Hohoˈa no te Fenua i tǎpǔhia mai

A mataitai i te fenua, a mataitai i te mamoe!

E MAU tausani kerisetiano o tei haere e mataitai i te Fenua i tǎpǔhia, ua manaˈo hoi ratou e ia ite ratou i te mau vahi i reira te mau ohipa i te tupuraa, e tauturu te reira ia ratou ia taa i te Bibilia, ma te ite papu atu i to ˈna auraa. Ua tano ratou.

Noa ˈtu e ua haere roa ˈtu outou e mataitai aore ra ua tuatapapa outou i te parau no teie mau fenua na roto i te mau buka e te mau tumu parau, ua ite anei outou i te mau mamoe? ‘No te aha hoi te mau mamoe e faahitihia ˈi e te Fenua i tǎpǔhia?’ o ta outou paha e ani mai. Inaha, e animala matauhia te mau mamoe i roto i te oraraa i te tau bibilia e no reira, eita te mataitairaa i te Fenua i tǎpǔhia e hope roa ahiri e eita te mau mamoe e faahitihia.

E nehenehe outou e mataitai atu i te mau hohoˈa i nia nei i roto i to outou tere, no te mea te mau mamoe e itehia ra i roto i taua fenua ra i teie mahana, hoê â ïa e tei ora na i te tau bibilia.a Ua teiahahia to ratou aero i te mii. (Levitiko 7:3; 9:19) Mea pinepine mea uouo to ratou huruhuru meumeu. A haamanaˈo râ e te vai atoa ra i roto i te nǎnǎ rahi a Iakoba i te mau mamoe “opatapata rarahi, e te . . . outeute.”—Genese 30:32.

Te faaite atoa ra taua aamu ra e e faarirohia na te hoê taata e nǎnǎ rahi ta ˈna ei taata moni. (Genese 30:43) Te taio nei tatou no nia ia Ioba e: “E o a ˈna pue taoˈa e hitu tausani ïa i te mamoe, e toru tausani kamela, e hoê tausani puaatoro, e pae hanere asini ufa . . . hau atura oia i te rahi i to te hitia o te râ atoa ra.” (Ioba 1:3; 42:12) A haamanaˈo na e e 3 000 mamoe e 1 000 puaaniho ta Nabala. Eaha ïa to ˈna tiaraa e to ˈna mana i te tau o Davida ra? (Samuela 1, 25:2) No te aha râ te hoê nǎnǎ rahi e riro ai ei taoˈa faufaa?

No te mea e horoa mai te mamoe i to ratou tiai aore ra to ratou fatu i te mau taoˈa faufaa. Ua riro te huruhuru mamoe iho ei faufaa o te faaapî-noa-hia. Te tauturu ra te Maseli 31:13, 21, 22 ia tatou ia ite i te paari e te itoito o te vahine o te faaohipa i te reira no te hamani i te ahu no to ˈna utuafare aore ra te mau ahu faanehenehe e nehenehe e hoohia. (Ioba 31:20) Ua riro te huruhuru mamoe ei taoˈa hooraa faufaa. O te itehia ra i roto i te aamu e na ô ra e “ua hapono maira te arii o Moabi . . . , o tei faaamu i te [mamoe], i te taoˈa aufau na te arii o Iseraela, hoê hoi hanere i te tausaniraa i te fanauˈa mamoe, hoê hanere hoi i te tausani i te mamoe pae, e te huruhuru atoa ra.” (Te mau arii 2, 3:4) Oia mau, e mau mamoe “e te huruhuru atoa ra”; ua hau atu to ratou faufaa no to ratou huruhuru.

Te vai ra to vetahi mau mamoe oni te mau tara rahi, mai ta outou e ite ra i nia i te hohoˈa i te pae atau. Te haamanaˈo ra anei outou i te pu tara mamoe oni o tei faaohipahia na no te faaoto i te Iubili? (Levitiko 25:8-10) E faaohipahia na teie mau tara poopoo no te faaoto i te pu faaararaa aore ra no te aratai i te mau ohipa tamaˈi.—Te mau tavana 6:34; 7:18, 19; Ioela 2:1.

Mai te peu e e nǎnǎ mamoe ta outou, mea papu maitai ïa e e maa ta outou no te mea tei roto te mamoe i te mau animala mâ tei faatiahia i te mau Iseraela ia amu. (Deuteronomi 14:4) E nehenehe te iˈo (mamoe aore ra pinia mamoe) e tunu-pape-hia aore ra e euhia. E maa faufaa roa te mamoe eu i roto i te oroa Pasa o te matahiti. (Exodo 12:3-9) E horoa tamau atoa te mamoe i te û, e faaohipahia no te inu aore ra no te hamani i te pata paari.—Samuela 1, 17:17, 18; Ioba 10:10; Isaia 7:21, 22.

Eita to tatou tere mataitairaa i te mau mamoe e hope ahiri e eita e faahitihia te taairaa piri roa i rotopu i te nǎnǎ e to ˈna tiai. E aupuru te hoê tiai haapao maitai i ta ˈna mau mamoe. Mai ta Iesu i faaite, e taa ia ratou i te reo o to ratou tiai mamoe e e pahono atu ratou ia pii mai oia i to ratou iˈoa. (Ioane 10:3, 4) Ia moe hoê, e maimi te tiai mamoe haapao maitai ia ˈna. Ia itea mai ia ˈna i te mamoe tei moe ra, e tuu atu oia ia ˈna i nia i to ˈna tapono e e amo atu ai no te faahoˈi ia ˈna i roto i te nǎnǎ.—Luka 15:4, 5.

Ua faaohipa o Davida i to ˈna aravihi e te nǎnǎ, ia ˈna i faaau ia ˈna iho i te hoê mamoe o Iehova to ˈna Tiai. Ua paruruhia o Davida, mai te mamoe i paruruhia i mua i te mau animala taehae. E nehenehe te mau mamoe e pee i te aratairaa a to ratou tiai haapao maitai. Ia pepe ratou, e rapaau oia i to ratou pepe, peneiaˈe e te monoˈi tamǎrû. Auê ïa taa-ê-raa e e te mau ohipa miimii a te mau raatira no Iseraela, tei faataahia i roto i te Ezekiela 34:3-8!

Te vai ra i roto i te Bibilia e rave rahi mau parau tohu e te mau faahitiraa taipe no nia i te mamoe. No reira, ia mataitai outou, ia haamatau outou e te mau mamoe no te Fenua i tǎpǔhia, e noaa ia outou i te hoê ite hohonu aˈe no nia i te mau parau i muri nei, “te nǎnǎ iti,” “te Arenio a te Atua,” e te mau “mamoe ê atu.”—Luka 12:32; Ioane 1:36; 10:16.

[Nota i raro i te api]

[Faaiteraa i te fatu o te hohoˈa i te api 24]

Pictorial Archive (Near Eastern History) Est.

[Faaiteraa i te fatu o te hohoˈa i te api 25]

Garo Nalbandian