Ngakyelɛlilɛ Ɛsalɛdolɛ Kɛlata Mɔɔ Yɛbava Yɛamaa La Babɔ Ɔ Bo April 2
1. Mekɛ boni a yɛbava Ngakyelɛlilɛ ɛsalɛdolɛ kɛlata ne yɛamaa wɔ ɛvolɛ ɛhye anu a, na nvasoɛ boni a wɔ ɛvolɛ biala nolobɔlɛ ɛhye azo a?
1 Ɔvi April 2 kɔdwu April 17, yɛbava gyimalilɛ mɔɔ sonle bolɛ kpalɛ wɔ ɛvolɛ ne anu—Kelaese ewule ne anwo Ngakyelɛlilɛ ne anwo ngɛlata yɛamaa. Mekɛ mɔɔ ɛze ɛhɔ la anu, anyelielɛma dɔɔnwo liele nolobɔlɛ ɛhye dole nu. Kɛ neazo la, wɔ Ngakyelɛlilɛ kenle ne, raalɛ kpanyinli bie vɛlɛle yɛ ɔfese ɛkɛ na ɔhanle kɛ: “Kɛkala a mera sua nu a, na ɛnee ɛsalɛdolɛ kɛlata bie vea me anlenkɛ ne abo. Mekulo kɛ mekɔ bie, na menze mekɛ mɔɔ bɛbayɛ ye a.” Adiema nrenya ne hilele ye wɔ kɛlata ne azo ɛleka mɔɔ ɔbanwu mekɛ ne la. Raalɛ ne dwulale ye edwɛkɛ ne na ɔhanle kɛ, “Mebahɔ bɛ gyimalilɛ ne abo nɔsolɛ!”
2. Duzu a yɛbahola yɛaha wɔ mekɛ mɔɔ yɛlɛfa ɛsalɛdolɛ kɛlata ne yɛamaa la ɛ?
2 Kɛzi Yɛbayɛ Ye La: Kɛmɔ mekɛ mɔɔ yɛfa yɛayɛ azɛlɛsinli ne anu gyima anzo la ati, ɔle kpalɛ kɛ yɛbamaa yɛ edwɛkɛ ne ayɛ nzinrenzinra. Yɛbahola yɛaha kɛ: “Ahye o. Yɛkulo kɛ yɛfa Ngakyelɛlilɛ mɔɔ bɛbayɛ ye ewiade amuala wɔ Molɛ, April 17 la anwo ɛsalɛdolɛ kɛlata yɛmaa wɔ abusua ne. [Fa ɛsalɛdolɛ kɛlata ne maa suamenle ne.] Kenle ne mɔɔ wɔ zolɛ la a bɛbayɛ Gyisɛse ewule ne anwo Ngakyelɛlilɛ ne a. Bɛbamaa Baebolo nu ɛdendɛlɛ mɔɔ bɛnlie nwolɛ ɛhwee la bɛava bɛahilehile kɛzi Kelaese ɛkpɔnedeɛ ne bahola aboa yɛ la anu. Ɛsalɛdolɛ kɛlata ɛhye bamaa wɔanwu mekɛ nee ɛleka mɔɔ yɛbayɛ ye la.”
3. Kɛ ɔkɛyɛ na yɛado ɛsalɛ yɛavɛlɛ menli dodo biala mɔɔ yɛbahola la ɛ?
3 Saa asafo ne lɛ azɛlɛsinli kpole a, bie a mgbanyima ne mɔ bamaa bɛagyakyi ɛsalɛdolɛ kɛlata ne bie wɔ ɛleka mɔɔ awie gyɛne ɛnrɛnwu ye la bɛamaa menli mɔɔ bɛnle sua nu la. Bɔ mɔdenle kɛ ɛbado ɛsalɛ wɔavɛlɛ menli mɔɔ ɛsia ɛkɔkpɔla bɛ, wɔ mbusua, ɛ gɔnwo mɔ gyimayɛvoma nee sukuluma, yɛɛ menli fofolɛ mɔɔ ɛze bɛ la. Saa ɔbayɛ boɛ a, fa magazine maa wɔ mekɛ mɔɔ ɛlɛfa ngɛlata ne bie wɔamaa wɔ dapɛne awieleɛ la. Ɛbahola wɔayɛ adekpakyelɛ boavolɛ wɔ April anu na wɔayɛ dɔɔnwo wɔ gyima ɛhye mɔɔ yɛ anyelielɛ la anu ɔ?
4. Duzu ati a yɛkulo kɛ anyelielɛma ba Ngakyelɛlilɛ ne bie ɛ?
4 Nea kɛzi ɛhye bayɛ daselɛlilɛ kpole amaa anyelielɛma mɔɔ bara bie la ɛ! Bɛbade Gyihova ɛlɔlɛ kpole ne mɔɔ manle ɔvale ɛkpɔnedeɛ ne ɔmanle la anwo edwɛkɛ. (Dwɔn 3:16) Bɛbade kɛzi Nyamenle Belemgbunlililɛ ne baboa alesama la anwo edwɛkɛ. (Aye. 65:21-23) Bɛbaha bɛahile bɛ noko kɛ bɛnwu mediema mɔɔ die nyɛvolɛ la na bɛha bɛhile bɛ kɛ bɛkulo kɛ bɛsukoa Baebolo ne amaa bɛanwu ninyɛne dɔɔnwo. Yɛ asɔneyɛlɛ a le kɛ menli mɔɔ lɛ ahonle kpalɛ la badie edwɛkɛ ɛhye na bara Ngakyelɛlilɛ ne bie!