E ora anei te nephe i muri aˈe i te poheraa?

UA FAATAAHIA te nephe mai te “pu i te pae varua o te taata, hamanihia e ia nehenehe te reira e taa ê i te tino, pohe ore e haavahia e te Atua”, no te oaoaraa aore ra no te ati i roto i te hoê huru a muri aˈe (Le Petit Robert). Mai te huru ra e te farii nei te rahiraa o te mau haapaoraa i taua faataaraa ra. Te parau ra te Buka parau paari apî katolika (beretane) e: “Ua riro te haapiiraa o te pohe-ore-raa te nephe e to ˈna oraraa i te poheraa o te taata (...) ei hoê o te mau ofai tihi o te haapiiraa philosopho e o te haapiiraa no nia i te parau faaroo kerisetiano.”

No reira, e maere paha outou i te haapii e no roto mai taua tiaturiraa tumu ra i te haapiiraa philosopho etene. Na mua roa ˈˈe i te fanauraahia o Iesu, ua tiaturihia e te nephe, o te hoê ïa mea o te ore e nehenehe e tapeahia, o te nehenehe e ora i rapae mai i te tino, e e nehenehe ïa e ora ˈtu i te poheraa o te tino, e e ora ˈtu mai te hoê tupapau, aore ra mai te hoê varua.

Ua faaite te mau Heleni i taua tiaturiraa ra na roto i te mau parau philosopho. Teie te mau parau a Socrate, taata philosopho heleni tuiroo: “Ia feruri na tatou e mea viivii ore te reira, te nephe e faataa ê ia ˈna i to ˈna tino: eita oia e rave i te hoê aˈe mea na muri ia ˈna, (...) e haere tia oia i te taoˈa ra hoê â huru to raua, i te hoê mea itea-ore-hia, i te mea mai te atua ra, pohe ore e te paari, e i te vahi i reira to ˈna tapaeraa e faatupu ai i te oaoaraa no ˈna, i reira te parau maamaa, te ohipa tano ore i te feruriraa, te mau mea mehameha (...) te mau mauiui atoa o te huru taata, e ore ai e taati faahou atu ia ˈna, e (...) e vai noa o ˈna e te mau Atua i te toea o to ˈna taime! — Phédon, 80, d, e; 81, a.

Te hoê haapiiraa e ere no roto mai i te Bibilia

Mea nafea taua tiaturiraa etene o te pohe-ore-raa te nephe i te haapiiraahia i roto i te amuiraa faaroo kerisetiano e i te haapaoraa ati iuda?

Te faaiti nei te Buka parau paari apî katolika i te mau ohipa i te na ôraa e: “Eita e ite-maitai-hia te manaˈo o te oraraa o te nephe i muri aˈe i te pohe i roto i te Bibilia.” Mea tano aˈe ia parau e aita roa ˈtu e itehia ra te haapiiraa o te pohe-ore-raa te nephe i roto i te Bibilia! Te faˈi ra taua buka parau paari ra e: “E ere hoê â huru te haapiiraa o te nephe taata i roto i te F[aufaa] T[ahito] ia faaauhia i te haapiiraa philosopho heleni e o to tatou nei tau.”

I roto i te tuhaa e piihia Faufaa Tahito, e itehia te parau heleni ra nèphèsh, huri-pinepine-hia na roto i te parau ra “nephe”, e 754 taime. E, i roto i te tuhaa piihia Faufaa Apî, e itehia te parau heleni ra psukhê, huri-atoa-hia na roto i te parau nephe, e 102 taime. Na roto i te tuatapaparaa i te faaohiparaa o taua mau parau ra i roto i te Bibilia, e matara mai te hoê manaˈo maere mau.

I roto i te Genese 2:7, te taio nei tatou e ua haapuai ihora te Atua i roto i te apoo ihu o Adamu i te aho ora, e ‘riro mai nei oia ei taata ora [na roto i te reo hebera nèphèsh]’. A tapao maitai: aita i horoahia na Adamu i te hoê nephe taata; ua riro mai râ oia ei taata ora. Na roto i te tahi atu mau parau, e nephe te poieteraa apî o Adamu. E ere atura ïa i te mea maere e ia parau te Buka parau paari apî katolika e: “I roto i te F[aufaa] T[ahito], e ere te nephe i te hoê tuhaa o te taata, o te taata taatoa râ, te taata mai te hoê mea ora.”

Te haapapu ra te tahi atu mau irava i te reira. Ei hiˈoraa, i roto i te Levitiko 7:20, te parauhia ra no “te taata i amu i te iˈo o te tusia no te maitai”. Te parau ra te Levitiko 23:30 no “tei rave i te ohipa”. I roto i te Maseli 25:25, te taio nei tatou e: “Mai te pape toetoe i te taata i hiaai ra, oia te parau maitai mai te fenua roa mai.” I te pae hopea, i roto i te Salamo 105:18, te parauhia ra e: “I mauiui to ˈna avae i te tapea, ua mau hoi oia i te auri.”

Teie râ, eaha te mea o te nehenehe e amu i te iˈo, e rave i te ohipa, e tamǎrûhia e te pape e e tapeahia i te auri? O te hoê tuhaa i te pae varua anei, taa ê i te taata, aore ra te taata iho? Mea papu te pahonoraa.

E tapao tatou e e ere te taata anaˈe te nephe. Te parau ra te Genese 1:20 ia tatou e, i te hoê taime o te poieteraa, ua parau atura te Atua e: “Ia rahi te mea ora nee haere i raro i te moana.” Oia mau, e mau nephe atoa te mau iˈa. I te tahi atu taime o te poieteraa, ua faaite te Atua e e mau nephe “te mau puaa, te mau mea e nee haere, e te mau manu avae maha o te fenua ra”. — Genese 1:24; hiˈo Levitiko 11:10, 46; 24:18; Numera 31:28; Ioba 41:21; Ezekiela 47:9.

No reira, i roto i te Bibilia, e ere te parau ra “nephe” i te hoê tuhaa i te pae varua papu ore, o te faataa ê i te tino i muri aˈe i te poheraa. O te hoê taata râ, te hoê animala, aore ra te ora e ohipa ra i roto i te tahi aore ra te tahi.

Eaha te ohipa e tupu ia pohe te hoê taata?

Ma te papu maitai, aita te Bibilia e farii ra i te manaˈo etene, oia hoi e nephe pohe ore to te taata. No outou, na vai i haapii i te parau mau no nia i te reira? Te feia philosopho heleni etene anei aore ra te nunaa ta te Atua i faatupu i te hoê faufaa? Papu maitai, o te nunaa a te Atua, te nunaa ta ˈna i horoa i ta ˈna Parau faaurua.

Teie nei râ, teie te hoê uiraa: Eaha te ohipa e tupu i nia i te nephe i te poheraa? I te mea e o te taata te nephe, mea papu maitai e ia pohe te taata, e pohe atoa ïa te nephe. Na roto i te tahi atu mau parau, ua riro te taata pohe ei nephe pohe. E rave rahi irava e haapapu ra i te reira. “O tei rave i te hara ra, o te pohe ïa”, ta te Ezekiela 18:4 e parau ra. I roto i Te mau Tavana 16:30, te taio ra tatou e: “E ua na ô aˈera Samasona, Ia pohe noa ˈtu vau i te poheraa o te Philiseti nei.” Te faaite nei te tahi mau irava e e nehenehe te hoê nephe e haapohehia (Genese 17:14), e tairihia e te ˈoˈe (Iosua 10:37) e e nehenehe e uumihia (Ioba 7:15), aore ra e nehenehe e haaparemohia (Iona 2:5). Te hoê nephe o tei faarue mai, aore ra nephe pohe, o te hoê taata pohe ïa. — Levitiko 19:28; 21:1, 11.

Eaha râ ïa te huru o te mau nephe pohe? Te pohe e ere ïa te ora. Ua taai to tatou mau tumu ite atoa i to tatou tino taata. Tei raro aˈe te ite, te faarooraa e te feruriraa i te tere-maitai-raa o to tatou mata, to tatou tariˈa e to tatou roro. Aita anaˈe e mata, eita ïa tatou e nehenehe e ite. Aita anaˈe e tariˈa, eita ïa tatou e nehenehe e faaroo. Aita anaˈe e roro, eita ïa tatou e nehenehe e rave i te hoê ohipa. Ia pohe anaˈe te hoê taata, eita ïa to ˈna mau melo atoa e tere faahou. E mau ïa to ˈna ora.

Ia au i te reira, te parau ra te Koheleta 9:5, 10 e: “Aita râ a te feia i pohe ra e parau itea. (...) aore hoi e ohipa, aore e imiraa, aore hoi e ite, aore hoi e paari, i te apoo ta oe e haere na.” Oia atoa, te parau ra te Salamo 146:3, 4 e: “Eiaha e tiaturi i te hui arii, e te taata atoa, aita hoi o ˈna e ora. Te reva nei hoi to ˈna varua, te hoˈi nei oia i to ˈna ra repo; mou roa ˈtura ta ˈna i opua i taua mahana ra.” No reira, ia pohe anaˈe te mau taata (te mau nephe), e mau noa ïa to ratou oraraa.

Mai te haapiiraa etene e tae atu i te haapiiraa a te Ekalesia

‘Aita anei te Faufaa Apî e haapii ra no nia i te pohe-ore-raa te nephe?’ ta vetahi ïa e ani. Aita roa ˈtu. Te faˈi ra te Buka parau paari apî katolika e: “Te pee ra te F[aufaa] A[pî] ma te haapao maitai i te maramarama [ta te Faufaa Tahito] e horoa ra no nia i te pohe.” Na roto i te tahi atu mau parau, te haapii ra te “Faufaa Apî” e e pohe te nephe. Ua faaite o Iesu Mesia e aita oia i tiaturi e mea pohe ore te nephe a ani ai oia e: “O teihea te au i te ture ia rave i te sabati, o te maitai anei, e o te ino; o te faaora anei, e o te taparahi?” (Mareko 3:4). Ua faaite o Paulo, aposetolo kerisetiano, e ua farii oia i te manaˈo ta te “Faufaa Tahito” e horoa ra no nia i te nephe, ma te faahiti i te Genese 2:7: “Ua oti hoi i te papaihia, I hamanihia te taata matamua o Adamu ei taata ora.” — Korinetia 1, 15:45.

Mea nafea to te manaˈo a Platon i te riroraa mai ei haapiiraa na te Ekalesia? Te faataa ra te Buka parau paari no nia i te haapaoraa e te ihimorare (beretane) a James Hastings e: “A haere ai te evanelia kerisetiano na roto i te uputa o te sunago ati iuda no te tomo atu i roto i te tahua taputoraa o te Hau emepera roma, ua afaihia te hoê manaˈo o te nephe no roto mai i te haapiiraa tumu hebera i roto i te hoê vahi haaatihia e te manaˈo heleni, apeehia e te mau faahopearaa o te ore e nehenehe e vaiihohia i te hiti i roto i te roaraa o to ˈna haamatauraa.” Ua tutava te feia haapii a te Ekalesia no te faariro i ta ratou poroi ei poroi “taa-maitai-hia i roto i te hoê ao o te iho tumu heleni” ma te faaohipa i “te mau parau e te mau manaˈo faatiahia o te haapiiraa heleni no nia i te huru o te taata”. Oia atoa, ua haamata te feia ati iuda e tuatapapa ra i te parau faaroo i te haapapu i roto i ta ratou mau papai i “te mana rahi o te haapiiraa a Platon”. — Buka parau paari ati iuda (beretane).

Ua tuuhia ˈtura te haapiiraa bibilia no nia i te nephe i te hiti, e ua tauihia aˈera e te hoê haapiiraa etene. Eita roa ˈtu te reira e nehenehe e riro ei hororaa ma te parau e na taua huru raveraa ra i rave e ia farii-rahi-hia te kerisetianoraa e te taatoaraa. A poro ai oia i Ateno, te pu iho o te iho tumu heleni, aita o Paulo i haapii i te manaˈo a Platon no nia i te nephe. I te taa-ê-raa, ua poro oia i te haapiiraa kerisetiano no nia i te tia-faahou-raa, noa ˈtu e ua manaˈo te feia heleni e faaroo ra ia ˈna e mea fifi roa ia farii i ta ˈna mau parau. — Ohipa 17:22-32.

Inaha, ua horoa mai te aposetolo Paulo i taua faaararaa ia tatou no nia i te amuiraa i te parau mau bibilia e te haapiiraa etene e: “Eaha to te maramarama auraa i te pouri? E eaha to te Mesia auraa ia Behala?” (Korinetia 2, 6:14, 15). Aita e feaaraa e, ia faatia-anaˈe-hia te hoê haapiiraa etene ia riro mai ei ofai tihi o ta ˈna haapiiraa philosopho e o ta ˈna tuatapaparaa no nia i te parau faaroo, aita te amuiraa faaroo kerisetiano i faahanahana i te Atua.

Te hoê tiaturiraa no te feia pohe

E tiamâraa to te taata no te tiaturi i te mea o ta ˈna e hinaaro. Teie nei râ, eita ta tatou e nehenehe e farii e no roto mai te haapiiraa no nia i te pohe-ore-raa te nephe, i te Bibilia. Tera râ, aita anei to te mau taata e tiaturiraa no te ora i muri aˈe i te pohe?

I muri aˈe i to ˈna aniraa e: “E ora faahou anei [te taata]?”, ua pahono o Ioba iho i ta ˈna uiraa, ma te faauruahia e te Atua, i te na ôraa e: “Na oe [Iehova] e tiaoro mai, e na ˈu e parau atu ia oe; e oto â oe i te ohipa a to rima i rave ra.” (Ioba 14:14, 15). Oia mau, te pûpû nei te Bibilia i te tiaturiraa o te tia-faahou-raa no te feia atoa tei vai i roto i te feruriraa o te Atua. Te tiai ru nei oia i te taime e faaora faahou ai oia i ta ˈna mau tavini haapao maitai, mai ia Ioba. Ua haapapu o Iesu Mesia i te parau mau o taua tiaturiraa ra, ma te parau e: “Eiaha e maere i te reira; te fatata mai nei hoi te hora e faaroo ai te feia atoa i roto i te apoo ra i tana reo, e e haere mai i rapae; e te feia i mau na i te parau maitai ra, e tia mai ïa e rave i te ora; e te feia hoi i mau na i te parau ino ra, e tia mai ïa e rave i te pohe.” — Ioane 5:28, 29.

Ia tae mai te taime e tupu mai ai taua parau tohu ra, te tǎpǔ ra o Isaia 25:8 e na te Atua “e haamou roa i te pohe e a muri noa ˈtu”. Oia hoi te auraa, o te hoê ao ïa i reira “e ore roa te pohe”, ia au i te parau a te Apokalupo 21:4. Te hinaaro ra anei outou e ora i roto i te hoê ao i reira eita e ite-faahou-hia te hunaraa maˈi, te fare no te vaiiho i te feia pohe, te menema, te tanuraa maˈi, te hoê ao i reira e ore roa ˈi te mau roimata no te mauiui, e vai noa mai râ te mau roimata no te oaoa?

Peneiaˈe paha ua haapii-noa-hia outou e e mea pohe ore te nephe. Ia haapii anaˈe râ outou i te Bibilia, e nehenehe e roaa ia outou te tiaturiraa i ta ˈna mau parau tǎpǔ, o te faatiamâ mai ia outoua. E nehenehe atoa outou e haapii i te mea te tia ia outou ia rave no te fanaˈo i taua mau parau tǎpǔ ra, eiaha ma te ora ˈtu na roto i te hoê huru nephe pohe ore, ma te noaa râ te “ora mure ore” i roto i te Paradaiso i nia i te fenua nei. — Ioane 17:3; Luka 23:43.

[Nota i raro i te api]