యౌవనులారా—‘మంచి పనులంటే ఉత్సాహం చూపించండి’

అపొస్తలుడైన పౌలు తీతుకు రాసిన ఉత్తరంలో, “అన్ని విషయాల్లో మంచి పనులకు ఆదర్శంగా” ఉండమని తీతును, ఇతర యౌవన సహోదరుల్ని ప్రోత్సహించాడు. (తీతు 2:6, 7) యెహోవా ప్రజలు ‘మంచి పనులంటే ఉత్సాహం చూపించేలా’ యేసు వాళ్లను శుద్ధి చేశాడని కూడా పౌలు అదే అధ్యాయంలో చెప్పాడు. (తీతు 2:14) అలాంటి మంచి పనుల్లో ఒకటి, దేవుని రాజ్యం గురించి ప్రకటించడం, బోధించడం. మీరు యౌవనులైతే, మీకు ఇప్పుడున్న బలాన్ని ఉపయోగించి సహాయ పయినీరుగా లేదా క్రమ పయినీరుగా సేవ చేయగలరా?—సామె 20:29.

మీరు పయినీరుగా సేవ చేయాలనుకుంటే, అందుకు సహాయపడే మంచి ప్రణాళిక వేసుకోండి. (లూకా 14:28-30) అంటే, మీరు పూర్తికాల పరిచర్య చేసేటప్పుడు మీ ఖర్చుల విషయంలో ఏం చేస్తారు? అవసరమైన గంటలను మీరు ఎలా పూర్తి చేస్తారు? మీ పరిస్థితి గురించి యెహోవాకు ప్రార్థించండి. (కీర్త 37:5) మీ తల్లిదండ్రులతో, చక్కగా పయినీరు సేవ చేస్తున్న ఇతరులతో మీరు వేసుకున్న ప్రణాళిక గురించి మాట్లాడండి. తర్వాత, మీ లక్ష్యాన్ని సాధించడానికి అవసరమైన పనులు చేయండి. యెహోవా సేవలో మీరు ఉత్సాహంగా చేసే ప్రయత్నాలను ఆయన ఖచ్చితంగా ఆశీర్వదిస్తాడు!

యౌవనులు యెహోవాను ఘనపరుస్తున్నారు వీడియో చూసి, ఈ ప్రశ్నలకు జవాబులు చెప్పండి:

• కొంతమంది పయినీరు సేవ చేయడానికి ఎలాంటి సవాళ్లు ఎదుర్కొన్నారు? వాటిని ఎలా చక్కగా పరిష్కరించుకున్నారు?

• పిల్లలు క్రమ పయినీర్లు అవ్వడానికి తల్లిదండ్రులు ఎలా సహాయం చేయవచ్చు?

• ప్రీచింగ్‌ కోసం ఒక పట్టిక లేదా షెడ్యూల్‌ ఉండడం ఎందుకు ముఖ్యం?

• పయినీర్లను సంఘ సభ్యులు ఎలా ప్రోత్సహించి సహాయం చేయవచ్చు?

• పయినీర్లుగా సేవ చేసేవాళ్లకు ఎలాంటి ఆశీర్వాదాలు వస్తాయి?