mau ravea te nehenehe e faaohipahia no te faaara i te anaanatae o te taata no te mau putuputuraa a te amuiraa? Nafea te feia e haapii nei i te Bibilia ia tauturuhia ia haamatau mǎrû noa i te faanahonahoraa? Eaha te mau manaˈo tauturu tano maitai ta outou e nehenehe e horoa ia ore to ratou taiâ ia haere i te Piha no te Basileia no te taime matamua?
3 Ia haamata iho â outou i te hoê haapiiraa, a haamatau i te paraparau no nia i te faanahonahoraa i te mau hebedoma atoa. E tia hoi ia papu i te taata haapii e ua riro roa te parau mau ei oraraa no outou, te here nei outou i to outou mau taeae e te faatura nei outou i te mau faanahoraa i ravehia e Iehova. A faahiti i te iˈoa o te mau taeae e a afai mai i te tahi mau taeae aau tae atoa, na muri iho ia outou i te haapiiraa. E nehenehe hoi te reira e faaoraora maitai i te aparauraa ia riro ei faaitoitoraa. I te taime au, e faaite atoa mai paha te taata haapii e mea au na ˈna e te haafaufaa nei oia i te amuiraa kerisetiano.—Luka 6:40.
4 Eaha ta tatou e nehenehe e rave no te faaore i te mǎtaˈu o te feia apî ia haere i te mau putuputuraa no te taime matamua? Ua manaˈo vetahi feia poro aravihi e mea maitai roa ia faataa i te tumu e te tereraa o te Piha no te Basileia. Ua patoi pinepine na te hoê utuafare i te haere mai i te mau putuputuraa a te amuiraa. Ua manaˈo atura te taeae e faatere ra i te haapiiraa e mea maitai paha ia afai i teie mau taata i te Piha no te Basileia i te taime aita e putuputuraa; ua haaati ratou i te piha e, tau taime i muri iho, ua haere maira teie utuafare i te mau putuputuraa. Na roto i to ˈna ite-maite-raa e to ˈna imiraa i te ravea, ua nehenehe teie taeae e haamatara i te fifi o tei tapea na i teie mau taata ia haere mai i te mau putuputuraa.
5 Mai te peu e ua matau outou i te tahi mau taata poro aravihi, o tei manuïa i te aratai i te mau taata ia haere mai i te mau putuputuraa a te amuiraa, no te aha e ore ai e haere atu e ani ia ratou ia horoa mai i te tahi mau manaˈo tauturu tano maitai? E i muri iho, e pue mai ïa te mau manaˈo o ta outou e nehenehe e faaohipa maitai i roto i ta outou mau haapiiraa. E pee anaˈe i te hiˈoraa o Iesu e e aratai anaˈe ma te aau tae i te mau taata mafatu haavare ore i roto i te faanahonahoraa ite-mata-hia a Iehova.