E ohipa to outou huru hiˈoraa i te nephe i nia i to outou oraraa
“Riro aˈera te taata ei taata ora.” — GENESE 2:7.
1, 2. Eaha ta te rahiraa o te mau haapaoraa e haapii ra no nia i te taata e te nephe?
TE HAAPII nei te mau haapaoraa atoa aore ra fatata te taatoaraa e, e nephe pohe ore to te taata. Te papai nei te Buka parau paari Apî katolika (beretane) e “ua poietehia [te nephe] e te Atua e ua tuuhia i roto i te tino i te haamataraa”, e “o te hoê o te mau tooma faufaa” [te pohe-ore-raa te nephe] a te mau ekalesia o te amuiraa faaroo kerisetiano. Oia atoa, “i ǒ te mau mahometa, ta te Buka parau paari Apî beretane e parau ra, e haamata mai te nephe i te hoê â taime e te tino e, i muri iho, e oraraa taa ê to ˈna, no te hoê taime noa to ˈna taairaa e te tino”.
2 Te tiaturi nei taua mau haapaoraa ra e e faarue te nephe i te tino i te taime o te pohe e e tamau oia i te ora mure ore noa, to ˈna titauraa o te oraraa ïa i nia i te raˈi, maa taime iti i te vahi tamâraa aore ra i roto i te mau mauiuiraa mure ore i roto i te hoê po auahi. Ua riro te pohe no ratou ei uputa o te matara i nia i te ora mure ore i roto i te ao varua. Na te mau parau i faahitihia i roto i te buka ra Te tiaturi nei matou i te pohe-ore-raa (beretane) e haapapu ra i te reira: “No ˈu, o te hoê ohipa faahiahia mau te pohe, te hoê huru faateiteiraa no ǒ mai i te Atua ra.”
3. Eaha ta e rave rahi mau haapaoraa no te pae Hitia o te râ e haapii ra?
3 Te tiaturi nei te mau hindous, te mau taata e haamori ra ia Bouddha, e te tahi atu â i te haereraa te nephe i roto i te tahi atu taata. Te manaˈo nei ratou e e ora faahou mai te nephe i roto i te tahi atu taata aore ra i roto i te tahi atu poieteraa ora. Mai te peu e e taata maitai, e hoˈi faahou mai ïa to ˈna nephe i roto i te hoê taata tiaraa teitei i te pae totiare. Mai te peu râ e taata ino, te manaˈohia ra e e hoˈi faahou mai oia i roto i te hoê taata tiaraa haehaa i te pae totiare, i roto i te hoê animala aore ra i roto i te hoê manu iti.
4, 5. No te aha e mea faufaa ia ite i te parau mau no nia i te nephe?
4 E mai te peu e aita to te mau taata e nephe pohe ore, mai te peu e e ere te pohe i “te hoê huru faateiteiraa no ǒ mai i te Atua ra” e ere atoa i te hoê uputa e matara i taua taime ra i nia i te hoê oraraa mure ore i roto i te mau ao varua aore ra i te hoˈi-faahou-raa mai te nephe i roto i te taata ěê? I teie hiˈoraa, te feia e tiaturi ra i te pohe-ore-raa te nephe, te hape nei ïa to ratou eˈa. Ia au i te buka ra Mau haapiiraa katolika i haamanahia (beretane), mea faufaa roa na te Ekalesia te tiaturiraa i te pohe-ore-raa te nephe, no te mea “e haafaufaa ore [te faarueraa o taua tooma ra] i te auraa aore ra te maramaramaraa o ta ˈna mau pure, o ta ˈna mau peu no te hunaraa e te mau hanahana i te pae faaroo e horoahia na te mau taata pohe.” E ohipa mai ïa ta tatou huru hiˈoraa i te nephe i nia i to tatou huru oraraa, i nia i ta tatou haamoriraa e i nia i to tatou ora mure ore no a muri atu. — Maseli 14:12; Mataio 15:9.
5 Mea faufaa ia ite i te parau mau no nia i te nephe, no te mea ua parau Iesu e: ‘E tia i te feia e haamori i te Atua ia haamori ma te varua e te parau mau.’ (Ioane 4:24). Na te Parau a te Atua, te Bibilia, e faaite i te parau mau no nia i te nephe taata. I te mea e te faaite ra te Atua i ta ˈna mau opuaraa i roto i te mau Papai tei faauruahia, e nehenehe tatou e papu e e parau mau te reira (Tesalonia 1, 2:13; Timoteo 2, 3:16, 17). Ua parau o Iesu i te Atua i roto i te hoê pure e: “O to parau na te parau mau.” — Ioane 17:17.
Ua poietehia anei te taata e te hoê nephe pohe ore?
6. Eaha ta te aamu no nia i te poieteraa o te taata ia au i te Genese e parau maramarama maira?
6 I roto i te Genese 2:7, te taio nei tatou e: “A hamani ai te Atua ra o Iehova i te taata i te repo fenua nei, ua haapuai ihora oia i te aho ora i roto i tana apoo ihu ra, riro aˈera te taata ei taata ora.” Aita te faahitiraa e parau ra e ua tuu te Atua i te hoê nephe pohe ore i roto i te taata. Te parau nei oia e, i te taime te puai o te Atua i horoa ˈi i te ora i te tino o Adamu, “riro aˈera te taata ei taata ora.” Te papu ra ïa ia tatou e e nephe te taata, eiaha râ e nephe to te taata.
7. Eaha te tumu i tuuhia mai ai te mau taata i nia i te fenua nei?
7 Ua poiete te Atua ia Adamu no te ora i nia i te fenua nei, eiaha i nia i te raˈi. Aita oia i opua e e riro te fenua nei ei vahi faahemaraa no te ite e ua tia anei o Adamu ia haere i nia i te raˈi. Ua hamani te Atua i te fenua nei “ia taatahia”, e o Adamu te taata matamua o tei ora i nia iho (Isaia 45:18; Korinetia 1, 15:45.) I muri iho, a poiete ai oia ia Eva no te riro ei vahine na Adamu, ua parau te Atua ia raua ia faaî i te fenua e ia faariro ei paradaiso i reira te mau taata e ora mure ore ai. — Genese 1:26-31; Salamo 37:29.
8. a) No te ora, eaha te titauraa te tia ia Adamu ia faaî? b) Ahiri e aita o Adamu i hara, ihea roa ïa oia e tamau noa ˈi i te ora?
8 Aita hoê aˈe vahi i roto i te Bibilia o te parau ra e te vai ra te hoê tuhaa o Adamu o te ore roa e pohe. No te ora râ, e tia ia ˈna ia faaî i te hoê titauraa: ia auraro i te ture a te Atua. Eaha ïa te ohipa e tupu ia ofati anaˈe o ˈna i taua ture ra? E haere anei o ˈna e ora i roto i te ao varua? Aita roa ˈtu. E ‘pohe ïa oia’. (Genese 2:17.) E hoˈi o ˈna i te vahi no reira mai o ˈna. Ua parau te Atua ia ˈna e: “E repo hoi oe, e e hoˈi faahou atu â oe i te repo.” (Genese 2:7; 3:19). Aita o Adamu i ora na na mua ˈˈe i to ˈna poieteraa, e aita atoa oia i ora mai i muri aˈe i to ˈna poheraa. Hoê anaˈe ïa ta ˈna maitiraa: 1) auraro e e ora mai, aore ra 2) faaroo ore e e pohe atu. Ahiri e aita o Adamu i hara, e ora mure ore ïa o ˈna i nia i te fenua nei, ma te ore roa ˈtu e haere i nia i te raˈi.
9. Eaha râ ta te Bibilia e parau ra ma te tano no nia i te pohe, e no te aha?
9 Ua faaroo ore Adamu, e ua pohe aˈera oia (Genese 5:5). O te pohe ïa ta ˈna utua. O te hoê uputa ïa no ˈna o te matara ra, eiaha i nia i te hoê “ohipa faahiahia mau”, i nia râ i te vai-ore-roa-raa. E ere atura ïa te pohe i te hoê hoa, o te hoê râ “enemi”, mai ta te Bibilia e parau ra. (Korinetia 1, 15:26.) Ahiri e e nephe pohe ore to Adamu o tei haere i nia i te raˈi mai te peu e ua auraro noa o ˈna, e riro ïa te pohe ei haamaitairaa. E ere roa ˈtu râ mai te reira. O te hoê ati. Maoti te hara a Adamu i parare ai taua ati ra i te mau taata atoa, i te mea e no roto paatoa mai tatou ia ˈna. — Roma 5:12.
10. Eaha te uiraa faufaa te matara mai, mai te peu e e tiaturi tatou e e nephe pohe ore to Adamu?
10 I te tahi aˈe pae, mai te peu e i to ˈna poieteraahia ua tuuhia te hoê nephe pohe ore i roto ia Adamu no te haamauiui e a muri noa ˈtu i roto i te hoê po auahi ia hara noa ˈtu o ˈna, no te aha ïa aita oia i faaarahia? No te aha i parau-noa-hia ˈi e e pohe o ˈna e e hoˈi o ˈna i te repo? Mea tia ore mau â i te faautua ia ˈna i te mau haamauiuiraa mure ore no to ˈna faaroo ore, ma te ore roa ˈtu e faaara ia ˈna! ‘Aita râ e parau-tia ore’ i te Atua ra (Deuteronomi 32:4). Aita hoi e faufaa ia faahiti ia Adamu i te parau no te hoê po auahi no te mau nephe pohe ore o te feia ino, no te mea aita e vahi mai te reira te huru e aita atoa e vai ra te mau nephe pohe ore (Ieremia 19:5; 32:35). Aita hoê aˈe taata e haamauiuihia e a muri noa ˈtu a hoˈi ai oia i te repo.
Te parau “nephe” i roto i te Bibilia
11. a) Eaha te parau hebera e eaha te parau heleni i hurihia na roto i te parau ra “nephe” i roto i te Bibilia? b) Mea nafea to te Bibilia no Ierusalema huriraa i te parau hebera e te parau heleni, oia hoi te auraa “nephe”?
11 I roto i te mau Papai hebera, te huri nei te parau ra “nephe” i te parau hebera nèphèsh, o te itehia hau atu i te 750 taime. I roto i te mau Papai heleni, o psukhê ïa te parau e tano ra, o te itehia hau atu i te 100 taime. Te huri nei Te mau Papai Moˈa — Tatararaa a te Ao Apî i te mau taime atoa i taua mau parau ra na roto i te parau ra “nephe”. Te rave nei te tahi atu mau tatararaa i te tahi atu mau parau. Teie te tahi ta te Bibilia no Ierusalema e faaohipa ra no te huri i te parau ra nèphèsh: nephe, hinaaro e tamaa, animala, mafatu, hinaaro, vairaa maa, taata ora, poia, feia, arapoa, pohe [taata pohe], taata, tatou iho, aho e ora. Te huri nei taua tatararaa i te parau ra psukhê na roto i te mau parau ra nephe, mafatu, varua (feruriraa), taata ora, taata e ora.
12. Eaha te faaohiparaa ta te Bibilia e rave nei no te parau hebera e te parau heleni, oia hoi te auraa “nephe”?
12 Te horoa ra te Bibilia i te iˈoa nèphèsh no te mau taoˈa ora i roto i te miti. Oia mau, te faahiti ra oia i te parau o ‘te mau mea ora to te pape’. (Levitiko 11:10.) E nehenehe e horoahia taua parau ra i te mau animala no te fenua: “Ia fanau mai te fenua nei i te mau mea ora ma to ratou ra huru, te mau puaa, te mau mea e nee haere, e te mau manu avae maha.” (Genese 1:24). Te tahi tau hanere taime, te faaohipahia ra te parau ra nèphèsh no te mau taata. “E taua feia atoa ra o ta Iakoba ra huaai mau, (...) e hitu ïa ahururaa.” (Exodo 1:5). E faaohipahia te parau ra psukhê na roto i te hoê â auraa, i roto i te Petero 1, 3:20 ei hiˈoraa. Te parau nei taua irava ra no te araka a Noa, “i ora ˈi e toofanu pue taata i te moana, oia hoi na taata toovau ra”.
13. I roto i teihea tupuraa te Bibilia e faaohipa ˈi i te parau “nephe”?
13 Te faaohipa nei te Bibilia i te parau ra “nephe” i roto e rave rahi atu â mau tupuraa. Te taiohia ra i roto i te Genese 9:5 e: “Eita roa hoi au e ore i te titau i te hoo i to outou na toto i ora ˈi outou.” Ia au i taua irava ra, e toto to te nephe. I roto i te Exodo 12:16, te parauhia ra e: “Maori râ o te maa ei amuraa na te taata atoa ra, o te reira anaˈe ra te tia ia outou ia rave.” Ia au i taua mau parau ra, e tamaa te nephe. I roto i te Deuteronomi 24:7, te parauhia ra no te hoê taata o tei ‘eiâ i te hoê o tana mau taeae’. E ere roa ïa i te hoê nephe pohe ore o tei eiâhia. Te parau nei te Salamo 119:28 e: “Ua tarapape tau aau i te oto.” E nehenehe atoa e erehia e te nephe i te taoto. Te faaite atoa ra te Bibilia e e pohe te nephe. Oia mau, e pohe oia. “E faataa-ê-hia ïa taata [nephe] i to ˈna ihora nunaa.” (Levitiko 7:20). “Eiaha roa oia e haafatata noa ˈtu i te hoê taata [nephe] pohe.” (Numera 6:6). “O mâua iho [nephe] te hoo ia outou.” (Iosua 2:14). “E te taata [nephe] atoa e ore e faaroo i taua peropheta ra, e mou roa ïa i ropu i te taata atoa.” (Ohipa 3:23). “Hope roa aˈera to raro i te tai ra i te pohe.” — Apokalupo 16:3.
14. E faahohoˈa maitai te Bibilia i te nephe, i te aha?
14 Mea maramarama maitai e te faaite ra te faaohiparaa a te Bibilia i te mau parau ra nèphèsh e psukhê e e taata te nephe aore ra, no te mau animala, o te hoê poieteraa ïa. E ere roa ˈtu i te hoê noa ˈˈe vahi pohe ore o te hoê taata. E faaohipa-atoa-hia te parau nèphèsh no te Atua iho: “Area te taiata e te rave parau ino ra, ua riri roa tana aau [nephe] ia ˈna.” — Salamo 11:5.
E rave rahi manaˈo fariihia o tei tuati
15. Eaha ta e rave rahi buka faahororaa no nia i te haapiiraa o te pohe-ore-raa o te nephe e parau ra?
15 E tano te manaˈo o e rave rahi mau taata tuatapapa i te Bibilia no te parau e aita te Bibilia e faahiti ra i te parau no te hoê nephe pohe ore. Te faahiti nei te Buka parau paari nainai ati iuda (beretane) e: “Aita te Bibilia e haapii ra e mea pohe ore te nephe, e aita atoa e itehia taua haapiiraa ra i roto i te mau papai matamua a te mau upoo faatere haapaoraa ati iuda. Te taiohia ra i roto i te Buka parau paari ati iuda (beretane) e: “Ua niu-noa-hia te tiaturiraa e e ora faahou te nephe i muri aˈe i te poheraa o te tino i nia i te mau manaˈo philosopho aore ra i te pae no te tuatapaparaa i te parau faaroo maoti i nia i te hoê tumu parau noa e nehenehe e tiaturihia; teie râ, aita hoê aˈe vahi i roto i te mau Papai moˈa e haapii papu ra i taua tiaturiraa ra.” Te horoa nei te Titionare faataaraa a te Bibilia (beretane) i teie nei haapapuraa: “Eita te nèphèsh (...) e tamau â i te ora taa ê atu i te tino, e pohe râ te reira e te tino. (...) Aita hoê aˈe irava bibilia e turu ra i taua haapapuraa ra e e taa ê ‘te nephe’ i te tino i te taime o te pohe.”
16. Eaha te mau manaˈo fariihia i faahaerehia no nia i te nephe?
16 Te faahiti nei te Titionare faataaraa o te mau parau bibilia (beretane) e: “I roto i te F[aufaa] T[ahito], e ere te parau ra ‘nephe’ i te hoê tuhaa itea-ore-hia taa ê atu i te tino o te mau taata, o te tamau â i te ora i muri aˈe i te pohe. E tano noa te parau ra [nèphèsh] i te ora e itehia ra e te mau taata taa maitai. (...) Ua horoahia te auraa matamua o te parau ra [psukhê] e te parau e tano ia ˈna i roto i te F[aufaa] T[ahito], maoti i to ˈna auraa i roto i te haapiiraa heleni.” E te faahiti ra te Titionare a te Bibilia Eerdmans (beretane) e, i roto i te Bibilia, “aita [te parau ra nephe] e faahohoˈa ra i te hoê tuhaa o te taata, o te taata taatoa râ. (...) Oia hoi te auraa, aita to te mau taata e nephe — e nephe ratou”. — Na matou e haapapu nei.
17. Eaha te faˈiraa o na pu katolika e piti no nia i te nephe?
17 Te faˈi atoa ra te Buka parau paari Apî katolika e, “i roto i te Bibilia, te auraa o te mau parau hurihia na roto i te parau ra nephe, i te rahiraa o te taime, o te taata taatoa ïa”. Te faahiti faahou ra taua buka ra e: “Aita e vai ra i te hoê faataaraa [tatuhaaraahia] o te tino e o te nephe i roto i te F[aufaa] T[ahito]. (...) Noa ˈtu e ua hurihia te parau ra [nèphèsh] na roto i ta tatou parau ra nephe, e ere te auraa e mea taa ê te nephe i te tino aore ra i te taata iho. (...) O [psukhê] te parau i roto i te F[aufaa] A[pî] o te tano i te parau ra [nèphèsh]. (...) Aita te huru haapiiraa e e ora te nephe i muri aˈe i te pohe e taa-papu-hia ra i roto i te Bibilia.” Ua papai o Georges Auzou, orometua haapii farani katolika no te Papai Moˈa, i roto i ta ˈna buka ra Te parau a te Atua e: “Te haapiiraa no nia i te ‘nephe’, mai te hoê tuhaa varua aore ra itea-ore-hia, taa ê atu i te ‘tino’, (...) aita ïa te reira e itehia i roto i te Bibilia.”
18. a) Eaha ta te hoê buka parau paari e parau ra no nia i te faaohiparaa o te parau “nephe” i roto i te Bibilia? b) I hea roa to te mau taata tuatapapa i te parau faaroo raveraa i te haapiiraa e e ora mai te tahi mea i muri aˈe i te poheraa o te tino?
18 Te faahiti ra te Buka parau paari marite e: “Te faataa ra te Faufaa Tahito i te taata mai te hoê taata taatoa, e ere râ te tahoêraa o te hoê nephe e te hoê tino. Noa ˈtu e e huri-pinepine-hia te parau hebera [nèphèsh] na roto i te parau ‘nephe’, e mea hape ïa i te horoa ˈtu no taua parau ra te auraa i faaohipahia e te mau Heleni. (...) E ere roa ˈtu te [nèphèsh] i te hoê taoˈa o te ora taata ê atu i te tino. I roto i te Faufaa Apî, e pinepine te parau heleni ra [psukhê] i te hurihia na roto i te parau ‘nephe’, e tera râ, eita e tia ia horoa ˈtu i te auraa ta te mau philosopho heleni e manaˈo ra. (...) Aita te Bibilia e horoa ra i teie huru faataaraa maramarama maitai e mea nafea te hoê taata e ora ˈtu i muri aˈe i te pohe.” Te parau faahou ra taua buka parau paari ra e: “Ua faaohipa paha te mau taata tuatapapa i te parau faaroo i te mau manaˈo o te mau philosopho no te faataa, na roto i te mau parau tano maitai, i te oraraa o te taata i muri aˈe i te pohe.”
E ere no roto i te Bibilia, e haapiiraa philosopho râ
19. Eaha te taairaa e vai ra i rotopu i te haapiiraa philosopho heleni e te tiaturiraa i te pohe-ore-raa te nephe?
19 Parau mau, ua farii te mau taata tuatapapa i te parau faaroo, i te mau manaˈo o te mau philosopho etene no te faahiti i te haapiiraa no nia i te pohe-ore-raa o te nephe. Te faˈi ra te Titionare Buka parau paari o te Bibilia na roto i teie mau parau e: “No roto mai te haapiiraa o te pohe-ore-raa i te feruriraa heleni.” Te haapapu ra Te Buka parau paari ati iuda e: “Ua ite aˈera te mau ati Iuda i te haapiiraa no te pohe-ore-raa te nephe i roto i te manaˈo heleni, i roto i te philosopho a Platon iho â râ, to ˈna tia matamua.” Ua parau o Platon, o tei ora i te IVraa o te senekele na mua ˈˈe ia Iesu Mesia, e: “Mea pohe ore te nephe e eita e pe, e e vai noa mai to tatou mau nephe i roto i te hoê ao ê atu.” — Paraparauraa a Platon (beretane).
20. Afea e mea nafea to te haapiiraa philosopho etene ôraa mai i roto i te kerisetianoraa?
20 Afea ra taua haapiiraa philosopho etene ra i te ôraa mai i roto i te kerisetianoraa? Te pahono ra te Buka parau paari Apî beretane e: “Mai te afaraa o te IIraa o te senekele, ua haamata te mau kerisetiano, te vai ra hoi ta ratou te tahi ite no nia i te haapiiraa philosopho heleni, i te hinaaro e faaite i to ratou faaroo ia au i te mau parau o taua manaˈo philosopho ra, no to ratou hiaai i te pae feruriraa e no te huti mai i te mau etene maramarama. Te haapiiraa philosopho o tei tano maitai no ratou, o te haapiiraa ïa a Platon.” Mea na reira, mai ta taua buka parau paari ra e faataa ra, to “te mau philosopho kerisetiano matamua faariiraa i te haapiiraa heleni o te pohe-ore-raa o te nephe.” Ua farii te pâpa iho o Ioane-Paulo II e, tei roto te haapiiraa o te pohe-ore-raa o te nephe i “te mau faataaraa o te tahi mau fare haapiiraa philosopho heleni”. Ma te farii i taua mau faataaraa ra, ua faarue te amuiraa faaroo kerisetiano i te parau mau ohie roa i haapapuhia i roto i te Genese 2:7, i reira e taiohia ˈi e: “Riro aˈera te taata ei taata ora.”
21. Te hoˈi ra te tiaturiraa i te hoê nephe pohe ore i teihea tau?
21 Ua haapiihia râ te pohe-ore-raa o te nephe na mua roa ia Platon. I roto i ta ˈna buka ra Te haapaoraa no Babulonia e no Asura (beretane), ua papai o Morris Jastrow e: “Ua huti maitai te fifi o te pohe-ore-raa (...) i te manaˈo o te mau taata no Babulonia e tuatapapa ra i te parau faaroo. (...) Te manaˈo nei ratou e te pohe, o te hoê eˈa ïa e aratai i te tahi atu huru oraraa.” Te faataa ra o Siegfried Morenz i roto i ta ˈna buka Te haapaoraa no Aiphiti (beretane) e “te manaˈo ra te feia no Aiphiti i Tahito ra e, te oraraa i muri aˈe i te pohe, mai te hoê ïa tamauraa i te ora i nia i te fenua nei”. Te tapao ra te Buka parau paari ati iuda e te vai ra te hoê taairaa i roto i taua mau haapaoraa tahito ra e o Platon; oia mau, te parau nei oia e ua turaihia taua taata philosopho ra ia farii i te manaˈo e e ore te nephe e pohe “na roto i te parau miterio a Orphée e a Eleusie, i reira i amuihia ˈi ma te maere mau te mau haapiiraa no Babulonia e no Aiphiti”.
22. No te aha e nehenehe ai e parau e ua ueuehia te mau huero o te haapiiraa no nia i te pohe-ore-raa te nephe i te haamataraa o te aamu o te taata nei?
22 Mea tahito ïa te haapiiraa o te hoê nephe pohe ore. Oia mau, e hoˈi roa to ˈna mau aa i te haamataraa o te aamu taata nei. I muri aˈe to Adamu parauraahia e e pohe o ˈna ia ore o ˈna e auraro i te Atua, ua horoahia ia Eva, ta ˈna vahine, i te hoê parau taa ê: “E ore roa orua e pohe.” Mai reira mai, ua ueuehia te mau huero o te haapiiraa o te pohe-ore-raa te nephe. Mai te reira tau, ua rave te hoê peu tumu i muri aˈe i te tahi, i te haapiiraa etene e parau ra e ‘i te auraa mau, eita tatou e pohe, e tamau noa râ tatou i te ora’. O te ohipa ïa i tupu no te amuiraa faaroo kerisetiano, o tei ume i to ˈna mau taata i roto i te apotata, ma te patoi i te mau opuaraa e te hinaaro o te Atua. — Genese 3:1-5; Mataio 7:15-23; 13:36-43; Ohipa 20:29, 30; Tesalonia 2, 2:3, 7.
23. Na vai i faaineine i te manaˈo o te pohe-ore-raa te nephe, e no te aha?
23 Na vai i turai i te mau taata ia tiaturi i taua parau haavare ra? Ua parau o Iesu ia ˈna i faaite i te mau upoo faatere haapaoraa no to ˈna ra tau e: “O te diabolo to outou na metua, i faatia ˈi â outou i te hinaaro o to outou metua ra (...). Ia parau oia i te parau haavare ra, ua parau ïa i te parau au ia ˈna ihora, e haavare oia, e e metua hoi no te haavare.” (Ioane 8:44). Oia mau, na Satani i haamau i te manaˈo o te pohe-ore-raa te nephe no te haafariu ê i te mau taata i te haamoriraa mau. Te hape nei ïa ratou e te atuatu nei ratou i te hoê tiaturiraa haavare, te feia e tiaturi nei i te mau haapiiraa no roto mai i te haavare matamua faatiahia i roto i te Bibilia, noa ˈtu e, i te tau i faahitihia ˈi te reira e te ophi, ua turai paha taua haavare ra ia Eva ia manaˈo noa e eita roa ˈtu oia e pohe i te pae tino.
24. Eaha te mau uiraa te nehenehe e ui ma te tano no nia i te ora mure ore e te pohe-ore-raa?
24 Aita, aita te Bibilia e haapii ra e e nephe pohe ore to te taata. Tera râ, no te aha oia e parau ai no te hoê tiaturiraa no nia i te ora mure ore? Aita anei oia e parau ra, i roto i te Korinetia 1, 15:53, e “o teie nei tino pohe noa, ia riro ei tino pohe ore e tia ˈi”? I te tahi atu pae, aita anei Iesu i haere i nia i te raˈi i muri aˈe i to ˈna faatia-faahou-raahia, e aita anei oia i faaite e e haere atoa vetahi i reira? E tuatapapa tatou i taua mau uiraa ra e te tahi atu â i roto i te tumu parau i mua nei.
Hiˈo-faahou-raa
◻ Eaha ta te rahiraa o te mau haapaoraa e tiaturi ra no nia i te nephe?
◻ Nafea te Bibilia i te faaiteraa e aita te taata i poietehia e te hoê nephe pohe ore?
◻ Ia au i te faaohiparaa ta te Bibilia e rave ra, eaha te auraa mau o te parau hebera e te parau heleni hurihia na roto i te parau “nephe”?
◻ Eaha te matara mai na roto e rave rahi manaˈo fariihia no nia i te faataaraa a te Bibilia no te nephe?
◻ No teihea tau te haapiiraa o te pohe-ore-raa te nephe?
[Hohoˈa i te api 12]
E mau nephe.