Ba Bolaetswe Tumelo ya Bone!

ENE e le ka makuku ka Sontaga. Setlhopha sa batho bangwe ba le 500 se ne sa dikaganyetsa ntlo nngwe mo motsaneng w.a Pangi, mo kgaolong ya Kivu, mo Zaire. Bakeresete bangwe ba ba neng ba ithobaletse mo gae ka kagiso ba ne ba phadimosiwa mo borokong ke lesomo le le tlhodiang le modumo wa go thubaganngwa ga lebati. Matswela? Banna ba Bakeresete ba le supa ba ne ba gogelwa kwa ntle, ba itewa mo go botlhoko le go patelediwa go tsamaya dikilomitara di le supa go ya motsaneng wa Kilungulungu o o mo gare ga sekgwa.

Fa ba tsena koo banna bano ba ba ratang kagiso ba Bakeresete ba feta ba kgaolwa memetso mme yo mongwe a tsewa dirwe. Mebele ya bone e ne ya epelwa kafa tlase ga noka morago ga gore metsi a kganelelwe tiragalo eno. Moragonyana metsi a ne a bulelwa, mme noka ya simolola go elela gape mo ba epetsweng teng, e tlogela go sena bosupi bope jwa tiragalo eno e e tsitsibanyang!

Ke eng Batho ba ba Senang Molato ba Bolailwe Setlhogo Jaana

Polao e e setlhogo eno ya basupi ba ba ikanyegang ba ga Jehofa e ne e le lekhubu le legolo la pogiso e e simologileng ka 1978 go ralala karolo ya kgaolo ya Kitru e e laolwang ke morafe wa Rega. Ke ka ntlhayang fa polao eno e e setlhogo e ile ya nna gone? Ka gonne Basupi ba ga Jehofa ba gana go dumalana le “Kimbilikiti.” Baetapele ba tumelo eno ya bagologolwane ya ba-Warega ba dumela gore Basupi ke matshosetsi a magolo mo setsong sa morafe wa bone mme ka gone ba tshwanetse go nyelediwa.

Go tloga ka 1978 go ya go 1983 Diholo tsa Bogosi tsa Basupi ba ga Jehofa di le mmalwa di ne tsa fisiwa ke maloko a a tlhaga a kobamelo eno. Ba ne ba tshosetsa Basupi ba le bantsi, ba ba leleka mo malapeng a bone, le go ba gapela di tsa bone. Maiteko a le mantsi a ne a dirilwe go bolaya Basupi ka boloi le ka dipheko. Ereka go ne ga‘seka ga atlega sepe sa tseno, babogisi ba ne ba fetogela mo polaong e kgolo ya sephologolo.​—Bapisa Dipalō 23:23.

Tiragalo E E Tsitlisang Marapo

Lefa go ntse jalo, a re eleng tlhoko thata ditiragalo tseo tse di setlhogo tsa Sontaga, August 14, 1983. Fa o leba 1983 Yearbook of Jehovah’s Witnesses, abo temana le tlhaloso tsa letsatsi leo di tshwanela jang ne! Letsatsi pele ga polao ya banna ba ba supang ba Bakeresete ba ba ikanyegang, bontsi jwa maloko a phuthego e potlana ya Basupi ba ga Jehofa kwa Pangi ba ne ba tsamaile go tswa metsaneng e e mo tikologong go tla go kopanela pokano ya bone ya ka metlha ya Matlhatso. Botlhe ba ne ba lala bosigo jotlhe koo go nna gone mo pokanong ya kobamelo mo mosong wa Sontaga. Batho ba le supa ba ne ba lala mo ntlong ya ga Kalumba Malumalu, modihedi wa nako e e tletseng le molebedi yo o okamelang wa phuthego. Moo go ne ga tlisa palo yotlhe go 11, go akareletsa Mokaulengwe Malumalu, mosadi wa gagwe, le bana ba bone ba le 2 ba bannye. Ba bangwe ba batlhano ba ne ba bona boroko mo legaeng la ga Mokaulengwe Kikuni Mutege.

Morago ga pokano ya Matlhatso, Basupi ba ne ba nna le maitiso a a monate ba orile molelo, ba opela dipina tsa Bogosi le go bolela maitemogelo. Ba ne ba lemoga gore ditlhophanyana tsa batho di ne di ntse di feta-feta foo ka mo go sa tlwaelegang, botlhe ba tsamaela ntlheng ya motsana oo dikilomitara di le pedi go tswa Pangi. Basupi ba ne ba tla itse jang gore kokoano ya baba ba bone e ne e raya eng?

Mo e ka nnang ka oura ya botlhano mo mosong o o latelang ntlo ya molebedi yo o okamelang e ne ya dikaganyediwa ke lesomo le eteletswe pele ke Kgosana ya Mophato Mulamba Musembe. Ba ne ba pateletsa gore Mokaulengwe Kampema Amuri le Waseka Tabu ba ye le bone kwa Kgosing ya Lebatla (Katunda Banangozi) e le gore ba tle ba dire “Salongo” (tiro e e patelesegang ya motse ya go tlhokomela ditsela, marogo, le tse di tshwanang). Ka maitseo Mokaulengwe Kampema o ne a tlhalosa gore thulaganyo e ne e setse e dirilwe le Kgosi Katunda go dira tiro mo letsatsing le le latelang. Mme Kgosana ya Mophato e ne ya leba phetolo eo jaaka ya go tlhoka maitseo mme a laola gore Mokaulengwe Kampema a itewe. Seno se ne sa latelwa ke taolo ya gore go itewe le bakaulengwe ba bangwe.

Ka nako eo setlhopha sa lemoga gore “moruti” Kalumba Malumalu (molebedi yo o okamelang) o ne a boetse kwa ntlong ya gagwe. Jalo botlhe ba kgarametsa ntlo go fitlhela ba thuba lebotana le lengwe. Fa ba sena go dira jalo, bangwe ba bone ba ne ba thelesegela mo teng go tshwara Mokaulengwe Malumalu. Morago ga tshukatshukano eo bokgaitsadi ba ne ba tshwarwa makgwakgwa mme bone le bana ba bone ba kgona go tshabela kwa lepodising la lefelo leo go bona tshireletso.

Go sale jalo, bakaulengwe ba babedi ba ba neng ba letse mo ntlong e nngwe ba ne ba kgona go falola. Mongwe wa bone (Hemedi Mwingilu) o ne a iphitlha mo ntlong e e neng e ise e fediwe mme a iponela tiragalo eo ka matlho. Mokaulengwe yo mongwe (Lulima Kazalwa) o ne a tshabela kwa sekgweng.

Kwa bofelong, bakaulengwe ba le supa ba ne ba tshwarwa, ba itewa le go tsewa ba bofilwe mabogo. Mo mosepeleng oo otlhe wa dikilomitara tse tlhano go ya kwa sekgweng gaufi le Kilungulungu, ba ne ba kgaramediwa le go setlakiwa ke batshwari ba bone. Lefa gone bakaulengwe ba ne ba le mo maibing fela fa ba goroga koo, ba ne ba ititeile dihuba gore ba seka ba latola tumelo ya bone​—le eleng fa loso lwa bone ka phepafalo lo ne lo le gaufi. Ba ne ba thulana le loso ka bopelokgale le ka seriti, jaaka go dirile Bakeresete ba bangwe ba bantsi ba ba ikanyegang ba metlha ya bogologolo le ya segompieno.​—Mathaio 24:9; Tshenolō 2:10.

Mokaulengwe yo mongwe, Amisi Milende, o ne a bolawa moragonyana ga foo. O ne a seyo a ile kwa Kama, mme banna ba ne ba rongwa koo go mo tshwara le go mo isa a bofilwe kwa Binyangi (dikilomitara di le 15 go tswa kwa Pangi) go bonala fa pele ga ga Kibonge Kimpili, Kgosana e nngwe ya Mophato. Fa a santse a letetse go goroga ga Kgosi, Mosupi yono yo o tlhaga o ne a kgothatsa mongwe wa bontsalae mo semoyeng le go bolelela babogisi ba gagwe gore lefa gone a ne a tloga a swa, o tla bo a letile Jehofa Modimo fela go mo tsosetsa mo lefatsheng leno le le tla nnang paradaise. Lekawana le le ikanyegang leno le ne la bolawa ke banna bangWe ba le mmalwa. Malomaagwe o ne a kopanetse mo go seno; o ne a galefile thata ka gonne bana ba gagwe ba babedi ba basimane ba ne ba fetogile Basupi ba ga Jehofa ka thuso ya ga Mokaulengwe Milende. Tota, bana bano ba babedi, Malala Ramatani le Akilimali Walugaba, ba ne ba le gareng ga Basupi ba bangwe ba ba supang ba ba neng ba bolawa!

Go Tweng ka Bafalodi?

Ditiragalo tseno tse di boitshegang di ne tsa fela ka polao ya banna ba hera bobedi bao ba tlogetseng batlholagadi le masiela. Bafalodi le Basupi ba bangwe ba lefelo leo le batho ba ba kgatlhegang ba ne ba tlhoiwa thata. Jalo ba ne ba tloga ba tshabela kwa Kindu, toropo e tona e e gautshwane, mme ba ne ba tlhokomelwa sentle kemaloko a diphuthego tse tharo tsa Basupi ba ga Jehofa teng koo. Ofisi ya lekala ya Watch Tower Society mo Kinshasa le yone e ne ya thusa bahutsahadi ka go ba romelela diaparo, dikobo, le madi. Thuso eno e e lorato e ne ya anaanelwa thata mme ya felela ka bosupi jo bo molemo go maloko a malapa a a sa dumeleng le ba-ela-dilo-tlhoko ba bangwe. (Yohane 13:34, 35; Yakobe 1:27) Balaodi ba puso le bone ba ne ba tsenelela. Ba-dira-molato ba ne ba tshwarwa mme dikgato tsa katlholo di ne tsa tsewa kgatlhanong le bone.

Ditiragalo tseno tse di tshosang di ne tsa tsosa dipotso tse dintsi. Kimbilikiti ke tumelo ya mofuta mang? Ke ditumelo le ditlwaelo tse di ntseng jang tse di ka tlhotlheletsang pogiso ya mofuta ono? Mme ke eng fa e le Basupi ba ga Jehofa fela ba ba tlhoilweng thata jaana eseng bodumedi jo bongwe?

[Setshwantsho mo go tsebe 3]

Motsana wa Pangi

[Setshwantsho mo go tsebe 4]

Tsela e e yang lefelong la polaelo