“Te mau parau tohu a te Atua”—Tairururaa Mataeinaa 1999 a te mau Ite no Iehova
1 A ora ˈi te mau ati Iseraela i te medebara, ua faaue Iehova ia Mose ia hamani e piti pu ario. Ia faaotohia hoê anaˈe pu, e tia ïa i te mau tavana no te mau opu ia haaputuputu mai i mua i te uputa o te tiahapa o te amuiraa. Ia faaotohia na pu e piti ra, e tia ïa i te amuiraa no Iseraela atoa ia haaputuputu mai. (Num. 10:1-4) I teie nei mahana, aita anei tatou e oaoa ra i te faarooraa i te parau faaite, mai te mau faaotoraa pu ra te huru, no nia i ta tatou tairururaa mataeinaa? I ta tatou mau tairururaa, te horoa nei Iehova i te mau faaueraa e te mau aˈoraa na roto i ta ˈna ra Parau e na roto i to ˈna mau tia nominohia. E tauturu te reira ia tatou ia tamau noa i te tavini i te Atua. Eita anei ïa tatou e oaoa i te iteraa e mau tausani, peneiaˈe atoa e mau ahuru tausani, feia haamori haapao maitai o te haaputuputu mai i roto i te here e te hau? Oia ïa!—Sal. 122:1, 7, 8.
2 I roto i na avaˈe Me e Setepa 1998 ra, tau hanere Tairururaa Mataeinaa e na te mau nunaa “E aratai te eˈa o te Atua i te ora” tei faanahohia na te ao atoa nei. Ua farii manihini te mau taeae e mau tuahine e mau tausani tia no te mau fenua atoa. Aita te mau reo ěê i paraparauhia i taua mau tairururaa ra i taotia aˈe i te faaiteraa i te here mahanahana. Ua fanaˈo maoro atu â te mau taeae i farii manihini i ǒ ratou i te mau tia no te tahi atu mau fenua i te hoê auhoaraa maitai. Ua hoˈi te mau mitionare e te mau tavini na te ara i to ratou iho fenua no te tairururaa. Ua riro to ratou taeraa mai ei faaitoitoraa i te pae varua no te taatoaraa. I te matahiti 1999, i ta tatou tairururaa mataeinaa, e mau taime â to tatou no te fanaˈo i to tatou autaeaeraa faufaa mau e no te haamauruuru ia Iehova no te tahoêraa o ta ˈna e horoa mai no tatou.
3 A tapao i te hoê piha hotela: I te mau matahiti atoa, e oaoa matou i te faaite atu ia outou eaha te mau faanahoraa te tia ia rave no te pae o te vahi faaearaa, e te haamauruuru nei matou ia outou no to outou tururaa mai.
4 Te feia e haere i te tahi atu tairururaa: Mai te peu e te opua ra outou e haere i te tahi atu tairururaa taa ê atu i ta ta outou amuiraa e apiti atu, e nehenehe te taeae papai parau e faaite atu ia outou i te vahi o te tuhaa haapao i te vahi faaearaa o te tairururaa o ta outou e haere. Ia papai outou no nia i te vahi faaearaa aore ra no te tahi atu mau haamaramaramaraa, a horoa i te hoê vehî rata titirohia tei papaihia to outou vahi nohoraa i nia iho. A haamanaˈo i te haapapu i te mau taio mahana o te tairururaa ta outou e haere atu.
5 Te haapaoraa i te mau tupuraa taa ê: A haapao i te mau hinaaro taa ê o te mau ruhiruhia aore ra te mau hapepa, te mau tavini ma te taime taatoa aore ra vetahi atu mau melo o ta outou amuiraa e hinaaro paha i te tauturu no te haere i te tairururaa. E nehenehe ïa te fetii, te mau matahiapo aore ra te tahi atu mau melo o te amuiraa, o tei ite i to ratou huru tupuraa taa ê, e tauturu ia ratou ia rave ma te here i te tahi mau ohipa e titauhia.—Hiˈo Timoteo 1, 5:4.
6 Te haapapu nei te api parau ra “Demande de chambre pour cas particuliers” i te mau titauraa te tia i te feia ani ia faaî. Teie faanahoraa, no te feia poro anaˈe ïa e roo maitai to ratou, e tae noa ˈtu te feia poro e haerea maitai to ta ratou mau tamarii, e ua fariihia te aniraa na te tomite no te taviniraa a te amuiraa. E tia ia hapono oioi i teie mau aniraa i te tuhaa haapao i te vahi faaearaa.
7 Te faaiteraa i to ˈna mauruuru: E mea faaitoito ia faaroo e te aruehia nei te iˈoa o Iehova no te haerea maitai o to tatou mau taeae e mau tuahine i te mau tairururaa. Ua parau te hoê taata e rave ra i te ohipa i roto i te hoê hotela e: “E feia maitai roa te mau taata e haere i ta outou mau tairururaa o ta matou e farii i roto i ta matou hotela.” Te na ô ra te hoê vahine rave ohipa e: “Mea au na matou e tapao i te mau piha no to outou mau hoa faaroo. E mau taata peu maitatai pauroa ratou e ua faaineine ratou i te mau haamaramaramaraa o ta matou e hinaaro. Mea ohie roa ˈˈe ia rave i te ohipa e o ratou.” Teie ta te hoê raatira vahine o te hoê fare tamaaraa i parau: “Te oaoa nei matou e te vai ra i te oire nei te mau taata o ta matou e nehenehe e teoteo.” Ua haamama mai te fare tamaaraa i te maa i nia i te faito 10 % i te feia atoa e tareta no te tairururaa ta ratou! Ua parau te hoê raatira hotela e: “Mea oaoa ia farii manihini i te mau Ite no Iehova i roto i ta matou hotela.” Ua riro teie mau parau ei faahitiraa parau maitai roa na te feia e ere i te mau Ite. Te faahanahana nei te roo maitai i noaa mai ia tatou ia Iehova e te teoteo nei oia ia tatou.—Tes. 1, 4:12; Pet. 1, 2:12.
8 Te faaitoito nei matou ia outou ia rave i te mau faanahoraa i teie nei no te haere i na mahana e toru o te Tairururaa Mataeinaa 1999 “Te mau parau tohu a te Atua.” Mai ia outou, te tiai ru nei matou i te faaroo i te ‘pii oaoa e te haamaitairaa’ a te mau taata haamori tahoêhia a Iehova. (Sal. 42:4) Ia haamaitai mai Iehova i te mau faaineineraa atoa e ravehia ia faufaahia tatou i te pae varua!
[Box on page 3]
Hora
Mahana pae e Mahana maa
9:30 – 5:00
Sabati
9:30 – 4:00