To Ɛ Sa Fɛlɛ Awie Mɔ

1. Mekɛ boni a yɛbabɔ ɔ bo yɛava nyianu ɛsalɛdolɛ ngɛlata ne yɛamaa a?

¹ Saa ɛbɔ kakɛ na eza ɛsɛkye mekɛ kɛ ɛto aleɛ wɔamaa wɔ abusua ne anzɛɛ ɛ gɔnwo mɔ a, ɛwie a ɛbava anyelielɛ wɔado ɛsalɛ wɔavɛlɛ bɛ. Zɔhane ala a bɛvɛ sunsum nu aleɛ mɔɔ yɛ sa baha ye wɔ nyianu mɔɔ ɛlɛba abo la anwo a. Gyihova ɛmaa yɛ adenle kɛ saa ɔka dapɛne nsa na yɛahɔ nyianu ne a, yɛdo ɛsalɛ yɛvɛlɛ awie mɔ. Nzɔne a baboa yɛ yeamaa yɛava anyelielɛ yɛado ɛsalɛ yɛavɛlɛ awie mɔ a?

2. Nzɔne a baboa yɛ yeamaa yɛava yɛ nwo yɛawula ɛsalɛdolɛ ne anu kpalɛ a?

² Saa yɛdwenle kɛzi adehilelɛ mɔɔ Gyihova fa maa yɛ wɔ nyianu ne mɔ abo la boa yɛ kpalɛ la anwo a, ɔbaha yɛ yeamaa yɛava yɛ nwo yɛawula ɛsalɛdolɛ ne anu kpalɛ. (Aye. 65:13, 14) Eza ɔwɔ kɛ yɛkakye kɛ ɛsalɛ mɔɔ yɛto yɛfɛlɛ awie mɔ ɛvolɛ biala la so ma. (Nea ɛlɛka “Ɔso Ma.”) Menli mɔɔ yɛbado ɛsalɛ yɛavɛlɛ bɛ la bie mɔ bahɔ nyianu ne yɛɛ bie mɔ noko ɛnrɛhɔ. Noko ɔnva nwo menli dodo mɔɔ bɛ nye balie nwolɛ la, mɔdenle mɔɔ yɛbabɔ ye wɔ ɛsalɛdolɛ ne anu la ye Gyihova ayɛlɛ na ɔda ye nyeleyɛlɛ ne ali.—Edw. 145:3, 7; Yek. 22:17.

3. Kɛzi yɛbava ɛsalɛdolɛ ngɛlata ne mɔ yɛamaa ɛ?

³ Ɔwɔ kɛ mgbanyima eku biala nea kɛzi bɛbahyɛ ɛsalɛdolɛ ngɛlata ne la. Ɔwɔ kɛ bɛsi nwolɛ kpɔkɛ kɛ saa nolobɔlɛma ando awie mɔ wɔ sua nu a bɛva bie bɛgyakyi bɛ anzɛɛ bɛbava bie bɛamaa wɔ bagua nu daselɛlilɛ ne anu a. Saa ɔbayɛ boɛ a, bɛlɛfa ngɛlata ne mɔ bɛamaa wɔ dapɛne awieleɛ a bɛva magazine ne mɔ bɛboka nwo bɛmaa. Wɔ ɛsalɛdolɛ ne anzi, nea kɛzi yɛ nye balie kɛ yɛvale yɛ nwo yɛwulale nu na menli dɔɔnwo rale sunsum nu ɛkponle ne mɔɔ Gyihova dole yɛ la abo a!

Ɔso Ma

Mekɛ mɔɔ ɛnee adiema raalɛ bie ɛlɛkyehyɛ ɛsalɛdolɛ ngɛlata ne bie wɔ ɛvolɛ dɔɔnwo mɔɔ ɛpɛ nu anu la, ɛnee ɔngola ɔnnwu ye saa nvasoɛ bara mɔɔ ɔlɛyɛ la azo a. Ɔbizale ɔ nwo kɛ, ‘Asoo menli balie na bɛahɔ nyianu ne?’ Wɔ Folɛ nwonlomɔ mɔɔ ɔhɔle nyianu ne abo la, ɔnwunle kpavolɛ bie mɔɔ wɔ India ɛzonlenlɛ bie anu la kɛ ɔde ɔbikye ye, yemɔti ɔlale ɔ nwo ali ɔhilele ye. Ɔmaanle adiema raalɛ ne nwunle kɛ ɔ sa hanle kɛlata ne bie la ati a yera nyianu ne a. Ɔbizale kpuya dɔɔnwo noko adiema raalɛ ne buale ye. Ɔhanle kɛzi ɔ nye ɛlie nyianu ne anwo nee kɛzi menli mɔɔ bɛra nyianu ne ɛziezie bɛ nwo nee bɛ nyɛleɛ nwo edwɛkɛ. Nzinlii wɔ kenle ko zɔhane ala, adiema raalɛ ne nee agyalɛma bie mɔɔ de bikye ye la bɔle adawu. Bɛdabɛ noko bɛ sa hanle ɛsalɛdolɛ ngɛlata ne bie la ati a bɛrale nyianu ne a. Bɛ nye liele nyianu ne anwo yemɔti bɛyɛle ngyehyɛleɛ kɛ aleɛ kye Molɛ a bɛbazia bɛara. Akee adiema raalɛ ne nwunle kɛzi yɛ ɛvolɛ ɛvolɛ ɛsalɛdolɛ ne sonle bolɛ la.
Wɔ nyianu bie mɔɔ bɛyɛle ye kenlensa ye la abo, agyalɛma bie mɔɔ bɛle dahuu adekpakyelɛma la lale bɛ nwo ali hilele agyalɛma bie mɔɔ bɛyɛ mgbanyinli la. Agyalɛma ne mɔɔ bɛyɛ mgbanyinli la hanle kɛ mekɛ mɔɔ limoa mɔɔ bɛra nyianu ne bie la ɛne. Adekpakyelɛma ne bizale bɛ kɛ, “Nwane a dole ɛsalɛ vɛlɛle bɛ a?” Bɛbuale kɛ, “Kenle ko yɛrale sua nu la, yɛnwunle ɛsalɛdolɛ kɛlata ne wɔ yɛ anlenkɛ ne abo.” Bɛgengale kɛlata ne na bɛhyehyɛle edwɛkɛ bie mɔɔ wɔ ɔ nzi bɔbɔ la. Menli mɔɔ rale nyianu ne la bie mɔ vale bɛ ewiazo aleɛ ne bie maanle bɛ. Bɛ nye liele gyimalilɛ ne anwo kpalɛ yemɔti bɛyɛle ngyehyɛleɛ kɛ aleɛ kye a bɛbazia bɛara. Bɛyɛle siakɔkpɔla nwo ngyehyɛleɛ.