Nolobɔlɛ Mɔɔ So Ma
Ɔka dapɛne nsa na asafo ne mɔ ahɔ bɛ nyianu ne a, bɛbazia bɛado ɛsalɛ bɛavɛlɛ anyelielɛma mɔɔ wɔ bɛ azɛlɛsinli ne anu la bɛamaa bɛahɔ bie. Adwenle kpalɛ bie ati a yɛto ɛsalɛ yɛfɛlɛ menli ɛvolɛ biala a. Mekɛ dɔɔnwo ne ala menli mɔɔ die ɛsalɛdolɛ ne to nu na bɛba nyianu ne la anye die ɛdendɛlɛ mɔɔ bɛdua Ngɛlɛlera ne azo bɛmaa, gyimalilɛ ɛleka ngakyile mɔɔ menli mɔɔ ɛdu bɛ nwo ɛmaa nea zo maa bɛyɛ gyima pɛpɛɛpɛ yɛɛ subane kpalɛ nee koyɛlɛ mɔɔ yɛda ye ali la anwo. (Edw. 110:3; 133:1; Aye. 65:13, 14) Ɛhye amuala anzi, asoo yɛ nolobɔlɛ ne so ma wɔ ɛleka mɔɔ ɔwɔ kɛ anyelielɛma tu adenle tendenle na bɛahɔ nyianu ne bie la?
Bɛwiele 2011 maangyeba nyianu ne la, ɔfese bie asa hanle kɛlata vile raalɛ bie mɔɔ nwunle ɛsalɛdolɛ kɛlata ne bie wɔ ye anlenkɛ ne anu la ɛkɛ. Gyihova Alasevolɛ bɔ ye anlenkɛ ne anu a ɔta ɔkpondɛ ɛleka bie ɔfea. Ɔhɛlɛle kɛ: “Ɛnee melɛ sua kɛnlɛma, kunli mɔɔ boa me, na ɛnee medwenle kɛ melɛ debie biala mɔɔ bamaa me nye alie la. Noko ɔyɛ alɔbɔlɛ kɛ ɛnee me nye ɛnlie, na ɛnee menlɛ bodane biala wɔ ɛbɛlabɔlɛ nu. Ɛhye ati, mempɛle adenle mayɛlɛ 200 mengɔle Folɛ ɛdeɛ ne bie.” Ɔ nye liele nyianu ne anwo somaa yemɔti ɔvɛlɛle ɔ hu wɔ moba zo na ɔhanle ɔhilele ye kɛ ɔbala na yeahɔ Molɛ ɛdeɛ ne bie. Ɔse, “Mendiele ɛdendɛlɛ ne amuala, menwunle Gyihova Alasevolɛ dɔɔnwo na membɔle kpɔkɛ kɛ ɔnle kɛ ɛhye ka ɛkɛ ne ala.” Ɔziale ɔhɔle sua nu la, ɔbɔle ɔ bo ɔzukoale debie na siane nna anzi ɔrayɛle nolobɔlɛnli mɔɔ bɛtɛsɔnenle ye la. Ɔka kɛ, “Ɔyɛ me fɛ somaa kɛ menwunle zɔhane ɛsalɛdolɛ kɛlata ne wɔ me anlenkɛ ne anu la ɔluakɛ kɛkala me ɛbɛlabɔlɛ gyi bodane zo amgba!”
Menli mɔɔ balie ɛsalɛdolɛ kɛlata ne la bie mɔ bahɔ bie. Yemɔti, bɔ mɔdenle fa ɛ nwo wula nolobɔlɛ ɛhye mɔɔ hyia la anu. Fa ɛsalɛdolɛ ngɛlata mɔɔ baha la kɔ ɛleka mɔɔ bɛbayɛ nyianu ne la na fa to ɛsalɛ fɛlɛ menli.
[Ɛlɛka wɔ mukelɛ 5]
Kɛzi Yɛbava Ɛsalɛdolɛ Kɛlata Ne Yɛamaa Ɛ?
Ɔwɔ kɛ yɛka edwɛkɛ sikalɛ, amaa yɛawie yɛ azɛlɛsinli ne anu gyima yɛ. Yɛbahola yɛaha kɛ: “Ahye o. Yɛlɛfa ɛsalɛdolɛ kɛlata ɛhye yɛamaa wɔ ewiade amuala. Wɔ ɛdeɛ ɛne. Edwɛkɛ dɔɔnwo wɔ ɛsalɛdolɛ kɛlata ne azo.” Maa ɔyɛ anyelielɛ. Saa yɛlɛfa yɛamaa wɔ dapɛne awieleɛ na ɔkɛyɛ boɛ a, yɛbahola noko yɛava magazine ne mɔ yɛamaa.