Indona Tâwp Dân Tûr

MIHRING SAWRKARTE CHU PATHIANIN A TI BORAL ANG

Pathianin mihring sawrkârna chu Bible-in Armageddon tia a koh indona hmangin a ti tâwp dâwn a.a (Thu Puan 16:16) Chutih hunah chuan, “khawvêl zawng zawnga lalte” chu “Pathian Engkimtitheia ni ropuia indonaa” tel tûrin an kal khâwm ang. (Thu Puan 16:14) Armageddon chu indona zawng zawng ti tâwptu tûr Pathian indona a ni.

Pathianin mihring sawrkârte chu vân aṭanga rorêla tih chhiat ni ngai lo tûr a Lalram, a nih loh leh a sawrkârnain a rawn thlâk ang. (Daniela 2:44) A Fapa Isua Krista chu Lal ni tûrin a thlang tawh a. (Isaia 9:6, 7; Matthaia 28:18) Chu sawrkâr chu Isua’n a hnungzuitute hnêna dîl tûra a hrilh Lalramb kha a ni. (Matthaia 6:9, 10) Mihring zawng zawng chu khawvêl pumhuap sawrkârna pakhat, Isua rorêlna hnuaiah an inpumkhat tawh ang.

Mihring rorêltute ang lo takin, Isua chuan a thuneihna chu ama hamṭhatna atân a hmang dâwn lo va. Ani chuan duhsak bîk a neih loh avângin, tu mahin an hnam, an pianna ram, a nih loh leh an ṭobul avânga en kân nih an hlauh a ngai lo vang. (Isaia 11:3, 4) Mite chuan an dikna an sual chhuah a ngai lo bawk ang. Engvângin nge? Isua’n mi mal tinte ṭhatna tûr a ngaihtuah dâwn vâng a ni. “Pachhiain a auhvin ani chuan a chhanhim ang a, mi rethei, ṭanpuitu nei lo pawh chu a chhanhim ang. . . . An nunna chu hnehchhiahna leh nunrâwnna lak ata a tlan ang.”—Sâm 72:12-14.

Pathian Ram chuan thihna thlentu râlthuamte chu lei ata a ti bo vek dâwn a. (Mika 4:3) Indo bânsan duh lotute leh mi dangte remna ti chhetu mi suaksualte chu a ti boral bawk ang. (Sâm 37:9, 10) Mipa, hmeichhia leh, naupang zawng zawngte chuan an awmna hmun apiangah him nia inhriatna an nei tawh dâwn a ni.—Ezekiela 34:28.

Mite chuan Pathian sawrkârna hnuaiah an duhthusâm ang nun chu an chên tawh ang a. Indona awmtîrtu retheihna, ṭâm leh, chênna tûr neih lohna ang chi buainate chu a awm tawh lo vang. Mi tinte chuan ei leh in hrisêl hnianghnâr tak leh chênna tûr hmun nuam takte an nei tawh ang.—Sâm 72:16; Isaia 65:21-23.

Pathian Ramah chuan indona sawhkhâwk râpthlâk tak takte chu a awm tawh lo vang a. Chûng zîngah chuan, indona nghawng ṭha lo takte avânga mite tawrh ṭhin tisa lama hliamte bâkah, rilru lama hliamte pawh a tel a ni. Mitthite pawh leia kaihthawh leh an ni ang a. (Isaia 25:8; 26:19; 35:5, 6) Chhûngkuate chu an inhmu leh ang. Chu bâkah, indona avânga thiltawn ṭha lo zawng zawngte pawh ‘thil hmasa ral tate’ zîngah a tel dâwn a ni.—Thu Puan 21:4.

PATHIANIN SUAL A TI BO VANG

Pathian Ram chuan mite chu Pathian dik awm chhun, “hmangaihna leh remna” Pathian, Jehovac biaknaah a pumkhattîr ang a. (2 Korinth 13:11) Mite chuan inrem taka awmho dân an zir bawk ang a. (Isaia 2:3, 4; 11:9) An thu zir nunpuitu zawng zawngte chu sual sawhkhâwkte lak ata chhuah zalen an ni tawh ang.—Rom 8:20, 21.

PATHIANIN SETANA LEH A RAMHUAITE A TI BORAL ANG

Pathian Ram chuan indona chawk chhuaktu ber, Setana leh a ramhuaite chu a ti boral dâwn a. (Thu Puan 20:1-3, 10) An thununna ṭha lo a awm tawh dâwn loh avângin, “[remna] nasa tak chu a duah hluah hluah bawk ang.”—Sâm 72:7.

Indona ti tâwp tûra Pathian thutiam chu a thleng famkim ang tih i ring nghet tlat thei a. Ani chuan indona ti tâwp tûrin theihna leh duhna a nei a ni.

• Pathian chuan indona leh tharum thawhna ti tâwp tûrin finna leh thiltihtheihna a nei a. (Joba 9:4) Hlen chhuah theih loh eng mah a nei lo.—Joba 42:2.

• Pathianin mite hrehawm tuar chu hmuh hrehawm a ti a. (Isaia 63:9) “Nunrâwnna ngaina” zawng zawngte chu a haw bawk a ni.—Sâm 11:5.

• Pathian chuan a thutiam a hlen reng ṭhîn a, dâwt a sawi thei lo.—Isaia 55:10, 11; Tita 1:2.