Te ara maite ra anei outou i to tatou nei tau?

TEI te ara-maite-raa i te mea atâta te ora aore ra te pohe. E nehenehe te reira e faahohoˈahia e tei tupu i nia i na motu e mouˈa auahi to nia iho.

I te 8 no Me 1902, i nia i te motu o Matinita no te mau Antilles, ua tutuha te Mouˈa Pelée i te auahi, te mouˈa no te senekele 20 i pohe rahi roa ˈˈe ai te taata. Ua pohe te rahiraa o na huiraatira e 30 000 no Saint-Pierre, te hoê oire e vai ra i raro i te mouˈa auahi.

I te avaˈe Tiunu 1991, ua haruru te Mouˈa Pinatubo, peneiaˈe na roto i te tutuharaa auahi rahi roa ˈˈe o te senekele. Ua tupu te reira i te hoê vahi faaea-rahi-hia e te taata i Philipino e fatata e 900 taata tei pohe. I teie râ taime, e piti ohipa tei tauturu ia faaorahia mau tausani taata: (1) te ara-maite-raa i te mea atâta e (2) te hinaaro mau e ohipa ia au i te mau faaararaa.

Ua faaora te mau haerea tano i te mau taata

Te taoto noa ra te Mouˈa Pinatubo tau hanere matahiti i te maoro i to ˈna haamataraa i te avaˈe Eperera 1991, i te faatupu i te mau tapao e fatata roa oia i te tutuha i te auahi. Ua haamata te ata pape e te mataˈi ra anhydride sulfureux i te maî mai roto mai i te apoo o te mouˈa. Ua ite te feia e faaea ra i taua vahi ra i te tahi mau aueueraa fenua nainai, e ua haamata mai nei te vari auahi i riro ei tapoˈi paari i te faura mai na roto mai i te mouˈa. Ua ara maite te mau aivanaa no te Piha Tuatapaparaa i te mau Mouˈa auahi e te mau Aueueraa fenua no Philipino e i muri aˈe, ua haapapu ratou i te manaˈo o te feia toroa a te hau e mea maitai aˈe ia faahaere ê i na huiraatira e 35 000 no te mau oire e te mau oire rii fatata.

E taa-maitai-hia e eita te taata e hinaaro e faarue i to ratou mau fare ma te tumu ore, ua faaruruhia râ to ratou anaanatae ore na roto i te haaparareraa i te hoê hohoˈa video o te faaite maite i te huru atâta ia tutuha te mouˈa i te auahi. Ua tupu te horo-ê-raa o te taata i te taime maitai. E piti mahana i muri aˈe, na roto i te hoê haruru puai mau, ua tutuha te mouˈa e vau kilometera afata rehu i roto i te reva mataˈi. I muri aˈe, ua pohe mau hanere taata i te mau taheraa vari. Ua ora mai râ te mau tausani paha taata, no te mea ua faaarahia te taata i te mea atâta e ua ohipa ratou ia au i te mau faaararaa.

Te horo-ê-raa i te hoê ati o te taata te tumu

I te senekele matamua o to tatou nei tau, mea titau-atoa-hia i te mau Kerisetiano e faaea ra i Ierusalema ia faaoti e e faarue anei ratou i to ratou mau fare. I to ratou horo-ê-raa i taua oire ra i te matahiti 66 T.T., ua ape ratou i te haamouraa i tae mai i nia i te tahi atu mau taata o te oire e te mau tausani ati Iuda i haere mai i Ierusalema no te oroa Pasa o te matahiti 70 T.T. Hau atu i te hoê mirioni taata e vai ra i roto i te oire i patuhia no te haapao i te oroa Pasa i to te mau nuu Roma faaoreraa i te mau ravea atoa no te horo ê. Te faahopearaa o te oˈe, o te haavîraa puai e o te mau aroraa tuutuu ore a te mau Roma, te hoê ïa numera o te feia i pohe hau atu i te hoê mirioni.

E ere e aita i faaarahia no nia i te ati i faahope i te orureraa hau a te mau ati Iuda i to Roma. E rave rahi matahiti na mua ˈˈe, ua tohu Iesu Mesia e e haaatihia Ierusalema. Ua parau oia e: “Ia hiˈo ra outou ia Ierusalema i te haaatiraahia e te nuu, ua fatata ïa to ˈna pau ia ite mai outou. Te feia i parahi i Iudea ra, a maue i nia i te mouˈa i reira, e to roto i te oire ra, a haere i rapae, e eiaha to te mau vahi atoa ra e tomo i roto i te oire.” (Luka 21:20, 21) Mea maramarama roa taua mau faaueraa ra, e ua pee maite te mau pǐpǐ a Iesu i te reira.

Te faatia ra te taata tuatapapa aamu no te maha o te senekele o Eusèbe de Césarée e ua rave te mau Kerisetiano no Iudea taatoa mai ta Iesu i faaara. Ia faarue te mau Roma i ta ratou haaatiraa matamua ia Ierusalema i te matahiti 66 T.T., e rave rahi mau Kerisetiano ati Iuda tei haere e faaea i roto i te oire Etene no Pella, i roto i te tuhaa fenua Roma no Perea. Na roto i te ara-maite-raa i to tatou tau e te raveraa mai ta Iesu i faaara, ua ape ratou i tei parauhia ei “hoê o te mau haaatiraa riaria roa ˈˈe o te aamu taatoa.”

I teie mahana, e hinaarohia te ara-maite-raa mai teie. Oia atoa te ohipa taa ê. E faataa te tumu parau i muri nei no te aha.

[Faaiteraa i te fatu o te hohoˈa i te api 3]

Godo photo, West Stock