A tauturu i te mau piahi Bibilia ia riro ei feia poro i te parau apî maitai o te Basileia
1 Mea faufaa roa te faaueraa ta Iesu i horoa i ta ˈna mau pǐpǐ ta te Mataio 28:19, 20 e faataa ra. Ua faauehia te mau pǐpǐ a te Mesia ia faariro atu â i te taata ei pǐpǐ o te tamau noa, i muri iho, i te ohipa faariroraa i te taata ei pǐpǐ. E haamauhia te hoê niu no te faaiteraa hopea o te parau apî maitai o te Basileia o te Atua na te ao nei i te anotau hopea taa ê mau, te anotau ïa ta tatou e ora nei.—Mat. 24:14.
2 Ta tatou mau piahi Bibilia, o ta tatou mau tamarii paha ïa aore ra te tahi atu taata, o te hinaaro ra e haapii i te Bibilia e o tatou. Te hinaaro ra iho â tatou e tauturu ia ratou taitahi ia farii e ia amo i ta ratou hopoia e tauturu ia vetahi ê ia riro ei pǐpǐ na Iesu Mesia.—Luka 6:40.
3 A faaineine ia ratou ia horoa i te faaiteraa: A faaitoito i te mau taata e haapii ra na muri ia oe ia faaite ia vetahi ê i ta ratou e haapii ra. A faatia ˈtu ia ratou i te tahi mau tupuraa o te taviniraa faaitoito. A haapii i ta oe mau tamarii mai to ratou tamarii-rii-raa mai â ia ohipa rahi i roto i te taviniraa ia au i ta ratou e nehenehe e rave. (Sal. 148:12, 13) A faaite na roto i ta oe huru paraparau e to oe hiˈoraa e e mea faufaa roa te taviniraa i roto i to oe oraraa.—Tim. 1, 1:12.
4 E faaohipa Iehova i te feia noa e farii e e auraro i ta ˈna mau ture aveia tia. Parau mau, aita to te mau taata poro apî e ite rahi mai to te mau taata poro aravihi, pûpûhia e bapetizohia, e mea titauhia râ ia tiaturi e ia ite te mau melo apî i te faataa ˈtu i te mau haapiiraa tumu o te Bibilia. (A hiˈo i te Organisés, api 79-82.) Ma te faataa ê roa ia ratou iho ia “Babulonia Rahi” e ma te ore roa e apiti atu i te poritita, e mea titauhia ia tae tamau ratou i te mau putuputuraa a te amuiraa.—Apo. 18:2, 4; Ioa. 17:16; Heb. 10:24, 25.
5 Ia manaˈo oe e te faaî ra te hoê o ta oe mau piahi Bibilia i te mau titauraa no te riro ei taata poro bapetizo-ore-hia, a faaite atu ïa i te tiaau peretiteni. E faanaho oia e ia farerei e piti matahiapo ia oe e ta oe piahi Bibilia no te faaoti e te faaî ra anei oia i te mau titauraa no te riro ei taata poro bapetizo-ore-hia i te parau apî maitai o te Basileia tahoêhia e te amuiraa. E fanaˈoraa taa ê ïa ta oe e tamau i te haapii i ta oe piahi Bibilia a apee ai oia ia oe i roto i te taviniraa.