Te hoê tufaa kerisetiano varavara
FAATIAHIA MAI E BLOSSOM BRANDT
Ua topa te hiona i San Antonio, Texas, i te mahana o to ˈu fanauraa, i te 17 no tenuare 1923. Mea toetoe i rapaeau, tera râ, ua puohuhia vau i roto i te mau rima mahanahana o to ˈu na metua kerisetiano here, o Judge raua o Helen Norris. Ia haamanaˈo vau mai to ˈu nainairaa mai â, te mau mea atoa ta ta ˈu mau metua i rave, ua niuhia ïa i nia i ta raua haamoriraa i te Atua ra o Iehova.
I TE matahiti 1910, e vau matahiti to Mama i reira, ua faarue to ˈna mau metua i to ratou vahi i pihai iho ia Pittsburgh, i Pennsylvania, no te haere atu i te hoê fare faaapuraa i rapaeau mai ia Alvin, i Texas. Ua oaoa roa ratou i te haapiiraa i te mau parau mau a te Bibilia na roto i te hoê taata tapiri. Ua faaohipa Mama i te toea o to ˈna oraraa i te imiraa i te feia e anaanatae i te tiaturiraa o te Basileia. Ua bapetizohia o ˈna i te matahiti 1912 i muri aˈe i to te utuafare haereraa ˈtu e faaea i Houston, i Texas.
Ua farerei o Mama e to ˈna mau metua no te taime matamua ia Charles T. Russell, te peretiteni matamua o te Watch Tower Bible and Tract Society, i to ˈna haereraa mai i roto i ta ratou amuiraa i Houston. Mea pinepine te utuafare i te titau manihini i te fare i te mau tia ratere a te Taiete, o tei piihia i taua tau ra e feia perenina. Tau matahiti i muri iho, ua haere atu o Mama e to ˈna mau metua e faaea i Chicago, i Illinois, e ua haere atoa mai Taeae Russell i roto i ta ratou amuiraa i reira.
I te matahiti 1918, ua roohia o Mama ruau i te fiva paniora, e no to ˈna paruparu, ua faaue aˈera te mau taote e ia ora oia i te hoê vahi mahanahana aˈe. I te mea e te rave ra o Papa ruau i te ohipa na te taiete pereoo auahi Pullman, i te matahiti 1919 ua faatiahia oia ia hoˈi atu i Texas. I reira, i San Antonio, ua farerei ihora o Mama i te hoê taurearea itoito, e melo no te amuiraa, o Judge Norris to ˈna iˈoa. Ua au roa raua i te tahi e te tahi i reira iho, faaipoipo ihora raua, e riro mai nei o Judge ei metua tane no ˈu.
To Papa haapiiraa i te parau mau a te Bibilia
Ua mairihia to ˈu papa i te iˈoa huru ê ra o Judge (Haava) i to ˈna fanauraahia mai. I te taime a ite ai to ˈna metua tane ia ˈna no te taime matamua, ua parau oia: “E au teie tamarii i te haava ra te huru,” e ua topahia ˈtura oia i teie iˈoa. I te matahiti 1917, i te 16raa o to ˈna matahiti, ua horoahia mai na Papa te mau api parau iti Teihea roa te feia pohe? e Eaha te nephe? (beretane) neneihia e te Watch Tower Bible and Tract Society. Ua pohe te metua tane o Papa e piti matahiti na mua ˈtu, e ua horoa mai teie mau api parau iti i te mau pahonoraa o ta ˈna i imi noa na no nia i te huru o te feia pohe. I muri noa iho, ua haamata ˈtura oia i te haere i te mau putuputuraa a te Feia Haapii Bibilia, o te iˈoa ïa o te mau Ite no Iehova i taua tau ra.
Ua hinaaro oioi noa o Papa e apiti i roto i te mau ohipa a te amuiraa. Ua horoahia maira te hoê tuhaa fenua ta ˈna e nehenehe e poro, e ia oti te haapiiraa, e haere atu o ˈna na nia iho i to ˈna pereoo taataahi e opere i te mau api parau iti. Ua pûpû oia ia ˈna taatoa i roto i te ohipa pororaa i te tiaturiraa o te Basileia, e i te 24 no mati 1918, ua faataipe atura oia i to ˈna pûpûraa ia ˈna iho no Iehova na roto i te bapetizoraa i roto i te pape.
I te matahiti i muri iho, i to Mama haereraa mai e faaea i San Antonio, ua au roa o Papa i reira iho i ta ˈna i parau “te ata haviti roa ˈˈe e na mata ninamu roa ˈˈe” o ta ˈna i ore i ite aˈenei. Ua faaite aˈera raua e te hinaaro ra raua e faaipoipo, tera râ, e ere i te mea ohie ia noaa i te parau faatia a te mau metua o Mama. Teie râ, i te 15 no eperera 1921, ua tupu ihora te oroa faaipoiporaa. Ua faariro raua toopiti atoa ra i te taviniraa ma te taime taatoa ei tapao i roto i to raua oraraa.
Haamataraa oioi i roto i te taviniraa
A faaineine ai Papa raua Mama i te haere atu i te tairururaa no Cedar Point, i Ohio, i te matahiti 1922, ua ite aˈera raua e ua hapû o Mama ia ˈu. I muri noa ˈˈe i to ˈu fanauraahia mai, e 22 matahiti noa hoi to Papa, ua nominohia oia ei faatere no te taviniraa i roto i te amuiraa. Oia hoi na ˈna e rave i te mau faanahoraa atoa no te pororaa. Tau hebedoma noa i muri aˈe i to ˈu fanauraahia mai, ua afai Mama ia ˈu i roto i te taviniraa na te mau fare. Inaha, mea au roa atoa na to ˈu papa ruau e to ˈu mama ruau ia afai ia ˈu na muri ia raua i roto i te taviniraa.
E piti noa matahiti to ˈu, ua haere to ˈu mau metua e faaea i Dallas, Texas, e ua haamata ˈtura raua i te taviniraa ma te taime taatoa ei mau pionie e toru matahiti i muri iho. I te po, e taoto raua i roto i te hoê roˈi iti na te pae purumu e e tuu raua ia ˈu i nia i te parahiraa i muri i te pereoo. Mea arearea roa na ˈu, tera râ, ua papu ia raua e aitâ raua i ineine atura no te oraraa pionie. Ua haamata ˈtura o Papa i te hoê ohipa tapihooraa. I muri iho, ua patu atura oia i te hoê pereoo faaearaa iti no te faaineine i te rave-faahou-raa i te taviniraa pionie.
Hou vau i haere ai i te haapiiraa, ua haapii mai o Mama ia ˈu ia taio e ia papai, e ua mau ia ˈu na tabula numeraraa e maha. Ta ˈna tapao, o te tauturu-noa-raa ia ˈu ia haapii. E faatia oia ia ˈu i nia i te hoê parahiraa i pihai iho ia ˈna ia nehenehe au e tamǎrô i te auˈa o ta ˈna e horoi ra, e e haapii mai oia ia ˈu ia tamau aau i te mau irava e ia himene i te mau himene o te Basileia, aore ra te mau pehepehe mai ta matou i pii na i taua tau ra.
Te taviniraa i te Atua e to ˈu mau metua
I te matahiti 1931, ua haere paatoa matou i te tairururaa putapû mau i Columbus, Ohio, i reira to matou mairiraahia i te iˈoa ra Ite no Iehova. Noa ˈtu e e vau noa matahiti to ˈu i reira, ua manaˈo vau e o te iˈoa nehenehe roa ˈˈe o ta ˈu i faaroo aˈenei. I muri noa ˈˈe i to matou hoˈiraa ˈtu i te fare, ua paapaa roa te taiete a to ˈu Papa, e ua faaoti ihora o Papa e o Mama e o “te hinaaro o te Fatu” e ia haamata faahou raua i te taviniraa pionie. No reira, ma te haamata i te tau veavea o te matahiti 1932, ua oaoa matou e rave rahi mau matahiti i roto i te taviniraa ma te taime taatoa.
Ua tavini to ˈu mau metua ei pionie i Texas no Ropu ia faaea noa raua i pihai iho i te mau metua o to ˈu Mama, o te faaea noa ra i San Antonio. I te mea e ua haere matou i tera e tera tuhaa taviniraa, ua taui pinepine au i te fare haapiiraa. I te tahi mau taime, e parau mai te tahi mau hoa manaˈo tano ore e, “No te aha orua e ore ai e faaea i te hoê vahi ia fanaˈo teie tamarii i te hoê nohoraa maitai,” mai te mea e aita vau e haapao-maitai-hia ra. Teie râ, ua manaˈo vau e e oraraa faahiahia mau to matou e te tauturu ra vau ia Papa e ia Mama i roto i ta raua taviniraa. Inaha, te haamatarohia ra e te faaineinehia ra vau no te ohipa o te riro a muri aˈe ei huru oraraa atoa no ˈu.
E rave rahi mau avaˈe to ˈu parau-noa-raa ia Papa e ia Mama e te hinaaro ra vau e bapetizo, e mea pinepine raua i te paraparau mai no nia i teie tumu parau. Ua hinaaro hoi raua e haapapu e ua taa ia ˈu i te faufaaraa o ta ˈu faaotiraa. I te 31 no titema 1934, ua tae maira te mahana no teie ohipa faufaa roa o to ˈu oraraa. Teie râ, te po na mua ˈtu, ua haapapu o Papa e ua paraparau atu vau ia Iehova i roto i te pure. E i muri iho, ua rave oia i te hoê ohipa nehenehe roa. Ua faatuturi oia ia matou pauroa, e ua faahiti atura oia i te hoê pure. Ua faaite aˈera oia ia Iehova i to ˈna oaoa rahi i te faaotiraa i ravehia e ta ˈna tamahine iti e pûpû i to ˈna ora No ˈna. Papu maitai e, i roto i te roaraa o te mau matahiti, eita roa taua po ra e moehia ia ˈu!
Te haamataroraa a to ˈu mau metua tupuna
I rotopu i te mau matahiti 1928 e 1938, ua haere pinepine atu vau e hiˈo i to ˈu mau metua tupuna i San Antonio. Hoê â huru te oraraa i ǒ raua e i ǒ to ˈu mau metua. E vahine afai poroi o Mama ruau, mai tei piihia te mau pionie i taua tau ra, e ua riro mai oia ei pionie afa taime. Ua nominohia o Papa ruau ei pionie i te avaˈe titema 1929, no reira ua riro te pororaa ei ohipa matauhia e raua i te mau mahana atoa.
E rave na o Papa ruau ia ˈu i roto ia ˈna i te po e e haapii mai oia i te iˈoa o te mau fetia. E faahiti mai oia i te mau parau a te rohipehe o tei mau aau ia ˈna. Ua rave au e rave rahi mau tere na nia i te mau pereoo auahi Pullman a rave ai oia i te ohipa no te taiete pereoo auahi. E nehenehe ta ˈu e fariu atu i nia ia ˈna ia farerei anaˈe au i te fifi; na ˈna e tamǎrû mai ia ˈu e e faaore i to ˈu mau roimata. Teie râ, ia aˈohia vau no to ˈu faaroo ore e ia haere atu vau ia ˈna ra ia tamǎrû mai oia ia ˈu, e parau mai iho â oia (e mau parau hoi o ta ˈu i ore i taa i taua taime ra, tera râ, e mea papu maitai to ˈna tuuraa reo): “E ta ˈu tamahine iti, e tano ia mauiui te taata faaroo ore.”
Te mau matahiti hamani-ino-raa
I te matahiti 1939, ua haamata aˈera te Piti o te Tamaˈi Rahi, e ua faaoromai te nunaa o Iehova i te hamani-ino-raa e te haavîraa uˈana a te nahoa taata. I te hopearaa o te matahiti 1939, ua pohehia Mama i te maˈi ino mau e ua titauhia ia tâpûhia o ˈna, e no reira ua hoˈi atura matou i San Antonio.
E haaputuputu mai na te mau nahoa taata ia rave matou i te ohipa opereraa vea na roto i te mau aroâ no San Antonio. Tera râ, i te mau hebedoma atoa, e tia ˈtu to matou utuafare i reira, e poro aroâ faataahia no matou tataitahi. Ua ite pinepine atu vau ia ratou i te afairaa i to ˈu Papa i te fare mutoˈi ia uiuihia o ˈna.
Ua tamata o Papa i te tamau noa i ta ˈna taviniraa pionie noa ˈtu e ua titauhia o Mama ia faaea. Tera râ, aita ta ˈna moni i navai i ta ˈna ohipa afa taime, no reira, ua titauhia ia faaea atoa o ˈna. Ua faaoti au i ta ˈu tau haapiiraa i te matahiti 1939, e ua rave atoa vau i te ohipa.
Ua riro te iˈoa o Papa, Judge (Haava), ei tauturu i taua mau matahiti ra. Ei hiˈoraa, ua haere atu te hoê pǔpǔ Ite e poro i roto i te hoê oire i te pae apatoerau no San Antonio, e ua tuu ihora te raatira mutoi ia ratou pauroa i roto i te fare auri. Ua tapea oia tau 35 taata, e to ˈu atoa mau metua tupuna to roto. Ua faaara ˈtu ratou ia Papa, e ua faahoro oia i reira. Ua tomo atu oia i roto i te piha ohipa a te raatira mutoi e ua na ô atura: “O Judge (te Haava) Norris vau no San Antonio.”
“Iaorana Haava, e nehenehe anei au e tauturu ia oe?” o ta te raatira mutoi ïa i ani.
“Ua haere mai au ia tuuhia teie mau taata i rapae i te fare auri,” o ta Papa ïa i pahono atu. I reira iho, ua tuu te raatira mutoi ia ratou ma te ore e titau i te hoê mea—e aita ˈtu uiraa o ta ˈna i ani mai!
Mea au roa na Papa ia poro i roto i te mau fare toroa a te oire, e mea au iho â râ na ˈna ia haere atu e farerei i te mau haava e te mau auvaha ture. E parau atu oia i te taata farii e: “O Judge (te Haava) Norris vau, e ua haere mai au e hiˈo i te Haava mea.”
E ia farerei oia i te haava, teie ïa ta ˈna e parau atu na mua: “I teie nei, hou vau e faaite atu ai i te tumu o to ˈu tere, e faaara ˈtu vau ia oe e mea maoro aˈe to ˈu riroraa ei Haava ia oe. Ua riro vau ei haava mai to ˈu fanauraahia mai â.” E i reira oia e faataa ˈtu ai e mea nafea te noaaraa mai i teie iˈoa. E faatupu hoi te reira i te hoê omuaraa auhoa, e mea maitai roa to ˈna mau taairaa e te mau haava i taua tau ra.
To ˈu mauruuru no te aratairaa a to ˈu mau metua
Tei roto vau i taua mau matahiti arepurepu o te taurearearaa ra, e ua ite au e e rave rahi taime to Papa raua Mama haapeapearaa no ˈu a hiˈo ai raua ia ˈu e a aniani ai e eaha ta ˈu e rave i muri iho. Mai ta te mau tamarii atoa e rave, ua tamatamata vau ia Papa e o Mama e rave rahi taime, ma te ani atu ia rave au i te tahi mea aore ra ia haere au i te hoê vahi ma te ite ê na hoi e eita raua e faatia. I te tahi mau taime, e taˈi au. I te mea mau râ, e peapea rahi ïa to ˈu ahiri e ua parau mai raua e: “A haere, a rave mai ta oe e hinaaro. Eita mâua e tâuˈa.”
I te mea e ua ite au e eita ta ˈu e nehenehe e turai ia raua ia faataui i ta raua mau ture, ua faatupu te reira i roto ia ˈu i te manaˈo e ua paruruhia vau. Inaha, mea ohie aˈe ia ani anaˈe mai te tahi mau taurearea ia rave matou i te mau arearearaa tano ore, e parau noa ˈtu hoi au e: “Eita to ˈu papa e faatia.” I te 16raa o to ˈu matahiti, ua haapao o Papa e ia haapii au i te faahoro i te pereoo e ia noaa mai ta ˈu parau faatia no te faahoro. Oia atoa, i taua tau ra, ua horoa mai oia i te hoê taviri o te fare. Ua putapû roa vau i te mea e mea tiaturi roa oia ia ˈu. E au ra e e taata paari vau, e ua horoa mai i te manaˈo e haapao i ta ˈu mau hopoia e te hinaaro eiaha e ofati i to raua tiaturi.
I taua tau ra, mea iti te mau aˈoraa i horoahia no nia i te faaipoiporaa, tera râ, ua ite o Papa i te Bibilia e eaha ta ˈna e parau ra no nia i te faaipoiporaa ‘i roto i te Fatu anaˈe.’ (Korinetia 1, 7:39) Ua faaara mai oia ia ˈu e mai te peu noa ˈtu e e afai mai au i te hoê taurearea no teie nei ao i te fare, aore ra ia hinaaro noa ˈtu vau e haamatau i te hoê taurearea no teie nei ao, e peapea roa ïa o ˈna. Ua ite au e ua tano iho â o ˈna, no te mea ua ite au i te oaoaraa e te tahoêraa i roto i to raua faaipoiporaa no te mea ua faaipoipo raua ‘i roto i te Fatu.’
I te matahiti 1941, i te 18raa o to ˈu matahiti, ua manaˈo vau e ua here au i te hoê taurearea i roto i te amuiraa. E pionie oia e te haere ra oia i te haapiiraa ia riro mai oia ei auvaha ture. Ua oaoa roa vau. I to mâua faaiteraa ˈtu i to ˈu mau metua e te hinaaro ra mâua e faaipoipo, maoti i te faaite i to raua mauruuru ore aore ra i te haaparuparu mai, ua parau noa mai raua e: “Hoê noa aniraa ta mâua ia oe, Blossom. Te manaˈo nei mâua e mea apî roâ oe, e te hinaaro nei mâua e ani ia oe ia tiai â hoê matahiti. Mai te peu e ua here mau orua, eita te hoê matahiti e taui i to orua here.”
Te mauruuru nei au i te mea e ua faaroo vau i ta raua aˈoraa paari. Hoê matahiti i muri aˈe, ua paari to ˈu feruriraa e ua haamata ˈtura vau i te ite e aita teie taurearea apî e faatupu ra i te mau huru maitatai o te faariro ia ˈna ei hoa faaipoipo maitai. I te pae hopea, ua faarue oia i te faanahonahoraa, e ua ape au i te ati i roto i to ˈu nei oraraa. Auê te faahiahia e ia fanaˈo i te mau metua paari e nehenehe to raua maramarama e tiaturihia!
Te faaipoiporaa e te taviniraa ratere
I te tau toetoe o te matahiti 1946, i muri aˈe i to ˈu taviniraa ei pionie e to ˈu raveraa i te ohipa afa taime e ono matahiti, ua tomo maira te taurearea haviti roa ˈˈe o ta ˈu i farerei aˈenei i roto i ta matou Piha no te Basileia. Ua tonohia mai o Gene Brandt ei hoa no ta matou tiaau ratere i te mau taeae, tera hoi te iˈoa o te tiaau ratere i taua tau ra. Ua au roa mâua i te tahi e te tahi, e ua faaipoipo mâua i te 5 no atete 1947.
I muri noa iho, ua iriti Papa e o Gene i te hoê taiete haapao buka moni. Tera râ, ua parau atu o Papa ia Gene e: “Te mahana e mairi ai tâua i te hoê putuputuraa aore ra i te hoê ohipa teotaratia no teie noa ˈˈe piha toroa, e opani tâua i ta tâua taiete.” Ua haamaitai mai Iehova i teie hiˈoraa pae varua, e ua navai maitai matou i teie piha toroa no to matou mau hinaaro i te pae materia e ua vaiiho atoa mai i te taime no te taviniraa pionie. E feia tapihoo aravihi roa o Papa e o Gene, e e nehenehe hoi matou e monihia, tera râ, e ere roa ˈtu te reira ta raua tapao.
I te matahiti 1954, ua titauhia o Gene i roto i te ohipa tiaau haaati, e tauiraa rahi te reira i roto i to mâua oraraa. Eaha hoi te huru o to ˈu mau metua? I reira â, aita raua i tapitapi no raua iho, no te mau faufaa râ o te Basileia o te Atua e no te maitairaa i te pae varua o ta raua mau tamarii. Aita roa ˈtu raua i parau mai e: “No te aha aita ta mâua e mootua?” Maoti râ, ua parau noa mai raua e: “Eaha ta mâua e nehenehe e rave no te tauturu ia orua i roto i te taviniraa ma te taime taatoa?”
No reira, i te taeraa te taime e haere ai mâua, e mau parau faaitoitoraa noa ïa tei faataehia mai e te oaoaraa i ta mâua haamaitairaa taa ê. Aita raua i faatupu i te manaˈo e te faarue ra mâua ia raua tera râ ua turu mai raua e 100 i nia i te hanere. I muri aˈe i to mâua revaraa, ua tutava noâ raua i roto i te taviniraa e ahuru matahiti. Ua nominohia Papa ei tiaau no te oire o San Antonio, e tiaraa hoi ta ˈna i tapea e 30 matahiti te maoro. Ua oaoa oia i te iteraa i te maraaraa mai te hoê amuiraa i roto i te oire i te mau matahiti 1920 ra i nia i te 71 amuiraa hou oia e pohe ai i te matahiti 1991.
No mâua o Gene, ua î te oraraa i te anaanatae. Ua ite mâua i te oaoaraa rahi e tavini i to mâua mau taeae e mau tuahine herehia i roto hau atu i te 31 hau e, te ohipa faahiahia roa ˈˈe, te haamaitairaa taa ê e haere atu i te 29raa o te pǔpǔ o te Haapiiraa Bibilia no Gileada a te Taiete Watchtower i te matahiti 1957. I muri iho, ua hoˈi atu mâua i roto i te taviniraa ratere. I te matahiti 1984, i muri aˈe e 30 matahiti i roto i te taviniraa haaati e te mataeinaa, ua horoa te Taiete i te hoê tuhaa taviniraa tiaau na Gene i San Antonio, i te mea e ua hau atu to ˈu mau metua i te 80 matahiti e ua paruparu roa raua.
Te aupururaa i to ˈu mau metua
Hoê noa matahiti e te afa i muri aˈe i to mâua hoˈiraa ˈtu i San Antonio, ua moe to Mama hiroa e ua pohe oia. Ua tupu taue noa mai e aita vau i nehenehe e faaite atu i te mau parau o ta ˈu i hinaaro noa na e parau ia ˈna. Ua haapii mai te reira ia ˈu ia paraparau rahi atu ia Papa. I muri aˈe e 65 matahiti to raua faaipoiporaa, ua moemoe roa oia ia Mama, tera râ tei pihai iho mâua ia ˈna no te here e no te turu atu ia ˈna.
Ua tamau noa Papa i te tapea i te hiˈoraa o to ˈna oraraa taatoa i te haere-tamau-raa i te mau putuputuraa kerisetiano, te haapiiraa, e te taviniraa e tae noa ˈtu i to ˈna poheraa. Mea au roa na ˈna ia taio. Ia faaea anaˈe o ˈna o ˈna anaˈe iho ia haere mâua i roto i te taviniraa, e hoˈi mai au i te fare e e ani atu vau e, “Ua moemoe anei oe?” No te mea ua taio oia e ua haapii noa oia, aita teie manaˈo i puta mai i roto ia ˈna.
Te vai ra te tahi atu peu i roto i to ˈna oraraa taatoa o ta matou i tapea noa. Ua onoono noa o Papa e ia tamaa amui te utuafare, i te tamaaraa poipoi iho â râ, ia tuatapapahia te irava mahana. Aita vau i faatiahia ia faarue i te fare ma te ore e hiˈopoa i te irava. I te tahi mau taime e parau atu vau: “E hoa Papa, e taerehia vau i te fare haapiiraa (aore ra i ta ˈu ohipa).”
“E ere na te irava e faataere ra ia oe; no te mea râ aita oe i tia oioi mai,” o ta ˈna ïa e parau mai. E e faaea mai au no te faaroo i te irava. Ua haapao oia e ia tapeahia teie hiˈoraa maitai e tae roa ˈtu i te mau mahana hopea o to ˈna oraraa. Teie te tahi atu tufaa o ta ˈna i vaiiho mai na ˈu.
Ua vai ieie noa to Papa feruriraa e tae roa ˈtu i te hopea. Te hoê mea i faaohie i te raveraa ia ˈna, oia ïa aita o ˈna i faaohipa rahi aore ra i amuamu. I te tahi mau taime, e faahiti oia i to ˈna maˈi arthrite, tera râ, e faahaamanaˈo atu vau e to ˈna maˈi mau, o te “Adamthrite [maˈi a Adamu],” e e ata oia. Ua parahi mâua o Gene i pihai iho ia ˈna, e ua pohe hau noa o Papa i te poipoi o te 30 no novema 1991.
Ua hau atu vau i te 70 matahiti i teie nei e te faufaa-noa-hia ra vau i te hiˈoraa maitai o to ˈu nau metua kerisetiano here. E ta ˈu pure hohonu roa ˈˈe, oia hoi ia faaite au i to ˈu mauruuru taatoa no teie tufaa na roto i te faaohiparaa i te reira i roto i te mau matahiti atoa e haere mai nei.—Salamo 71:17, 18.
[Hohoˈa i te api 5]
Mâua o Mama
[Hohoˈa i te api 7]
1. Ta ˈu tairururaa matamua: San Marcos, Texas, setepa 1923
2. Te tairururaa hopea a Papa: Fort Worth, Texas, tiunu 1991 (O Papa tera e parahi ra)
[Hohoˈa i te api 9]
Gene e o Blossom Brandt