Te oraraa i muri aˈe i te pohe te mau uiraa aitâ i pahonohia
“IA POHE te taata nei, e ora faahou anei?” (Ioba 14:14). I roto i te mau matahiti i mahemo, ua feruri maite te mau taata o te mau totaiete atoa i nia i taua uiraa ra ta te patereareha ra o Ioba i ani te tahi tau senekele i teie nei, e mea rahi roa te mau pahonoraa i horoahia.
Ua manaˈo te mau Heleni no te tau Tahito e e ora te mau nephe o te feia pohe. E haere ratou na roto i te anavai ra Styx no te haere i roto i te hoê basileia rahi i raro aˈe i te fenua, piihia te mau Po auahi. I reira, e faautuahia ratou e te feia haava no te haamauiuiraa i roto i te hoê fare tapearaa e mea teitei roa te mau patu fare, aore ra ia ite i te oaoaraa rahi i roto i te mau aua piihia Elysées. Ua tiaturi atoa te tahi mau nunaa tahito e e riro te mau nephe ei fetia aore ra ei fetia ave. Te parau atoa ra te tahi pae e mea maramarama te mau nephe e e hutihia ratou e te avae; i te mau avae atoa, ia ati anaˈe te avae, e faahaerehia te mau nephe i te mahana ra.
I to tatou nei â tau, mea rahi roa te mau haapiiraa no nia i te ora i muri aˈe i te pohe. Te tiaturi nei te feia inidia e te mau taata e haamori ra ia Bouddha i te ora-faahou-raa i roto i te tahi atu tino. Te haapii ra te mau mahometa e e ora mai te nephe i te pohe o te tino, e i te haavaraa hopea, e haere oia i te paradaiso aore ra i te po auahi. Te tiaturi ra te mau porotetani e e ora te mau nephe i muri aˈe i te pohe no te ite i te oraraa i nia i te raˈi aore ra no te haamauiuiraa i roto i te auahi o te po auahi. Ua amui mai te katolikaraa i te mau limebo e te vahi tamâraa i taua faahohoˈaraa ra.
I roto i te tahi mau fenua, ua riro te mau tiaturiraa no nia i te parau o te nephe o te feia pohe ei amuiraa maere mau o te mau tutuu no te fenua iho e o te haapaoraa e faahua parau ra e kerisetiano ratou. Ei hiˈoraa, mea pinepine e tapoˈi te mau katolika e te mau porotetani no Afirika tooa o te râ i te mau hiˈo ia pohe anaˈe te hoê taata, ia ore te taata e hiˈo e e ite atu i te varua o te taata pohe. E maha ahuru mahana i muri aˈe i te poheraa o te hoê taata herehia, e faatupu te fetii e te mau hoa i te hoê oroa no te faahanahana i te haereraa o te nephe i nia i te raˈi. I muri iho, mea pinepine i te oroa Noela aore ra i te Matahiti Apî, e haere te mau melo o te utuafare i te vahi tanuraa maˈi e e manii ratou i te hoê ava taero i nia i te menema. E paraparau atoa ratou i te taata pohe no te ani atu i te tahi mau haamaitairaa e no te horoa ˈtu ia ˈna i te tahi mau parau apî no nia i te utuafare.
Ma te papu, aita te mau haapaoraa taa ê o te ao nei e afaro ra no nia i te parau o te ohipa e tupu i muri aˈe i te pohe. Teie râ, te farii nei fatata te taatoaraa o ratou i te hoê haapiiraa tumu: te pohe-ore-raa te nephe taata. Te rahiraa o te mau haapiiraa no nia i te oraraa i muri aˈe i te pohe, o te tahi noa ïa mau tauiuiraa no nia i taua parau tumu ra.
Teie râ, e tupu mai te tahi mau uiraa fifi roa i roto i to tatou feruriraa: No hea mai te tiaturiraa i te pohe-ore-raa te nephe? Ua haapiihia anei te reira i roto i te mau Papai? Mai te peu e e, no te aha te haapii atoa ra te mau haapaoraa e ere i te mau haapaoraa kerisetiano i te reira? O te reira te mau uiraa atoa o tei ore e tia ia ape. Noa ˈtu eaha to outou tiaturiraa i te pae faaroo, e parau mau te pohe e eita ta outou e nehenehe e ape i te reira. Te titau atu nei ïa matou ia outou ia tuatapapa i taua mau uiraa ra ma te hoê feruriraa mahorahora maitai.