Nyianu Ngakyelɛ
Gyimalilɛ Mekɛ: Kenle nsa ne amuala, bɛbabɔ gyimalilɛ ne abo nwonlomɔ 9:20. Zɔhane mekɛ ne, ɔwɔ kɛ yɛ kɔsɔɔti yɛtɛnla aze, amaa bɛahola bɛabɔ gyimalilɛ ne abo wɔ enililɛ nu. Wɔ Yalɛ nee Folɛ, yɛbakpɔne nɔsolɛ 5:00 na Molɛ noko yɛakpɔne nɔsolɛ 4:00.
‘Bɛva Edwɛndolɛ Bɛye Gyihova Ayɛlɛ’: Nyamenle tete azonvolɛ vale edwɛndolɛ yele Gyihova ayɛlɛ, na ɛnɛ noko, edwɛne tɛde nɔhalɛ ɛzonlenlɛ foa titili. (Edw. 28:7) Bɛfa mgbɛnu edwɛne bɛbɔ yɛ maanzinli nyianu gyimalilɛ foa biala abo. Ɛhye ɛnle edwɛne bie mɔɔ bɛlɛbɔ ala, emomu bɛziezie bɛmaa yɛ amaa yɛazukoa Gyihova anwo debie na yɛazonle ye. Yemɔti saa ebianutɛnlavolɛ ne ka kile yɛ ka bɛlɛba bɛarabɔ mgbɛnu edwɛne ne abo a, ɔnle kɛ yɛbɔ adawu, emomu ɔwɔ kɛ yɛtɛnla aze na yɛtie edwɛne ne. Saa yɛyɛ ye zɔ a, ɔkile kɛ yɛ nye sɔ mediema mɔɔ zieziele edwɛne ne la mɔdenlebɔlɛ. Mediema mrenyia nee mraalɛ ɛhye mɔ fa bɛ kodoku nu ezukoa tu adenle fane nwiɔ wɔ ɛvolɛ ne anu kɔ Patterson, New York amaa bɛahyehyɛ edwɛne mɔɔ yɛ fɛ la bɛamaa yɛadie. Yɛtie mgbɛnu edwɛne ne yɛwie a, akee ɔwɔ kɛ awie biala fa ɔ nwo wula nu ɔmaa yɛto yɛ Belemgbunlililɛ edwɛne ne bie yɛye Gyihova ayɛlɛ.
Kale Agyinlaleɛ: Kyesɛ awie ɛnde kpɔkɛ anzɛɛ arɛlevilɛ nu edwɛkɛ bie si, tɛ ye zɔhane a dahuu ɔle kpalɛ kɛ yɛbadɛnla ɛleka mɔɔ yɛbahola yɛadie gyimalilɛ ne la tɛla kɛ yɛbadɛnla kale nu mɔɔ bamaa debie ahwehwe yɛ adwenle anzɛɛ yɛbahola yɛala la. Yɛtɛnla menli ne anu yɛtie edwɛkɛ ne a ɔle adenle mɔɔ yɛdua zo yɛkile anyezɔlɛ yɛmaa sunsum nu ngyehyɛleɛ kɛnlɛma ne mɔɔ Gyihova ɛyɛ ɛmaa yɛ la. Kɛmɔ kale agyinlaleɛ ne ɛnle kpole la ati, ɔbayɛ kpalɛ kɛ menli dɔɔnwo babɔ nu ava kale ko.
Ebia Mɔɔ Bɛkpondɛ Bɛsie Awie: Ɛbahola wɔakpondɛ mbia wɔamaa menli mɔɔ ɛ nee bɛ vi sua nu anzɛɛ vole kale ko anzɛɛ wɔ Baebolo sukoavoma mɔɔ bɛle fofolɛ la ala. Yɛsɛlɛ bɛ, saa bɛnva mbia ne bɛnzie awie mɔ a, bɛmmafa ninyɛne bɛgua zolɛ. Bɛyɛ ye zɔ a ɔbamaa awie mɔ anwu kɛ bɛkola bɛtɛnla mbia zɔhane mɔ azo. Bɛgyakyi mbia titili bie bɛmaa menli mɔɔ bɛyɛ mgbanyinli anzɛɛ bɛnde kpɔkɛ la. Kɛmɔ mbia ɛhye anzo la ati, sonla ko anzɛɛ menli nwiɔ mɔɔ bɛlɛboa ahenle mɔɔ ɛyɛ kpanyinli anzɛɛ ɛnde kpɔkɛ la ala a bahola adɛnla ɔ nwo ɛkɛ a.
Tɛladeɛ Mɔɔ Fɛta: Ɔwɔ kɛ yɛwula tɛladeɛ mɔɔ fɛta la wɔ nyianu mekɛ ne anu, na ɔnle kɛ ɔyɛ kɛ ewiade ne anu ɛdeɛ mɔɔ ɛbu zo la. (1 Tem. 2:9) Saa yɛkpɔne foa bie na yɛlɛkɔ ɛleka mɔɔ yɛda la anzɛɛ yɛlɛfi ɛkɛ a, yɛngulo kɛ yɛyɛ yɛ nwo basabasa. Yemɔ bamaa yeayɛ yɛ fɛ kɛ yɛbabɔ yɛ nyianu baagye ne yɛɛ ɔnrɛyɛ yɛ nyiane kɛ yɛbali daselɛ wɔ mekɛ mɔɔ nwolɛ adenle kɛra la. Anwoziezielɛ nee subane kɛnlɛma mɔɔ yɛbava yɛahɔ nyianu ne mɔ la bamaa ahonlekpalɛma adie Baebolo ne anu edwɛkɛ ne mɔɔ maa ngoane la na yeamaa Gyihova anye alie.—Zɛf. 3:17.
Da Subane Kpalɛ Ali Wɔ Ɛlɛtɔlɔneke Ninyɛne Nwo: Saa yɛfa yɛ fonu anzɛɛ ɛlɛtɔlɔneke debie gyɛne biala yɛto ɛleka mɔɔ ɔnrɛzu ɔnrɛgyegye awie mɔ la a, ɛnee yɛlɛda subane kpalɛ ali. Saa ɛlɛfa kamela anzɛɛ ɛlɛtɔlɔneke debie gyɛne biala wɔali gyima a, ɔwɔ kɛ ɛdwenle awie mɔ anwo amaa wɔangyegye bɛ anzɛɛ wɔanzi bɛ nye. Eza ɔnle kɛ yɛdua ɛlɛtɔlɔneke debie biala azo yɛfa edwɛkɛ yɛnwa awie wɔ mekɛ mɔɔ gyimalilɛ bie ɛlɛkɔ zo la.
Ewiazo Aleɛ: Yɛsɛlɛ bɛ bɛva ewiazo aleɛ bɛrɛla na bɛanvi nyianu ɛleka ne kɛ bɛkadɔ aleɛ wɔ ewiazo ɛnwomenlelielɛ mekɛ ne anu. Bɛbahola bɛava debie ekyi mɔɔ bɛfa aleɛ bɛgua nu a ɔndwe la bɛazie ebia ne abo. Bɛmmaa awie adenle kɛ ɔva debie kpole mɔɔ bɛfa menli dɔɔnwo aleɛ bɛgua nu nee debie mɔɔ kola bɔ la ɔrɛla nyianu ne abo.
Ndoboa: Yɛbahola yɛaye ndoboa wɔ yɛ nyianu ne abo yɛava yɛaboa ewiade amuala gyima ne yɛava yɛahile kɛzi yɛ nye sɔ nyianu ngyehyɛleɛ ne la. Saa ɛbalua kyɛɛke zo a wɔaye ndoboa ne a, tua maa “Watch Tower.”
Ayileyɛlɛ: Yɛsɛlɛ wɔ saa ɛlɛ ayile bie mɔɔ ɛfa a, ɛnee nea kɛ ɛbava dɔɔnwo wɔara, ɔluakɛ ɛnrɛnyia bie wɔ nyianu ne abo.
Banebɔlɛ Nwo Boɛnleanlɛ: Yɛsɛlɛ wɔ bɔ mɔdenle nea kɛ ɛbabɔ ɛ nwo bane wɔ ninyɛne mɔɔ bamaa wɔahola wɔatele wɔadɔ aze la anwo. Ɛvolɛ biala mgbɔlaboa mɔɔ menli wula la maa bɛboda, titili mɔɔ abo wale la. Ɔle kpalɛ kɛ ɛkɛwula mgbɔlaboa mɔɔ ɛlɛfo debie zo a ɔnrɛmaa ɛnrɛdɔ aze la.
Esiane Nee Edwɛkɛ Mɔɔ Hyia Ndɛndɛ: Saa awie hyia ayileyɛlɛ ndɛndɛ wɔ nyianu ne abo a, yɛsɛlɛ kɛ bɛnwu menli mɔɔ die nyɛvolɛ la anu ko mɔɔ bikye bɛ la na ɔbamaa Ayilelielɛ Ɛleka ne anzo ade ye ndɛndɛ amaa yɛ menli mɔɔ bɔ mɔdenle mɔɔ bɛwɔ ɛkɛ la ahola anlea kɛzi ye tɛnlabelɛ ne de la na bɛava nwolɛ moalɛ mɔɔ fɛta la bɛamaa ye.
Bɔkɔbɔkɔyɛlɛ: Ɔwɔ kɛ menli mɔɔ bahɔ nyianu ne la kɔsɔɔti siezie ɛleka mɔɔ bɛkɛli debie la. Kɛmɔ bɛfa ninyɛne mɔɔ bɛgua ewula nu bɛsiezie nyianu biala abo la ati, bɛnlea kɛ bɛkɛva ngɛlata, aleɛ, nzule wolɔba nee ninyɛne gyɛne bɛkɛgua nu. Saa yɛyɛ ɛhye a ɔkile kɛ yɛle menli mɔɔ yɛyɛ yɛ nwo bɔkɔbɔkɔ a.
Tiefi: Yɛsɛlɛ kɛ nyianu ne ɛlɛkɔ zo a mmamaa ɛ mra adenle ɛmaa bɛduolua nu mgbane mgbane bɛkɔ tiefi ne azo. Saa ɔwɔ kɛ ngakula kɔ tiefi ne azo a, bɔ mɔdenle nea kɛ bɛ nee kpanyinli anzɛɛ bɛ diema kpanyinli bahɔ.
Buluku Fofolɛ Mɔɔ Bɛkɛye: Nyamenle Edwɛkɛ ne tu yɛ folɛ kɛ ‘yɛva ɛhulolɛ yɛyɛ debie biala mɔɔ yɛyɛ la.’ (1 Kɔl. 16:14) Saa bɛye buluku bie wɔ nyianu ne abo a, ɛlɔlɛ nee awie mɔ mɔɔ yɛdwenle bɛ nwo la ɛnrɛmaa yɛnrɛnriandi yɛnrɛzuhuzuhu awie mɔ kɛ yɛdimoa yɛalie buluku ne mɔɔ bɛye la bie. Saa yɛsi abotane zɛhae a, ɔkile kɛ yɛnyi sunsum nu, yɛɛ ɔda mediema ɛlɔlɛ mɔɔ yɛlɛ yɛmaa awie ko biala la ali.—Dwɔn 13:35.
Please Follow Up Kɛlata: Saa bɛdi awie daselɛ wɔ nyianu mekɛ ne anu na ɔ nye die nwolɛ a, bɛhyehyɛ Please Follow Up (S-43) kɛlata ne bie. Bɛbahola bɛava kɛlata ne bɛahɔ Bulukulielɛ Ɛleka ne anzɛɛ bɛava bɛamaa bɛ asafo ne anu kɛlɛhɛlɛvolɛ ne wɔ mekɛ mɔɔ bɛkɛzia bɛkɛhɔ sua nu la.
Aleɛlilɛleka: Da subane kpalɛ ali wɔ aleɛlilɛleka fa wula Gyihova anyunlunyia. Siezie ɛ nwo kɛ ɛle Keleseɛnenli la. Saa ɛkulo kɛ ɛkyɛ awie debie a yɛ ye zɔ.
Dabelɛ:
Saa ɛwɔ sua mɔɔ ɛbadua nwolɛ kakɛ la anu a, ɛ nee menli dodo mɔɔ bo zolɛ la mmada nu.
Saa ɛwɔ awie mɔ sua nu a, yɛ ɛ nwo bɔkɔbɔkɔ, yɛ wɔ ninyɛne pɛpɛɛpɛ na kile debie biala mɔɔ bɛbava bɛamaa wɔ la anwo anyezɔlɛ.
Ɔnle kɛ mediema mrenyia nee mraalɛ da sua ko anu kyesɛ bɛle abusua ko.
Mmato aleɛ wɔ sua mɔɔ bɛndo aleɛ wɔ nu la anu.
Amaa wɔali ɛ nwo eni la, ɔnle kɛ ɛbia alie nwo. Saa ɔkɛyɛ boɛ a, ɔwɔ kɛ bɛfa ɛkpa anzɛɛ ɛdanlɛ bɛyɛ abialeɛ.
Kɛmɔ yɛle Keleseɛnema la ati, yɛngulo kɛ yɛfa ngyehyɛleɛ biala mɔɔ bɛyɛ bɛmaa nyɛvolɛ la yɛdi gyima wɔ adenle ɛtane zo.
Da sunsum ne ma ne ali wɔ kɛzi ɛ nee menli mɔɔ yɛ gyima wɔ hotɛle anzɛɛ mbusua mɔɔ ɛ nee bɛ de bayɛ ninyɛne la anu.
Ɔwɔ kɛ awovolɛ maa bɛ nye kɔ bɛ mra nwo zo mekɛ biala wɔ hotɛle ɛkɛ anzɛɛ ɛleka mɔɔ bɛnyianle dabelɛ la.
Saa edwɛkɛ ba wɔ dabelɛ anzɛɛ hotɛle sua ne anwo a, nea kɛ ɛbabɔ Rooming Department ne amaneɛ wɔ nyianu ne abo.
Tunwomaa Gyima: Saa awie kulo kɛ ɔtu ɔ nwo ɔmaa a, ɔwɔ kɛ ɔkɔ Tunwomaa Gyima Ɛleka ne mɔɔ wɔ nyianu ne abo la. Ngakula mɔɔ bɛtɛdwule ɛvolɛ 16 la noko bahola ayɛ gyima kɛnlɛma wɔ mekɛ mɔɔ bɛ awovolɛ anzɛɛ awie mɔɔ nea bɛ anzɛɛ kpanyinli bie mɔɔ bɛkpa ye ɛlɛnea bɛ nwo zo la. Ɔwɔ kɛ menli mɔɔ nea gyima ngakyile ne mɔ azo la dua maangyebakyi ne tunwomaa ngyehyɛleɛ ne azo kpondɛ menli mɔɔ baboa bɛ la kolaa na nyianu ne abɔ ɔ bo.