Te mau mouˈa auahi i Hawaii

TE MAUTEUTE RA te raˈi i roto i te pouri o te po, te maî maira te hoê hauˈa auahi i roto i te reva, te haaputaputa ra te viivii o te reva i te mata. Eaha râ teie e tupu nei? No te aha râ teie mau taata e faaineine ai no te faaatea ê ia ratou? Te ura ra anei te hoê uru raau? Aita; na te hoê mouˈa auahi e hauti ra, oia hoi teie e faaineine faahou nei i te horoa mai i te hoê hohoˈa huru ê mau e te anaana, e faatupu nei i teie arepurepuraa.

I nia i “te motu rahi” no Hawaii, e pinepine te mau mouˈa auahi i te hauti. Ua faatupu te mouˈa auahi ra o Kilauea, ei hiˈoraa, e 48 tutuharaa auahi mai te tutuharaa auahi no te 3 no tenuare 1983 maira. E mea pinepine te reira i te tupu e 24 hora i te maororaa e aore ra e iti rii aˈe; i reira te vari auahi e pihaa mai ai i nia i te hoê teiteiraa tau ahuru metera e tae atu e 300 metera, a tahe atu ai i nia i te tahi tau kilometera na te hiti o te mouˈa.

Te hoê tutuharaa auahi taa ê mau

Mea taa ê râ te tutuharaa auahi i tupu i te tau uaaraa tiare no te matahiti 1984. I reira, ua ara mai te mouˈa auahi teitei roa ˈˈe e hauti noa râ i te ao nei, te Mauna Loa, to ˈna teitei 10 000 metera ïa i nia ˈˈe i te vairaa miti. Aita oia i hauti faahou mai te hoê tutuharaa auahi iti hoê mahana i te avae tiurai 1975 mai â, i te avae mati e eperera râ, ua hauti faahou oia e 22 mahana i te roaraa. Ua tutuha aˈera oia hau atu i te hoê milioni metera tuea vari auahi i te hora. E navai roa te faito o te mau mea ta ˈna i tutuha i roto i te hoê noa hora no te hamani, i te hoê vahi haereraa i te pae purumu 10 tenetimetera te meumeu, e 1,20 metera te aano mai Honolulu e tae roa ˈtu i New York, oia hoi te hoê roaraa e 7 800 kilometera.

Ua hamani te rahiraa vari auahi e rave rahi mau taheraa rahi, e ua tahe atu te tahi i Hilo, oia hoi te oire otahi o te motu, ua hau i te 35 000 taata e faaea ra i reira. Ua hiˈopoa maite noa te mau tia mana faatere i te tupuraa o te mau mea, e ua rahi roa aˈera te haapeapearaa i to te hoê o te mau taheraa vari auahi rahi roa ˈˈe i tahe roa mai i pihai iho fatata e hitu kilometera i te oire. I te pae hopea râ, noa ˈtu te rahiraa vari auahi i tutuhahia, aita te ora e te mau maitai materia a te mau taata no Hawaii, i haamataˈuhia.

A tutuha noa ˈi te Mauna Loa i te auahi, ua ite-atoa-hia te araraa mai te Kilauea no te hoê taime poto noa, na roto i te mau haruru e te mau tutuharaa vari auahi fatata i te 200 metera te teitei. Tera te mea maere mau: a tahi ra mai te matahiti 1868 maira, na mouˈa auahi o te motu ra o te hauti noa râ, e tutuha ˈi i te auahi i te hoê â taime.

Te mau peu tahito no Hawaii

Mai te nehenehe e manaˈohia, ua faahaamanaˈo te mau tupuraa maere mau o te natura ia vetahi te mau peu tahito e tae roa ˈtu te mau mataˈuraa tupapau. Ia au i te hoê o taua mau peu ra, e faaearaa te mouˈa auahi no Pélé, te ruahine no te auahi, o te haamataˈu i te ora e te mau maitai materia a te feia no te motu ra no te faaite i to ˈna riri. I te tau tahito, ia tutuha te mouˈa i te auahi, e pûpû atu to Hawaii ia ˈna, te maa e te ava no te tamǎrû ia ˈna.

I to tatou nei mahana, te haapao noa nei â vetahi mau taata no Hawaii i te tahi o teie mau peu tahito. Inaha, a tutuha ˈi te Mauna Loa i te auahi i te matahiti 1984 ra, ua itehia hau atu i te hoê kahuna, aore ra tahuˈa no Hawaii, te paiuma ra i nia i te mouˈa e ia tae roa i te apoo, a horoa ˈtu ai i te iˈa uteute e te taro i te ruahine no te auahi, o Pélé vahine.

Ua faura faahou maira te tahi atu â aai i to te Mauna Loa e te Kilauea tutuharaa i te auahi i te hoê â taime. I te po, ua parau te rahiraa o te mau taata, te vai ra hoi i roto ia ratou te tahi mau rave ohipa no te Piha ohipa o te Aua animala o te fenua iho, e ua ite ratou i te hoê ata uouo i nia i te raˈi apeehia e te hoê uira anaana roa. Ia au i te aai, te faaite maira teie tupuraa e te ori haere ra o Pélé tei rave i te hohoˈa o te hoê poro auahi, aore ra popoahi, mai te hoê mouˈa auahi i te tahi no te faataa i te aanoraa o to ˈna vahi.

Ua tupu atoa te tahi atu tupuraa a tutuha ˈi te mouˈa i te auahi. No te mea hoi te tanotano ra te huru o te reva, ua topa maira maa hiona iti i nia i te Mauna Loa, a pihaa noa mai ai te vari auahi. Noa ˈtu e ua faataa mai te mau aivanaa e e nehenehe te auahi e te mau rehu i tutuhahia i roto i te reva e faatopa mai i te hiona, e faataaraa ê ta te feia i ite i te mau aai no Hawaii.

Ia au i te aai, ia topa mai te hiona i nia i te mouˈa auahi, te haru ra ïa o Pélé e to ˈna tuahine Lilinoé, te ruahine no te hiona, i te fenua oia hoi te Mauna Loa. Ia tahe te hiona i nia i te vari auahi, ua upootia ïa o Pélé i roto i teie haruraa i te faatereraa.

Te hoê tutuharaa auahi no teie iho nei

Mai te matahiti 1984 mai, ua faaea noa te Mauna Loa, area te Kilauea, tei tutuha e 48 taime i te auahi mai te matahiti 1983 mai â, ua manii tamau noa ïa te vari auahi i te 18 no tiurai 1986 ra. I te avae novema i mairi aˈenei, ua hau atu i te 180 000 metera tuea ofai tahe tei tahe atu i roto i te miti i te mahana hoê. Ua taui roa teie taheraa ofai tahe fatata hoi i te hoê ahuru ma toru kilometera te roa, tei tâpû i te purumu rahi no Kalapana, i te hohoˈa o te pae miti ma te faaano atu i te fenua. I te avae titema ra, ua faaino roa oia e 26 fare faaearaa e ua haamataˈu atoa e 80 fare.

Noa ˈtu e e ere te mau mouˈa auahi no Hawaii i te mea ino roa, ua faaino iho nei râ te reira i te mau maitai materia huru rahi. E mea varavara râ te mau tutuharaa auahi e te mau taheraa vari auahi i te haamataˈu i te ora o te feia no te motu iho, no te mea te tupu nei te reira i roto i te mau vahi atea. Ia tapiri noa mai te hoê o taua mau taheraa ra i te hoê vahi faaeahia e te taata, e nehenehe te mau tia mana faatere e faaara oioi noa ia faaatea ê te taata ma te nahonaho e te atâata ore.

Ua ohipa maite te mau mouˈa auahi no te faariro i te fenua ei vahi faaearaa no te taata; ua haamaitai atoa te reira i te repo fenua e ua tamǎrû i te huru o te reva. Eiaha roa te reira ia horoa mai i te hoê mataˈuraa tupapau, ia turai râ te hiˈoraa faahiahia mau e horoahia mai e te mau mouˈa auahi no Hawaii ia tatou, ia faahanahana ia Iehova, te Atua i poiete i te mau mea atoa.

[Faaiteraa i te fatu o te hohoˈa i te api 28]

Piha pataraa hohoˈa o te Aua animala o te fenua

[Faaiteraa i te fatu o te hohoˈa i te api 29]

Piha pataraa hohoˈa o te Aua animala o te fenua