Indonain Kan Zavaia Min Nghawng Dân
“Khawvêl Indopui Pahnihna hnua indona a thlen nasat berna hunah kan awm a, mi tlûklehdingâwn 2—mi pali zêla pakhat—chu indona thlenna hmunahte an awm a ni.”
United Nations Deputy Secretary-General Amina J. Mohammed, January 26, 2023.
Indona chu tûna hmun râlmuang takahte pawh thleng thei reng a ni a. Tûn hma zawng aia khawvêl a inpawh lehzual tawh avângin, indona thlenna hmuna awm lote pawhin an lo tuar ve thei a. Indona tâwp hnuah pawh a sawhkhâwk chu hun rei tak chhûng an tuar thei a ni. Entîrna ṭhenkhat lo ngaihtuah ta ila:
Ṭâm. World Food Programme chuan, “indona chu ṭâm tlâktîrtu ber a la ni reng a, khawvêla ṭâm tuar zaa sawmsarih chu indona leh tharum thawhna thlenna hmunahte an awm a ni,” tiin a sawi.
Taksa leh rilru lama harsatna. Indona a thlen mai hlauhna chuan mite chu rilru hah leh thlaphâng takin a awmtîr thei a. Indona thlenna hmuna awmte chuan hliam an tawrh theih reng bâkah, rilru lamah pawh harsatna an nei thei a. Chu bâkah, damdawi lama inenkawlna ṭha an dawng thei lo fo bawk a ni.
Chênna in chhuahsanna. United Nations High Commissioner for Refugees sawi dânin, kum 2023, September thlaah khân khawvêl puma mahni chênna in chhuahsan zât chu mi maktaduai 114 aia tam an ni a. Chutiang a nih chhan bul ber chu indona a ni.
Sum leh pai lama harsatna. Indona avângin mite chuan thil man to chak lutukna ang chi sum leh pai lama harsatnate chu an tuar ṭhîn a. Sawrkârin damdawia inenkawlna leh zirna lama a hman tûr sum tam tak chu sipaite chhawmdâwl nâna a hman zâwk hian an tawrh phah ṭhîn bawk a. Chu bâkah, indo zawha intungding leh tûr chuan sum leh pai tam tak a ngai bawk a ni.
Ram leilung tih chhiatna. Mite chuan an chênna leilung tih chhiatsak an nih hian nasa takin an tawrh phah ṭhîn a. Tui, boruak leh, lei thianghlim lo chuan hun rei tak chhûng hrisêlna lamah harsatna a awmtîr thei a, indona tâwp hnuah pawh rah puah bawm rah palh chu thil hlauhawm tak a la ni reng fo.
Indona chuan chhiatna leh chânna nasa tak a thlen tih chu rinhlelh rual a ni lo.