A haapao maitai i te faaararaa!

BOOM! I te 3 no Tiunu 1991 ra, ma te haruru puai mau, ua tutuha te Mouˈa Fugen i Tapone i te mahu e te rehu rahi roa. Ua tahe mai teie anoiraa veavea mau na nia mai i te mouˈa. E 43 taata tei pohe i roto i te tutuharaa. E rave rahi taata tei ora mai tei paapaa ino roa. “E pape, e horoa mai na i te pape,” o ta te tahi pae ïa i tuô. Ua ru atu te feia tupohe auahi e te mau mutoi e tauturu ia ratou.

UA ITEHIA te hoê pou vari i nia i te tupuai o te Mouˈa Fugen fatata e piti hebedoma na mua ˈˈe, te ara noa ra ïa te feia toroa e te huiraatira. Hau atu i te hoê hebedoma na mua ˈˈe i te ati, ua faaarahia e faarue i te tuhaa fenua. Hoê noa mahana na mua ˈˈe i te tutuharaa, ua ani te mau mutoi i te mau papai vea eiaha e haere atu i te tuhaa fenua opanihia ra. Noa ˈtu râ, i taua avatea peapea ra, e 43 taata to ǒ i te vahi atâta ra.

No te aha te taata e rave rahi i haere ai aore ra i faaea noa ˈi i taua vahi ra? Ua hoˈi mai te tahi feia faaapu tei faarue hoi i to ratou fare e hiˈo i ta ratou mau faufaa e mau faaapu. E toru taata maimi i te pae o te mau mouˈa auahi tei tamata i te haere i pihaiiho roa i te mouˈa auahi no te haamâha i to ratou anaanatae aivanaa. Aita te tahi mau papai vea e te tahi feia pata hohoˈa i mǎtaˈu i te haere atu i ǒ mai i te reni taotiaraa no to ratou hinaaro i te parau apî faahoruhoru no nia i te ohipa a te mouˈa auahi. E toru taata faahoro taxi tei aufauhia e te mau vea to ǒ. Te tiai ra te mau mutoi e te feia tupohe auahi. E tumu iho â ta te taata taitahi e haere ai oia i te vahi atâta—te faahopearaa râ, ua erehia ïa oia i te ora.

Tei roto anei outou i te hoê vahi atâta?

Aita paha ïa tatou paatoa e ora ra i pihaiiho i te hoê mouˈa auahi e ohipa ra. Eaha râ mai te peu e e farerei tatou i te hoê ati na te ao atoa nei, e tei roto tatou i te hoê vahi atâta e ati aˈe te ao nei? Te faaara maira te hoê buka o te nehenehe e tiaturihia e e faaiteraa parau tohu to roto, e te fatata maira te hoê ati na te ao atoa ta ˈna e faataa mai teie: “E haapourihia te mahana, e ore hoi te marama e anaana mai, e mairi mai hoi te mau fetia o te raˈi, e e pau hoi te mana o te raˈi i te ueuehia: . . . ei reira te mau fetii atoa o te fenua nei e oto ai.” (Mataio 24:29, 30) Te faaitehia ra e e taeahia “te mau fetii atoa o te fenua nei” e teie ohipa e tupu i nia i te raˈi i nia i te faito o te ao atoa nei. Oia hoi, ua taaihia teie parau tohu i te hoê ati o te au ia tatou taitahi.

Teie buka parau tohu e nehenehe e tiaturihia, o te Bibilia ïa. Ma te faahiahia, te horoa maira te mau irava tapiri i tei faahitihia i nia ˈˈe i te hoê faataa-huˈahuˈa-raa i te mau mea e aratai atu i te ati na te ao atoa nei. Mai te pou vari e te tahi atu â mau mea o te mouˈa auahi tei faaara i te feia toroa o te oire o Shimabara ia faataa i te tuhaa fenua atâta, te horoa maira te Bibilia i te tumu ia ara e ia faaineine tatou no te ora mai. E nehenehe tatou e huti mai i te hoê haapiiraa i roto i te ati o te Mouˈa Fugen e e ite maite i te fifi o te mea e tupu mai i mua nei.

[Faaiteraa i te fatu o te hohoˈa i te api 2]

API MATAMUA: Yomiuri/Orion Press/Sipa Press

[Faaiteraa i te fatu o te hohoˈa i te api 3]

Yomiuri/Orion Press/Sipa Press