Ua maramarama te ohipa i taa-ore-hia ra!

TE MANAˈO nei te rahiraa o te taata e e ere te pohe te hopea o te oraraa o te taata nei, e ora ˈtu râ te tahi mea i muri aˈe i te poheraa o te tino. Te reira mea, ua matau-noa-hia i te parau e varua.

Ei pahonoraa i te uiraa ra “Mea nafea tatou i te iteraa e, i te poheraa, e faarue mai te rouh [varua] i te tino?”, te faaite ra te vea The Straight Path e: “Te pohe, o te revaraa ïa o te varua. I te taime te varua e faarue ai i te tino, e haere atu oia i roto i te barzakh [to muri aˈe i te pohe]. (...) I roto i te apoo, te vai ra te tino, eiaha râ te varua.” Te manaˈo ïa teie o te mau mahometa, o te ore hoi i taa ê atu i te mau haapiiraa a te amuiraa faaroo kerisetiano.

Ei hiˈoraa, teie e piti na uiraa no roto mai i te Ui no nia i te haapiiraa kerisetiano (beretane), te hoê buka katolika e faaohipahia i roto i te mau fare haapiiraa no Beretane:

Uiraa: “Nafea to oe varua e nehenehe ai e riro mai te Atua ra te huru?”

Pahonoraa: “E riro to ˈu varua mai te Atua ra te huru, no te mea e varua oia e e ore oia e pohe.”

Uiraa: “Eaha te auraa o te parau ra ‘e ore to oe varua e pohe’?”

Pahonoraa: “Ia parau anaˈe vau e e ore to ˈu varua e pohe, te faaite ra ïa vau e eita oia e mou.”

E nehenehe teie buka e aratai i te tamarii ia farii i taua mau manaˈo ra, aita râ oia e horoa maira i te tahi haapapuraa no nia i te mau parau ta ˈna e faahiti ra.

Te vai nei râ ta tatou te hoê pu haamaramaramaraa o te haapapu mai nei e eaha mau na te varua [nephe]. O te Bibilia ïa, te buka tahito roa ˈˈe i itehia e te taata. E riro paha outou i te maere i te mau mea ta ˈna e haapii ra.

Te faataaraa a te Bibilia no nia i te varua [nephe]

I roto i te Genese, te buka matamua o te Bibilia, te vai ra te aamu no nia i te poieteraahia te taata e te mau mea ora atoa i nia i te fenua nei. Ua papaihia oia na roto i te reo hebera, e i roto i na pene matamua e piti, e itehia te parau ra nèphèsh, te auraa ra “mea ora” tei matau-noa-hia i te parau e varua, e maha taime, hoê anaˈe râ taime teie parau i te faahitiraahia no te taataa. E hiˈo anaˈe na eaha te auraa o taua parau ra i roto i na tupuraa e toru ê atu.

“Hamani ihora te Atua i te mau mea rarahi o te tai, e te mau mea ora [nèphèsh] hautiuti atoa o te moana e rave rahi ra, ma to ratou huru; e te mau manu pererau atoa, ma to ratou huru.” — Genese 1:21.

“E na te mau manu avae maha atoa o te fenua nei, e na te mau manu atoa o te reva, e na te mau mea ora [nèphèsh] atoa e nee haere i nia iho i te fenua nei ra; na ratou te mau raau rii atoa ei maa.” — Genese 1:30.

“Ua hamani hoi te Atua ra o Iehova i te mau manu avae maha atoa o te fenua nei, e te mau manu atoa o te reva, i te repo fenua; e ua aratai mai ia Adamu ra, ia itea ta ˈna iˈoa e mairi; e ta Adamu iˈoa e mairi i taua mau mea ora [nèphèsh] atoa ra, ia riro te reira ei iˈoa mau.” — Genese 2:19.

Te faaite mai nei te faaauraa i taua na irava e toru nei e, te ravehia ra te parau ra nèphèsh no te mau mea ora animala.

Ia au i teie mau irava, a hiˈo na râ i te aamu no nia i te poieteraahia te taata matamua ra o Adamu:

“A hamani ai te Atua ra o Iehova i te taata i te repo fenua nei, ua haapuai ihora oia i te aho ora i roto i tana apoo ihu ra, riro aˈera te taata ei taata ora [nèphèsh].” — Genese 2:7.

Ma te tuatapapa i teie nei irava i roto i te hoê huriraa o te Torah, oia hoi na buka matamua e pae o te mau Papai hebera, te faaite ra te Taiete neneiraa buka ati iuda no Marite e: “Aita i faaitehia i roto i te Bibilia e e varua to tatou. Te ‘Nèfesch’ [nèphèsh] o te taata iho ïa, to ˈna hiaai i te maa, te toto e tahe ra i roto i to ˈna mau uaua, te taata taatoa.” (Na matou e haapapu nei.) Ma te papu maitai, e nehenehe atoa ïa e na reira i te parau no te mau mea atoa i poietehia, tei piihia e “mea ora”. Aita ratou e fatu ra i te hoê varua; e mau varua aore ra mea ora anaˈe hoi ratou.

O Platon e te varua

No hea mai ïa te manaˈo ra e e faarue te varua i te tino i te poheraa? Te papai ra te Encyclopédie juive e: “I te taime noa a itehia ˈi te manaˈo peresia e to te heleni, i haamauhia ˈi i roto i te haapaoraa ati iuda i te manaˈo no nia i te hoê varua iˈo ore tei taa ê i te taata iho.”

I te mau tau tahito roa ˈˈe, e tiaturi na to Aiphiti e eita te varua e pohe e e hoˈi faahou mai oia e hiˈo i te tino o te taata pohe. No reira ratou i faaohipa ˈi i te mau ravea atoa no te faaherehere i te mau tino pohe ma te miriraa i te mau tino.

E tia atoa ia tapao mai e te haapapu maitai ra te Evangelischer Erwachsenenkatechismus (Ui porotetani no te feia paari) apî, i neneihia e te Ekalesia lutero no Helemani e, e ere te haapiiraa no nia i te pohe-ore-raa o te varua, no roto mai i te Bibilia, no ǒ mai râ i “te philosopho heleni ra o Platon (427-347 hou to tatou nei tau) [tei] haapapu na e te vai ra te hoê taa-ê-raa i rotopu i te tino e te varua”. Te faaite atoa ra taua buka ra e: “Te feaa nei te mau taata tuatapapa i te parau no nia i te Atua o teie nei tau, no nia i te anoiraahia te manaˈo heleni i te Bibilia. (...) Te patoi nei ratou i teie tiaturiraa e vahi i te taata ei tino e ei varua.”

No reira, eaha te tupu mai i nia i te nephe taata nei, e parau-noa-hia nei e varua, i muri aˈe i te poheraa? E vaiiho ïa tatou e na te mana rahi aˈe oia hoi te Bibilia, te Parau i faauruahia mai a te Atua, e pahono mai. Te haapapu maitai maira oia e: “Ua ite te feia e ora nei, e pohe ratou, aita râ a te feia i pohe ra e parau itea.” (Koheleta 9:5). Ma te tohu i te parau no nia i te hoê tia-faahou-raa, teie ta Iesu i parau: “E faaroo ai te feia atoa i roto i te apoo ra i tana reo, e e haere mai i rapae.” — Ioane 5:28, 29.

No reira, tei hea ˈtura ïa te feia pohe? ‘Tei roto ïa i te apoo,’ e tiai ra e ia faatia-faahou-hia mai ratou e te Atua, o te haamanaˈo ra ia ratoub. Te hoê tia-faahou-raa? Eaha hoi te reira? E tiaturiraa mau anei te reira? Te vai ra i roto i te tumu parau faaotiraa, te aamu no nia i te hoê ati i tupu aita i maoro aˈenei i Beretane, o te faaite maira e mea papu mau â te tiaturiraa no nia i te tia-faahou-raa.

[Nota i raro i te api]

[Tumu parau tarenihia i te api 23]

Ua ite anei oe?

Aita roa ˈtu hoê aˈe irava i roto i te Bibilia e faahiti ra i te mau parau ra “varua pohe ore”. Aita roa ˈtu teie mau parau e amuihia ra. E ono anaˈe taime te faahitiraahia te mau parau ra “pohe ore” e “pohe-ore-raa”, e i roto anaˈe hoi i te mau papai a te aposetolo Paulo. Ia horoahia ˈtu te pohe-ore-raa i te mau taata, te faataahia ra ïa oia mai te hoê re e horoa-noa-hia ˈtu i na 144 000 feia e hoohia mai i nia i te fenua nei no te faatere ei arii i nia i te raˈi i pihai iho ia Iesu Mesia. — Korinetia 1, 15:50-54; Apokalupo 5:9, 10; 14:1-4; 20:6.

[Tumu parau tarenihia i te api 24]

Na roto i tei hea mana?

Te auraa o te parau ra “varua” ia au i te “Dictionnaire Quillet-Flammarion” oia ïa: “Tuhaa itea-ore-hia e te pohe ore o te vai ora noâ i muri aˈe i te poheraa.” Te haapapu maira teie tatararaa e te tiaturiraa e e vai ora noâ te “varua” i muri aˈe i te pohe, e manaˈo papu ore noa â ïa. Aita roa ˈtu e haapapuraa e vai ra no te turu atu i te reira. Area râ, te faaite ra te mana teitei roa ˈˈe i roto i teie tuhaa, oia hoi te Bibilia, e: “O tei [te nephe] rave i te hara ra, o te pohe ïa” — Ezekiela 18:4.

[Hohoˈa i te api 24]

“Varua” o te hoê taata papai aiphiti i faahohoˈahia mai te hoê manu e upoo taata, e tei parauhia e ‘hoˈi mai oia e hiˈo i te tino i roto i te apoo’.

[Faaiteraa i te tumu]

Ma te parau faatia a te British Museum, Lonedona