A faaohipa maitai i to oe taime i roto i te taviniraa
1 E mea papu e mea rahi te ohipa e titauhia ia rave i roto i ta tatou taviniraa, e te poto nei te taime. (Ioa. 4:35; Kor. 1, 7:29) Ma te faanaho maitai i ta tatou ohipa e ma te tapura aˈena i te reira, e nehenehe tatou e faaohipa maitai i te taime ta tatou i faataa no te taviniraa.
2 A faaineine: Hou a haere ai i te putuputuraa no te pororaa, ia papu ia oe e te vai ra te mau papai hinaarohia e oe e te haamanaˈo maitai ra oe i ta oe faaiteraa. A faaoti ai te putuputuraa e te hoê pure, a haere tia ˈtu i roto i te taviniraa. E nehenehe ïa oe e te feia e ohipa ra e o oe e rave i te rahiraa o te taime e vai ra no te taviniraa.
3 Mai te peu e ua faataa te mau matahiapo e o oe te faatere i te putuputuraa no te pororaa, a haamata i te hora tia. A haapoto noa i te putuputuraa—eiaha e hau atu i te 10 e tae atu i te 15 minuti. Hou a tono ai i te pǔpǔ, e mea tia ia ite te taata taitahi ihea e na muri ia vai oia e poro ai.
4 I roto i te pororaa: Ua oti anaˈe te putuputuraa no te pororaa, eiaha e faataere faufaa ore noa, a haere tia ˈtu râ i roto i te tuhaa fenua. Mai te peu e ua faanaho oe i te faarue oioi i te tuhaa fenua, e nehenehe paha oe e faanaho i to oe iho faurao ia nehenehe te toea o te pǔpǔ e tamau i te poro. Ia ohipa oe e te hoê pǔpǔ, a haamanaˈo ia vetahi ê o te tiai ra ia faaoti oe i te hoê tauaparauraa. Ma te faatano i te parau, e vaiiho oe i te taata o te hinaaro ra e mǎrô aore ra e faanaho oe i te hoˈi faahou e farerei i te taata i anaanatae.—Mat. 10:11.
5 No te mau farerei-faahou-raa, e nehenehe oe e ape i te mau tere faufaa ore ma te haere e hiˈo i te mea fatata hou a haere ai e hiˈo i te tahi atu. E nehenehe atoa e taniuniu i te tahi o ratou no te haapapu e to te fare iho â ratou. (Mas. 21:5) Ia manaˈo oe e faaea maoro i te hoê farerei-faahou-raa, e nehenehe te tahi atu e poro na pihai iho mai aore ra e rave i te tahi atu farerei-faahou-raa.
6 Te ora nei tatou i te tau o te auhune rahi pae varua. (Mat. 9:37, 38) Ua fatata te ohipa i te oti. No reira, o te faaohipa-maitai-raa ïa i to tatou taime i roto i te pororaa to tatou hinaaro e tia ˈi.