‘Ua tia maira te tino o te feia moˈa e rave rahi’
“UA AUEUE ihora te fenua, e amahamaha ihora te mato: maheu aˈera te mau menema; e ua tia maira te tino o te feia moˈa i taoto ra e rave rahi, i muri aˈe i tana tia-faahou-raa i nia ra, e ua haere maira ratou mai raro mai i te apoo, haere atura i roto i te oire moˈa ra, e itea ihora e te taata e rave rahi.” (Mataio 27:51-53). No Karl Staab, taata katolika tuatapapa bibilia, ua riro taua ohipa ra i tupu i te poheraa o Iesu ei “ohipa maere roa”. Eaha te ohipa i tupu?
Ua haapii o Epiphane e te tahi atu mau Metua o te Ekalesia (feia papai o te tau tahito kerisetiano, mea mana ta ratou mau papai i te pae o te faaroo) e ua hoˈi mai iho â te feia moˈa i te ora e ua haere ratou i nia i te raˈi e o Iesu o tei faatiahia. Ua manaˈo o Augustin, o Théophylacte e o Euthymius Zigabène e ua fanaˈo taua mau taata pohe ra i te hoê tia-faahou-raa no te hoê taime noa, tera râ, i muri iho, ua hoˈi mau aˈera ratou i roto i ta ratou mau apoo. Teie râ, aita taua manaˈo hopea ra “i fariihia e te taatoaraa”, ta te taata tuatapapa bibilia ra o Erich Fascher ïa e parau ra. Na roto i te tatararaa i te Mataio 27:52, 53, te horoa nei e rave rahi mau tatararaa bibilia no teie tau i te manaˈo e ua tupu iho â te hoê tia-faahou-raa. E ere mai te reira te huru i roto i te Tatararaa a te ao apî o te faahiti ra i te mau faahopearaa o te hoê aueueraa fenua. No te aha?
A tahi, noa ˈtu e o vai te “feia moˈa” e parauhia ra, aita o Mataio e parau ra e o ratou tei faatiahia, o to ratou tino pohe râ, aore ra to ratou tino. Te piti, aita oia e parau ra e ua ora faahou mai ratou, ua faatiahia râ ratou. Teie râ, eita te iho parau heleni ra égéïrô, oia hoi te auraa “faatia”, e tano i te mau taime atoa i te hoê faatia-faahou-raa. E nehenehe atoa e horoahia i te auraa ra “iriti” mai roto mai i te hoê apoo, aore ra ‘tia mai’ mai te fenua mai (Mataio 12:11; 17:7; Luka 1:69). Ua haamatara mai te aueueraa fenua i tupu i to Iesu poheraa i te mau menema, ma te haamahuti mai i rapae te mau tino pohe. Ua ite-atoa-hia taua mau ohipa ra i te IIraa o te senekele o to tatou nei tau e te taata papai aamu heleni ra o Aelius Aristide, e aita i maoro aˈenei, i te matahiti 1962, i te fenua Colombie.
Te tuea ra taua faataaraa ra o te ohipa i tupu e te mau haapiiraa bibilia. Oia mau, i roto i te Korinetia 1, pene 15 i reira te aposetolo Paulo e horoa ˈi i te mau haapapuraa tano maitai o te tia-faahou-raa, aita oia e faahiti ra i te Mataio 27:52, 53. Hoê atoa huru no te mau taata papai bibilia atoa (Ohipa 2:32, 34). I te tahi aˈe pae, aita te mau tino o tei tia mai i te poheraa o Iesu, i nehenehe e hoˈi faahou mai i te ora, mai ta Epiphane i manaˈo, no te mea ua riro o Iesu ei “matahiapo o te feia i pohe ra”, e toru noa mahana i muri aˈe (Kolosa 1:18). Hau atu, ua noaa i te mau kerisetiano o tei faatavaihia, o tei pii-atoa-hia te “feia moˈa”, te parau tǎpǔ ra e e fanaˈo atoa ratou i te tia-faahou-raa matamua i roto i te roaraa o te hoˈi-faahou-raa mai o te Mesia, eiaha râ i te senekele I. — Tesalonia 1, 3:13; 4:14-17.
Mea fifi roa no te feia tuatapapa bibilia ia faataa i te irava 53, noa ˈtu e te horoa ra e rave rahi o ratou i te manaˈo e te faataa ra te irava 52 i te matararaa o te mau menema na roto i te aueueraa fenua e te fauraraa mai te mau tino tei tanu-noa-hia ˈtura. Ei hiˈoraa, te huri ra te taata helemani tuatapapa bibilia ra o Theobald Daechsel mai teie te huru: “E matara aˈera te mau menema, e ua tia aˈera e rave rahi tino pohe o te feia moˈa e taoto ra.”
O vai te feia o tei “haere atura i roto i te oire moˈa ra” i muri iho roa, oia hoi i muri aˈe to Iesu faatiaraahia? Mai ta tatou i ite i nia mai, ua vai pohe noa te mau tino tei tia mai. No reira, te faahiti ra o Mataio i te parau no te feia o tei ite i te mau menema e o tei faatia i te mau parau apî no te ohipa i tupu i Ierusalema. No reira, te faahohonu ra te huru i hurihia ˈi taua irava ra i roto i te Tatararaa a te ao apî i to tatou maramarama o te Bibilia, e eita te reira e faaarepurepu i te feruriraa o te taata taio no nia i te tia-faahou-raa.