Te tapaparaa i te hoê tapao mai te onoraa o to ˈu matahiti
FAATIAHIA E SANDRA COWAN
E rave rahi mau metua o te maiti nei i te hoê toroa no ta ratou mau tamarii, mai te hauti upaupa aore ra te ori, e e haamata ratou i te faaineine ia ratou mai to ratou nainairaa mai â. Te reira mau ta to ˈu metua vahine i rave no ˈu. Mai te pitiraa o to ˈu hebedoma, ua afai oia ia ˈu i te mau putuputuraa kerisetiano atoa e i roto i te pororaa.
I TE maharaa o to ˈu matahiti, ua manaˈo o Mama e ua ineine au no te haere e poro o vau anaˈe. Te haamanaˈo maitai ra vau i ta ˈu tamataraa matamua. Ua faahoro matou e tae roa ˈtu i te hoê fare faaapu rahi, e a tiai noa ˈi o Mama e te tahi atu feia i roto i te pereoo uira, ua haere atura vau i mua i te opani. Ua faaroo mai te hoê vahine maitai roa ia ˈu a pûpû atu ai au hoê ahuru buka iti na ˈna. No te aufau mai, ua horoa maira oia i te hoê tâpû puˈa rahi. Ua rave mai au i roto i to ˈu na rima e piti. Ua horuhoru-roa-hia vau!
I taua matahiti 1943 ra, ua iriti te Fare Haapiiraa Gileada a te Taiete Watchtower i ta ˈna mau uputa no te faaineine i te mau tavini pionie ma te taime taatoa no te ohipa mitionare. Ua faaitoito aˈera Mama ia ˈu ia faariro i te taviniraa mitionare ei tapao i roto i to ˈu oraraa. Te uˈana ra ïa te Piti o te Tamaˈi rahi i Europa, e e faatia mai na Mama ia ˈu i te parau no te mau tamarii apî Ite no Iehova i Europa o tei faataa-ê-hia i to ratou mau metua. Ua hinaaro oia ia noaa ia ˈu i te puai no te faaruru i te mau huru tamataraa atoa.
I te tau veavea o te matahiti 1946, ua bapetizohia vau i te tairururaa rahi i Cleveland, i Ohio. Noa ˈtu e e ono matahiti noa to ˈu, ua papu maitai to ˈu hinaaro e faaî i ta ˈu euhe ia Iehova. I taua tau veavea ra, ua tavini au ei pionie no te taime matamua. Ua haamanaˈo vau i te hoê mahana, ua opere au e 40 vea i te feia e parahi noa ra i te vahi The Plaza i San Diego, i Kalifonia. Eita e ore e ua farii mai ratou no to ˈu nainai e to ˈu vaha iti paraparau.
Mea pinepine matou i te poro i pihai iho ia Beth-Sarim, i reira to te taeae Rutherford, te peretiteni a te Taiete Watch Tower, tei pohehia hoi i te maˈi, faaearaa i te mau tau toetoe hou to ˈna poheraa i te matahiti 1942. Ua haere pinepine atu matou e ua tamaa roa ˈtu i reira e te mau tavini ma te taime taatoa. Ua haapapu teie mau farereiraa oaoa ia ˈu e te reira mau te oraraa o ta ˈu e hinaaro ra. Ua faariro atura vau i te Fare haapiiraa Gileada e te taviniraa mitionare ei tapao i roto i to ˈu oraraa.
I te matahiti i muri iho, ua taa ˈtura to ˈu mau metua, aita râ teie tauiraa i roto i to matou utuafare i haaparuparu i to matou huru i te pae varua. E pionie o Mama e ua haapao oia i te haapiiraa ia mâua to ˈu taeae. Mea oraora maitai to matou pereoo nohoraa maoti te mau tere farerei o te mau taeae e te mau tuahine kerisetiano. Ua imi Mama i te ravea ia farerei au i te feia tei haere i te haapiiraa Gileada. O Lloyd raua o Melba Barry e piti o teie feia tuite, o tei haere mai i roto i te taviniraa ratere a tiai noa ˈtu ai i ta raua tonoraa i te fenua ěê i Tapone. Ua rave raua i te taime no te faaitoito ia ˈu—o vau hoi te hoê tamahine iti e titau noa ra e riro ei mitionare—ua haaputapû mau â te reira ia ˈu.
I te ahururaa o to ˈu matahiti, ua faaipoipo o Mama i te hoê Ite faahiahia mau o tei riro atoa ei tavini pionie. Ua faaamu oia ia mâua to ˈu taeae eiaha noa i nia i te papie i roto atoa râ i to ˈna mafatu. Ua riro atoa matou i to ˈna here no Iehova e to ˈna itoito no te taviniraa.
Ua rave amui o Mama e o Papa i te ohipa no te aratai i ta raua nau tamarii na roto i te mau matahiti fifi o te taurearearaa. Ua riro to matou fare ei vahi haapuraa i te pae varua o ta ˈu e haamanaˈo nei ma te here. E ere i te mea ohie no raua ia tavini ei pionie e te hoê moni ohipa haihai e ia rave e piti tamarii; ua titauhia i te haapaeraa ia ˈna iho. Ua tiaturi noa râ o Mama raua o Papa ia Iehova e ua tuu atoa i te mau faufaa o te Basileia i nia i te parahiraa matamua.
Te haamanaˈo papu ra vau i te tairururaa rahi i te oire no New York i te matahiti 1950! Ua tarahu Papa i te moni i te fare moni, e ua rave matou e toru taata na muri ia matou no te tauturu mai i roto i te mau haamâuˈaraa. Ua parahi matou o Mama, o Papa, to ˈu taeae, e o vau nei i nia i te parahiraa no mua mai San Diego e tae roa ˈtu i New York, area te tahi mau taata ra, ua parahi ïa ratou i muri. Aita te paoti ohipa o Papa i farii ia mairi oia i te ohipa e piti hebedoma, e ua vaiihohia o ˈna i ta ˈna ohipa i to ˈna haereraa i te tairururaa. Ua parau mairâ o Papa ia matou e, e haapao iho â Iehova i te mea e erehia ra e matou, e ua na reira Oia. Ua hoo Papa i te pereoo uira no te aufau i te tarahu a te fare moni, e ua noaa mai ia ˈna te hoê ohipa maitai aˈe. Ua riro mau â teie ohipa e vetahi atu mai teie te huru ei mea faufaa roa no ˈu i te mau matahiti i muri aˈe i to mâua ta ˈu tane faarururaa i te mau huru tupuraa fifi.
I to matou hoˈiraa ˈtu mai New York mai, ua haere atu matou e mataitai i te Vahi faaapuraa a te Basileia, i reira to ˈu iteraa i te Fare haapiiraa no Gileada no te taime matamua. Te haamanaˈo ra vau i to ˈu tia-noa-raa i roto i te hoê o te mau piha haapiiraa i te na ôraa ia ˈu iho e, ‘E 11 matahiti noa to ˈu. Eita vau e tapae mai i ǒ nei. E tae mai o Aramagedo na mua ˈˈe.’ Teie râ, ua haapapu faahou â teie tere ia ˈu ia faariro ia Gileada ei tapao no ˈu.
Te tutavaraa ia naeahia ia ˈu i ta ˈu tapao
I te mau tau faafaaearaa atoa no te tau veavea i to ˈu haereraa i te haapiiraa, mai te faito matamua e haere atu ai, ua rave au i te taviniraa pionie. I muri iho, e piti hebedoma i muri aˈe i to ˈu faaotiraa i ta ˈu haapiiraa tuarua i te avaˈe tiunu 1957, ua riro maira vau ei pionie tamau.
Ua riro mau â te putuputuraa faanahohia no te feia e anaanatae ra e haere i Gileada i te tairururaa mataeinaa no Los Angeles i te matahiti 1957, ei taime taa ê mau no ˈu. A haere ai au i te fare ie i reira taua putuputuraa ra e tupu ai, ua farerei au ia Bill, te hoê taeae apî o ta ˈu i matau mai te onoraa o to ˈu matahiti mai â. I te matahiti na mua ˈtu, ua haere o ˈna e tavini i te vahi i titauhia i te tauturu i Louisiane. Ua maere roa mâua i te iteraa e te anaanatae rahi ra mâua toopiti atoa ra i te taviniraa mitionare. E ono avaˈe i muri iho, ua faaoti aˈera mâua e apiti i roto i teie opuaraa. Ua papai atu mâua i te Taiete no te ani i te hoê vahi e tonohia ˈi mâua e hoê avaˈe na mua ˈˈe i to mâua faaipoiporaa, ua faataehia mai hoê i Romney, i Virginie Tooa o te râ.
Ua haere atu mâua e faaea i reira i to mâua tereraa ˈtu i te tairururaa no New York i te matahiti 1958. I taua tairururaa ra, ua haere atu mâua i te putuputuraa no te feia e anaanatae ra e haere i Gileada. E mau hanere taata o tei tae mai. I to mâua hiˈoraa ˈtu i teie nahoa rahi, ua manaˈo ihora mâua e eita paha mâua e titauhia ia haere i Gileada. Noa ˈtu râ, ua hapono mâua i ta mâua aniraa matamua, noa ˈtu e e 11 hebedoma noa to mâua faaipoiporaa. I te matahiti i muri iho, i te tairururaa mataeinaa no Philadelphia, ua hapono faahou mâua i te piti o te aniraa.
I Romney, ua haapii mâua o Bill i te tiaturi ia Iehova no te tauturu ia mâua i roto i te mau huru tupuraa fifi. Fatata e 2 000 taata e faaea ra i te oire no Romney. Aita e ohipa i reira. Ua ora mâua i roto i te hoê pereoo nohoraa e 5 metera tei hamanihia no te huru mahana no Kalifonia. Aita ta mâua e pape, aita e matini tamahanahana, e aita atoa e afata faatoetoeraa maa. No te toetoe i roto ra, e tia ia mâua ia tuparari i te pape toetoe paari i roto i te patete ia noaa mai te pape. Ua tauturu te mau taeae ia mâua ia au i tei maraa ia ratou, ma te horoa atoa mai i te maa o te mau animala o ta ratou i aˈuaˈu. Ua amu mâua i te ria, e te mau animala parauhia raton-laveur e te écureil. E rave rahi taime, ua manaˈo mâua e eita mâua e tamaa i taua mahana ra, e ia hoˈi atu mâua i te fare i muri aˈe i te taviniraa, te vai ra ïa te tahi apara aore ra te pata paari i mua i to mâua opani.
E iva avaˈe to mâua faarururaa i te hoê oraraa riirii. I te pae hopea, ua faaoti aˈera mâua e mea maitai aˈe ia haere atu mâua e faaea i Baltimore, i Maryland, i reira e noaa mai ïa ta Bill ohipa. I to mâua faaararaa i te mau taeae i ta mâua faaotiraa, ua taˈi ratou e ua taˈi atoa mâua. No reira, ua opua ihora mâua e faaoromai rii â.
I muri noa iho, ua faaau maira te hoê Ite, o ˈna hoi te faatere no te hoê fare toa i Westernport, i Maryland, e 60 kilometera te atea, i te hoê ohipa afa taime na Bill. I taua avaˈe ra, ua pûpû maira te hoê o ta mâua feia haapii bibilia i te hoê fare e te mau tauihaa to roto e oia atoa te hoê umu arahu rahi. I reira ïa te Malaki 3:10 riroraa ei irava au-roa-hia e au. Ua ninii mai Iehova i nia ia mâua i te hoê haamaitairaa tei hau aˈe i ta mâua i manaˈo.
Ua tapae mâua i Gileada!
Hoê o te mau mahana faahiahia roa ˈˈe o to mâua oraraa, o te mahana ïa no Novema 1959, i faataehia mai ai ta mâua parau titauraa no te haere i Gileada. Ua titauhia mâua i te 35raa o te pǔpǔ haapiiraa, te pǔpǔ hopea e faatupuhia i te Vahi faaapuraa a te Basileia. I to ˈu tiaraa ˈtu i roto i taua piha ra o ta ˈu i mataitai i to ˈu nainairaa, ua noaa ia ˈu i te hoê manaˈo oaoa e te mahanahana o ta ˈu e ore e nehenehe e faataa na roto i te mau parau.
Ua riro o Gileada mai te hoê vahi haumǎrû i te pae varua. Mai te mea ra e ua ora mâua i roto i te ao apî e pae avaˈe. Mea varavara roa i roto i te oraraa, ia tiai oe i te hoê ohipa e rave rahi matahiti e ia noaa mai, ua hau atu ïa i te faahiahia i ta oe i manaˈo na. Mai te reira ïa no Gileada.
Ua tonohia mâua i Inidia, teie râ, i te pae hopea, aita ta mâua parau faatia no te faaea i roto i taua fenua ra i fariihia. No reira, i muri aˈe i to mâua tiairaa hoê matahiti i New York, ua tono atura te Taiete Watch Tower ia mâua i te fenua Maroc, i Afirika Apatoerau.
Mitionare i te fenua Maroc
Ua faaea mâua e 24 matahiti oaoa mau i Maroc, e ua here roa mâua i te taata i to mâua tapaeraa ˈtu i reira. Ua haapii mâua i te reo farani e te reo paniora, o tei tauturu ia mâua ia paraparau e te mau taata ěê e ora ra i reira. O te feia iho â râ no te tahi atu mau fenua o tei farii i te poroi o te Basileia.
Ua haapii au i te Bibilia e te hoê vahine paniora e ori flamenco to ˈna toroa, e te rave ra o ˈna i te ohipa i roto i te hoê vahi arearearaa i Casablanca. I to ˈna haapiiraa i te mau faaueraa tumu a te Bibilia, ua faarue ihora oia i te fatu o taua vahi ra, ua faaea hoi raua e ua hoˈi atura o ˈna i Paniora. I reira, ua poro oia i to ˈna mau fetii atoa, e ua farii vetahi i te mau parau mau bibilia o ta ˈna i faaite atu. I muri aˈe, ua hoˈi faahou mai oia i Casablanca, i reira to ˈna tapearaa i to ˈna haapao maitai i te Atua e tae roa ˈtu i to ˈna poheraa i te matahiti 1990.
I roto i te mau matahiti matamua to mâua faaearaa i Maroc, ua tupu te mau maraaraa i roto i te numera o te feia poro o te Basileia. Teie râ, no te mea e mea fifi roa no te feia ěê ia noaa i te ohipa e te mau parau faatiaraa no te faaea i roto i te fenua, ua haamata ihora te mau Ite i te haere atu i Europa. Te faaea ra vetahi o te feia o ta mâua i haapii i teie nei i Niu-Zelani, i Kanada, i te Fenua Marite, i Bulgaria, i Rusia, e i Farani, e te rave nei vetahi i te taviniraa taime taatoa.
Ua opani-taue-hia ˈtura ta matou ohipa pororaa i Maroc i te avaˈe eperera 1973. Auê ïa tairiraa e! I te hoê ahiahi mahana maha, ua putuputu mai te hoê nahoa taata oaoa i te Piha no te Basileia, e ua paraparau noa matou e tae roa ˈtu i te taime a tupohehia ˈi te mau mori no te faaite ia matou e ua tae i te taime no te hoˈi i te fare. Aita hoi matou i manaˈo e eita matou e ite faahou i teie mau mori ia anaana i roto i teie mau farereiraa kerisetiano tiamâ. I raro aˈe i te opaniraa, ua haaputuputu te mau pǔpǔ iti no te mau putuputuraa e te mau tairururaa haaati i roto i te mau fare o te taata. No te haere atu i te mau tairururaa mataeinaa, ua tere atu te mau Ite i Farani aore ra i Paniora.
A topa ˈi ta matou mau numera, e taairaa piri roa tei tupu i roto i te pǔpǔ Ite haihai o tei toe mai i Maroc. No reira, i te taime a faaoti ai te Taiete Watch Tower e opani i te amaa e e tono ia mâua i te tahi atu vahi, ua taˈi matou paatoa.
I Afirika no Ropu
Te fenua apî i reira to mâua tonoraahia, o te Repubilita ïa no Afirika no Ropu. Auê ïa tauiraa rahi e o Afirika Apatoerau! I Maroc, fatata hoê â te ahuarai e to Kalifonia apatoa, i ǒ nei râ, mea veavea ïa e te haumi te ahuarai o te mau pae rua ma.
Ua faaruru mâua i te mau fifi apî. Ei hiˈoraa, e tia ia ˈu ia haavî i to ˈu mehameha i te mau manumanu nee haere. E toru taime, ua topa mai te hoê moo i nia i to ˈu upoo a tomo ai au na roto i te hoê opani. I te tahi atu taime, a faatere ai au i te hoê haapiiraa bibilia, ua apiti atoa mai te hoê iore ia matou! Noa ˈtu to ˈu hinaaro e ouˈa e e horo, ua haapii au i te haavî ia ˈu iho, a tiatonu noa ˈi i teie iore e te afairaa i ta ˈu pute e to ˈu avae i nia e tae roa ˈtu i te taime e haere ai oia. Inaha, e nehenehe oe e matau i te mau huru tupuraa atoa mai te peu e e faaoromai noa oe.
E ono avaˈe to mâua faaearaa i reira, e ua faaarahia maira na roto i te radio e ua opanihia ta matou ohipa. No reira, ua opanihia ta matou mau Piha no te Basileia, e ua titauhia te mau mitionare ia faarue i te fenua. O mâua anaˈe e te tahi atu feia faaipoipo o tei nehenehe e faaea mai i te amaa e toru â matahiti. I te hoê râ poipoi sabati, a tupu ai ta matou haapiiraa no Te Pare Tiairaa, ua haere maira te hoê mutoi e mauhaa ta ˈna e ua afai atura ia matou i te pu a te mau mutoi. Ua tuu ratou i te mau vahine e te mau tamarii, ua tapea râ ratou e 23 taeae, e ta ˈu atoa tane, o Bill. I muri aˈe e ono mahana, ua vaiiho oia ia ˈna ia hoˈi i te fare no te faaineine i ta mâua tauihaa; e toru mahana i muri iho, na roto i te faaueraa a te hau, ua faarue ihora mâua i te fenua, i te avaˈe me 1989. Ua taˈi faahou matou i to mâua revaraa i te vahi tauraa manureva, e rave rahi hoi o to matou mau taeae here o tei haere mai e aroha ia mâua.
Tei Sierra Léone atura mâua
Tei Sierra Léone mâua i teie nei, i Afirika Tooa o te râ, te hoê fenua haviti e to ˈna mau pae tahatai one uouo nehenehe mau. Mea auhoa roa te taata, e mea au roa te pororaa i reira. E titauhia matou ia parahi i te mau fare atoa, mea pinepine i raro aˈe i te marumaru o te hoê tumu vî aore ra te hoê tumu haaari. Mea au roa na te taata ia paraparau no nia i te Atua e e rave atoa mai ratou i ta ratou iho Bibilia no te apee i te taioraa.
Te rave nei mâua o Bill i te ohipa i te Betela no Freetown. Ta ˈu ohipa, o te pahonoraa ïa i te niuniu paraparau e e haapao atoa vau i te mau tamatahitiraa e te tabula faufaa moni a te mau amuiraa. I muri aˈe e 16 matahiti to mâua taviniraa i roto i te mau fenua ua opanihia te ohipa pororaa, mea oaoa roa ia parahi i roto i te hoê fenua i reira mea tiamâ te ohipa e te haere atoa ra i mua.
E hope ta ˈu e 30 matahiti i roto i te taviniraa mitionare i te avaˈe tiunu 1991. Oia mau, ua tuu o Mama i te hoê tapao faufaa mau i mua ia ˈu! Ahiri e te ora noa ra o ˈna, e oaoa roa vau i te parau faahou atu ia ˈna e, “Mauruuru, Mama!” Auaa râ, e nehenehe noâ ta ˈu e parau e: “Mauruuru, Papa!”
[Hohoˈa o Sandra Cowan i te api 26]
[Hohoˈa o Sandra Cowan ei tamarii i te api 27]
[Hohoˈa i te api 28]
Tairururaa no New York, 1958
[Hohoˈa i te api 29]
35raa o te pǔpǔ haapiiraa—Tiurai 1960
[Hohoˈa i te api 30]
O Bill e o Sandra Cowan, 1991